ང་དང་ངའི་ཕ་ཡུལ།

        ཡུལ་གྱར་གྱི་རྣམ་ཤེས་ལྡོམ་པོ་ཞིག བསྐལ་བ་སྟོང་ལ་བསགས་པའི་སྡིག་སྒྲིབ་དེའི་རྣམ་སྨིན་གྱིས། ལུང་པ་བྱང་ལྟ་འདི་རུ་ཁ་བ་བཞིན་བབས་པས། ཕ་ཡུལ་གྱི་འབྱུང་བཞི་ལ་འདི་ལྟར་འཐིམ་པར་གྱུར། དེ་ནས་བཟུང་། ཟླ་འོད་ཀྱིས་ཕ་ཡུལ་གྱི་ཕྱི་ནང་གསང་གསུམ་བརྟོལ་ནས་ང་ཡི་མིག་ལ་ཤམ་ཤམ་འབབ་ཅིང་། སྐར་ཚོགས་ཀྱང་ཕ་ཡུལ་གྱི་ཕྱག་ཟུང་ལས་འདྲིལ་ཏེ་ང་ཡི་པང་ལ་སིལ་སིལ་ཐོར། སྐྱེས་དུས་མིག་ལ་འཁོར་བའི་ལུག་ཁྱུའི་སྤྲིན་དཀར། སུ་རུའི་མེ་ཏོག་གི་མངའ་ཐང་རྒྱས་པའི་རྫ་སིལ་འདིའི་ལང་ཚོ་ཡིན། སྤྲོ་སྐྱིད་ཀྱི་རྡེའུ་འབུམ་སྤུངས་པའི་བྱིས་པ་ཚོའི་རྨི་ལམ་དང་རེ་སྨོན་གྱི་འཇའ་ཚོན། སྦྲ་ནག་གི་ཁ་ཚུབ་ལས་ཁ་བཏགས་ལྟ་བུའི་གངས་ལ་འཐེན་ཡོད། དད་འདུན་གྱི་མཆོད་མེ་ལམ་ལམ་འཚེར་བའི་ངོགས་སུ་རིགས་དྲུག་གི་སྐྱིད་སྡུག་འཁོར་ཡོད།

        རླུང་བུ་བསིལ་བསིལ་དག་རི་གླུའི་འགྱུར་ཁུགས་དང་བསྡེབས་ནས་རྣམ་ཤེས་ཚོགས་དྲུག་གི་དགའ་སྟོན་ལ་སྨིན་དུས། ང་ནི་དུས་རབས་ཀྱི་ཁྲེས་པོ་ལྗིད་དྲག་པའི་ཨ་སྐྱོ་བ་ཞིག་སྟེ། ཕ་ཡུལ་ཁོ་ནའི་ཕང་བ་རུ་ངལ་གསོའི་དབུགས་དབྱུང་ཐོབ། དྲན་གདུང་གི་ཐང་ཆེན་རེ་རེ་རྔམ་པས་བཅད་ནས་ཕ་ཡུལ་གམ་ལ་ལོག་ཐེངས་རེ་དང་སྐྱོ་སྣང་གི་རླུང་བུ་འགམ་གྱིན་འཁྱར་འཁྱོར་གྱི་གོམ་འགྲོས་རྒྱང་ལ་བསྒྱུར་ཐེངས་རེ་རེར། ས་ཆེན་གྱི་ཟེ་བར་འཐམ་པའི་ཕ་ཡུལ་གྱི་ཁུ་སུམ་པའི་མཚན་ལྗོངས་རེ་རེ་དང་། བྱང་ཐང་གི་རྡོ་བ་ལྟར་འཁྱག་པའི་ཕ་ཡུལ་གྱི་ཉི་འོད་མཐའ་དག ང་ཡི་གློ་མཆིན་གྱི་ཧྲག་ན་འཚིང་ཁ་ཤིག་ཤིག་བྱེད། སྨུག་པའི་ཁྲོད་ཀྱི་སྒམ་བརླིང་གི་རི་ཚོགས་དེ་དག་ཡབ་ཆེན་གྱི་རྒྱབ་གཟུགས་བཞིན། འཁྱག་ཤི་ཐེབས་པའི་སེམས་པ་གྲངས་མེད་འདར་སིག་སིག་གིས་བསྙེས་ཆོག་ཨང་། ཁུ་བྱུག་དང་མེ་ཏོག་གི་དག་ཞིང་དུ། ལྷུང་ལྷུང་འབབ་པའི་རྫ་ཆུ་བསིལ་མར་སེམས་པ་དང་མཆུ་འདབས་ལྷན་ཅིག་སྦྱར་ན། ཚེ་ལོ་དཔག་མེད་དུ་མིག་ཟུང་བཙུམ་ནས་སེམས་པ་འདི་ཡོངས་སུ་བརླན་ན་སྙམ། ཆར་བ་བབས་རྗེས་ཀྱི་དྭངས་གཙང་གི་ཞོགས་པ་རེ་རེ་བྱེའུ་སྐད་གྱ་གྱུ་ཡིས་དཀྲོགས་ལ། མཐིང་མདོག་གི་ནམ་མཁར་སྤྲིན་དཀར་གྱི་འདབ་མ་གཡོ་ཞིང་གཡུ་སྔོན་གྱི་འཛིན་མར་རྩྭ་ལྗང་གི་རྦ་རླབས་འཕྱུར་དུས། ངུར་སྨུག་གི་ངོ་གདོང་རེ་རེར་ཉི་འོད་ཀྱི་བྱབས་ཁྲུས་བྱས་ལ་འཛུམ་དཀར་གྱི་བསིལ་ཆར་འཇོ།

