གཉེན་སྒྲིག་ཐོ་འགོད་བྱེད་པར་ཆ་རྐྱེན་གང་དག་ཚང་དགོས།

གྱོད་དཔེ།

ཕག་མོ་དོན་གྲུབ་ཀྱིས་གཉེན་རྟགས་བརྒྱབ་སྟེ་ལོ་གཉིས་གསུམ་ཙམ་འགོར་ནའང་ཁྱིམ་ཚང་ཕན་ཚུན་ལ་ཤི་རྨས་སོགས་ཀྱི་ཆག་སྒོ་གཅིག་རྗེས་གཉིས་མཐུད་དུ་བྱུང་བས། གཉེན་སྟོན་གྱི་ཆོ་ག་བཤམས་མ་ཐུབ་པའི་ཁར་གཉེན་སྒྲིག་ཐོ་འགོད་ཀྱི་འགྲོ་ལུགས་ཀྱང་བསྒྲུབ་མེད། ན་ནིང་དབྱར་ཁར་མ་འོངས་པའི་མནའ་མ་སྟེ། ཀླུ་མོ་རང་ཁྱིམ་གྱི་ཁང་གཞིས་གསར་པ་ཕུབ་བཞིན་པའི་སྒང་ལ་སྟབས་མ་ལེགས་པར་ཁང་ཐོག་ནས་སར་ལྷུང་སྟེ་རྨས་སྐྱོན་ཚབས་ཆེན་བཟོས་ཏེ་རྫོང་སྨན་ཁང་དུ་བསྟན་པ་ན། སྨན་པས་མྱུར་བུར་གཤག་བཅོས་བྱེད་དགོས་ཚུལ་དང་། གལ་ཏེ་གཤག་བཅོས་ལེགས་འགྲུབ་བྱུང་ནའང་བྱིས་པ་སྐྱེས་པའི་ནུས་པ་ཤོར་སོང་ཞེས་བཤད། སྐབས་དེར་ཕ་མ་གཉིས་ཀྱིས་བུ་མོ་སྲོག་ཉེན་ལས་ཐར་ཐུབ་ཚེ་ཅི་བྱུང་ན་བྱུང་ཞེས་གཤག་བཅོས་བྱས། ཀླུ་མོ་སྨན་ཁང་ནས་བུད་རྗེས་ཕག་མོ་དོན་གྲུབ་ལ་གཉེན་སྒྲིག་ཐོ་འགོད་ཡི་གེ་ལེན་དུ་འགྲོ་ཞེས་ཡང་ཡང་སྐུལ་ནའང་ཁོས་མོ་ལ་ཁ་ཡ་མ་བྱས།

ཁྲིམས་བཤད།

རང་རྒྱལ་གྱི་《གཉེན་སྒྲིག་བཅའ་ཁྲིམས།》ལས་གཏན་ཁེལ་བྱས་པ་ལྟར་ན། གཉེན་སྒྲིག་ཆ་རྐྱེན་ལ་ངེས་པར་དུ་ཚང་དགོས་པའི་ཆ་རྐྱེན་གསུམ་དང་དེར་བཀག་འགོག་བྱེད་པའི་ཆ་རྐྱེན་གཉིས་ཡོད་དེ། ཆ་རྐྱེན་འདི་གཉིས་དང་མཐུན་པའི་གནས་ཚུལ་འོག ཁྱོ་ཤུག་ཟུང་གིས་གཉེན་སྒྲིག་ཐོ་འགོད་བྱས་ན་ད་གཟོད་ཁྲིམས་ནུས་ལྡན་པ་ཞིག་ཡིན།

