བོད་ལྗོངས་སུ་ཉུལ་བའི་ཟིན་ཐོ། ［སྙན་ཚོམ］

 

གླེང་གཞི།

 

 

ང་ཚོའི་མགོ་ཐོག་གི་ཉི་མ་གཅིག་པོ་འདི།

 

ནམ་རྒྱུན་ལྟར་དལ་བྲེལ་དང་གཡོ་ཟོལ་མེད་པར་ཤར་ཡོང་།

 

ཏག་ཏག་ཉིན་གུང་ཞིག་ལ།

 

ང་རང་གནའ་མཁར་ཟི་ལིང་ནས་མེ་འཁོར་ལ་བསྡད་དེ་ལྷ་སར་ཆས།

 

ངའི་གཡས་གཡོན་གྱི་རི་ར་བ་ཁང་ཁྱིམ་དག་ནི།

 

གཙང་པོ་གཉིས་ཀྱི་ཟོལ་གྱིས་ངའི་རྒྱབ་ཕྱོགས་སུ་བཞུར།

 

ང་ནི་གཙང་པོ་དེ་གཉིས་ཀྱི་མགོ་ཁུངས་འཚོལ་མཁན་ཞིག་དང་འདྲ་བར།

 

རེ་བ་ཆེན་པོ་ཞིག་གིས་མདུན་ཕྱོགས་ཁོ་ན་བསྙེགས་ནས་སོང་།

 

མདུན་ཕྱོགས་ན་ཅི་ཞིག་ཡོད་དམ།

 

གདོད་མའི་ནགས་ཚལ་ཆེན་པོ་ཞིག་ཏུ།

 

སྲིད་པའི་མེ་ཆེན་སྦར་བའི་སྐྱེས་ཆེན་ཞིག་གམ།

 

ཡང་ན།  དཀའ་ཐུབ་ནགས་ལ་གནས་པའི་སྤྲེའུ་ཞིག་ཡོད་དམ།

 

རང་སེམས་ནང་ལ་བསྐོར་ཏེ་ཕྱི་འདང་རེ་བརྒྱབ་ན།

 

ང་རང་ཕྱིར་ལོག་དུས་ཀྱང་འདི་ལྟར་ཡིན་ནམ།

 

 

 

གཅིག ལྷ་ས།

 

 

?་བ་ལེབ་མོ་དག་ཕན་ཚུན་འབྱར་ནས་གྲོང་ཁྱེར་འདི་གྲུབ།

 

སྲ་མཁྲེགས་ཀྱི་?་ལ་སྐྱོ་བའི་མིག་ཆུ་འདུག

 

མིག་ཆུས་སྐྱིད་ཆུ་ཟེར་བའི་ཀོ་གྲུ་གཏོང་སའི་གཙང་པོ་འདི་གྲུབ།

 

ང་གཙང་འགྲམ་ལ་ཐོན་དུས།

 

ཕོ་བྲང་ཕོ་ཏ་ལའི་བརྗིད་ཉམས་མཐོང་བྱུང་།

 

?་མཁར་རིང་མོ་འདིའི་དུས་གསུམ་གྱི་ཡིག་ཚང་མཐོང་བྱུང་།

 

བརྙན་གཤེར་གཤེར་གྱི་ངོ་གདོང་མཐོང་བྱུང་།

 

?་བ་ལེབ་མོ་དག་གི་ངོས་སུ་ཕབ་པའི།

 

མི་རྣམས་ཀྱི་ཐོད་པའི་ཁ་ཡིག་མཐོང་བྱུང་།

 

 

 

ལྷ་ས་ནི་?་ཡི་གྲོང་ཁྱེར་ཞིག་སྟེ།

 

?་ཡི་ཨུ་ཚུགས་དང་?་ཡི་གཉོམ་ཆུང་གི་གཤིས་ཀ་མཐོང་བྱུང་།

 

དུས་ཚོད་ལྟར་རླུང་གིས་ཟད་ཀྱིན་པའི་དར་ལྕོག་དང་དེའི་ངོས་ཀྱི་ཡི་གེ

 

བཙན་པོའི་སྐབས་ཀྱི་?་རིང་དང་དེའི་ངོས་ཀྱི་ཡི་གེ

 

ད་དུང་ངའི་སྙན་ངག་དང་ངའི་ཡིག་འབྲུ་དེ་ཚོ།

 

 

 

གཉིས།  ཕོ་བྲང་པོ་ཏ་ལ།

 

 

མི་རྣམས་ཀྱི་རྔུལ་ཁྲག་དང་ལྷ་འདྲེ་ཡི་ཆོ་འཕྲུལ་གྱིས་བརྩིགས་རྗེས།

 

བཙན་པོ་སུ་ཞིག་གིས་ཆེས་ཐོག་མར་འདི་ནས་དབང་ཆ་སྤྱད་དེ།

 

བཙུན་མོ་ཚོའི་ངོ་གདོང་གི་གཡེར་བག་འཚོས་ཤིང་།

 

དམག་རྟ་ཧྲག་སྒྲིག་གིས་དཔུང་ཆེན་བཏེགས་ཏེ།

 