        ང་ཡི་ཨ་ཕ་རྫ་རོག་རོག་གི་ཟུར་ཁར་འགྲེང་ནས། གནས་འདིའི་ཡུལ་ལྷ་གཞི་བདག་ལ་ཀི་སྭོ་ལྷ་རྒྱལ་གྱི་འབོད་པ་གཏོང་ཞིང་བསང་དུད་སྔོན་མོ་གཡས་སུ་བསྐྱིལ་བས། ཕ་ཡུལ་དང་ཨ་ཕ་ངོ་བོ་དབྱེར་མེད་དུ་འདྲེས་ནས་དགྲ་འདུལ་གཉེན་སྐྱོང་གི་འཕྲིན་ལས་ལ་གཞོལ། ང་ཡི་ཨ་མས་གནས་འདིའི་རི་ཆུ་ནགས་གསུམ་ལ་དད་པའི་བརྐྱངས་ཕྱག་འཚལ་ཞིང་སྨོན་པའི་གསོལ་འདེབས་བྱས་པས། ཕ་ཡུལ་དང་ཨ་མ་གཞི་གཅིག་ལ་འཐིམ་ནས། དྲོད་འཇམ་གྱི་རུམ་ཁ་རུ་བུ་རབས་ཚ་རྒྱུད་འདི་དག་རྩེད་དགོད་ཀྱིས་འཚར་ལོངས་བྱུང་ཞིང་རླུང་རྟའི་རྟ་རྒོད་རྒྱུག ང་ཡི་ཕུ་ནུ་ལྕམ་སྲིང་དག་གནས་འདི་རུ་མེ་ཕུང་གི་མཐའ་རུ་འདུས་ཏེ་ལག་པས་སྤྲིན་པ་དཀྲུགས་ཤིང་རྡོག་པས་ས་ཆེན་མནན་པས། ཕ་ཡུལ་དང་ཕུ་ནུ་བརྙན་ཡོལ་གཅིག་ཏུ་གྲུབ་ནས། རྒྱང་རིང་བའི་ཤམྦྷ་ལ་དང་བདེ་བ་ཅན་བཤམས་སྟོན་བྱེད།

        ཕ་ཡུལ་ནི་ཕ་མ་དང་ཕུ་ནུ་ཡིན་ཨང་།

        ཕ་ཡུལ་ནི་ཉི་མའི་མཐའ་མཇུག་གི་ཕྱིར་མིག་ལུས་པའི་བྲག་ཐེམ་དེ་ཡིན། རྒོད་པོ་དག་གི་ཐོག་མའི་སྨོན་འདུན་དང་མཐའ་མཇུག་གི་ཚང་མལ་དེ་ཡིན། སྒོ་ཁྱི་ཟུག་པའི་གཅོང་སྐད་རླུང་གིས་ཁུར་ནས་རྒོད་པོའི་རྨི་ལམ་གྱི་སྒྲོ་གཤོག་སྒུལ་གྱིན་འདུག