དང་པོ། གཉེན་སྒྲིག་བྱེད་དུས་ངེས་པར་དུ་ཚང་དགོས་པའི་ཆ་རྐྱེན་གསུམ་ནི།

གཅིག ངེས་པར་དུ་ཕོ་མོ་གཉིས་རང་དབང་རང་འཐད་ཡིན་དགོས། རང་རྒྱལ་གྱི་《གཉེན་སྒྲིག་བཅའ་ཁྲིམས།》ཀྱི་དོན་ཚན་གཉིས་པའི་ཚན་པ་དང་པོའི་གཏན་ཁེལ་ལྟར་ན། གཉེན་སྒྲིག་རང་དབང་དང་ཁྱོ་གཅིག་ཤུག་གཅིག ཕོ་མོ་འདྲ་མཉམ་བྱེད་པ་ནི་གཉེན་སྒྲིག་ལམ་ལུགས་ཀྱི་ཆེས་གཙོ་བོའི་རྩ་དོན་ཡིན། ཕོ་མོ་གཉིས་ཀ་རང་དབང་རང་འཐད་ཡིན་ཟེར་བ་ནི། ཕོ་མོ་གཉིས་ཀར་རང་དབང་རང་འཐད་ཡིན་དགོས་པ་ལས་ཕྱོགས་གཅིག་ཁོ་ན་འཐད་པ་བྱུང་བའམ་ཡང་ན་བཙན་གྱིས་འཐད་པ་བྱུང་དུ་འཇུག་པ། མི་གཞན་གྱི་བསམ་བློའི་རེ་བ་ལྟར་གཉེན་སྒྲིག་བྱེད་དུ་འཇུག་མི་ཆོག་པ་ལ་གོ ཕོ་མོ་གཉིས་ཡིད་མཐུན་བྱུང་བ་ཟེར་བ་ནི་ཕྱོགས་གཉིས་ཀྱི་ལྷད་མེད་ཀྱི་བརྩེ་དུངས་གཞིར་འཛིན་དགོས་པ་ལས་ཐུན་མོང་དང་མི་སྒེར་གང་རུང་གིས་དེ་ལ་ཐེ་གཏོགས་དང་བཙན་ཤེད་ཀྱི་བྱ་སྤྱོད་སྤེལ་མི་ཆོག

གཉིས། ངེས་པར་དུ་ཁྲིམས་ཀྱི་གཏན་ཁེལ་བྱས་པའི་གཉེན་སྒྲིག་གི་ལོ་ཚོད་ཐོན་དགོས། 《གཉེན་སྒྲིག་བཅའ་ཁྲིམས།》ཀྱི་དོན་ཚན་དྲུག་པའི་གཏན་ཁེལ་ལྟར་ན། གཉེན་སྒྲིག་བྱེད་པའི་ལོ་ཚོད་ནི་ཕོ་ལོ་ཉེར་གཉིས་དང་མོ་ལོ་ཉི་ཤུ་ཡིན། གཞན་གཉེན་འཕྱི་སྒྲིག་དང་བྱིས་པ་ཉུང་སྐྱེ་བྱེད་པར་སྐུལ་སློང་བྱེད་པ་ཡིན། གཉེན་འཕྱི་སྒྲིག་ནི་ཕོ་ལོ་ཉེར་ལྔ་དང་མོ་ལོ་ཉེར་གསུམ་གྱི་རྗེས་སུ་གཉེན་སྒྲིག་བྱེད་པ་ལ་ཟེར།

གསུམ། ངེས་པར་དུ་ཁྱོ་གཅིག་དང་ཤུག་གཅིག་གི་ལམ་ལུགས་དང་མཐུན་དགོས། ལམ་ལུགས་འདི་ནི་དེང་རབས་དཔལ་ཡོན་སྤྱི་ཚོགས་ཀྱི་གཉེན་སྒྲིག་ལམ་ལུགས་ཡིན། ཁྱོ་གཅིག་ཤུག་གཅིག་གི་ལམ་ལུགས་ལག་བསྟར་བྱས་པ་འདིས་གཉེན་སྒྲིག་བྱས་ཡོད་པའི་མིར་སླར་ཡང་གཉེན་སྒྲིག་བྱེད་པར་བཀག་འགོག་བྱེད་པ་ཡིན། གལ་ཏེ་ཁྱོ་ཤུག་ཡོད་པའི་མིས་སྔར་ཡོད་ཀྱི་གཉེན་སྒྲིག་འབྲེལ་བ་མེད་པར་མ་བཟོས་པར་ཡང་བསྐྱར་གཉེན་སྒྲིག་བྱས་པ་དེ་གཉེན་སྒྲིག་ཉིས་རྩེག་ཏུ་གྲུབ་པ་ཡིན། འདི་གཉིས་ལས་འགལ་ནས་གཉེན་སྒྲིག་བྱས་པ་ལ་ཁྲིམས་ནུས་མི་ལྡན་པར་མ་ཟད། བཅའ་ཁྲིམས་ནང་གཏན་ཁེལ་བྱས་པ་ལྟར་འགན་འཁུར་དགོས།