མཐའ་བཞིའི་རྒྱལ་ཕྲན་དག་དབང་དུ་བསྡུས།

 

ཀི་བཏབ།  ལྷ་རྒྱལ་འཐེན།

 

 

 

དུས་དང་དུས་སུ།

 

གསེར་གྱི་རྒྱ་ཕིབས་དབྱིངས་ན་གཡོ་ཞིང་།

 

དུས་དང་དུས་སུ།

 

དུང་ཆེན་གྱི་སྒྲ་དབྱངས་སྦོམ་པོར་གྲག

 

ཕྱི་ནང་གསང་གསུམ་གྱི་ལོ་རྒྱུས་ཟབ་མོར་གསལ་བའི་པོ་ཏ་ལ།

 

ཆོས་སྲིད་ཀྱི་མངའ་ཐང་དགུང་ནས་དར་བའི་པོ་ཏ་ལ།

 

ང་རྒྱལ་གྱི་དབུ་འཕང་མཐོ་བ་ཁྱེད་རང་ཡིན་ལ།

 

ང་ཚོའི་སེམས་ཀྱི་གཞོམ་གཞིག་བྲལ་བའི་ལྕགས་རི་དེའང་ཁྱེད་རང་ཡིན།

 

 

 

དུས་ཚོད་ཀྱི་བར་གསེང་ཞིག་ནས།

 

པོ་ཏ་ལས་བྲེལ་འཚུབ་ཀྱིས་མདུན་ཕྱོགས་ཀྱི་སྐྱིད་ཆུར་གཟིགས་དུས།

 

མེ་ལོང་ལྟ་བུའི་སྐྱིད་ཆུ་གཞི་ནས་འཁྱག་ལ་འབྱར་ཚར།

 

 

 

གསུམ།  ཇོ་ཁང་།

 

 

ཇོ་ཁང་གི་མདུན་དུ་སེར་སྐྱ་ཕོ་མོ་མང་པོས།

 

བརྐྱངས་ཕྱག་གྱང་འགྱེལ་བ་ལྟར་འཚལ་ཏེ།

 

ཚེ་ཚེ་རབས་རབས་སུ་བསགས་པའི་ལན་ཆགས་ཀྱི་ཉེས་སྒྲིབ་ཀུན།

 

?་གཅལ་རིང་མོ་འདི་བརྒྱུད་ནས་ཇོ་བོར་སྙན་ས་འབུལ།

 

ཇོ་བོའི་གསེར་ཞལ་ན་འཛུམ་ཙམ་ཡང་མེད་པར་ཧ་ཅང་གཟབ་ནན་གྱིས་བཞུགས།

 

མར་མེ་སེར་པོའི་ཚོགས་ཀྱི་འོད་ངོགས་ན།

 

རིགས་དྲུག་གི་རྣམ་ཤེས་གངྒའི་ཀླུང་གི་བྱེ་མའི་རྡུལ་དང་མཉམ།

 

གསོལ་འདེབས་དང་ཡིག་དྲུག་གི་སྒྲ་དབྱངས་སྙན་མོས།

 

འགྲོ་བ་འདི་དག་རེ་རེ་བཞིན་བདེ་བ་ནས་བདེ་བའི་ལམ་དུ་དྲངས།

 

ལྷ་སའི་ཇོ་ཁང་ལ་འཁོར་བའི་རྣམ་ཤེས་འདི་དག

 

ཧ་ཅང་ཕྱུག་པོ་ཕྱུག་པོ་ཡིན་འོས་ཏེ།

 

ཇོ་ཁང་གི་?་གཅལ་རིང་མོ་འདིར།

 

མི་རྣམས་ཀྱི་དད་འདུན་དང་སྙིང་སྟོབས་བརྐོས་ཡོད།

 

རྒྱུ་དང་འབྱོར་བ་བརྐོས་ཡོད།

 

ཚེ་རབས་རྗེས་མའི་ལས་སྐལ་དང་རང་གི་ཐོད་པའི་ཁ་ཡིག་བརྐོས་ཡོད།

 

ད་དུང་།  ལན་ཆགས་ཀྱི་བུ་ལོན་བརྐོས་ཡོད།

 

 

 

བཞི།  བར་སྐོར།

 

 

 

བར་སྐོར་ནི་འཚུབ་ཆ་ཆེ་བའི་གྲོང་ཁྱེར་གྱི་དཀྱིལ་དབུས་ཏེ།

 

འཚུབ་ཆ་ཆེ་བའི་རྐྱེན་གྱིས་ཧ་ཅང་དོག་པར་གྱུར།

 

ངས་སྲང་ལམ་འདི་དག་རྒྱུ་མ་འདེད་འདེད་བྱས་ཏེ་མཐའ་རུ་བསྐྱལ་མོད།

 

གཡུང་དྲུང་གི་རིས་སུ་ཕབ་པའི་སྲང་ལམ་འདི་དག་ལ་ད་དུང་གོ་བ་མ་ལོན།

 

