མཚམས་མཚམས་སུ་སྤྲིན་པས་གནམ་མཐའ་བརྐྱངས།
སྐབས་སྐབས་སུ་ཉི་འོད་ཀྱིས་སེམས་མཐའ་བསྲིངས།
ཆུ་མོ་ལན་རེར་དྭངས་ཤིང་ལན་རེར་རྙོག
རླུང་བུ་ལན་རེར་དལ་ཞིང་ལན་རེར་མགྱོགས།
ཡིན་ནའང་སྟོད་ཀྱི་གངས་ཀྱི་ལྷུན་པོ་གན།
སྔར་བཞིན་དཀར་ཞིང་གཙང་།
སྔར་བཞིན་སྲ་ཞིང་བརྟན།
ཁྱོད་འདྲ་ཉུང་ཉུང་ཡིན།
སེམས་ཀྱི་ཕྱི་དང་ནང་།
མཚམས་མཚམས་སུ་བདེན་པས་ཡ་ཆུང་གསལ།
སྐབས་སྐབས་སུ་ཚུལ་འཆོས་ཀྱི་མུན་པས་གཡོགས།
དུངས་སེམས་མཚམས་རེར་འཕྱོ་ཞིང་མཚམས་རེར་འཇགས།
ཆོད་སེམས་ལན་རེར་བརྟན་ཞིང་ལན་རེར་འཁྱོར།
ཡིན་ནའང་སྨད་ཀྱི་སེམས་སོང་སྙིང་སྡུག་གན།
སྔར་བཞིན་སྒམ་ཞིང་བརླིང་།
སྔར་བཞིན་གཞུངས་ཤིང་བྱམས།
ཁྱོད་འདྲ་ཉུང་ཉུང་ཡིན།
ཁྱོད་འདྲ་ཉུང་ཉུང་ཡིན་ཏེ།
དུས་ཚོད་ཀྱི་ཧྲག་བར་ནས་ངང་སྒུག་གི་སེམས་པ་བསྐུངས་པའི་ཁྱོད་འདྲ་ཉུང་ཉུང་ཡིན།
ཡ་ཆུང་གི་གཏིང་རུམ་ནས་གསང་ཚིག་གི་ལྡེ་མིག་འབོར་བའི་ཁྱོད་འདྲ་ཉུང་ཉུང་ཡིན།
འཛུམ་འཚེར་གྱི་ཡོལ་རྒྱབ་ལ་ཉམ་ཆུང་གི་སེམས་པ་སྦ་མཁན་ཁྱོད་འདྲ་ཉུང་ཉུང་ཡིན།
ཁ་ཚིག་གི་ཟུར་ཁ་རུ་ཡ་ཆུང་སྙི་མོའི་དཔངས་མཐོ་བ་ཁྱོད་འདྲ་ཉུང་ཉུང་ཡིན།
ཡིན་ཏེ།
མིག་ལ་མཛེས་པ་ཁྱོད་འདྲ་ཉུང་ཉུང་ཡིན།
ཡིད་དུ་འོང་བ་ཁྱོད་འདྲ་ཉུང་ཉུང་ཡིན།
རྒྱང་རིང་མ་ཡིན་པའི་རྒྱང་རིང༌།
འུ་གཉིས་ཀྱིས། དཔའ་སྙིང་ཆེན་པོས།
རང་རང་གི་འཇིག་རྟེན་ནས།
འཇིག་རྟེན་གྱི་ཕྱེད་ཀ་རེ་བསྐྱུར་ཏེ།
ཅི་ཞིག་གི་ཆེད་དུ་གདོང་མཆོང་བྱེད།
ཁྱེད་ཀྱིས་ཅི་ཡང་རྟོགས་ཡོད་པ་བཞིན།
ངས་ཀྱང་ཁྱེད་ཀྱི་ཆེད་དུ་གང་ཡང་ཚོར་ཡོད།
གང་བུ་གྲོལ་མ་ཐག་པའི་ན་ཟུག་སུ་ཡིས་རྟོགས་ཨང་།
འདབ་གཤོག་བརྐྱང་མ་ཐག་པའི་ཐེ་ཚོམ་སུ་ཡིས་ཤེས་ཨང་།
དགུང་ཨ་སྔོན་འཁོར་ལོའི་རྩིབས་བར་ནས།
ཁྱེད་ནི་རྒོད་པོ་ཞིག་གམ་གཡུ་སྦྲང་ཞིག
ས་དོག་མོ་པདྨའི་འདབ་སྟེང་ནས།
ང་ནི་མེ་ཏོག་གམ་རྩྭ་ལྗང་ཞིག
ཁྱེད་ཉིད། མཐོན་པོ་རི་ལ་བབས་ཏེ་རྒྱང་ལ་ལྟ་ཞིང་།
དམའ་མོ་རྡེའུར་ཁེན་ནས་ངལ་ཞིག་གསོ་འམ།
ང་ཡིས། ཨ་སྔོན་དབྱིངས་ལ་ཅེར་ནས་རེ་སྒུག་བྱས་ཤིང་།
དོག་མོ་ས་ལ་བལྟས་ནས་དངན་པ་རེ་འཐེན་ནམ།
གང་ལྟར། དཔུང་བ་མཉམ་བཤིབ་ཀྱི་བར་ན།
རི་ཆུས་བར་ཐག་ཆོད་པ་གསལ་བས།
ཞག་གཅིག་གི་ལྷན་འཛོམས་དང་རྨི་ལམ་རེ།
ཉིན་གཅིག་གི་བརྩེ་བ་དང་གྱེས་བྲལ་རེ།
ད་ནི། མི་ཚེ་ལ་བཞག་པའི་ཚེག་ཐུང་རེ་ཡིན་དུ་ཆུག་ཀྱང་།
དགའ་དགོད་དང་ངུ་ངག་གི་དབྱངས་རྟའི་ཁུགས་སོ་རེ་ན།
བྱམས་བརྩེའི་མཛེས་པ་རེ་འཁྱིལ་ཡོད་པས།
འུ་གཉིས་ནི།
ཕན་ཚུན་གྱི་སེམས་ངོགས་སུ་འཚེར་བའི།
མཛེས་སྡུག་གི་སྐར་མ་འོད་ཆེན་རེ།