སྤོ་བོའི་མཐའ་མཇུག་གི་རེ་བ་དང་དབུས་རྡོ།

ཟླ་ངོ་གཅིག་གི་ཡར་སྔོན་ལ།

ང་རང་ཆུང་མ་དང་མཉམ་དུ་ལྷ་སར་འགྲོ་ཁར། ངའི་སྤོ་བོས།

སྐམ་རིད་ཀྱི་ལག་ཟུང་གིས་ངའི་ལག་པར་དམ་པོར་འཇུ་བཞིན།

ལྷ་ས་ནས་ཕྱིར་ཕ་ཡུལ་ལ་ལོག་སྐབས།

ང་ལ་ལྷ་ས་ནས་ཅིས་ཀྱང་དབུས་རྡོ་ཞིག་ཁྱེར་ནས་ཤོག་ཟེར།

སྐད་ཆ་མང་པོ་མང་པོ་ཞིག་བརྗོད་རྒྱུ་ཡོད་ཀྱང་།

སྐད་ཆ་ཡོད་ཚད། མིག་ཆུ་དང་ལྷན་དུ་ཁོག་ལ་བཅུག་ནས།

ཆུང་མ་དང་མཉམ་དུ་ལྷ་སར་བསྐྱོད་པའི་ལམ་ལ་ཞུགས།

མེ་འཁོར་གྱི་སྒེའུ་ཁུང་ལས། ཐེངས་དང་པོར།

ཕོ་བྲང་པོ་ཏ་ལ་མིག་ལམ་ལ་འཆར་འོངས་དུས།

མིག་ཆུ་ཐིགས་པ་གཉིས། རྦབ་རྡོ་བཞིན།

ངའི་མཁུར་མགོ་བརྒྱུད་དེ། རླུང་གིས་འཁྱེར་ནས།

སྒེའུ་ཁུང་གི་ཕྱི་རོལ་ལ་འཕུར་སོང་།

ལྷ་སར་འབྱོར་རྗེས། སྤོ་བོ་ལགས་ལ་ཁ་པར་བཏང་བ་ན།

ཁ་པར་ལས། སྤོ་བོས་ངག་འདར་འདར་གྱིས།

ཁྱོད་གཉིས་བདེ་བླག་ངང་ལྷ་སར་འབྱོར་སོང་བ་དེ་ནི།

ཁྱོད་གཉིས་ཀྱི་སྐྱེ་བ་སྔོན་མའི་ཚོགས་བསགས་རེད་ཟེར།

ཁྱོད་གཉིས་བདེ་བླག་ངང་ཕྱིར་ཕ་ཡུལ་ལ་འབྱོར་རྒྱུ་དེ་ནི།

བཟའ་མི་ཡོངས་ཀྱི་སེམས་གཏིང་གི་རེ་བ་ཡིན་ཟེར།

དེ་ལས་གཞན། ལྷ་ས་ནས་ཕྱིར་ཕ་ཡུལ་ལ་ལོག་སྐབས།

ང་ལ་དབུས་རྡོ་ཞིག་འཁྱེར་འོང་རྒྱུ་དེ་ཡིད་ལ་དམ་པོར་འཇགས་རོགས་ཟེར།

གཟའ་འཁོར་གཉིས་ཀྱི་རིང་ལ། ལྷ་སའི་ཕྱོགས་ཀྱི་གནས་འགངས་ཆེན་དག་ལ་ཕྱིན་ནས།

སྐུ་གསུང་ཐུགས་རྟེན་དག་ལ་ཕྱག་འཚལ་ཞིང་ཐོད་པ་གཏུགས་རྗེས།

སླར་ཡང་ལྷ་སའི་གྲོང་ལ་འབྱོར་སོང་།

ཉིན་གཉིས་གསུམ་ཙམ་གྱི་རྗེས་སུ། སྤོ་བོ་ལགས་ཀྱིས་ཁ་པར་ལས།

ང་ལ་དབུས་རྡོ་ཞིག་འཁྱེར་ཡོང་རྒྱུ་དེ་གཏན་ནས་བརྗེད་མི་ཉན་ཞེས།

ཡང་དང་བསྐྱར་དུ་བརྗོད་བྱུང་།

ངས་ལན་དུ། དོན་ངོ་མར་ལྷ་སའི་རྡོ་ལ་རིན་ཐང་ཅི་ཞིག་ཡོད་ཅེས་སྨྲས་པ་ན།

