ཀ་ཅི་དྲི་མེད་ལྟར་དཀར་ལྷག་བསམ་གྱི་འོད་འཆང་། །
ཁ་བ་ཅན་སྤུན་ཟླས་དལ་གཅིག་རང་གཟིགས་དང་། །
ག་བཏང་གོ་ཆོད་མེད་པའི་འདི་ཕྱི་ཡི་བྱ་གཞག །
ང་ཡི་ངན་དགུའི་སྤྱོད་པ་མདོ་ཙམ་ཞིག་ཞུའོ། །
ཅ་ཅོ་རྣམ་གཡེང་མང་བ་སྔོན་སོང་གི་བག་ཆགས། །
ཆ་ལུགས་ཚུལ་མིན་སྤྱོད་པ་ཕྲན་བུ་ཡི་རང་གཤིས། །
ཇ་ཆང་ལོག་འཚོར་རྔམ་པ་སྔོན་གོམས་ཀྱི་འབྲས་བུ། །
ཉ་ཕག་ཇི་བཞིན་ཉལ་བ་བཙུན་གཟུགས་ངའི་རང་གཤིས། །
ཏ་ལའི་སྡོང་ལྟར་བཙུགས་པའི་སོ་ཐར་གྱི་བསླབ་གཞི། །
ཐ་ཤལ་བག་མེད་གཡེང་བའི་འགྱེལ་ཚུལ་འདིར་གཟིགས་དང་། །
ད་ལྟའི་དུས་ན་ཕྲན་བུའི་སྒྱིད་ལུག་གི་བྱ་བར། །
ན་མཉམ་བཙུན་གཞོན་དག་གིས་ཁྲེལ་གཏམ་འདིར་གཟིགས་དང་། །
པ་ཏྲའི་རིས་བཞིན་གྱ་གྱུ་གཡོ་སྒྱུ་ཡི་བྱ་བས། །
ཕ་མར་གྱུར་བའི་འགྲོ་དྲུག་བསླུས་ཚུལ་འདིར་གཟིགས་དང་། །
བ་གླང་བཞོན་ཁལ་བླུན་རྨོངས་བཀོལ་སྤྱོད་ཀྱི་བྱ་བས། །
མ་བོས་སྡུག་བསྔལ་མགྲོན་དུ་འབོད་ཚུལ་འདིར་གཟིགས་དང་། །
ཙ་རི་སློབ་གཉེར་འགྲིམ་པའི་དཀའ་ཐུབ་ཀྱི་བྱ་བ། །
ཚ་གྲང་ངལ་བ་མ་ནུས་ཅོལ་ཆུང་ངར་གཟིགས་དང་། །
ཛ་ཡའི་གསུང་རབ་དགོས་མེད་རྣ་རྒྱབ་ཏུ་བོར་ཏེ། །
་ལྟར་མཁར་གྲོང་ངེས་མེད་འཁྱམ་ཚུལ་འདིར་གཟིགས་དང་། །
ཞྭ་གོས་ལྷམ་སོགས་རབ་བྱུང་རྟགས་ཙམ་དུ་བཟུང་ནས། །
ཟ་ཉལ་ལས་ལ་མི་ཚེ་སྐྱེལ་ཚུལ་འདིར་གཟིགས་དང་། །
འ་ཅག་བསྟན་སྒོར་ཞུགས་པའི་བཙུན་གཞོན་གྱི་གྲྭ་ལས། །
ཡ་ངའི་གཡང་ལ་ལྷུང་པའི་ཐ་ཤལ་ངར་གཟིགས་དང་། །
ར་བ་གངས་རིས་བསྐོར་བའི་བསིལ་ལྡན་གྱི་ལྗོངས་འདིར། །
ལ་རྒྱའི་སྙིང་ཁམས་མེད་པའི་སྡར་མ་ངར་གཟིགས་དང་། །
ཤ་ཁྲག་སྒྱུ་ལུས་གྲུབ་པའི་དལ་འབྱོར་གྱི་རྟེན་བཟང་། །
ས་མཐོའི་སྒང་འདིར་སྡིག་གཡོག་བཀོལ་ཚུལ་འདིར་གཟིགས་དང་། །
ཧ་ལམ་ཆོས་གཟུགས་ཙམ་ལས་གདེང་ཚོད་ནི་མེད་པ། །
ཧ་ཧ་ཀ་ཁའི་ལམ་ནས་སྙིང་ཁོང་གི་འབོད་པ། །
ཨ་མས་བུ་ལྟར་བརྩེ་བའི་གངས་ལྗོངས་ཀྱི་མཆེད་པོ། །
ཨ་ལ་ཐུགས་ཁྲེལ་མ་གནང་དྲིན་ལྡན་ལགས་གཟིགས་དང་། །