གླིང་གེ་སར་རྒྱལ་པོའི་བཞུགས་ཁྲི།
དཔའ་བོའི་བྱུང་བ་བརྗོད་པའི་སྙན་ངག་རིང་མོ་གླིང་གེ་སར་རྒྱལ་པོ་སྒྲུང་ནང་གི་མི་སྣ་གཙོ་བོ་གེ་སར་ནོར་བུ་དགྲ་འདུལ་ནི། བཙན་པོའི་གཉའ་གནོན་དང་། གཉོམ་ཆུང་གི་ཟེ་འཐེན་དུ་སྟོབས་དང་རྫུ་འཕྲུལ་ཕྲུལ་དུ་བྱུང་བའི་བོད་མི་རིགས་ཀྱི་དཔའ་བོ་བླ་ན་མེད་པ་ཞིག་ཡིན། གེ་སར་སྒྲུང་དེའི་གཏམ་རྒྱུད་མང་པོ་ཞིག་ཆུ་དམར་ལེབ་དང་འབྲེལ་བ་དམ་པོ་ཡོད། ཆུ་དམར་ལེབ་ནི་གེ་སར་ནོར་བུ་དགྲ་འདུལ་རྟ་རྒྱུག་རྒྱལ་འཇོག་བྱས་སའི་གནས་ཁྱད་པར་ཅན་ཞིག་ཡིན་པར་གྲགས། དེ་ཡང་གླིང་གེ་སར་རྟ་རྒྱུག་བྱེད་ས་ནི་རྨ་ཆུའི་ཆུ་མགོའི་རྫ་སྐྱ་ཐང་ནག་ཡིན(ད་ལྟ་ཆུ་དམར་ལེབ་རྫོང་རྨ་སྟོད་ཤང་གི་གནས་ས་ཡིན)། རྒྱལ་ཁ་བླངས་ནས་རྒྱལ་པོར་བཞུགས་པའི་ཁྲི་ཡང་རྫ་སྐྱ་ཐང་ནག་ཏུ་ཡོད། གེ་སར་བཞུགས་ཁྲི་ནི་རྡོ་ལེབ་མཐུག་པོས་བརྩིགས་པ་ཞིག་ཡིན། དེའི་རིང་ཚད་སྨི་1.8དང་། འཕྲེད་ལ་སྨི་1.4དང་མཐོ་ཚད་སྨི་2ཡོད་པ། རྡོ་ལེབ་མཐུག་ཚད་ཕལ་ཆེར་ལི་སྨི་15-20བར་ཡོད། རྡོ་ལེབ་ཀྱི་ངོས་མཉམ་ཞིང་བརྩེགས་མ་ཆུ་དང་འོ་མ་འདྲེས་པ་བཞིན་གཞི་གཅིག་ཏུ་གྱུར་པ་འདྲ། འོན་ཀྱང་རྫ་སྐྱ་ཐང་ནག་གི་ཕྱོགས་བཞི་རུ་དེ་འདྲའི་རྡོ་ལེབ་ལེན་རྒྱུ་མེད་པས། རྡོ་ལེབ་དེ་དག་ས་ཆ་གང་ནས་བླངས་པ་དང་ཡོ་བྱད་ཅི་ལ་བརྟེན་ནས་འདིར་བསྐྱས་པ་སོགས་ད་བར་སུས་ཀྱང་ཤེས་ཚོད་མེད་པའི་གསང་གནས་ཤིག་རེད།
གཏེར་ཆུ་དང་འབྲི་ཆུ་འདུས་མཚམས་ནས་ལེ་བར་བརྒྱད་ཙམ་ཟིན་སར་གྲོག་རོང་དོག་པོ་ཞིག་ཡོད་པ་དེར། ངག་རྒྱུན་དུ་གླིང་གེ་སར་རྒྱལ་པོའི་དཔུང་རོགས་འབྲུ་དགའ་བདེ་ཆོས་སྐྱོང་བེར་ནག་གི་བཞུགས་ས་ཡིན་པ་གྲགས། འབར་དགོན་ཡུལ་ཚོའི་མི་དམངས་སྲིད་གཞུང་ནས་གཏེར་ཆུ་གྱེན་ལ་ལེ་བར་གཅིག་ཙམ་ཕྱིན་ས་ཐང་ཆུང་ཅིག་ཡོད་པ་དེ་ལ་དགའ་བདེ་ཐང་ཟེར། ངག་རྒྱུན་དུ་དེ་ནི་འབྲུ་དགའ་བདེའི་རུ་འདུག་ས་ཡིན་པར་གྲགས། འབར་དགོན་ཡུལ་ཚོའི་མི་དམངས་སྲིད་གཞུང་ནས་སྨི་500ཙམ་གྱི་གཏེར་ཆུ་ཆུ་འགྲམ་ལ། རྡོ་ལེབ་རག་སྐྱ་ཞིག་གི་སྟེང་དུ་མིག་མང་རི་མོ་བརྐོས་ཡོད་པ་དེ་ལ་ཧོར་གླིང་དམག་འཁྲུག་ཟེར། དེ་ཡང་གེ་སར་ནོར་བུ་དགྲ་འདུལ་བདུད་འདུལ་དུ་སོང་བའི་རྗེས་སུ། ཧོར་གླིང་གཡུལ་འགྱེད་བྱུང་བ་དང་འབྲུ་དགའ་བདེ་ཚང་དུ་གནས་སྐབས་བསྡད་ཡོད་པའི་འབྲུག་མོས་གེ་སར་རྒྱལ་པོ་དྲན་དྲག་པའི་དབང་གིས་ཉིན་མོའི་ཟས་བཅག དགོང་མོའི་གཉིད་བཅག གཡོག་མོས་འབྲུག་མོའི་སྡུག་བསྔལ་སེལ་ཆེད། ཧོར་གླིང་དམག་འཁྲུག་ལ་དཔེར་བཞག་ནས་མིག་མངས་རི་མོ་ཞིག་བརྐོས་ནས་རྡེའུ་རྩེད་ཆས་ཀྱིས་དུས་འདའ་ཐབས་བྱས་ཞེས་བཤད་སྲོལ་མཆིས།
