སྙན་ངག་གི་ཕྱི་ཤ་སྒྱུ་རྩལ་རེད།

སྙན་ངག་འོ་ཇ་ནང་གི་མངར་བཅུད་རེད་དམ།།
ཕ་གའི་སྨུག་པའི་ནང་གི་ཟིལ་བ་ཡིན་ནམ།།
སྣང་བ་རི་ལ་ཡན་པའི་ལུག་ཁྱུ་ཨེ་ཡིན།།
བལ་སྐུད་སྐྱ་ཉིས་སྒྲིལ་བའི་ཐག་པའི་སྣེ་ན།།
རྒྱ་ཁབ་གཡེང་ལ་དཔྱངས་འདྲའི་སྙན་ཚིག་ཐར་ཐོར།།
མི་བརྗེད་གྲོགས་པོའི་མགུར་དུ་བསྟར་བ་ལགས་ན།།
མི་ཚེ་བར་གསེང་གང་གིས་གང་ལ་འབྲི་ཆོག།
ང་ནི་ཁྱོད་ལ་དགའ་བར་ཚོད་ཅིག་མིན་ལ།།
ཁྱེད་ཀྱིས་ང་ལ་བྱིན་རླབས་ག་འདྲ་གནང་སོང་།།
སྐྱིད་སྡུག་ལོ་ཆང་ཁམ་པའི་བྲོ་བ་བཞིན་དུ།།
མི་ཡིས་འཐུང་དགོས་ངས་ཀྱང་བཏུང་བར་བྱ་འོ།།
འབྱུང་བཞིའི་ཁ་ཏོག་གཅིག་ཏུ་ངེས་པ་མེད་པར།།
རེས་གཅིག་ནག་ལ་རེས་གཅིག་སྐྱ་བོར་གྱུར་ཏོ།།
སེམས་ཀྱི་གཏིང་རིང་དེ་ཡི་གཏིང་རིང་ཞིག་ན།།
འཚོ་བའི་གྲུ་ཁ་འདེད་པའི་ན་ཟླའི་ཚོགས་ཀྱང་།།
བརྩེ་བ་སྙིང་གི་མཐིལ་དུ་སིམ་སིམ་བབས་བྱུང་།།
མྱང་ངན་ཐང་སྟོང་དེ་རུ་ཁེར་བུར་འཁྱམ་དུས།།
སྐྱོ་རོགས་བསེར་བུ་ཞིག་ལས་མེད་པའི་ཚོད་ལ།།
སེམས་ཀྱི་རྟེན་ས་འཁྲི་ས་སྙན་ངག་ཡིན་ན།།
རི་བོ་འགུལ་བ་ལྟ་བུའི་སེམས་ནི་འཚུབ་པ།།
གྲུ་རྟ་ཆུ་རུ་སྐྱོམ་པའི་གྲུ་བའི་ལོག་ཏུ།།
གཡོར་གྲུ་རླུང་གིས་བསྒུལ་བའི་སྣང་བ་འཆར་བ།།
སྒྱུ་འཕྲུལ་ལྷ་མོ་གར་ལ་ཡང་གཅིག་ལྡེམ་པས།།
སྣང་སྲིད་གླུ་རུ་བཞེངས་པའི་བརྡ་ཐབས་གྲོལ་སོང་།།
ཚོར་བས་ང་དེད་ངས་ནི་ཁྱོད་ཀྱང་བྲིས་སོ།།
ཁྱོད་ནི་བྲིས་མཐར་ཡང་བསྐྱར་འབྲི་བར་བརྩམ་དགོས།།
ཐ་སྙད་ཚོན་ཁ་ལྡེབ་སྒྲིག་ཡག་ལ་མོད་པོ།།
འབད་ཀྱང་མི་དགོས་རང་བྱུང་ངང་གིས་གྲུབ་པ།།
རྟོག་ཚོགས་རྦབ་རྡོ་ཉུལ་བའི་འཁོར་བའི་ཟུར་ན།།
ཁྱོད་ནི་མཐོང་རྒྱུ་མེད་ལ་དྲན་རྒྱུ་མང་བ།།
བཙལ་ཡང་མ་རྙེད་པ་དེ་ཁྱོད་ཉིད་ཡིན་ནོ།།
དྲན་པ་དྲན་པ་ཟེར་བ་ཁྱོད་དང་གཅིག་རེད།།
རི་ཐང་ཁ་བ་བབས་པས་དཀར་པོ་རང་རེད།།
གྲང་ངར་ཨེན་ཙམ་ལྡང་བ་ལུས་ཀྱིས་མྱངས་ཡོད།།
ང་དང་ཁྱོད་གཉིས་ལས་མགོ་ཚིགས་པའི་ནང་རེད།།
རྨི་ལམ་ཐང་ཆེན་གཅོད་པའི་རྟ་ཕོ་རྐྱང་ལི།།
བང་ཆེན་བང་ཆུང་བརྩིས་ན་བརྒྱ་དང་བརྒྱད་རེད།།
བྱེ་མའི་རི་བོ་ཁྱོད་ཀྱི་མདུན་དུ་ཉུལ་ཡང་།།
ཐེ་ཚོམ་མེད་པར་མུ་ནས་མུ་རུ་ཆོངས་ཤིག།
བསྐལ་བ་འདི་དང་བསྐལ་བ་གཞན་དུ་ཞིག་ལ།།
མཁར་གྱི་གང་ངོར་བདག་གི་གསང་བ་བྲིས་པ།།
འཇིག་ཅིང་རལ་བ་མེད་པའི་ད་དུང་གསལ་ལེར།།
ཁྱེད་ཅག་ད་ཡོད་ཚང་མས་རྟོགས་པར་ཤོག་ཅིག།