རྣོ་ལྕགས་ཨར་འདམ་ཞུན་མས་རྒྱུ་བྱས་རབ་བསྐྲུན་མཁར་སྙེགས་བ་གམ་གྲངས་མེད་ཚོགས། །
ཕན་ཚུན་བཟོ་ལྟ་འགྲན་ཞིང་དབྱིག་འཛིན་སྒེག་མོའི་པང་ལས་བསླངས་ཏེ་མཁར་འཕགས་བཞིན། །
གང་ལྟར་ལོ་རྒྱུས་ཚད་ཐིག་ལས་བརྒལ་ས་ཡོམ་ཚད་རིམ་བརྒྱད་ཐེག་གདེང་ཚོད་ངེས། །
གང་ས་གང་དུ་བལྟས་ཀྱང་ཨ་རིའི་ཕོ་བྲང་དཀར་པོ་འདི་ན་འཕོས་སོ་སྙམ། །
རི་མཐོ་ལུང་གཟར་ལམ་ཐག་དཔག་ཚད་མང་པོ་ཆོད་པའི་དཀའ་སྡུག་མྱོང་ཞིང་སྲོག་དམར་འབེན་ལ་བཞག་པའི་རྒྱུས། །དཀའ་སྡུག་ཉེན་བརྒྱ་བསལ་ཞིང་བདེ་འཇཊ་ཁག་ཐེག་ཡོང་ཆེད་མ་དངུལ་འབོར་བཏང་ལྷུན་པོའི་ཁོང་གསེང་རྒྱུད་ནས་བཟོས། །
གྲོང་ཁྱེར་ཆེན་མོའི་གཞི་ཁྱོན་ཡོངས་ཁེབས་སྲིད་ཞེང་ཐམས་ཅད་དྲ་བས་བསྣོལ་བའི་སྣུམ་ནག་ཨར་འདམ་གཞུང་ལམ་སྟེང་། །
སྣ་མང་ཕྲ་རགས་འཁོར་ལོའི་ཚོགས་རྣམས་ཕན་ཚུན་བང་རྩལ་འགྲན་ཞིང་ཉིན་མཚན་དབྱེར་མེད་ངལ་གསོ་མེད་འདི་མཚར། །ས་མཐོའི་མཁའ་དབུགས་རབ་སྲབ་གྲང་ལྷགས་ངར་མའི་བཟོ་ལྟ་ཆེས་ངོམས་ལྷག་པར་བཞི་གཅིག་བཞིས། །
སྲོག་དབང་ཤོར་བའི་གཤིན་པོ་སྡུག་མོད་ཤུལ་ལུས་གསོན་རྣམས་སླར་འཚོའི་ཆ་རྐྱེན་ཡར་ཟླ་བཞིན། །
རྒྱལ་ཁབ་གློག་དྲའི་ཁོངས་ཚུད་ཕྱིན་ཆད་སྔར་གྱི་སྐབས་འགར་ཡོད་ལ་སྐབས་འགར་མེད་པའམ། །
གསལ་ལ་མི་གསལ་ཁག་ཐེག་རབ་བྲལ་ཡུལ་ཤུལ་གློག་གི་ལོ་རྒྱུས་དེ་ཡང་དབྱིངས་རིམ་ཡལ། །
ཡུལ་ཤུལ་གསར་པའི་གྲོང་ཁྱེར་ཀུན་སྙོམས་རྣམ་བཀྲ་ཚོན་མདངས་སྣ་ལྔའི་གློག་གི་སྒྲོན་མེའི་དཔལ། །
རབ་ཏུ་འབར་བའམ་ཡང་ན་ནོར་འཛིན་སྒེག་མོར་མཛེས་ཆས་སྤྲས་ཕྱིར་དཀྱིལ་འཁོར་བཤམ་པ་བཞིན། །
ཏང་གི་དབུ་འདྲེན་རྟ་བདུན་དབང་པོས་ཐུགས་རྗེས་སྙོར་སྐྱོང་གཟི་འོད་རབ་ཏུ་འབར་བ་ཡིས། །
རྒྱལ་ཡོངས་མི་རིགས་ཁག་གི་སྦྱིན་པའི་ཕྱག་ཡངས་བརྐྱངས་པའི་རླབས་ཆེན་རྒྱལ་ཁ་འདི་ན་བྲིས། །
གཞན་ཡང་ཆུ་ཟླ་མཚོ་ཡི་གོད་ཆག་ཉམས་ངའི་སྡུག་འོག་ནས། །
མཆོག་དམན་བར་གསུམ་ཀུན་གྱིས་རེ་བའི་མིག་ལྟོས་མཆོག་དེ་གང་། །
གྲངས་མེད་ཚེ་སྲོག་འཆི་འཚོའི་མཚམས་ནས་རྣམ་རྒྱལ་བརྩོན་ལེན་པ། །
དུང་གི་མདངས་འཛིན་མཁའ་ལམ་རབ་བགྲོད་ནམ་མཁའ་ལྡིང་གི་སྤུན། །
རྩོམ་སྒྲིག་འགན་འཁུར་བ། ཀུན་ཁྱབ། ལྷ་གཡང་ནོར་བུ།