ཀྭ་ཡེ་གསོན་དང་གངས་ལྗོངས་ན་མཉམ་གྱི་གྲོགས་རྣམས། །
ཁ་བའི་ལྗོངས་སུ་བྱས་རྗེས་རླབས་ཆེན་ཞིག་ཞོག་དང་། །
ག་ས་གང་དུ་གནས་པའི་སྐལ་ལྡན་གྱི་སློབ་གྲོགས། །
ང་ཡི་གཏམ་འདི་ཉན་པར་ཅུང་ཟད་ཅིག་སྒུག་དང་། །
ཅ་ཅོ་འ་འུར་མ་རབ་འདུ་འཛི་སོགས་སྤངས་ཤིང་། །
ཆ་ལུགས་ཡ་རབ་བསམ་བཟང་སློབ་བུ་ལ་བརྩོན་དང་། །
ཇ་ཆང་ལོངས་སྤྱོད་ལེགས་པའི་བདེ་བ་ལ་མ་ཆགས། །
ཉ་མོའི་འགྲོས་ལྟར་འཕེལ་རྒྱས་མྱུར་ཚད་ལ་བརྩོན་དང་། །
ཏ་ཀུ་འདྲ་བའི་འཁང་མེད་གྲོགས་བཟང་ཚོ་མཉམ་དུ། །
ཐ་ཤལ་སྤྱོད་ངན་སྤངས་བའི་ཀུན་སྤྱོད་ལ་རེམས་དང་། །
ད་དུང་ཉོན་ལ་སེམས་བཟང་ཁ་ཏ་ཡི་ཚིག་རྣམས། །
ན་ཆུང་གྲོགས་པོ་རྣམས་ལ་ཅུང་ཟད་ཅིག་སྨྲས་ན། །
པ་ཕ་ཨ་མའི་བསམ་དཀར་ཞལ་ཏ་ལ་ཉན་ནས། །
ཕ་བཟང་བུ་ལ་ནོར་ཡ་མེད་པ་ཞིག་གྱིས་དང་། །
བ་གམ་འདྲ་བའི་ཤེལ་ཁང་གྲུ་བཞི་ཡི་ནང་རོལ། །
མ་ལུས་ཤེས་བྱའི་གནས་ལ་རྨོངས་མེད་དུ་འབད་དང་། །
ཙ་གེ་ཙིག་གེའི་མཁོ་ཆས་འཚོལ་རྒྱུ་རྣམས་བསྐྱུར་ཏེ། །
ཚ་ཟེར་ནད་རིགས་འཇོམས་པའི་སྨན་པ་ཞིག་བརྩོན་དང་། །
ཛ་ལོ་སྲམ་འཁོར་རབ་རྒྱན་ཁམས་པ་ཡི་གྲོགས་རྣམས། །
་ལེར་ཐམས་ཅད་བསམ་པ་གཅིག་མཐུན་གྱི་ངང་ནས། །
ཞ་སྨྱུག་བྲིས་ཀྱི་ཁ་ལོ་བར་མེད་དུ་བསྒྱུར་ནས། །
ཟ་འོག་གདན་ས་འཛིན་པའི་མཁས་ཆེན་ཞིག་བརྩོན་དང་། །
འ་ཅག་མི་རིགས་འདི་ཡི་ལས་དབང་ལ་བསམས་ཏེ། །
ཡ་རབ་དམ་པའི་བླང་བྱ་སྙིང་ཁོང་ནས་མ་བརྗེད། །
ར་གན་གསེར་དུ་བརྫུ་བའི་ཆ་ལུགས་དེ་སྤངས་ནས། །
ལ་རྒྱའི་བ་དན་གོ་ལའི་ཡང་རྩེ་རུ་བསྒྲེང་ཕྱིར། །
ཤ་རུས་གཅིག་པའི་གངས་ལྗོངས་སྤུན་ཟླ་རྣམས་ལྷན་དུ། །
ས་ཕྱོགས་གང་སར་ཚན་རིག་དར་སྤེལ་དུ་གཏོང་དགོས། །
ཧ་ཅང་རྣ་བ་ཚ་བའི་འཕྲིན་ཆུང་གི་སྙིང་གཏམ། །
ཨ་རོགས་ཅུང་ཟད་ཉོན་དང་ཕན་པ་ཞིག་ཡོད་ངེས། །
རྩོམ་སྒྲིག་འགན་འཁུར་བ། ཀུན་ཁྱབ། ལྷ་གཡང་ནོར་བུ།