ཁོས་ཤུགས་རིང་ཞིག་ཕྱུངས་རྗེས། དེང་སང་གི་ལོ་ཆུང་རྣམས་ལ་དེ་ཡི་རིན་ཐང་བཤད་ན།

ཡིད་ཆེས་གཏན་ནས་བྱེད་མི་སྲིད་ཅེས་བརྗོད་བྱུང་།

ཕ་ཡུལ་ལ་ལོག་སྐབས་ཀྱི་ཉིན་སྔོན་མར། ང་རང་ཆུང་མ་དང་མཉམ་དུ།

ཕོ་བྲང་པོ་ཏ་ལར་མཐའ་མཇུག་གི་གྱེས་ཕྱག་འབུལ་དུ་ཕྱིན།

ཕྱིར་ལོག་ཁར། ཆུང་མ་དང་ངེད་གཉིས་དམར་པོ་རིའི་སྟེང་ལ་འགོས་སྟེ།

དབུས་རྡོ་ཞིག་བཙན་གྱིས་བཀོག་ནས་ཁུར་ཁུག་ནང་ལ་བཅུག

སླར་ཡང་མེ་འཁོར་ལ་བསྡད་དེ།

ཉིན་གཉིས་ཙམ་གྱི་རྗེས་སུ་ལྷ་སའི་གྲོང་ནས་ཕ་ཡུལ་ལ་འབྱོར་རྗེས།

བཟའ་མི་རེ་རེར་ཕྱག་མདུད་དང་ཕྲེང་བ་རེ་རེ་ལེགས་སྐྱེས་སུ་བྱིན་ཞིང་།

ཁུར་ཁུག་ལས་དབུས་རྡོ་བླངས་ཏེ་སྤོ་བོ་ལགས་ལ་ཕུལ་པ་ན།

སྤོ་བོ་ལགས་ཀྱིས་དབུས་རྡོ་དེ་ལག་ཟུང་གིས་བཏེགས་ནས།

མིག་ཟུང་བཙུམས་སྟེ་ཐོད་པ་ཐེངས་གསུམ་གཏུགས་རྗེས།

བཟའ་མི་རེ་རེར་ཐོད་པ་གཏུགས་སུ་བཅུག་ཅིང་།

མཆོད་ཁང་གི་ནང་ལ་སོང་སྟེ། ཁ་བཏགས་སེར་པོ་ཞིག་གིས་ལེགས་པར་དཀྲིས་རྗེས།

ལྷའི་སྐུ་མདུན་ལ་བཞག་སོང་།

དབུས་རྡོ་དེ་དངོས་སུ་ལག་ལ་ཐོབ་པའི་ཉིན་མོ་དེ་ནས་བཟུང་སྟེ།

སྤོ་བོ་ལགས་ཀྱི་སྨྲ་བ་ཇེ་མང་དུ་ཕྱིན་འདུག་ཅིང་།

ངས་ཀུ་རེའི་ཚུལ་དུ།

དོན་ངོ་མར་ལྷ་སའི་རྡོ་ལ་རིན་ཐང་ཅི་ཞིག་ཡོད་ཅེས་འདྲི་ཐེངས་རེར།

ཁོས་ནམ་རྒྱུན་པུས་མོའི་སྟེང་ལ་ཤུགས་ཀྱིས་ཐལ་ལྕག་གིས་ཐེངས་ཤིག་བརྒྱབ་ཏེ།

གད་མོ་ཐག་གེ་བ་ཞིག་བགད་རྗེས།

དེང་སང་གི་ལོ་ཆུང་རྣམས་ལ་དེ་ཡི་རིན་ཐང་བཤད་ན།

ཡིད་ཆེས་གཏན་ནས་བྱེད་མི་སྲིད་ཅེས་བརྗོད་འོངས་ཤིང་།

ངས་སླར་ཡང་ཀུ་རེའི་ཚུལ་དུ།

འོ་ན་ལྷ་སའི་རྡོ་ལ་ཁྱད་ཆོས་ཅི་ཞིག་ཡོད་ཅེས་འདྲི་དུས།

ཁོས་དེ་མ་ཐག ལྐོག་ཏུ་ལྷུང་བའི་མིག་ཟུང་གིས།

ངའི་གདོང་ལ་འབུར་ཚུགས་སུ་བགྲད་བཞིན།

ལྷ་སའི་རྡོ་ལ་རྣམ་ཤེས་ཡོད་པ་རེད་ཅེས་བརྗོད་འོངས།