རྨི་ལམ་དང་གཙང་བོ། ད་དུང་མེ་ཏོག་རྐང་གཅིག
ཉི་འོད་འཕྲོ་བའི་ཡུལ་གྲུ་ན་མེ་ཏོག་བཞད་ཡོད།
མེ་ཏོག་གི་འདབ་མ་ན་ཟིལ་བ་སྦྲུམ་ཡོད།མིག་ཟུང་གི་ཟིལ་བ་རེ་རེ་ཡང་།
ཉི་འོད་ཀྱི་ཟེགས་མ་རུ་འཁྲུལ་ནས།
རྨི་ལམ་ལ་རྨི་ལམ་བརྩེགས་པའི་ལོ་ཟླ་ཟད་པོ།
གཙང་འགྲམ་གྱི་བྱེ་འདམ་ལ་འདྲེས།
ཁེར་རྐྱང་གི་སྣང་བ་འདི་རུ་སྦས་ནས།
རྨི་ལམ་གྱི་གཤོག་པ་འདི་རུ་བཙུགས་ནས།
གཙང་བོའི་རབ་ཁ་ནས་མེ་ཏོག་ཅིག་འཐུ་འདོད་པས་ཡིན་ནམ།
ཡང་ན། མུན་པ་དེ་ཐོལ་གྱིས་བསྲེགས་འདོད་པས་ཡིན།
ཉི་ཟེར་གྱི་འདབ་མར་ས་རྡུལ་ཕོག་པའི་ཞོགས་པ་དེར།
ཉི་ནུབ་ཀྱི་མཚམས་སྤྲིན་ལ་ནག་ཐིག་བབས་པའི་དགོང་མོ་དེར།
ཁྱོད་ཀྱི་ལག་ཏུ་སྨྱུ་གུ་ཞིག་བཟུང་ཡོད།
ས་ཆེན་གྱི་ཕྲག་གོང་ནས་བཞི་ཤད་ཅིག་བྲིས་སོང་།
གཙང་བོའི་རབ་ཁ་ལ་ཞབས་རྗེས་ཤིག་དཔར་སོང་།
གཙང་བོའི་རླབས་རིས་ཀྱིས་ཕྱི་ནས་ཕྱི་ལ་འདེད་བཞིན།
སྙིང་སྟོབས་ཀྱི་སྤོབས་པས་ནང་ནས་ནང་ལ་རྫོང་བཞིན།
ཞོགས་པ་རེ་རེ། དགོང་མོ་རེ་རེ།
ཁྱོད་ཀྱི་རྨི་ལམ་ལ་མིག་ཆུ་འཁོར་སྲིད་དམ།
ཟླ་འོད་ཀྱི་ཞགས་པའི་སྣེ་ན་ལུས་པའི་མེ་ཏོག་རྐང་གཅིག
གཙང་འགྲམ་གྱི་བྱེ་འདམ་ཁུགས་ན་ལུས་པའི་མེ་ཏོག་རྐང་གཅིག
༢༠༡༦.༥.༣ལ་གཙོས་གྲོང་ནས་བྲིས།
སྨུག་པ།
མེ་ཏོག་གི་སྐྱེད་ཚལ་མཛེས་པོ་ཞིག
རྨི་ལམ་གྱི་ཁམས་སུ་བརྗིད་ཀྱིས་བབས།
སང་ཉིན་ལ་བསྲིངས་པའི་ལག་པ་ཡ་གཅིག་གིས།
ཤོག་ངོས་ཀྱི་ཡིག་འབྲུ་རེ་རེ་བཞིན་འཐུ།
ནོར་ནག་གི་རྭ་རྩེ་ནས།
འོད་གོར་གྱི་ཐིག་ལེ་རེ་རེ་ས་ལ་ལྷུང་དུས།
གྲང་ལྟོགས་ཀྱིས་མནར་བའི་སྤྱང་ཚོགས་རི་ལ་ཤོར།
ཡིད་ཆེས་དང་ཕུགས་བསམ་བོར་བའི་རྐང་ཐང་བས།
ལག་པས་འགྲམ་པ་བསྐྱོར་ནས་ཟླ་འོད་ཀྱི་ཟེགས་མ་འཐུ།
མུན་པ་གོས་སུ་གྱོན་ཚུལ་དེ་ནི།
སྐྱ་རེངས་འཛུམ་གྱིས་བསུ་ཚུལ་དེ་ནི།
སྟོང་ཆ་རིང་མོ་ཞིག འདྲི་རྟགས་བརྗིད་པོ་ཞིག
ལམ་གྱི་བཞི་མདོ་ན་ལུས་པའི་ཡུལ་གྱར་བ་དེ་ནི།