        ཕ་ཡུལ་ནི་རེ་སྒུག་དང་འཁྲེང་ཞེན་གྱི་ཁིའུ་ཉག་དེ་ཡིན། ཕར་འགྲོ་རྗེས་ནས་སྐྱེལ་མ་དང་ཚུར་འོང་སྔོན་ནས་བསུ་མ་གནངས་སའི་ས་ཚིགས་དེ་ཡིན། ཚར་དཀར་གྱི་གོང་ཁ་སྨྲེང་སྐྱོའི་མཆི་མས་བརླན་པའི་སྨན་ཤར་ཞིག བག་རྟ་གྲོ་ཁྲའི་སྒ་གོང་ནས་ངུ་བཞིན་ངུ་བཞིན་ཁིའུ་ཉག་འདི་ལས་གནས་ཡུལ་འགྲིམས་ལ། མེ་མདའ་རྭ་རིང་ཁུར་བའི་མི་ཕོ་དཔུང་རྗེན་ཞིག ཇག་རྟ་ཁམ་པ་རྔོག་རིང་གོང་ནས་དཔའ་སྤོབས་ཀྱིས་འཕྱོ་བཞིན་འདི་ནས་ཇག་ལ་བུད་སོང་། བཀྲེས་སྐོམ་ལྟོ་བ་སྒལ་བར་འབྱར་ནས་ལྡུམ་ཐུག་ཚ་བའི་ཕོར་ཁ་རྩོད་པའི་ཨ་སྐྱོ་ཞིག་ཀྱང་ཡུལ་འཁྱམས་བྱས་སོང་། ཕྱིར་མི་ལྡོག་པའི་ཡུལ་གྱར་རེ་རེའི་དབུ་ཁྱུད་འདི་ནས་བྲིས་ཤིང་། ཡི་མུག་གི་རྨུ་ཐག་ལ་འཇུས་ཏེ་ལན་ཆགས་ཀྱི་སེམས་ངལ་འཁུར་པའི་སྦྱོར་བའང་འདི་ནས་བརྩམས།

        ཡུལ་མི་ཚོའི་སྐྱིད་སྡུག་དང་འགྲོགས་པའི་གཙང་བོའི་འགྱུར་ཁུག རྟ་ནག་སྒྲོག་འགྲོས་ཀྱི་རྣམ་ཐར་ཕྱི་མ། ཕ་ཡུལ་གྱི་མཁའ་མཐའ་ཧྲིལ་གྱིས་ཁེབས་པའི་དུད་སྤྲིན་གྱི་ཡོལ་བ། མུན་པའི་ས་སྲོད། ས་མཁྲེགས་ཀྱི་ལྷུ་ཚིགས་གློད་མ་མྱོང་བའི་རྟོགས་བརྗོད་གསེར་བྲིས་མ། ལྷ་སྒྲུང་དང་འཆར་ཡན་གྱི་མཚོ་མོ་ཡོམ་ཡོམ་སྐྱོམས། ཞེན་ཆགས་དང་དྲན་གདུང་གི་ཆུ་ཚན་ལྷོག་ལྷོག་གདུ། ཕ་ཡུལ་ནི་ངག་ནས་བརྗོད་ཐབས་མེད་པའི་དུངས་ཞེན་གྱི་ཐ་སྙད་ཅིག་ཡིན། ཡང་ན་སྲོག་རྩ་རུ་ཟུག་པའི་རྣོ་དབལ་གྱི་ཚེར་མ་དེ་ཡིན།

        ཕ་ཡུལ་ཨྰ། ཁྱེད་ཀྱི་པང་ནས་བྱ་ཁྱུ་དག་རྒྱང་ལ་འཕུར་སོང་། རི་སྐྱེས་ཀྱི་ཚོགས་ཀྱང་མགོ་རྣ་དྲོང་དྲོང་གིས་རྒྱང་ལ་གཤར་སོང་། ཐ་ན་ཁྱེད་ཀྱི་གཅེས་ཕྲུག་དག་གི་ཐ་ཆུང་དེ་ཡང་རྒྱང་ལ་འཁྱམས་སོང་། ཁེར་རྐྱང་གི་ཁྱེད་ཀྱིས། རྒྱང་ལ་ཡལ་བའི་རྒྱབ་གཟུགས་རེ་རེ་མིག་གིས་སྐྱེལ་དུས། ཁྱེད་ཀྱི་བྱང་ཁོག་ལ་འཁྱག་གྲང་གྲང་གི་ཁ་བ་བབས་བྱུང་ངམ། མིག་ཀོང་ནས་དམར་ལམ་ལམ་གྱི་ཤྭ་འོད་བརྡོལ་བྱུང་ངམ།།