འཁྲུག་ཆ་དོད་པའི་བར་སྐོར་གྱི་ཚོང་ར་དང་མི་ཡི་རྒྱུ་འགྲུལ།

 

འདོད་རྔམ་དང་ཆགས་སྲེད་ཀྱིས་འབར་བའི་ངོ་གདོང་དེ་དག

 

དད་པ་ན་ཟུག་ཅན་གྱི་ཐག་རིང་གི་ཆོས་མཇལ་བ་དེ་དག

 

དེ་དག་རེ་རེ་བཞིན་བར་སྐོར་ལ་འདུས་ནས་འཚང་རྒྱག་བྱེད།

 

མྱུར་དུ་ཕྱུག་པོར་འགྱུར་འདོད་པའི་ཚོང་བ་དག་དང་།

 

མྱུར་དུ་འཚང་རྒྱ་བར་འདོད་པའི་དད་ལྡན་པ་དག

 

བར་སྐོར་ན་མགོ་བོ་འགལ་མེ་བཞིན་དུ་འཁོར།

 

ངས་མ་སྐྱེས་ཨ་མའི་ཆང་ཁང་ནས་ལྷོད་བག་གིས་ཆང་སེར་ཞིག་འཐུང་བཞིན།

 

ཚངས་དབྱངས་རྒྱ་མཚོ་སོང་མྱོང་བའི་གཞིས་ཀ་དག་དང་།

 

དགེ་འདུན་ཆོས་འཕེལ་བཟི་མྱོང་བའི་ཆང་ཁང་དག་ལ།

 

གནས་ལུགས་མེད་པའི་སྡོམ་ཚིག་གསར་པ་འཇོག་འདོད་བྱུང་།

 

 

 

བར་སྐོར། མར་དྲི་དང་བསང་དྲི་འཐུལ་བའི་ལྷ་སའི་བར་སྐོར།

 

བར་སྐོར་ལ་ཐོན་དུས།

 

མི་རྣམས་ཀྱི་གོམ་སྟབས་ཀྱང་རང་ཤུགས་ཀྱིས་ཇེ་མགྱོགས་སུ་བུད་འགྲོ་བ་ཅི་ཡིན་ནམ།

 

ངལ་གསོ་ཏོག་ཙམ་གནོང་དང་།  གྲོགས་པོ་ཚོ།

 

མཐོ་རིས་ཀྱི་ལྷ་རྣམས་ཀྱང་བར་སྐོར་ལ་འཛོམས་ནས།

 

ཁྱོད་ཚོ་ལ་ཡིད་ཆེས་དང་མཉེས་པོ་གནང་གིན་འདུག

 

 

 

ལྔ།  ནོར་བུ་གླིང་ག

 

 

ནོར་བུ་གླིང་གར།

 

ཁྱོད་ཀྱིས་དེ་ནས་ཅི་ཞིག་བཙལ་ཡང་ཅི་ཡང་མི་རྙེད།

 

ལོ་ངོ་དུ་མར་སྦས་པའི་གླེགས་བམ་དག་ལས་ཀྱང་།

 

ཁྱོད་ཀྱིས་གསར་པ་གསར་རྐྱང་ཞིག་རྙེད་པར་མི་འགྱུར།

 

 

ཁྱོད་ཀྱིས་འདི་ནས་ངལ་གསོ་ཙམ་ཡང་བྱེད་མི་ཐུབ།

 

དད་པ་དང་དག་སྣང་གིས།  རེ་ཆད་དང་ཡི་མུག་གིས།

 

ཁྱོད་ཀྱིས་ག་ལེར་གྱེས་ཕྱག་ཕུལ་ཏེ་སོང་ན་འགྲིག

 

 

 

ནོར་བུ་གླིང་ག་ནི་ཁྱོད་དང་འུ་གཉིས་ཀྱི།

 

སྤྲོ་གསེང་གཏོང་ས་དེ་མ་ཡིན་ནོ། ། 

 

 

 

དྲུག  སེ་ར།

 

 

བྱུར་དམར་ཚོམ་བུ་ཞིག་ལྷ་སའི་བྱང་རྒྱབ་ཏུ་འཐོར།

 

ཡི་གེ་དང་གླེགས་བམ་གྱི་གསེབ་ཏུ་འཐོར།

 

?་རྗེ་ཕུར་བའི་ཕྱག་དབང་གིས།

 

སྡིག་སྒྲིབ་ཟེར་བའི་སྟོབས་ཆེན་དེའི་མགོ་ལ་ཐོ་བ་གཞུས།

 

སྐུ་མཁྱེན་སྐུ་མཁྱེན་ཟེར་བའི་སྤྲང་པོ་དག་དང་།

 

གང་སར་རོ་ལྟར་ཉལ་བའི་ཁྱི་གུ་དག་གིས།

 

དུས་ཚོད་དང་རིན་ཐང་ཤེས་ཀྱིན་མི་འདུག

 

འདུ་ཁང་གི་ནང་རོལ་ནས་མཆེད་པའི།

 

སྒྲ་དེའང་ཐོས་ཀྱིན་མི་འདུག

 

