··ཁོང་གི་བརྩམས་ཆོས་ནང་བཞེངས་པའི་མི་སྣའི་གཟུགས་བརྙན་དག་ལས་བྱིས་པའི་དྭངས་གཙང་ལྷད་མེད་དང་བློ་བདེ་བག་ཕེབས་ཀྱི་རང་གཤིས་མངོན་ཞིང་། དུས་དང་ཁོར་ཡུག་གི་འགལ་འདུའི་ཁྲོད་ལས་བྱུང་བའི་ཐུན་མིན་གྱི་རྣམ་པ་ཞིག་ཀྱང་ངང་ངམ་ཤུགས་སུ་འཆར་ཞིང་། ཁོང་གི་བརྩམས་ཆོས་ལ་དོན་ཇི་བཞིན་བརྗོད་པ་དང་ལྐོག་འགྱུར་གྱི་རང་བཞིན་གཉིས་ཀ་ལྡན་ཡོད་པས། སྔོན་མས་ང་ཚོར་ཁོང་གི་བརྩམས་ཆོས་ཀྱི་འཇིག་རྟེན་ལ་མྱོང་རོལ་བྱེད་འདོད་ཀྱི་བློ་སྒོ་ཡངས་པོར་ཕྱེ་ཞིང་། ཕྱི་མས་ང་ཚོ་ལྐོག་འགྱུར་གྱི་བསམ་གཞིགས་ཀློང་དུ་ཚུད་པར་བྱེད་བཞིན་ཡོད། མིག་སྔར་བཀྲ་ཡེ་དོན་ནེས་གསར་རྩོམ་གྱི་རྣམ་པར་འགྱུར་ལྡོག་བཏང་སྟེ་བརྒྱུད་ལམ་གསར་པ་དང་། རི་མོའི་རྣམ་པ་གསར་པ། བརྗོད་བྱའི་མཚོན་དོན་གསར་པ་བཅས་འཚོལ་ཞིབ་བྱས་ནས། རང་གི་རི་མོ་དང་འཇིག་རྟེན་ལ་འཛིན་པའི་འདོད་ཚུལ་གསར་རྐྱང་ཞིག་ལ་རེ་སྙེག་བྱེད་བཞིན་ཡོད།
··བཀྲ་ཡེ་དོན་ནེ་ནི་བོད་ཀྱི་ན་གཞོན་རི་མོ་བ་ཞིག་ཡིན་པའི་ཆ་ནས། ཁོང་གི་བརྩམས་ཆོས་དག་ལས་མར་རྩམ་གྱི་དྲི་ངད་འཐུལ་ཞིང་། དེ་ལས་ཀྱང་ཡིད་དབང་འཕྲོག་པ་ཞིག་ལ་ཁོང་གི་གསར་རྩོམ་ལ་རང་ངོས་ཀྱི་ཉམས་མྱོང་དང་རང་གནས་སའི་ཁོར་ཡུག་གི་ཚད་བཀག་མ་ཐེབས་པར། ཡངས་ཤིང་རྒྱ་ཆེ་བའི་སྟོང་གསུམ་ཁམས་ཆེན་པོའི་མྱོང་བ་དང་འཚོར་འདུ་དག་ཀུན་འཕྲོད་རང་བཞིན་གྱི་ཐོག་ནས་ང་ཚོའི་མིག་མདུན་དུ་བཤམས་ཡོད། །
