གཅེས་ཕྲུག ཨ་ཕའི་ཡོད་ཚད་ཡིན།

གླེང་སློང་།
ཚེ་སྲོག་དང་ལུས་ཕུང་།
དོན་ལྔ་སྣོད་དྲུག
གངས་རི་དང་སྤངས་ལྗོངས།
ཕ་ས་ཕ་ཡུལ།
མི་ཚེ་འདིར། ང་ལ་ཅི་ཡང་ཡོད་ལ་ཅི་ཡང་མེད་ཆོག
སྐྱེ་བ་ད་ཐེངས། ཁྱོད་ཡོད་པས།
ཁྱོད་ཀྱི་དགོད་སྒྲ་དང་འཛུམ་མདངས་ཡོད་པས།
འཇིག་རྟེན་འདི་ནས། ང་ལ་ཅི་ཡང་མེད་ཀྱང་།
ང་ལས་བདེ་སྐྱིད་ལྡན་པའི་མི་ཞིག་གང་ན་ཡོད་ཨང་།
ང་ལ་གཏན་དུ་ཁྱོད་ཡོད་པས་ཆོག
ཨ་ཕའི་གཅེས་ཕྲུག་ཨང་།
1 འབྱུང་བཞིར་སྦྱར་ནས་བླངས་པའི་གླུ།
མེ་ལྕེ་ང་རྒྱལ་གྱིས་འབར་བ་དེ་ཁྱོད་ཀྱི་ལང་ཚོ་རེད།
རླུང་བུ་འཇགས་མེད་དུ་གཡུགས་པ་ཁྱོད་ཀྱི་གོམ་སྒྲ་རེད།
བྲག་རི་བརྗིད་ཉམས་ཀྱིས་འགྱིང་བ་ཁྱོད་ཀྱི་ཚེ་སྲོག་རེད།
ཆུ་བོ་ཆད་མེད་དུ་འབབ་པ་ཁྱོད་ཀྱི་བརྩོན་པའོ། །
ང་རྒྱལ་གྱིས་འབར་བའི་མེ་ལྕེར་འཕྲད་ན་ཁྱོད་ནི་ཆུའོ། །
ཞེ་སྡང་གིས་མཆོངས་བའི་ཆུ་དང་འཕྲད་ན་ཁྱོད་ནི་བྲག་གོ །
འུར་འུར་དུ་གཡུགས་པའི་རླུང་དང་འཕྲད་ན་ཁྱོད་ནི་རིའོ། །
འཇིགས་ཤིང་ཡེར་བའི་གཅོང་རོང་དང་འཕྲད་ན་ཁྱོད་ནི་རླུང་ངོ་། །
2 གཏམ་རྒྱུད།
གནའ་སྔ་མོ་སྔ་མོ་ཞིག་ལ།
ཉི་མ་དང་ཁ་ཐག་ཉེ་སར་ཁྱིམ་གཞིས་མཁར་དུ་བརྩིགས་པས།
རླུང་རྟ་མཁའ་ལ་འཕུར་མྱོང་།
བློ་གྲོས་དང་རྣམ་དཔྱོད་ལ་རྣོ་ལྕགས་ཀྱི་གཤོག་པ་ཐོགས་པས།
མཛེས་མ་ཁྱིམ་དུ་བསུས་མྱོང་།
ཚན་རིག་དང་ཤེས་རབ་ཀྱི་ཉི་ཟླ་ལྷན་དུ་རྒྱས་པས།
གངས་རི་འོད་དུ་འཚེར་མྱོང་།
དཔའ་ངར་དང་སྙིང་སྟོབས་ལ་མེ་ལྕེ་འབར་བས།
བུ་རྟས་དགུ་ཚིགས་བསྒྲིབས་མྱོང་།
གཏམ་རྒྱུད་ཀྱི་མགོ་འདི་ལྟར་བརྩམས་ནས།
སྲིད་གསུམ་ལ་སྙན་པའི་གྲགས་པ་རྒྱས་ཡོད་མྱོང་ནའང་།
གཏམ་རྒྱུད་ཀྱི་མཇུག་འདི་ལྟར་བསྡུ་མིན་དེ།
ཁྱོད་ལ་ཐུག་ཡོད་ཨང་།
ང་ཡི་བུ་ཆུང་། སྙིང་གི་གཅེས་ཕྲུག
3 ནར་སོན་དུས།
མེ་ཏོག་ཁོ་ན་མིན་པའི་འཇིག་རྟེན་འདིས།
ཁྱོད་ཀྱི་མེ་ཏོག་ལ་ནག་ནོག་བཟོ་སྲིད་པས།
གསལ་བྱེད་ཀྱི་གཞུ་མོར་དབྱངས་ཡིག་གི་ལྕགས་མདའ་སྤྲད་ནས།
ཡོད་ཚད་དགའ་ལྷང་ལྷང་གིས་གདོང་བསུ་བྱེད་དགོས།
གཅེས་ཕྲུག ཁྱོད་རང་ནར་སོན་དུས།
ཡུལ་ལྗོངས་ཤིག་ལ་ཚོན་རྩི་བྱུགས་དགོས།
རྩ་བའི་ཁ་དོག་བཞི་ལས།
སེར་པོ་དེ་ནམ་ཡང་གཙུག་ཏུ་བཀུར་དགོས།
དཀར་པོ་དེ་རི་བོ་དང་སྤྲིན་པར་བྱུགས་དགོས།
སྔོན་པོ་དེ་ནམ་མཁའ་དང་ས་གཞིར་བྱུགས་དགོས།
དམར་པོ་དང་རིང་དུ་གྱེས་ནས་གཏན་དུ་དོར་དགོས།
ཨ་ཕའི་གཅེས་ཕྲུག
རླུང་དང་སེར་བུ། ཆར་དང་སེར་བ།
མདའ་དང་མདེའུ། གཏམ་དང་མྱི་ཁ།
འདི་དག་གདོང་གིས་བསུས་ནས་གདོད་མིའི་ནགས་ཚལ་བརྒལ་དགོས་ཨང་།
ང་ཡི་བུ། སྙིང་གི་བུ།
རི་ལུང་དང་རྫ་རྒྱུད་ན་ཁེར་རྐྱང་གིས་འཚོ་བའི་འབྲོང་རྒོད་དར་མ།
ནགས་ཚལ་དང་གཡང་གཟར་ན་ཞེ་སྡང་གིས་མཆོངས་བའི་རྒྱ་སྟག་ངར་མ།
སུ་དང་གང་ལའང་མགོ་བོ་མི་བསྐུར་བའི་དུས་རབས་ཀྱི་དཔའ་བོ་ཡིན།
ཁེར་རྐྱང་དང་གཉའ་གནོན་ལ་ངོ་རྒོལ་བྱེད་མཁན་གྱི་འགྱུར་མེད་སྙིང་སྟོབས་ཡིན།
ང་ཡི་བུ། སྙིང་གི་བུ།
ཁྱོད་རང་ནར་སོན་དུས།
འབྲོང་རྒོད་དར་མའི་དཔའ་རྩལ་འཛོམས་དགོས།
རྒྱ་སྟག་ངར་མའི་སྙིང་སྟོབས་ཡོད་དགོས།
4 འདི་ལྟར་བགྲོད་དགོས།
འཇིག་རྟེན་འདིར།
ཡང་ན། མི་ཚེ་འདིར།
ཁྱོད་ཀྱི་སྤྲུལ་བསྒྱུར་གང་མང་ཞིག་བྱེད་དགོས་པ།
ལས་དབང་ཞིག་གམ་ཡང་ན་འོས་འགན་ཞིག་གོ །
ཨ་ཕའི་གཅེས་ཕྲུག མིག་གིས་རྒྱང་ལ་ལྟོས།
