ཉག་རོག་གི་སྐོར་བྲོ་ལ་རོལ་ཆའི་མཐུན་སྦྱོར་མེད་ལ་ས་ཕྱོགས་ཀྱི་གཟབ་འཆོར་སྤྲས་པའི་བྲོ་པ་རྣམས་ཕོ་མོ་འགྲིག་གཉིས་སུ་བསྒྲིགས་ནས། སྐོར་བྲོ་འཁྲབ་པའི་སྐབས་ཀྱི་བྲོ་འགོ་ཁྲིད་མཁན་དེ་ལ་བྲོ་དཔོན་ཟེར་ཞིང་། བྲོ་དཔོན་དེ་ནི་བྲོའི་མཁན་པོ་ལྟ་བུ་དང་བྲོའི་སྒྱུ་རྩལ་ལ་ཕྱོགས་ཡོངས་ནས་རྒྱུས་ལོན་ཡག་པོ་ཡོད་དགོས། དཔེར་ན་ངག་སྙན་ལ་གཟུགས་བཟང་བ། བྲོ་འགྲོས་ལེགས་པ་སོགས་ཀྱི་ཁྱད་ཆོས་དགོས་པ་མ་ཟད། མི་གཤིས་བཟང་ལ་ཀུན་དང་མཐུན་པ་ཞིག་དགོས། བྲོ་དཔོན་གྱིས་གཙོ་ཆེ་ས་བྲོ་ར་སྤྱིའི་བཀོད་སྒྲིག་ལ་བསམ་བློ་གཏོང་དགོས་པ་དང་། དེ་ནས་བྲོ་དཔོན་གྱི་རྗེས་སུ་འབྲང་མཁན་དེ་ལ་བྲོ་གཡོག་ཟེར་ཞིང་། བྲོ་གཡོག་ལ་ཚང་དགོས་པའི་ཆ་རྐྱེན་ནི། བྲོ་དཔོན་གྱི་ངག་དང་མཐུན་ཅི་ཐུབ་བྱ་དགོས་པ་མ་ཟད་བྲོ་ཡ་ཚོས་ཁྲིད་པའི་བྲོ་ངག་དང་ཚིག་འགྲོས་བཅས་ལ་རྒྱུས་ལོན་བྱ་དགོས། བྲོའི་མཇུག་མར་ཡོད་པའི་བྲོ་པ་དེ་ལ་བྲོ་རྔ་ཞེས་ཟེར།
དེ་མིན་རྣམས་ལ་བྲོ་པ་ཞེས་ཟེར་བ་མ་གཏོགས་མིང་གཞན་འདོགས་སྲོལ་མེད། སྤྱིར་བཏང་གི་བྲོ་འགྲོས་ཀྱི་ཆ་ནས་དབྱེ་ན་འགྲོ་བྲོ་དང་ཁེར་བྲོ་རྣམ་པ་གཉིས་ཡོད། འགྲོས་བྲོ་ནི་ཉག་བྲོའི་སྤྱི་འགྲོས་དེ་ལ་ཟེར། ཁེར་བྲོ་ནི་དེ་ལྟར་མ་ཡིན་པར་རང་ལ་ཐུན་མོང་མ་ཡིན་པའི་བྲོ་འགྲོས་ཅན་དེ་ལ་ཟེར་ཞིང་། དཔེར་ན། ཨ་ལ་ཐ་ལ་དང་ཨ་རོགས་ཁམས་པ་ལྟ་བུ་ལ་འདོད། བྲོ་ཚིག་ལ་སྤྱིར་དུམ་བུ་གསུམ་རེ་ཡོད་ལ། དཔེར་ན་དགུང་ཨ་སྔོན། མཐོ་བྲག་དཀར། སྡེ་རྒྱ་གྲོང་ལྟ་བུ། བྲོ་ཐོག་མ་དེ་སྐྱེས་པ་ཚོས་ཁྲིད་སྲོལ་ཡོད་ལ། སྐྱེས་པ་ཚོས་བྲོ་ཚིག་བཏང་རྗེས་བུད་མེད་ཚོས་དེ་བསྐྱར་ཟློས་སུ་གཏོང་བ་དང་། དེ་ནས་བུད་མེད་ཚོས་བྲོ་ཁྲིད་དུས་སྐྱེས་པ་ཚོས་བསྐྱར་ཟློས་སུ་གཏོང་། དེ་ལྟར་བརྗེ་རེས་བྱས་ནས་ཉིན་ཞག་མང་པོ་འཆམ་སྲོལ་ཡོད། སྤྱིར་བཏང་བྲོ་ཚིག་དུམ་བུ་གསུམ་ཡོད། དེའང་དུམ་བུ་དང་པོ་འཆམ་དུས་ངག་རྟ་ཉམས་འགྱུར་དལ་བ། དུམ་བུ་གཉིས་པ་འཆམ་དུས་ངག་རྟ་དང་ཉམས་འགྱུར་ཅུང་མགྱོགས་ལ། དུམ་བུ་གསུམ་པ་འཆམ་དུས་ཇེ་མགྱོགས་སུ་གཏོང་། དེ་ནི་ཞི་རྒྱས་དབང་དྲག་གི་རྣམ་པ་ཡིན་ནོ། །སྐོར་བྲོ་འཁྲབ་དུས་ཕོ་མོ་གཉིས་ཀྱི་བྲོ་འགྲོས་ལ་ཁྱད་པར་ཆེར་མེད་མོད། ཉམས་འགྱུར་དང་གོམ་སྟབས། རྐང་པ་མཐོ་དམའ་དང་ཤུགས་ཆེ་ཆུང་། ལག་པ་གཡུག་མི་གཡུག་སོགས་ཀྱི་ཐད་ནས་ཁྱད་པར་ཆེན་པོ་ཡོད། སྤྱིར་བཏང་བུད་མེད་ཀྱི་བྲོ་འགྲོས་དེ་བརྩེ་དུང་ལྡན་པ་དང་ཉམ་ཆུང་ལ་བག་ཕེབས་པའི་ཉམས་དེ་ནི་བྲོ་དེའི་ཐོག་མཐའ་བར་གསུམ་དུ་ཡོད་དགོས། སྐྱེས་པ་རྣམས་ནི་དེ་ལྟར་མ་ཡིན་པར་ཁོག་སྟོད་བསྒྲད་བསྒྲད་དང་། རྐང་པ་སིལ་སིལ། སྐྱེས་ཕོ་རབ་ཀྱི་ཉམས་དགུ་དང་ལྡན་པ། ཁོག་ཡངས་ལ་བརྗིད་ཉམས་དང་ལྡན་པ་ཞིག་ཡིན། རྒྱུ་མཚན་དེའི་ཕྱིར་ན་ཉག་རོང་སྐོར་བྲོའི་ཁྱད་ཆོས་དངོས་ལ་ཞིབ་འཇུག་བྱས་ན། དེ་ནི་ཚ་འུར་གྱི་སྐོར་བྲོ་ཞིག་གཏན་ནས་མིན་པར་ཞི་དུལ་བག་ཕེབས་སམ་སོས་དལ་བག་ཡངས་ཀྱི་སྐོར་བྲོ་ཞིག་ཡིན། དེ་ཡང་གནའ་མི་ཚོའི་བསམ་བློ་དང་བརྩེ་དུང་བརྗེ་རེས་བྱེད་པའི་ལག་ཆ་གཙོ་བོ་ཞིག་ཡིན་པ་མཚོན་ཡོད། ཉག་རོང་སྐོར་བྲོ་ནི་གཙོ་ཆེ་བ་ལུས་ཀྱི་སྟེང་ནས་དལ་གྱིས་འགྱིང་བ་དང་ཉམས་ཀྱི་སྟེང་ནས་བརྗིད་ཆགས་པ་ཞིག་ཡིན།
