ཇི་ཙམ་ཉན་ཡང་ཉན་མི་ཚར་བ་ནི།
རླུང་བུའི་སྒྲ་རེད།
ཉིན་མཚན་ཐུན་དྲུག་གི་དུས་ཚོད།
རླུང་སྒྲས་བསླུས་ཟིན་པས།
གམ་དུ་ག་ལེར་བཅར་ནས།
ཇི་ཙམ་ཉན་ཡང་ཉན་མི་ཚར་བ་ནི།
རླུང་བུའི་སྒྲ་ཁོ་ན་རེད།
ཁུ་སིམ་མེར་སྒེའུ་ཁུང་གི་འགྲམ་ནས་ཉན་དུས།
ཡང་ཡང་ཐོས་འོང་བ་དེ་ཡང་རླུང་སྒྲ་རེད།
དེ་ནི་མཛེས་སྡུག་གི་དཔྱིད་ཀ་བསུ་བའི་སྟ་གོན་ཡིན་ནམ།
ཡང་ན་ཅི་ཞིག་སྐྱེལ་ཡོང་བའི་རེ་འདོད་ཁོ་ནས།
ངས་རླུང་སྒྲ་ལ་ཉན་ཡོད།
གལ་ཏེ།
གལ་ཏེ།
རི་བོ་དེར་ཧར་གྱིས་འཛེགས་རྗེས།
ཐང་ཆེན་དེ་ཧད་ཀྱིས་བརྒལ་ན།
ངའི་སེམས་ནང་གི་ཡུལ་ལྗོངས་དེ།
མིག་ལམ་དུ་མངོན་ཐུབ་བམ།
གལ་ཏེ།
ཡུལ་ལྗོངས་དེ་ཉམས་སུ་མྱོང་རྗེས།
བག་ལ་ཉལ་བའི་ཤོག་སྙིགས་འགའ་ལ།
ཤི་འཐམ་རོ་འཐམ་བྱས་ན།
ངའི་བློ་ཁ་ཡངས་པོར་འགྲོ་སྲིད་དམ།
ཐ་སྙད་ཅིག
ཐ་སྙད་ཅིག་ཉི་མར་སྲོ་དུས།
ཉི་ཟེར་དེས་འཛུམ་ཙམ་བྱས་བྱུང་།
ཐ་སྙད་དེར་བྱིལ་བྱིལ་གཏོང་དུས།
བྱིའུ་ཆུང་ཞིག་དགུང་ལ་འཕུར།
གཤོག་སྒྲོ་མཛེས་པོ་དེ་ལྡེམ་ཞོར།
གསུང་སྐད་སྙན་མོ་ཞིག་སྒྲོག་གིན།
ཐ་སྙད་ཅིག་རྒྱང་དུ་ཁྱེར་སོང་།
ཐ་སྙད་ཅིག་རླུང་ཁར་གཡེང་དུས།
བསེར་བུ་དེས་དགོད་ཙམ་བྱས་བྱུང་།
ཐ་སྙད་དེར་རེག་རེག་བྱེད་དུས།
དར་ལྕོག་རླུང་གིས་བསྐྱོད་སོང་།
ཕྱི་ནང་རེས་མོས་སུ་སྟོན་གྱིན།
ཁ་ཕོ་རི་རབ་ཙམ་བཤད་དེ།
ཐ་སྙད་ཅིག་རྒྱང་དུ་ཁྱེར་སོང་།
ཁྱེད་རང་ངའི་མེ་ལོང་ཡིན།
དུས་ཚོད་ནི་གཙང་པོ་བཞིན་བཞུར་སོང་།
ཁྱེད་རང་ཁོ་ནས་ངའི་རུས་སྒྲོམ་སྲུང་བཞིན་འདུག
དུས་ཚོད་ཀྱིས་ཡང་ཡང་བཀྲུས་པའི་མི་ཚེའི་ཁ་དོག
ཁྱེད་རང་གཅིག་པུས་ང་ལ་སྟོན་གྱི་འདུག
ཁྱེད་ནི་ངའི་མེ་ལོང་ཡིན།
ལོ་ཟླ་ནི་བྱེ་ཕུང་བཞིན་བསགས་སོང་།
ཁྱེད་རང་ཁོ་ནས་ངའི་ཁང་ཁྱིམ་སྲུང་བཞིན་འདུག
དུས་ཚོད་ཀྱིས་ལམ་བུ་བཞིན་འཐེན་པའི་ངོ་གདོང་གི་གཉེར་མ།
ཁྱེད་རང་གཅིག་པུས་ང་ལ་སྟོན་གྱི་འདུག
ཁྱེད་ནི་ངའི་མེ་ལོང་ཡིན།