དུང་མཚོ་དང་དངུལ་མཚོ་གཉིས་ཀྱི་ཕྱོགས་ནས་བྱང་ཤར་མཚམས་སུ་རྒྱང་ལྟ་བྱས་ན། སྐྱ་ལོ་མཁར་དམར་གྱི་ནུབ་ནས་སྤྱི་ལེ་གསུམ་གྱི་ས་ཆ་ལ། རི་སྡོང་གཉིས་ཀྱི་བར་ལ་ཐང་གཞོང་ཞིག་ཡོད་པར་མཐོང་། ཐང་གཞོང་དེའི་བྱང་ངོས་ནི་རྒྱ་རྒྱའི་རི་རྒྱུད་དུ་ཐུག་ཅིང་། ལྷོ་ན་ར་བའི་སྒོ་ཆེན་དང་འདྲ་བའི་ལུང་མདའ་སྟེ། སྔར་སྐྱ་ལོའི་འདོ་བ་དགུ་བརྒྱ་རྭ་གཅིག་སོགས་རྟ་ར་ཡིན་པར་བཤད། ལྷག་པར་དུ་ར་བའི་ལྷོ་ནུབ་ཀྱི་རི་སྡོང་ངོས་ལ་གསལ་ལ་མི་གསལ་བའི་གྱང་བརྡུང་བའི་ཤུལ་ཡང་མཐོང་། ལུང་པ་འདིའི་མིང་ལ་ལུང་སྔོ་ཆེན་ཞེས་ཟེར་ཏེ། ལུང་པ་དེ་དུང་མཚོ་དཀར་མོའི་སྔོ་རེངས་ཕྱོགས་སུ་ཡོད་པས་དེའི་ཁ་དོག་གིས་ས་མིང་ཀྱང་སྔོ་ཆེན་ཟེར་ཞེས་ངག་རྒྱུན་དུ་གྲགས། ལུང་པའི་མདའ་ནི་སྒ་སྐྱ་ལོ་ཚང་གི་རྟ་ར་སྟེ། དམངས་ཁྲོད་དུ་འབྲུག་མོའི་རྟ་ར་ཞེས་པའི་མིང་ཆགས།
ཁྲ་ཕུ་དང་འབྲེལ་མཚམས་ཀྱི་སྲིབ་རྒྱབ་ལུང་ཞོལ་དུ་སོ་རིང་སོ་ཐུང་ཞེས་པ་དེ་ནི་གླིང་སྒྲུང་དུ་ཁྲ་རྒན་གྱིས་སྒྲིག་འཛུགས་བྱས་པའི་ཕྱི་དགྲ་འགོག་སྲུང་གི་སོ་ལྟ་ཕྱི་ནང་གཉིས་ཡོད་པའི་ཆ་ནས་བཏགས་ཤིང་། གླིང་སྒྲུང་གི་ས་མིང་འབོད་སྟངས་དང་གཅིག་མཚུངས་རེད། དེ་དང་འབྲེལ་མཚམས་སུ་གཡས་གཡོན་ལུང་པ་གཉིས་ཡོད་དེ། གཡས་ལུང་པ་ལ་སྣང་ཆུང་ལུང་དང་གཡོན་ལུང་པ་ལ་ཁྲ་ཕུ་ཞེས་འབོད། ས་མིང་དེ་འབོད་དོན་ནི། ལུང་པ་དེ་ལ་སྤྱི་དཔོན་གྱི་བརྒྱུད་པ་བུ་གསུམ་གྱི་ཡ་གྱལ་དང་སྣང་ངུ་གཡུ་སྟག་གི་གདུང་འབུམ་ཡིན་པར་གྲགས། ཨ་ཁུ་སྤྱི་དཔོན་རྒྱལ་པོའི་སྲས་ཆུང་སྣང་ངུ་གཡུ་སྟག་དེ་ཉིད་ཧོར་གླིང་གཡུལ་འགྱེད་ཀྱི་སྐབས་སུ་བདུད་བློན་ཨ་ལྔ་མཐེབ་དྲུག་གིས་མདའ་དྲུག་གིས་ལམ་ནས་བསད། དེ་བས་ཁོང་གི་གདུང་འབུམ་དེ་སྤྱི་སྤྱོད་ལམ་ཆེན་ནས་སྤྱི་ལེ་བཞི་ལྔ་ཡི་མཚམས་སྣང་ཆུང་ཞེས་པའི་ཕུ་ལ་དེའུ་གཉིས་ཡོད། གཅིག་ལ་གོ་ཁྲབ་དང་གཅིག་ལ་སྐུ་གདུང་སྦས་ཡོད་ཅེས་གནའ་མི་ཕལ་མོ་ཆེའི་བཤད་སྲོལ་ལ་སྣང་ཆུང་གདུང་འབུམ་ཞེས་གྲགས། །