སྤྲང་པོ་ཚོས་ལག་པ་ཅི་ལྟར་བསྲིང་རུང་།

 

ལག་མཐིལ་ལ་རང་གི་མི་ཚེ་མ་བབས།

 

ནམ་རྒྱུན་ཉི་མར་ལྡེ་བའི་ཁྱི་གུ་དག

 

ཉི་འོད་དང་བར་ཐག་ཧ་ཅང་རིང་པོར་ཕྱིན་ཚར།

 

ལྷ་ཚོགས་ལ་སྐྱབས་སུ་འོངས་པའི་མཇལ་བ་འདི་དག

 

ཁྱོད་ཚོ་སྐྱོབ་པའི་དཔུང་དང་གཉེན་དེ་མིན་པས།

 

དུས་ཚོད་ལྟར་ཕྱིར་ཕ་ཡུལ་ཟེར་བའི་རང་གི་དུར་ས་དེར་ལོག་འགྲོ

 

ཉི་མ་རེ་རེ་བཞིན་ཞི་འཇམ་གྱི་ཉི་འོད་དེ།

 

སེ་ར་དགོན་པའི་རྒྱ་ཕིབས་སྟེང་འཕྲོས་ཡོང་ལ།

 

དུས་དང་དུས་སུ་དུང་ཆེན་གྱི་སྒྲ་དབྱངས་སྙན་མོས།

 

ཁྱོད་རང་ད་དུང་གསོན་ཡོད་པའི་གོ་བརྡ་སྤྲད་ཡོང་།

 

 

 

བདུན།  འབྲས་སྤུངས།

 

 

དཔལ་ལྡན་འབྲས་དཀར་སྤུངས་པའི་སྡེ།

 

ས་རུ་བབས་པའི་སྐར་ཚོགས་དུམ་བུ་ཞིག་དང་འདྲ་བར།

 

འོད་ཀྲིག་ཀྲིག་གིས་གནའ་སྔ་མོའི་གཏམ་རྒྱུད་ཅིག་འཆད།

 

སྐྱེས་ཆེན་ཚོའི་འཆད་རྩོད་རྩོམ་གསུམ་དང་།

 

མཁས་བཙུན་བཟང་གསུམ་གྱི་ཡོན་ཏན་གླེང་།

 

 

 

ཤོག་དཀར་ངོས་ཀྱི་ནག་ཐིག་རེ་རེ།

 

ཡི་གེ་རེ་རེ་ཡིན་པའི་ངེས་ཤེས་རྙེད་པ་ནས།

 

ལོ་རྒྱུས་ཡང་བསྐྱར་མགོ་ནས་འབྲི་མགོ་བརྩམས།

 

ལས་འབྲས་དང་དགེ་སྡིག་ལ་བླང་དོར་ཤེས་པ་ནས།

 

མི་རྣམས་ནི་ཕྱི་གསལ་ནང་གསལ་གྱི་ཤེལ་སྒོང་ཞིག་དང་འདྲ་བར།

 

འབྲས་སྤུངས་དགོན་ལ་ཐོན་དུས་འོད་དུ་འཚེར།

 

 

 

བརྒྱད།  དགའ་ལྡན།

 

 

ཁོང་ནི་དྲན་འཕྲུལ་རྒོད་པའི་བཙུན་པ་ཞིག་ཡིན་འདུག

 

ཨ་མདོ་ནས་ལྷ་སར་སོང་སྟེ་རང་གི་འདོད་པ་ལྟར་གྱི་མི་ཞིག་བྱས།

 

དགའ་ལྡན་ནི་ཁོང་གི་རྩེ་ར་ཆུང་ཆུང་ཞིག་ཡིན་འདུག

 

མི་རྣམས་ཀྱིས་ཙོང་ཁ་པ་ཞེས་ངོ་སོ་ཆེ་རུ་བསྟོད་སྐད།

 

 

 

ཁོང་ནི་ཁྲེལ་གཞུང་མེད་པའི་ཨ་མདོ་བ་དེ་ཡིན་སྐད།

 

མི་ཚེ་གང་པོར་ང་ཚོས་གོ་དཀའ་བའི་རྟེན་འབྲེལ་ཟེར་བ་ཞིག་ལབ་སྟེ།

 

ཡུམ་ཆེན་གྲོངས་ཁར་ངོ་ཡང་ཐུག་མ་ཐུབ།

 

ཞལ་ཐང་ཞིག་བསྐུར་བའང་ཡུམ་ཆེན་གྱི་ཕྱག་ལ་འབྱོར་དུས་རྫུན་མར་གྱུར།

 

 

 

དགའ་ལྡན་ནི་གོ་བ་ཧ་ཅང་ཟབ་པའི་མིང་ཚིག་ཞིག་སྟེ།

 

མིང་ཚིག་འདིས་ཆོས་ཉིད་དང་བདེན་པ་ཟེར་བའི།

 

དོན་དམ་གྱི་དངོས་པོ་དེ་ཁུར་ཡོད།

 