སྐྱེས་པ་རྣམས་ནི་གཙོ་བོ་རྐང་ལག་གཉིས་ཀྱི་ལས་ཀ་འདྲ་མཉམ་གྱིས་ཐོན་དགོས་ལ། བུད་མེད་རྣམས་ནི་གཙོ་བོ་ལག་པ་ཡིན། ལུས་ཀྱི་སྒུར་ཚད་ལ་ཁྱད་པར་ཡོད་དེ། སྐྱེས་པ་རྣམས་ཀྱི་ལུས་དེ་ཕར་བལྟས་ན་ཅུང་ཙམ་སྒུར་བ་དང་འདྲ་བ་ཞིག་དང་། དེ་ནི་གཙོ་བོ་ཁོག་སྟོད་ཁོག་ཕུབ་པ་ཡིན་ལ། མགོ་བོ་སྒུར་སྲོལ་མེད། རྐང་པའི་རྡོག་བྲོ་དེ་མཐོ་ཙམ་བཀྱག་སྲོལ་ཡོད་པ་དང་། ལག་པ་མགོ་བོ་ཡན་ལ་འདེགས་སྲོལ་ཡོད། དེ་ལ་སེང་གེའི་འགྱིང་འགྱིང་ལྟ་བུ་ཟེར། བུད་མེད་རྣམས་ཀྱི་ལུས་སྒུར་རྒྱུ་ཅུང་མང་ཙམ་ཡོད། དེ་ནི་ཉམ་ཆུང་ལ་ཁྲེལ་གཞུང་ལྡན་པའི་ཉམས་ཡིན། རྐང་པའི་རྡོག་བྲོ་དེ་ཧ་ཅང་དམའ་ལ་ཕལ་ཆེར་འགུལ་ཉམས་ལས་མི་མཐོང་བ་འདྲ། ལག་པ་དེའང་མགོ་བོའི་ཡན་ལ་བཀྱག་སྲོལ་མེད། སྐོར་བྲོ་ལ་རྐང་པ་གཡས་པའི་རྡོག་བྲོ་མ་གཏོགས་རྒྱག་སྲོལ་མེད། ལག་པ་གཉིས་ལས་གཡས་པ་དེ་གཡོན་པ་ལས་མཐོན་པོར་བཀྱག་སྲོལ་མེད། དེ་ནི་རྨ་བྱས་སྒྲོ་གུར་ཕུབ་པ་ལྟ་བུ་ཟེར། ཡིན་ནའང་དེང་གི་དུས་འདིར་སྐོར་བྲོའི་སྒྱུ་རྩལ་མི་ཉུང་བ་ཞིག་ཉམས་ནས་སྒྱུ་རྩལ་གྱི་ཐད་ནས་བསམ་བློ་གཏོང་མཁན་ནི་ཉིན་མོའི་སྐར་མ་དང་འདྲ། དེའང་བར་སྐབས་ཤིག་ལ་བོད་མིའི་ཟློས་གར་ཚོགས་པ་བྱུང་བས་ས་ཆ་སོ་སོའི་བྲོ་དང་གླུ་སོགས་འགོ་བཅད་མཇུག་ཟླུམ་བྱས་ནས་བསྒྲིགས་པ་དང་། ཡུལ་ཕྱོགས་གཉིས་ཀྱི་བྲོ་དེ་བྲོ་གཅིག་ཏུ་བསྒྲིགས་ནས་འཁྲབ་པ་སོགས་ཀྱིས་ཉག་རོང་སྐོར་བྲོའི་རང་ངོས་ཀྱི་སྒྱུ་རྩལ་ལ་གཏོར་བཤིག་མི་ཉུང་བ་ཞིག་ཐེབས་འདུག །