མཐུར་མདའ་དང་སྒྲོག་གིས་མ་ཐུབ་པའི་གྱི་ལིང་བཞིན་ལྷགས་རླུང་རྒོད་པོ་ཁོད་ཡངས་པའི་རྩྭ་ཐང་དུ་རྒྱུ་དུས། བདག་གིས་དགུན་ཁ་ནི་རང་དབང་དང་གྲང་ངར་ཆེ་བའི་རླུང་འཁྱིལ་འདིས་མཚོན་ལོས་ཆོག་སྙམ། ཚངས་པའི་སྲས་མོའི་ངག་དང་དོ་བའི་རྦབ་ཆུའི་འགྲམ་དར་གྱིས་དཔྱངས་ཏེ་སེར་ལམ་ལམ་གྱི་ཉི་འོད་མེ་ལོང་དུ་འཕྲོས་པ་ལྟར་མིག་ལམ་ཡོད་ཚད་དཀར་ལམ་མེར་གྱུར་པ་ན། ངས་གཞི་ནས་དགུན་ཁ་ནི་ཁ་དོག་དཀར་པོ་རྐྱང་རྐྱང་ཞིག་ཡིན་པའང་ཤེས་སོང་། དུས་དེ་ནས་བཟུང་སྟེ་ངེད་ཀྱིས་དུས་ཚིགས་བཞི་བོ་དགུན་ཁ་ཡིན་ན་འདོད་ཀྱང་རང་བྱུང་ཁམས་ཀྱི་ཆོས་ཉིད་དང་སྒྲིག་སྲོལ་ལ་སུ་ཡིས་བཀོད་འདོམས་དང་སྟངས་འཛིན་བྱེད་བཏུབ།
མང་པོ་ཞིག་གིས་དགུན་ཁ་ནི་སྐྱ་ཟད་སྔོ་སྡུག་ཅིག་ཏུ་ངོས་འཛིན་དང་འགྲེལ་བཤད་བརྒྱབ་མོད། བདག་གིས་དེ་ལས་ལྡོག་སྟེ་ཉི་ཟླ་རྭ་བར་ན་ཁུར་བའི་འབྲོང་རྒོད་ཅིག་ཏུ་ངོས་འཛིན་དང་མཆན་བཀོད་བྱེད། རྒྱུ་མཚན་ནི་ང་ཡིས་དགུན་ཁའི་མིག་འབྲས་ཁྲོད་ནས་གཡུ་ཡི་མཎྚལ་ལྟ་བུའི་ཡིད་ཆེས་དང་སྐར་ཚོགས་ལྷུམས་སུ་སྦྲུམ་པའི་སྒྲ་དབྱངས་ལྷ་མོ་མཐོང་བས་རེད། ཐོ་རངས་འཕུར་བའི་བྱ་ཁྱུའི་གྲས་ན་ང་ལ་གྲོགས་པོ་ནད་པ་ཞིག་ཡོད། ཁོང་གིས་བཤད་པར་ལྟར་ན། ཧི་མ་ལའི་ཕ་རོལ་ནས་དགུན་ཁ་སྐྱེལ་བ་ནི་ལོ་གཅིག་གི་ལས་གཞིའི་རྣམ་གྲངས་གྲས་ཀྱི་ཧ་ཅང་གལ་ཆེན་ཞིག་ཡིན། དེར་ས་གཤིས་དྲོ་ལ་ནགས་ཚལ་སྟུག་པ། ཟས་བཅུད་འཛོམས་ལ་ཉི་འོད་དུས་སུ་ཤར་བ་སོགས་ཀྱི་ལོ་རྒྱུས་མང་པོ་བཤད་པར། མ་ཟད། དགུན་ཁ་སྐྱེལ་བའི་བྱ་ཁྱུ་ཞིག་ལ་མཚོན་ན་ཧི་མ་ལ་ཡའི་རི་རྒྱུད་བརྒལ་བ་ནི་འབྲོག་པས་རུ་དབྱར་སར་སྤོར་བ་ལྟར་སྤྲོ་སྣང་གིས་ཁེངས་པའི་ལྗོངས་རྒྱུ་ཞིག་ལས་མི་བསྲོན་པའི་དཀའ་ངལ་ཞིག་ཏུ་གཏན་ནས་ངོས་འཛིན་གྱི་མེད་ལ་འཛིན་ཡང་མི་སྲིད་ཟེར། ངས་གཏམ་དེ་ཐོས་འཕྲལ་གྲོགས་པོ་ཁོང་ནི་གཟུགས་གཞི་བདེ་ཐང་མིན་ཡང་འཛམ་གླིང་ན་གྲགས་པ་འབར་བའི་ཧི་མ་ལ་ཡའི་རི་རྒྱུད་ཆེན་མོ་བརྒལ་བའང་ལུས་སེམས་ཀྱི་ལོངས་སྤྱོད་དུ་མཐོང་བ་ནི་ཇི་འདྲའི་ཡིད་སྨོན་ཤོར་དགོས་པ་ཞིག་རེད་ཨང་སྙམ།མིའི་རིགས་ནི་མ་གཞི་ནས་འདོད་ཧམ་གྱི་སྲེད་པ་འཇགས་པར་བྲལ་བའི་སྲོག་ཆགས་ཤིག་ཡིན་སྟབས། ངའི་དགུན་མལ་གྱི་གནས་ཚང་དྲོན་མོའི་ཤིང་ཐུར་རེ་རེ་ཡང་འབུད་ཤིང་དུ་ཁྱེར་སོང་ལ། ཁྱིམ་མཚེས་བྱི་ལོང་ཁེར་ཧྲེང་མས་དགུན་ཟས་གྲོ་མ་ལག་མཐིལ་གང་པོ་ཡང་ལོ་རེ་རེར་བཙན་འཕྲོག་བྱས་སོང་བས། ལོ་ཟླ་དེའི་སྨྲེ་ངག་གི་འོ་དོད་ནི་གྲོང་ཁྱེར་ག་གེ་མོའི་ནང་མ་ཁང་གི་སྐད་སྒྲ་ལས་ཀྱང་ལྡབ་ཀྱིས་མཐོ། ཕྱི་རོལ་ན་ཆར་བ་ཤག་ཤག་ཏུ་འབབ་ཀྱི་མཆིས། རྩྭ་ཕྲན་རེ་རེ་ཕན་ཚུན་འཁྱུད་དེ་བསྐྲུན་པའི་ངའི་མལ་ཚང་དུའང་ཆུ་ཐིགས་གང་ས་ནས་ཟག་གིན་གདའ། སྐབས་དེར་བདག་གིས་གློ་བུར་དུ་གནམ་སའི་འདྲེས་མདོ་ན་འཁྱུག་པའི་གློག་དམར་ཀྱ་ཀྱུའི་སྣེ་ནས་དགུན་ཁའི་སྙིང་གཏམ་དྲན། ལྷགས་རླུང་དང་འགྲམ་དར་ཡང་ཝ་ལེར་དྲན།
ད་ལོ་དགུན་ཁ་ནི་ཏག་ཏག་ས་ཆུ་མེ་རླུང་གི་བདག་ཉིད་ཅན་ཏེ་སྲིད་པ་རྒད་པོ་དགུང་ལོ་བརྒྱད་ཅུ་ལོན་པའི་གྱ་སྟོན་གྱི་ལོ་ཚིགས་རེད། དེར་བརྟེན། དགུན་ཁ་སླེབས་པ་དང་བསྟུན་བདག་གིས་ཁོང་ལ་གྱ་སྟོན་གྱི་ལེགས་སྐྱེས་སྟབས་བདེ་ཤིག་འབུལ་འདོད་མཆིས་མོད། རུ་དགུན་སར་མ་སྤོ་གོང་དུ་ཚང་མས་སུ་མགྱོགས་གང་མགྱོགས་ཀྱིས་རིན་གོང་མཐོ་ཞིང་སྤུས་ཀ་ལེགས་པའི་དངོས་པོ་རྩ་ཆེན་མང་པོ་སྟེར་ཀྱིན་ཡོད་སྟབས། སྲིད་པ་རྒད་པོའང་ཐུགས་དགྱེས་ནས་བཞུགས། དེ་བས་ངའི་སེམས་སུ་རང་བྱུང་ཁམས་ཀྱི་ཆོས་ཉིད་ལ་བསྒྱུར་བཅོས་དང་ཁ་གསབ་བྱེད་པ་ནི་སླ་མོ་ཞིག་མ་ཡིན་ནམ་སྙམ་སྟེ། གསལ་ལ་མི་གསལ་བའི་དགུན་ཁ་མཚོན་བྱེད་ཀྱི་རི་མོ་རུམ་ནས་བླངས་ཏེ། གཅེར་བུ་འགྲེང་བའི་སྡོང་ཕྲན་དེའི་ཡར་ག་ན་བྱ་སྒྲོ་སྤྲུགས་པའི་བྱིའུ་ཆུང་ལ་ཅེར་ནས་ཡུན་རིང་བསྡད། བལྟས་ཀྱིན་བལྟས་ཀྱིན་བདག་གི་ངོ་གདོང་དུ་ཁ་བའི་འདབ་མ་ཁ་ཁེར་ཞིག་ལྷུང་བྱུང་། །