དངོས་པོ་དེ་ནི་ཁོང་གི་རྩེད་ཆས་ཡིན་འདུག

 

 

 

ཡུམ་ཆེན་གྱི་དྲན་གདུང་གི་མིག་ཆུ་རེ་རེ།

 

དྲོད་ལམ་ལམ་གྱིས་ཁོང་གི་ཕྱག་མཐིལ་ལ་ལྷུང་རུང་།

 

ཁོང་ལ་ས་འགུལ་ལྟ་བུའི་ཚོར་བ་འཁྲུག་པ་ཙམ་ལས།

 

དགའ་ལྡན་ཟེར་བའི་རང་ཉིད་ཀྱི་བཙོན་ར་འདི་ལས་གྱེས་མ་ཐུབ།

 

 

 

དགུ།  རྩེད་ཐང་།

 

 

ང་ཚོའི་མེས་པོ་རྣམས་བྱིས་པ་ཡིན་དུས་འདི་ནས་ནར་སོན།

 

འདི་ནས་རྩེ་ཞོར་དགོད་ཞོར་དུ་རང་གི་རིགས་རྒྱུད་དང་མངའ་ཐང་སྤེལ།

 

སྲིད་པའི་རབ་བྱེད་དག་རྩེད་ཐང་མགོན་པོ་རི་ལ་བབས་ཏེ།

 

སྒྲུང་ལྡེའུ་བོན་གསུམ་གྱིས་ཆབ་སྲིད་བསྐྱངས།

 

མི་ལ་བཙན་གཉོམ་ཤོར།  ཞིང་ལ་ཆེ་ཆུང་ཤོར།

 

ཕྱུགས་ལ་མང་ཉུང་ཤོར།

 

 

 

རྩེད་ཐང་ནི་སྐྱེས་ཆེན་སུ་ཞིག་གི་དཀྱེལ་ཡངས་ཀྱི་བློ་གཤོག་དེ་དང་འདྲ་བར།

 

ས་ཆེན་འདིའི་སྟེང་གི་མི་རྣམས་བསྐྱངས་ཤིང་།

 

བཙན་པོའི་རྒྱལ་རབས་ཟེར་བའི་?་རིང་ཞིག་བཙུགས།

 

དེ་ནས་བཟུང་ས་ཆེན་འདིའི་སྟེང་གི་མི་རྣམས་ལ་ཁོམ་ལོང་མ་བྱུང་།

 

དེ་ནས་བཟུང་རྩེད་ཐང་གི་བྱིས་པ་བསམ་མེད་དེ་ཚོ།

 

ལོ་རྒྱུས་ཀྱི་ལྟེབ་གཉེར་བར་ནས་རྒས་མགོ་བརྩམ།

 

 

 

བཅུ།  ཡུམ་བུ་བླ་མཁར།

 

 

བུ་སྐྱེས་ཀྱི་དང་པོ་ཡིན་ཞེས་མཁར་ཞིག་བརྩིགས།

 

མཁར་ལ་སྔ་བ་ཡུམ་བུ་བླ་མཁར་བརྩིགས།

 

མཁར་སྟེང་ནས་ཀི་རིང་ལན་གསུམ་བཏབ་སྟེ།

 

ས་ཆེན་ལ་རང་གི་མངའ་ཐང་གོ་བར་བྱས།

 

 

 

རླུང་དང་ཁ་བའི་ཁྲོད་དུ་ཁེར་རྐྱང་གི་འགྲེང་ཚུགས་དེས།

 

ཁེར་རྐྱང་གི་རུ་སྡེ་མང་པོ་གཅིག་ཏུ་བསྡུས།

 

གྲོས་མགོ་གཅིག་ལ་བཞག  གྲོས་རྟིང་མནའ་ཡིས་མནན།

 

ལོ་རྒྱུས་དེ་ལྟར་མགོ་བཙུགས་པ་ནས་འཇིག་པའི་བར་དུ།

 

བླ་མཁར་འདིས་ནམ་ཡང་མགོ་བོ་མཐོན་པོར་བཏེགས་ཏེ།

 

ཚེ་ཚེ་རབས་རབས་སུ།

 

རང་གི་བདག་པོའི་མངའ་ཐང་སྲུང་ཡོད།

 

 

 

བཅུ་གཅིག  ཁྲ་འབྲུག་དགོན་པ།

 

 

མུ་ཏིག་ཞལ་ཐང་མཐོང་དུས།

 

གཞི་ནས་ཁྲ་འབྲུག་དགོན་པར་འབྱོར་བ་ཚོར།

 

དད་པ་དང་དག་སྣང་ཟེར་རྒྱུ་ཧ་ཅང་དཀའ་བའི་ཚོད་དུ་འདུག

 

གདོད་མ་ནས་རང་རྒྱུད་ལ་གོམས་པའི་འདོད་སྲེད་དེའི་དབང་གིས།

 

དྲན་པའི་ཟབ་སར་བརྐོས་པའི་སྙིང་སྡུག་དེ་དྲན།

 

མུ་ཏིག་ཞལ་ཐང་མཐོང་དུས་ལྷག་ཏུ་དྲན།

 

