འཇིག་རྟེན་པའི་མགུར།

ང་ཡི་འགྲུལ་བ་རེ་རེའི་གདོང་ལ་བལྟས།།

གདོང་གི་འཛུམ་དང་སྐྱོ་བའི་ཉམས་ལ་བལྟས།།

བསྟན་བཤིག་ཚ་བའི་བྱིས་པའི་བཞིན་ལ་བལྟས།།

ལྟ་བཞིན་ལྟ་བཞིན་ང་ཡི་གདོང་ནི་བོར།།

ལམ་གྱི་ཁ་བ་མར་མར་ས་ལ་ཐིམ།།

སེམས་ཀྱི་སྐྱོ་བ་རེ་རེ་སྲོག་ལ་སིམ།།

སྲོག་གི་དབང་པོ་རེ་རེ་འགགས་ན་ཡང་།།

སྐྱོ་བའི་སྡུག་བསྔལ་ཆུ་ཡི་རྦ་རླབས་བཞིན།།

ང་ཡི་ལམ་ཐག་ཚེ་ཡི་འཇའ་ཚོན་ཡིན།།

མེ་ཡི་དྲོད་དང་རླུང་གི་བསིལ་བ་ཡོད།།

ང་ཡི་ཚེ་གྲོགས་མཚན་མོའི་གློག་ཞགས་ཡིན།།

སེམས་ཀྱི་བྲག་ལ་མེ་ཏོག་གློ་ཁ་སྐྱེས།།

ས་ཚུགས་ཤིག་ནས་ང་ཚོ་མཉམ་དུ་འཛོམས།།

འབབ་ཚུགས་ཤིག་ནས་ང་ཚོ་སོ་སོར་གྱེས།།

སླར་ཡང་ས་ཚུགས་ཤིག་ནས་འཕྲད་པའི་ཚེ།།

ང་ཚོའི་གདོང་ནི་སྤྲུལ་གྱི་ཤུན་སྐོགས་ཙམ།།

བུ་ག་དོག་པའི་སེམས་ཀྱི་ཨི་ཁུང་དུ།།

སྐྱོ་བའི་ཕག་པ་ནག་པོས་ཉུལ་ཉུལ་བྱས།།

ཡངས་རྒྱ་ཆེ་བའི་འཇིག་རྟེན་སྐྱ་བོ་འདིར།།

མི་ཚེའི་རི་མོ་གང་དང་ཅི་ལ་འབྲི།།

མཚོན་ཆ་མེད་པའི་འཇིག་རྟེན་གཡུལ་ངོགས་འདིར།།

ས་སྨྱུག་དཀར་པོ་སྤྱད་དེ་ནག་པོ་བརྫད།།

བསྟུད་མར་ནག་པོ་སྤྱད་དེ་དཀར་པོ་སྣོག །

ཡང་སྙིང་གང་དང་ཅི་ཞིག་རྙེད་དགོས་སམ།།

ཁྱོད་ཀྱི་སྟངས་ཀ་སྣ་ཚོགས་འགྱིང་བཞིན་བསྟན།།

ཁོ་མོའི་གདོང་ལ་ཚོན་རྩི་སྣ་ཚོགས་བྱུག །

འོན་ཀྱང་སེམས་ཀྱི་སྒོ་མོ་ཕྱེས་པའི་ཚེ།།

དབུལ་ཕོངས་དབུལ་ཕོངས་མིན་པ་སུ་མི་འདུག།