མདང་ནུབ་ཀྱི་ཁ་བ།
རྨེ་རུ་མགོན་པོ་སྐྱིད། (ཀན་ལྷོ)
མདང་ནུབ
སྟོན་མཇུག་གི་ཁ་བ་དལ་གྱིས་བབས་བྱུང
ཁ་བའི་འདབ་མ་དཀར་པོ
ཨ་ཕའི་ཐོང་གཤོལ་ལ་བབས་བྱུང
ཨ་མའི་ཞིང་ཚུགས་སུ་བབས་བྱུང
ཕ་ཡུལ་གྱི་རུ་སྡེ་ཁྲ་མོར་བབས་བྱུང
སྐྱི་བསེར་རླུང་བུས་སྐྱོམ་པའི
ཁ་བའི་རྣམ་ཤེས་ཕྲ་མོ
བྲག་རིའི་རྩེ་དང་རྫ་ཆུའི་ཁུགས
སྤང་རིའི་ཐེམ་དང་ནགས་རིའི་གཞུང
གཡང་ཁྱིམ་ཚང་གི་ར་སྐོར་དང
སྙིང་རྗེ་བའི་བྱི་ལ་དཀར་ལྡང་མའི་སྨ་རའི་ཐོགས་ལའང་བབས་འདུག
མདང་ནུབ་ཀྱི་ཁ་བ་དེ
སེམས་པའི་ཟབ་ས་རུ་བབས་བྱུང
ཐིགས་ཆུ་གཙང་མའི་ཆབ་རྒྱུན་དེ་ཚོ
ཁང་ཀླད་ནས་ཤོ་ཆུ་བརྒྱུད་དེ་ས་ངོས་སུ
ག་ལེར་འཛགས་དུས
ཨ་ཕས་ཐར་ཆེན་གསུངས་པའི་ཆོས་དབྱངས་རེད
ཨ་མས་མ་ཎི་ཟློ་བའི་སྙན་དབྱངས་རེད
ཕུ་བོའི་ངག་འཇམ་ཁ་བརྡའི་ཀློང་གི་འདང་ཞེན་ཟབ་མོ་རེད
ཨ་ཅེའི་དགོ་དགོ་ངག་ལ་འགུགས་པའི་བཞོ་དབྱངས་དྭངས་མོ་རེད
སྙན་འགྱུར་ཁྲི་འབུམ་རྒུམ་པའི་དབྱངས་རྟ་འཇམ་པོ
སྙིང་གི་དཀྱིལ་ལ་བབས སེམས་ཀྱི་གཏིང་དུ་འཐིམ
མདང་ནུབ
བལ་དཀར་ཁ་ཆུ་འཇོ་བའི་གདན་སྟེང་ནས
ཚ་བེར་བེར་གྱི་མེ་ཕོར་རུམ་མཁན་དེ་ང་ཡིན
མེ་ཕོར་སྟེང་གི་ཇ་དེམ་ལ་འོ་སྤྲིའི་མངར་ཁ་སྦྱིན་མཁན་དེ
དྲིན་ཆེན་གྱི་ཕ་ལོ་ཡིན བྱམས་ལྡན་གྱི་མ་ལོ་ཡིན
དྲོད་ཀྱི་མེ་ཁ་དམར་ལྷེམ་ལྷེམ་དུ་འཕྱུར་བས
ཁང་ཁྱིམ་དྲོན་མོའི་གདུང་མའི་གསེང་ནས་ཀྱང
འོ་ཇ་དཀར་པོའི་རླངས་པ་ཐོལ་གྱིས་འཁོར
དཀར་ཡོལ་འབྲུག་རིས་མ་ལས་ལྟེམས་པའི
མངར་ལ་ཞིམ་པའི་འོ་ཇ་ཧུབ་ཀྱིས་འཐུང་དུས
མཆུ་སྒྲོས་ནས་མིད་ཐག ལུས་ཀྱི་རྩ་ལམ་རེ་རེ
བདེ་སྐྱིད་དང་སེམས་འགུལ
སྤྲོ་སྣང་དང་དགའ་བ་འབུམ་གྱིས་བརྟས་སོང
མདང་ནུབ་ཀྱི་ཁ་བ་དེ སེམས་པའི་ཟབ་ས་རུ་བབས་བྱུང
བདེ་སྐྱིད་ཀྱིས་བབས་བྱུང
ལྷག་བསམ་གྱིས་བབས་བྱུང
དྭངས་གཙང་གིས་བབས་བྱུང
༢༠༡༧ལོའི་ཟླ༡༠བའི་ཚེས༡༠ཉིན་རྨེ་རུ་ཉིན་པ་ནས།