 

 

རྗེ་བཙུན་མ། ངས་ཅི་ཞིག་ལབ་སོང་།

 

 

 

བཅུ་གཉིས།  བསམ་ཡས།

 

 

བསམ་ཡས་བྱ་ཕོ་དཀར་པོས་སླར་ཡང་གཉིད་ལས་བསླངས།

 

མདང་ནུབ་ཀྱི་རྨི་ལམ་དེ་བསམ་ཡས་བྱ་ཕོ་དཀར་པོས་དཀྲོགས།

 

རྨི་ལམ་དུ་ངས་ཧས་པོ་རིའི་རྩེ་ནས་ལབ་བཙས་ཤིག་བསྟད་པར།

 

བདུད་བློན་རྣམས་ཀྱིས་དབྱེན་དབྱེན་ཧས་ཧས་བྱས།

 

ངས་དེ་ཚོར་སྣང་དོགས་ཙམ་ཡང་མ་བྱས།

 

 

 

ངས་དེ་ཚོར་སྣང་དོགས་ཙམ་ཡང་མི་བྱེད་དོན་ནི།

 

མཁན་སློབ་ཆོས་གསུམ་དངོས་སུ་བཞུགས་པས་ཡིན་ལ།

 

སྒྲ་སྒྱུར་གླིང་ན་ལོ་ཙཱ་བ་རྣམས་ཕྱག་ལས་ལ་བྲེལ་བས་ཡིན།

 

ཡིན་ནའང་། ངའི་རྨི་ལམ་དེ་བསམ་ཡས་བྱ་ཕོ་དཀར་པོས་དཀྲོགས་སོང་།

 

 

 

བཅུ་གསུམ།  ཐུབ་བསྟན་?་རྗེ་བྲག

 

 

ཕུར་བུ་བྲག་ལ་བརྡབས་ཚེ་བྲག་ཀྱང་ཉིལ།

 

གནམ་ས་ཆ་ལང་རྡེབ།

 

ལྷ་ཚོགས་ཀྱང་ཤིག་ཤིག་འདར།

 

ཡིན་ནའང་།  གདོན་འདྲེ་ཁ་དར་བས།

 

ཀླ་ཀློའི་ཚོགས་ཀྱི་བ་སྤུ་ཙམ་ཡང་སྒུལ་བར་མ་ནུས།

 

 

 

བཅུ་བཞི། གོང་དཀར་ཆོས་སྡེ།

 

 

གངས་དཀར་སེམས་ལ་ནག་ནོག་གི་དྲི་མ་བྲལ་བས།

 

ཕན་ཚུན་སེམས་ངོ་འཕྲོད་པར་གྱུར།

 

དད་པ་རང་ལ་ཡོད་ན།

 

ཕྱི་མའི་ལམ་སྣེ་རང་གི་མདུན་ན་ཡོད།

 

གར་འགྲོ་རང་དབང་ཡིན་པ།

 

རང་སེམས་ནང་ལ་བསྐོར་ན་མཁྱེན་ངེས་ཡིན།

 

 

 

བཅུ་ལྔ།  ས་སྐྱ་དགོན།

 

 

དཔལ་ས་སྐྱའི་གཙུག་ལག་ཁང་ནས།

 

གླེགས་བམ་གྱི་རི་རབ་མཐོང་བྱུང་།

 

པོ་ཏི་ལྕགས་ལུང་མ་མཐོང་བྱུང་།

 

ང་ཡི་རེ་བ་མཐོང་བྱུང་།

 

 

 

དུས་དང་དུས་སུ།

 

ཆོས་དུང་དཀར་པོ་རྒྱང་གྲགས་མ་ལྷང་ལྷང་གྲག་དུས།

 

འབྱུང་འགྱུར་གྱི་འབོད་པ་ཐོས་བྱུང་།

 

 

 

བཅུ་དྲུག  གོང་དཀར་ཆོས་སྡེ་དགོན།

 

 

ཡན་ལག་ལྔ་ག་ས་ལ་བཙུགས་ནས་ཕྱག་གསུམ་ཕུལ་བ་དེ།

 

ང་རང་གི་གུས་ལུགས་ཤིག་ཡིན།

 

གསེར་རྐོང་མར་ཁུས་བཀང་ནས་ཕུལ་བ་དེ།

 

ང་རང་གི་ཚོགས་བསགས་ཤིག་ཡིན།

 

བརྗོད་འདོད་པའི་སྐད་ཆ་ཚང་མ།

 

སྒྲ་དང་དབྱངས་འགྲོས་ཤིག་གི་ཚུལ་གྱིས།

 

ཁྱོད་ཀྱི་ནམ་མཁའ་ལྟ་བུའི་ཐུགས་སྟོབས་ལ་ཞུས་ཡོད།

 

 

 

 

 

བཅུ་བདུན།  གཙང་བཀྲ་ཤིས་ལྷུན་པོ།

 

 

དུས་ཚོད་ཀྱི་གཙང་པོའི་ངོགས་ནས་འཇིག་རྟེན་ལ་དགེ་སྡུག་གི་མཐའ་གཉིས་བྱུང་།

 

