མིག་མདངས་ནི་སྐད་ཆ་ཡིན།

མིག་མདངས་ནི་སྐད་ཆ་ཡིན།

 

                                                                ཁ་བ་ལྷ་མོ། (མཚོ་ནུབ)

 

སྨྲ་བ་ལ་རྨ་ཁ་སོས་བྱེད་ཀྱི་ནུས་པ་མེད་ན

ད་ནི་ཁ་རོག་གེར་འདུག་ཨང

ཉི་ཟླ་སྐར་གསུམ་འཁོར་སའི་ནམ་མཁའ་ཁ་རོག་གེར་འདུག 

རི་རབ་ཁང་ཁྱིམ་འདེགས་པའི་ས་གཞིའང་ཁ་རོག་གེར་འདུག 

 

གནམ་ས་གཡོས་ཤིང་འགྲོ་བའི་རླུང་བུའང་མཐའ་མཇུག་བར་སྣང་ཁམས་ལ་འཐིམ་

   འགྲོ་དུས་སྨྲ་བ་མེད

བྲག་དང་རི་བོ་བསྒུལ་བར་བྱེད་པའི་རྒྱ་མཚོའང་མཐའ་མཇུག་རང་བྱུང་ཁམས་ནས་

   གཉིད་འགྲོ་དུས་སྨྲ་བ་མེད

 

མེ་ཏོག་ཅིག་སྐྱེས་ནས་འཆི་རག་བར་དུ་སྨྲ་བ་མེད་ཀྱང

མཛེས་སྡུག་གི་འདབ་མ་རེ་རེ་སྐད་ཆ་མིན་ནམ

སྐར་ཕྲན་ཞིག་ཤར་ནས་ནུབ་རག་བར་དུ་སྨྲ་བ་མེད་ཀྱང

འོད་ཀྱི་ཟེར་མ་རེ་རེ་སྐད་ཆ་མིན་ནམ

 

སྨྲ་བ་མེད་ཀྱང་ཅི་སྐྱོན

སྨྲ་བ་མང་ནས་ཅི་བྱེད

ཁྱོད་ཀྱི་མིག་མདངས་སྐད་ཆ་ཡིན

 

                                                                2017.11.12