གཉིས་པ། གཉེན་སྒྲིག་བཀག་འགོག་བྱེད་པ་ལ་ཆ་རྐྱེན་གཉིས་ཡོད་དེ།

གཅིག སྤུན་མཆེད་དང་མི་རབས་གསུམ་བར་གྱི་རྒྱུད་འབྲེལ་སྤུན་མཆེད་ཡིན་པ།

གཉིས། གསོ་རིག་ལས་གཉེན་སྒྲིག་བྱེད་མི་འོས་པའི་ནད་རིགས་ཡོད་པ། ལག་ལེན་ཁྲོད་གསོ་བ་རིག་པའི་གཞུང་ལུགས་ལྟར་གཉེན་སྒྲིག་བྱེད་མི་འོས་པའི་ནད་རིགས་གཙོ་བོ་ནི་ཚབས་ཆེ་བའི་འགོས་ནད་རང་བཞིན་གྱི་ནད་རིགས་དང་དམིགས་བསལ་གྱི་འགོས་ནད་ཚབས་ཆེན། སྨྱོ་ནད་བཅས་ནད་རིགས་གསུམ་ཡིན། གལ་ཏེ་ཁྱོ་ཤུག་ཕྱོགས་གཅིག་ལ་ནད་རིགས་འདི་གསུམ་ལས་གཅིག་ལྡན་ཚེ་གཉེན་སྒྲིག་ཐོ་འགོད་མ་བྱས་ཀྱང་ཆོག ། 




གྱོད་དཔེ།

ཀླུ་ཐར་དང་བཙུན་ཐར་སྐྱིད་གཉིས་ནི་མིང་སྲིང་གཉིས་ཀྱི་བྱིས་པ་ཡིན། ཀླུ་ཐར་ལ་མཚོན་ན་ཕ་གཅིག་ལ་བུ་གཅིག་པོ་ལས་མེད་པས། ཆུང་དུས་ནས་ཁྱིམ་ཚང་གི་གཞི་འཛིན་ཡིན་ཟེར་ནས་སློབ་གྲྭར་འགྲོ་རུ་མ་བཅུག་པར་རང་ཡུལ་ན་ནོར་ལུག་འཚོ་བཞིན་ཕ་མ་གཉིས་ལ་སྲི་ཞུ་གང་ལེགས་སྒྲུབ་ཅིང་ཡོད། ཀླུ་ཐར་ནི་མི་གཞུང་དྲང་ཞིག་ཡིན་པའི་ལས་ལ་བརྩོན་ཞིང་ཕ་མར་བྱམས་སྐྱོང་ཆེ་བའི་བུ་ཆུང་ཡ་རབས་ཤིག་ཡིན་ནའང་། ཕོ་ལོ་ཉི་ཤུ་ནས་སུམ་ཅུ་འབུད་ལ་ཉེ་ཡང་ད་དུང་མནའ་མ་བླངས་མེད། ཕ་མ་དང་གཉེན་ཉེ་ཚང་མ་འཚུབ་ཆ་ལངས་ཏེ་ཀླུ་ཐར་ལ་མནའ་མ་བཙལ་དགོས་ཟེར་ནས་གྲོས་ཁ་ཡང་ཡང་བྱས་མོད། རང་སྡེ་ཚོ་དྲུག་ཁྲོད་ན་ཀླུ་ཐར་ལ་རན་པའི་མནའ་མ་ཞིག་ཅིས་ཀྱང་མ་རྙེད། བུ་མོ་བཙུན་ཐར་སྐྱིད་ལ་མཚོན་ན་ཀླུ་ཐར་གྱི་ཨ་ནེ་ཡི་བུ་ཆུང་བ་ཡིན་ལ་སློབ་གྲྭ་མཐར་ཕྱིན་ཏེ་ལས་བྱེད་ཀྱི་གྲས་སུ་མ་ཚུད་པས་རང་ཡུལ་དུ་བསྡད་ཡོད། ཉིན་ཞིག་ཁོ་མོའི་ཤ་ཉེ་རྣམས་འདུས་ཏེ་བུ་མོ་འགྲོ་ས་གནས་ཡིན་ཟེར་ནས་ཀླུ་ཐར་ལ་མནའ་མར་བྱིན། ཀླུ་ཐར་དང་བཙུན་ཐར་སྐྱིད་གཉིས་མིང་སྲིང་གཉིས་ཀྱི་བྱིས་པ་ཡིན་པས་འདི་ལྟར་གཉེན་སྒྲིག་བྱས་ཆོག་གམ།