གདུལ་བྱ་རྟག་འཛིན་ཅན་རྣམས་འདུལ་བའི་ཆེད་དུ།

 

སྐྱེས་ཆེན་སུ་ཞིག་གིས་དགོངས་པ་གཞན་དུ་གཏད་དུས།

 

ས་ཆེན་ལ་སྐྱོ་གདུང་གི་མྱ་ངན་འཁོར་ཡང་།

 

རྒོད་པོའི་ཚོགས་ཀྱི་རྩལ་ལྡན་གྱི་གཤོག་རྩལ་མ་ལྷོད།

 

མིག་ཆུ་སེམས་ལ་རུམ་ནས་གནམ་འཕང་བསྟད།

 

རླུང་ལ་ཚོད་བགམ་བྱས།  གཤོག་རྩེ་རླུང་ལ་བརྡར།

 

མིག་ཆུ་ཁ་ཤས་སྤྲིན་གསེབ་ལ་ལྷུང་།

 

 

 

བཀྲ་ཤིས་ལྷུན་པོའི་གསེར་ཏོག་གི་གྲིབ་སོ་ས་ལ་ལྷུང་།

 

གངས་རིའི་མུ་ཁྱུད་ཀྱིས་བསྐོར་བའི་ས་ཆེན་ལ།

 

ཡིག་དྲུག་གི་སྒྲ་དབྱངས་ངུས་ནས་བཞུར།

 

སེམས་དང་སེམས་ཀྱི་བར་ལ།

 

དགུན་ཁའི་?་འཁྱག་ལེབ་མོ་དག་འབྱར།

 

 

 

བཅོ་བརྒྱད།  ཞྭ་ལུ་དགོན་པ།

 

 

ཞ་ལུ་ལོ་ཙཱ་བས་གསུང་རབ་བསྒྱུར་དུས།

 

ཡི་གེ་ཐམས་ཅད་འོད་དུ་ཞུ་ནས།

 

དགོན་པའི་གསེར་ཏོག་དང་རྒྱ་ཕིབས་ཀྱི་ཡང་སྟེང་དུ་བབས།

 

མི་རྣམས་ཀློག་ལ་བྱང་བས།

 

ཚང་མས་ཚགས་སྡུར་བྱས་ནས་ཀློག་ཐུབ་སོང་།

 

 

 

བཅུ་དགུ།  རྒྱལ་རྩེ་དཔལ་འཁོར་ཆོས་སྡེ།

 

 

ལྷིང་འཇགས་ཀྱི་ཀློང་ནས་ཕྱི་རོལ་གྱི་གོམ་སྒྲ་ལ་ཉན་དགོས་བྱུང་།

 

དཔའ་བོའི་བཙན་རྫོང་ནས་མཆེད་པའི་སྐད་སྒྲ་ག་གེ་མོར་ཉན་ཞོར།

 

རང་གི་བདག་པོ་རྣམས་རེ་རེ་བཞིན་སྡོང་རྒན་ལྟར་འགྱེལ་ཚུལ་ལ་བལྟས་ཤིང་།

 

སྐྱོ་ངལ་རིང་མོ་ཞིག་དང་ལྷན་དུ་ཨམ་གཙིགས་བསྡམས།

 

 

 

དཔའ་བོའི་ཟུངས་ཁྲག་ཡིག་དྲུག་གི་གདངས་ལ་འདྲེས་ནས་བཞུར།

 

བུད་མེད་ཚོའི་མིག་ཆུ་ཁྱོ་བོ་ཆ་མེད་དག་གི་རུམ་ལ་ལྷུང་།

 

བརྩེ་དུང་མེད་ཀྱང་བྱིས་པ་མགོ་སེར་མང་པོ་སྐྱེས།

 

 

 

སྡུག་བསྔལ་གྱི་གོ་རིམ་འདི་དག་ལ།

 

ཆོས་སྡེ་འདིས་སྤྱན་གཟིགས་ཙམ་ལས་སྐྱོབ་ཐབས་མ་བྱུང་།

 

ལོ་ངོ་མང་པོ་ཞིག་གི་རྗེས་སུ།

 

ཆོས་སྡེ་འདིར་སླར་ཡང་བདག་པོ་གསར་པ་དག་ཐོན།

 

པར་ཆས་ཁུར་བའི་མགྲོན་པོའང་མང་པོ་ཐོན།

 

 

 

ཉི་ཤུ།  གཉན་ཆེན་གངས་བཟང་།

 

 

གཉན་ཆེན་པོ།  གངས་རིའི་ཕོ་བྲང་ན་བཞུགས།

 

དུས་བཞིར་ཁ་བའི་གོས་དཀར་མནབས་ནས།

 

ས་ཆེན་འདིའི་གཙུག་རྒྱན་ང་ཡིན་ཟེར།

 

འགྲོ་དུས་ཁ་ཆར་དང་བུ་ཡུག་བསྡུས་ནས་འགྲོ་ཞིང་།

 