མི་ཞིག་ལ་འཛོམས་དགོས་པའི་མ་མཐའི་ཆ་རྐྱེན་དེ་ཁྱོད་ལ་འཛོམས་ན།
ཨ་ཕ་ཁྱད་པར་བ་ཞིག་དགའ་མི་སྲིད་མོད།
མི་ཞིག་ལ་འཛོམས་དཀའ་བའི་ཡ་མཐའི་ཆ་རྐྱེན་རེ་ཁྱོད་ལ་འཛོམས་ན།
ཨ་ཕའི་རྣམ་ཤེས་དང་སྙན་ངག
ནམ་ཡང་དགོད་སྒྲའི་ཁྲོད་འཚོ་ངེས།
ང་ཡི་བུ།
ཨ་ཕའི་སྙིང་གི་ནོར་བུ།
5 ཁ་ཆེམས།
ཨ་ཕའི་གློ་སྙིང་འདྲ་བའི་གཅེས་ཕྲུག་ཡ།
ཨ་ཕའི་མིག་འབྲས་ལྟ་བུའི་སེམས་སྐྱིད་ཨང་།
ཁྱོད་རང་ཕ་ཡུལ་གྱི་ཆེད་དུ་རྒྱང་ལ་བཞུད་དགོས།
རྒྱང་རིང་ནས། ཕ་ཡུལ་ལ་ཕྱིར་མིག་འཕེན་དགོས།
ཕ་ཡུལ་གྱི་ཕུ་ནུ་མིང་སྲིང་ཚོས།
ཁྱོད་ཀྱིས་རྒྱང་རིང་ནས།
ཀ་ར་དང་སྦྲང་རྩི་མངར་མོ་རེ་ཁྱེར་ཡོང་བར་རེ་སྒུག་བྱས་ཡོད།
རྒྱང་རིང་ནས་གངས་རི་དང་ལུག་ཁྱུ་སེམས་ཀྱིས་འཚོ་དགོས།
ཁ་བ་བབས་དུས་ཕུ་ནུ་མིང་སྲིང་ཚོ་གྲང་སྲིད་པས།
ཁྱོད་ཀྱིས་ཕ་ཡུལ་ལ་དྲོད་ཁོལ་ཁྱེར་ཡོང་དགོས།
ཨ་ཕའི་གཅེས་ཕྲུག་ཨ།
ལན་རེར་ཁྱོད་ཀྱི་རྡོ་འཁུར་དགོས་ཤིང་།
མཚམས་རེར་ཁྱོད་རང་འཕུར་ཡང་དགོས།
ལན་རེར་རང་ལ་དབང་བའི་ལམ་ཞིག་མེད་པའི་སྣང་བ་སྐྱེ་སྲིད།
མཚམས་རེར་ལམ་ནི་འོད་ལྟར་གསལ་བའི་ཚོར་བའང་ཡོད་སྲིད།
ང་ཡི་བུ།
མི་ཚེ་ནི་དབྱར་མཇུག་གི་གནམ་གཤིས་ཡིན།
འཚོ་བ་ནི་རླུང་ནང་གི་ཁུར་མོང་ཡིན།
ཁྱོད་ཀྱིས་ནམ་ཡང་རང་ཉིད་ལ་ཡིད་ཆེས་བྱེད་དགོས།
མེས་པོ་ཚོས་ཁྱོད་ལ་གསེར་ཆུས་བརྒྱན་པའི་ནམ་མཁའ་བསྐྱུར་ཡོད།
ནམ་ཟླ་འདིས་ཁྱོད་ལ་དུག་ཚེར་ཅན་གྱི་བགྲོད་ལམ་བསྐྲུན་ཡོད།
གང་ནས་འགྱེལ་ན་དེ་ནས་ཡར་ལ་ལངས་དགོས།
ནམ་མཁའ་ཞུ་ནས་ཁུ་བ་ནག་པོ་བཞུར་ཡང་།
རང་ཉིད་ཀྱི་རྣམ་ཤེས་གཡོ་བཙོང་མ་བྱེད།
རང་ཉིད་ཀྱི་ལམ་བུར་རང་ཉིད་འཚོལ་དགོས།
ཨ་ཕའི་གཅེས་ཕྲུག་སེམས་ལ་བཟུང་དགོས།