ཁྲིམས་བཤད།

ཤ་རུས་གཅིག་པའི་གཉེན་ཚན་ཞེས་པ་ནི་ཐད་ཀར་ཁྲག་རྒྱུད་ཀྱི་འབྲེལ་བ་ཡོད་པའི་གཉེན་ཚན་ཏེ། རང་ཉིད་ཀྱི་ཕ་མ་དང་། རང་ཉིད་ལས་སྐྱེས་པའི་བྱིས་པར་གོ དཔེར་ན་ཕ་མ་དང་། སྤོ་བོ་སྤོ་མོ། བུ་བུ་མོ་དང་ཚ་བོ་ཚ་མོ་སོགས་ཡིན། རྒྱུད་འབྲེལ་གཉེན་ཚན་ཞེས་པ་ནི་ཐད་ཀར་ཁྲག་རྒྱུད་ཀྱི་འབྲེལ་བ་མེད་ཀྱང་། རང་ཉིད་དང་རུས་རྒྱུད་གཅིག་པའི་ཤ་ཉེ་ལ་གོ མི་རབས་གསུམ་ནང་ཚུན་གྱི་རྒྱུད་འབྲེལ་གཉེན་ཚན་ཞེས་པ་ནི་རང་ཉིད་ནས་ཡར་རྩིས་པའི་སྤོ་བོ་རྨོ་བོ་དང་། མར་རྩིས་པའི་ཚ་བོ་ཚ་མོའི་བར་གྱི་ཤ་ཉེ་ལ་གོ

ཁྲག་རྒྱུད་ཀྱི་འབྲེལ་བ་ཉེ་བའི་ཤ་ཉེ་དང་གཉེན་སྒྲིག་བྱས་ཚེ། ལུས་སེམས་གང་རུང་ནས་ངན་ཆད་མང་པོ་གསོག་འཇོག་དང་རྒྱུད་འཛིན་བྱས་ནས་མི་རབས་ཕྱི་མའི་ལུས་ཕུང་བདེ་ཐང་ལ་གནོད་པ་ཚབས་ཆེན་ཐེབས་ཡོང་བ་མ་ཟད། མི་ཆོས་ཀུན་སྤྱོད་ཀྱི་གནས་ལུགས་དང་ཡང་མི་མཐུན་པ་ཡིན།

རང་རྒྱལ་གྱི་《གཉེན་སྒྲིག་བཅའ་ཁྲིམས》ཀྱིས་གཏན་ཁེལ་བྱས་ཡོད་པ་ལྟར་ན།

གཅིག ཤ་རུས་གཅིག་པའི་གཉེན་ཚན་དང་མི་རབས་གསུམ་ནང་ཚུན་གྱི་རྒྱུད་འབྲེལ་གཉེན་ཚན། ཤ་རུས་གཅིག་པའི་གཉེན་ཚན་ནི་ཕ་མ་དང་བུ་ཕྲུག སྤོ་བོ་རྨོ་བོ་དང་ཚ་བོ་ཚ་མོ་ཡིན། རྒྱུད་འབྲེལ་གཉེན་ཚན་ནི་གཅེན་གཅུང་མིང་སྲིང་དང་། ཕ་རྒྱུད་ཀྱི་གཅེན་གཅུང་མིང་སྲིང་། མ་རྒྱུད་ཀྱི་གཅེན་གཅུང་མིང་སྲིང་། མི་རབས་མི་གཅིག་པའི་ཁུ་དབོན་དང་དབོན་ཞང་བར་སོགས་ལ་གོ

གཉིས། གསོ་རིག་ཐོག་གཉེན་སྒྲིག་བྱས་མི་ཆོག་པར་འདོད་པའི་ནད་ཡོད་པ། གཙོ་བོ་གཤམ་གསལ། གཅིག མཚན་མའི་ནད་སངས་དྲག་ཏུ་མ་སོང་བ། གཉིས། ཚབས་ཆེ་བའི་གདོན་ནད་དང་སྨྱོ་ནད། གསུམ། ན་བཞིན་པའི་ཁྲིམས་བཀོད་འགོས་ནད་དེ། དཔེར་ན། ཨེ་ཙི་འགོས་ནད། འགོ་སླ་བའི་གློ་བའི་གཉན་རིམས། མཆིན་ཚད་མཐོ་བ་ལྟ་བུ། བཞི། སྤྱིར་བཏང་དུ་འཁྲིག་སྦྱོར་བྱེད་ནུས་མེད་མཁན་གཉེན་སྒྲིག་བྱས་མི་ཆོག་མོད། ཡིན་ནའང་ཕྱོགས་གཉིས་ཀ་ལོ་ན་བགྲེས་པ་དང་། ན་ཚ་ཡོད་པ། འཁྲིག་སྦྱོར་བྱེད་ནུས་མེད་པ་བཅས་ཕན་ཚུན་གྱིས་ཤེས་ཡོད་ཚེ་གཉེན་སྒྲིག་བྱ་ཆོག་པ་ཡིན། །