ཕེབས་འོང་དུས་ཀྱང་ཁ་ཆར་དང་བུ་ཡུག་བསྡུས་ནས་ཕེབས་འོང་།

 

གཉན་ཆེན་པོ།  དུག་གི་སྡོང་བོ་ཞིག་སྟེ།

 

ཁྲོས་དུས་གངས་རིའང་མེ་རུ་འབར་ཡོང་།

 

 

 

ཉེར་གཅིག   ཡར་འབྲོག་གཡུ་མཚོ།

 

 

ནམ་མཁའི་ལྷ་དང་ལྷ་མོ་རྩེ་དགར་རོལ་བའི་དུས་ཤིག་ལ།

 

ལྷ་མོ་ཞིག་གི་གཙུག་གཡུ་མི་ཡུལ་ལ་བོར།

 

དེ་ནས་བཟུང་ང་ཚོའི་འཇིག་རྟེན་ལ།

 

སྲིད་པའི་མེ་ལོང་འདི་བྱུང་ཞིང་།

 

མཚན་ལ་ཡར་འབྲོག་གཡུ་མཚོར་གསོལ།

（ང་གཉིས་གཉིས་པོའི་ལས་དེ།།

 

ངང་བ་སེར་པོའི་ལས་རེད།།

 

ཟ་རྒྱུ་འདམ་ལས་མེད་ཀྱང་།།

 

མཉམ་ཟ་མཉམ་འཐུང་བྱས་ཆོག།）

 

 

 

ཡར་འབྲོག་གཡུ་མཚོའི་འགྲམ་ནས།

 

འཇིག་རྟེན་ལ་བརྩེ་གླུ་འདི་ཁྱབ་ཡོང་།

 

ངས《ང་ནི་ཡར་འབྲོག་གཡུ་མཚོའི་ནང་གི་ཉ་ཞིག་ཡིན》ཞེས་པའི།

 

སྒྲུང་འབྲིང་ཞིག་ལ་ལྟ་བཞིན།

 

ལྷ་མོ་དེའི་ལས་སྐལ་ལ་གཞི་ནས་སེམས་ཁུར་བྱེད་མགོ་བརྩམས།

 

 

 

ཉེར་གཉིས།  གསང་སྔགས་དགོན།

 

 

གསང་བ་སྔགས་ལ་བྱས་པས།

 

གྲུབ་པ་རང་སར་གྲོལ།

 

ཆོས་ཉིད་ཀྱི་བདེན་པ་མཐོང་ན།

 

དོན་དམ་གྱི་རང་ཞལ་མཐོང་ཡོང་།

 

 

 

ཉེར་གསུམ།  བྲག་ཡེར་བ།

 

 

གནས་འདི་ནས་མི་རྣམས་ཀྱི་སྨྲ་བརྗོད་འགག་སོང་།

 

ཡུལ་དུས་ཀྱང་ཁེགས་པར་གྱུར་བས།

 

བྲག་ཡེར་པས་ལྷིང་འཇགས་ཧྲིལ་བོ་ཞིག་གོས་སུ་གྱོན་ཡོད།

 

 

 

སྒོམ་སྒྲུབ་བྱ་སའི་བྲག་ཁུང་རེ་རེ་ནི།

 

ཉམས་རྟོགས་རིགས་ཤིག་གི་དཔའ་གདེངས་དང་འདྲ་བར།

 

ཁེར་རྐྱང་གི་དུད་པས་བསྒོས་ཡོད།

 

 

 

ཉེར་བཞི།  མཇུག་བྱང་།

 

 

ཚོར་བའི་ཡི་གེ་འདི་དག

 

ངས་ལྷ་སའི་བར་སྣང་ལ་བྲིས་ཡོད།

 

ཁྱེད་དང་བར་ཐག་ཉེ་སར་བྲིས་ཡོད།

 

 

 

ཚོར་བའི་ཡི་གེ་འདི་དག

 

ངས་ལྷ་སའི་བར་སྐོར་ལ་བྲིས་ཡོད།

 

བར་སྐོར་གྱི་ཁྲོམ་གཟིགས་སྒང་ལ་བྲིས་ཡོད།

 

 

 

ངས་ཡི་གེ་འདི་དག་འབྲི་དོན་ནི།

 

འཕྱོངས་རྒྱས་ཟླ་བ་སྒྲོལ་མ།

 

གཡུ་ཐོག་ཟམ་པ་བརྒྱུད་ནས་བུད་སོང་བས་ཡིན།

 

རིག་འཛིན་ཚངས་དབྱངས་རྒྱ་མཚོས།

 

ཞབས་རྗེས་གངས་ལ་བཞག་ནས་བུད་སོང་བས་ཡིན།

 

ངས་ཡི་གེ་འདི་དག་འབྲི་དོན་ནི།

 

ང་རང་ལྷ་སར་ཐེངས་ཤིག་ཡོང་མྱོང་བས་ཡིན།

 

 

 

2017-1-19-29ཉིན་བར་དཔལ་གྱི་ཆོས་འཁོར་ལྷ་སར་བྲིས།