དངོས་མིན་ཤུལ་བཞག་རིག་གནས་ཀྱི་སྨན་འཇིམ་འབག་མགོ

        

        སྨན་འཇིམ་འབག་མགོ་ནི་བོད་རང་གི་ཁྱད་ཆོས་འབུར་དུ་ཐོན་པའི་བཟོ་རྩལ་ཞིག་ཡིན་ལ་ཁམས་ཁུལ་ལ་ཆ་བཞག་ན་ཉག་རོང་རྫོང་དུ་ལག་རྩལ་དེ་མ་ཉམས་གོང་འཕེལ་དུ་འགྲོ་བཞིན་ཡོད། སྨན་འཇིམ་འབག་མགོ་ནི་ཤིང་གི་གྲི་དང་དབྱུག་གུ། ཐོ་བ། འབིག་སོགས་ལག་ཆ་ཉི་ཤུ་ཙམ་ལས་བཟོས་པ་ཞིག་ཡིན།

        རྒྱུ་ཆ་ནི་མཚོ་འཕགས་སྨི་4600ཡན་གྱི་ས་དང་ཆུ་གཉིས་སྦྱར་ནས་མ་དཔེ་བཟོས་པ་དེ་སྐོམ་རྗེས་དེའི་ཕྱི་རུ་སྨན་འདག་དང་སྦྱར་བའི་རིང་བསྲེལ་དང་བྱུ་རུ་མུ་ཏིག གཟི་དགུ་མིག་ཅན་བཅས་བསྲེས་པ་མ་ཚད་རྩ་ཆེ་བའི་བོད་སྨན་དང་རྩྭ་སྨན། རིན་པོ་ཆེ་སོགས་སྦྱར་ནས་སྔོན་གྱི་མ་དཔེ་དང་ཁྱད་མེད་ཀྱི་གཟུགས་དང་སྒྲོས་ཉམས་དོད་པ་དེ་སྐོམ་རྗེས་སུ་ནང་གི་མ་དཔེ་འདམ་བརྫིས་གཏོར་ནས་ཕྱིར་སྨན་འདག་རྐྱང་ནས་གྲུབ་པའི་ཞལ་འབག་ཞིག་ཡིན།

        འབག་མགོ་བཟོས་ཚར་རྗེས་རབ་གནས་གནང་ཏེ་ཉིན་བདུན་གྱི་རིང་ལ་ཆུ་ནང་སྦངས་ན་བཀྲག་མདངས་ལྡན་ཞིང་དྲི་ཞིམ་འཐུལ་བ་ཞིག་ཏུ་གྱུར།

        སྨན་འཇིམ་འབག་མགོ་ལ་རུལ་རྒྱུ་མེད་ལ་མདོག་ཡལ་རྒྱུ་མེད་པ་དང་འཁྱེར་བདེ་བའི་ཁྱད་ཆོས་འཛོམས། བཤད་སྲོལ་ལྟར་ན་འབག་མགོ་ལ་རབ་གནས་ཐོབ་པས་སྲུང་མའི་འབག་མགོ་དང་སྐུ་འདྲ་གང་ཡིན་རུང་བགེགས་འགོག་བར་ཆད་སེལ་ཞིང་དངོས་གྲུབ་སྩོལ་བའི་ནུས་པ་ལྡན་པར་མ་ཟད་རྒྱུ་ཆའི་ནང་དུ་སྨན་རིགས་མང་པོ་འདུས་ཡོད་པས་ཆམ་ནད་དང་ངལ་དུབ་སེལ་བའི་ནུས་པ་ཆེན་པོ་ཡོད་པར་གྲགས།

        ད་ལྟར་ཉག་རོང་གི་སྨན་འཇིམ་འབག་མགོའི་རྒྱུན་འཛིན་པ་བསོད་ནམས་རྒྱལ་མཚན་དང་བཅས་པའི་སྐུ་དྲིན་ལ་བརྟེན་ནས་བཟོ་རྩལ་དེ་མ་ཉམས་རྒྱུན་མཐུད་ཀྱིས་འཕེལ་རྒྱས་སུ་འགྲོ་བཞིན་མཆིས་སོ། །