ཤར་མར་གཏོང་བའི་ལམ་ཆེན་ལས། འགྲོ་འདུག་དཀག་ཁག་སེལ་བར་བྱས།

བཅོས་བསྒྱུར་སྒོ་འབྱེད་བྱས་ཚུན། དཀར་མཛེས་ཁུལ་གྱིས་འགྲིམ་འགྲུལ་རྨང་གཞིའི་སྒྲིག་བཀོད་འཛུགས་སྐྲུན་ཐད་མ་དངུལ་གཏོང་ཤུགས་ཆེ་རུ་བཏང་བས་ཁུལ་ཡོངས་ཀྱི་གཞུང་ལམ་གཙོ་བོའི་དྲ་རྒྱའི་མ་ལག་གཞི་རྩའི་ཐོག་ཆགས་ཡོད་པ་དང་། རོང་འབྲོག་མང་ཚོགས་ཕྱིར་འགྲིམ་པར་སྟབས་བདེ་ཆེན་པོ་བསྐྲུན་ཡོད།
2017ལོའི་ཟླ་12པའི་ཚེས་31ཉིན། གཡག་རྔ་ནས་དར་མདོ་བར་གྱི་མྱུར་བགྲོད་གཞུང་ལམ་ཁོངས་ཀྱི་གཡག་རྔ་ནས་ལྕགས་ཟམ་ཁ་ལམ་མཚམས་སི་ཁྲོན་མྱུར་བགྲོད་གཞུང་ལམ་དྲ་བའི་ཚོད་ལྟའི་འཁོར་སྐྱོད་གྲས་སུ་བཞག་ཅིང་། དེ་ནས་བཟུང་དཀར་མཛེས་བོད་ཁུལ་དུ་མྱུར་བགྲོད་གཞུང་ལམ་མེད་པའི་ལོ་རྒྱུས་ལ་རྫོགས་ཚིག་འགོད་ཅིང་། ཁྲེན་ཏུའུ་ནས་དར་མདོ་བར་དུས་ཚོད་4ཙམ་ལས་འགྲོ་མི་དགོས་ཤིང་། དཀར་མཛེས་བོད་ཁུལ་མྱུར་བགྲོད་གཞུང་ལམ་གྱི་འཕེལ་རྒྱས་དུས་རབས་སུ་སླེབས་པའོ། ། ལྕགས་ཟམ་ཁ་ནས་དར་མདོའི་བར་གྱི་མྱུར་བགྲོད་གཞུང་ལམ་ཡང་མིག་སྔར་གྱི་འཆར་གཞི་ལྟར་ན་2018ལོའི་ལོ་མཇུག་ཚུན་དུ་ཤར་གཏོང་ལེགས་འགྲུབ་ཡོང་རྒྱུ་རེད།