སུ་ཞིག་གིས་བདས་པའི་སྒོ་ཁྱི་བཞིན།
འདི་ནས་གང་ཞིག་ལ་ཐོགས་མེད་དུ་ཆས་རྩིས་ཡོད་རུང་།
བཞི་མདོ་ནས་གཞུང་ལམ་འཕྲེད་དུ་གཅོད་དུས།
དམར་སེར་སྔོ་ལྗང་གི་གློག་འོད་མིག་ལ་ཕོག
རྒྱབ་ན་ཁུར་བའི་ཤོག་ལེབ་དེ་དག
མདུན་ན་བརྩིགས་པའི་ཡིག་འབྲུ་དེ་དག
རྨི་ལམ་གྱི་ཕར་ངོགས་སུ་བཏང་བའི་གྲུ་གཟིངས་ཡིན་ན།
གཙང་བོའི་རབ་ཁ་ན་འགྱིང་བའི་གསེར་གྱི་ཕོ་བྲང་དེ།
སུ་ཞིག་གི་དྲན་པ་དང་བརྩེ་བ་ཡིན།
སུ་ཞིག་གི་ཟུངས་ཁྲག་དང་མིག་ཆུ་ཡིན།
༢༠༡༦.༩.༡༥ལ་ནུབ་བྱང་མི་རིགས་སློབ་གྲྭ་ཆེན་མོ་ནས་བྲིས།
དཀར་ནག་གི་མཚམས་སུ་འགྲེང་བའི་ལས་སྐལ།
སྤྲིན་པ་ས་ལ་བབས་ཤུལ་གྱི་ཁ་བ་ཡིན་ན།
ཁྱོད་ཀྱི་ཡང་སྟེང་ན་འདབ་མའི་གཤོག་པ་ལྡེམ།
ཆུ་བོ་མར་ལ་བཞུར། སྡོང་ལོ་ཁུར་བའི་ཆུ་བོ་དེ།
སུ་ཞིག་གི་མིག་ཟུང་ལས་བཞུར་བའི་ངག་གི་སྐད་ཆ།
སུ་ཞིག་གི་དྲན་གཏིང་ན་འབྱར་བའི་ཐ་ཚིག་གི་འབོད་པ།
ཆགས་སྡང་གི་སྤུ་གྲི་ཐོགས་པའི་རྔོན་པ་དེ་དག
ཡང་ན། གྱང་གཏིང་ན་འཕག་འཚག་རྒྱག་པའི་འབུ་སྲིན་གྱི་ཚོགས།
རླུང་བུ་ངེས་མེད་དུ་རྒྱུ་བས་ཡིག་ཚོགས་ཀྱི་ཐ་སྙད་མང་བོ།
གཙང་བོ་དང་བྱེ་ཐང་གི་འཇིངས་སུ་བཏབ་རྗེས།
ཡིག་ནོར་གྱིས་ཁེངས་པའི་ལམ་ཡིག་ཅིག་མདུན་དུ་གཡུགས།
དུ་སྤྲིན་སྐྱ་བོས་གཡོགས་པའི་ནམ་མཁའ་དེ་དང་།
ཉི་འོད་ཤུགས་ཀྱིས་འཚེར་བའི་བར་སྣང་དེ་ལས།
སང་ཉིན་ཟེར་བའི་རྒྱུས་མེད་ཀྱི་རི་རབ་ཅིག་མངོན།
མཚན་ངོགས་སུ་བཏབ་པའི་ཁ་ཆར་བུ་ཡུག
དེའི་ཀློང་ན་འཚུབ་པའི་སྐར་ཚོགས་ཡོད་ཚད།
སེམས་ཁོངས་སུ་ཟགས་བཞིན་པའི་སྒྲ་དབྱངས་དེ་དག
ག་ལེར་བཏུས་ནས་ཁྱོད་ལ་བསྐུར་དུས།
དངངས་སྐྲག་དང་ཞེན་པ་ཅིག་ཅར་དུ་སྐྱེས།
དབྱར་གྱི་ཁ་བ་དང་དགུན་གྱི་ཆར་བ་དྲན་པ་དེ་ནི།
ཉི་མ་ནུབ་ཤུལ་དུ་ས་གཞིས་མུན་ནག་གྱོན་ནས།
ང་ལ་ཕུར་ཚུགས་སུ་ཡང་ནས་ཡང་དུ་བལྟའོ། །
༡༠༡༦.༡༡.༧ལ་ལན་ཇུ་ནས་བྲིས།