ང་ལ་མིང་མི་དགོས།

        ན་ནིང་དཔྱིད་ཀར་དྲི་ཞིམ་གྱི་མེ་ཏོག་དང་ལྷུང་ལྷུང་གི་ཆུ་ཕྲན། སྒེག་ཉམས་ཀྱི་ལྗོན་ཤིང་། ལྡེམ་འགྱུར་གྱི་བྱིའུ། འཇམ་མཉེན་གྱི་ལོ་མ། བརླན་གཤེར་གྱི་ས་གཤིས། དྭངས་གཙང་གི་མཁའ་དབུགས་ཀྱི་སླད་དུ། ང་གྲོང་འདབས་ཀྱི་ཆུ་འགྲམ་དུ་སོང་།

        ཆུ་ཡི་འགྲམ་དུ་སྐྱེས་པའི་མཐོ་དམའ་དང་སྦོམ་ཕྲ་མི་འདྲ་བའི་ལྗོན་ཤིང་སྣ་ཚོགས་ཀྱི་དབུས་སུ་རྩྭ་ཕྲན་དང་ལྡུམ་བུ་མང་པོ་ལྗང་ནེམ་ནེམ་གྱིས་འཁྲུངས། ལྗོན་ཤིང་ཆེན་པོ་རྣམས་ཀྱི་རྩ་བར་ལྡུམ་བུ་ཆེ་ཆུང་གྲུ་གང་ཙམ་ཐར་ཐོར་དུ་སྐྱེས་ཏེ་མེ་ཏོག་དམར་སེར་ཞིག་བཞད་པས་མ་ཚད་ཡལ་གའི་རྩེ་མོར་ད་དུང་གོང་བུ་གཉིས་གསུམ་ཙམ་ཡང་སྣང་། ལྗོན་ཤིང་རྣམས་ཀྱི་བར་སྟོང་ལས་ཉི་འོད་འཕྲོ་དུས་དྲོ་ཐིང་ཐིང་དང་ས་ལ་གནམ་ཆུ་ཟག་དུས་རླན་ཤིག་ཤིག མཁའ་ལ་རླུང་བུ་ལྡང་དུས་སྒེག་ལྡེམ་ལྡེམ་བྱེད་མོད། གཡས་གཡོན་དང་བསྟུན་ན་ཅུང་ཁེར་རྐྱང་གི་སྣང་བ་ཞིག་འགོག་མེད་དུ་སྐྱེས།

        སྤྱིར་ང་རང་ནི་རོང་ས་ཞིག་ནས་འཚར་ལོངས་བྱུང་བ་ཡིན་པས་རྩྭ་རྩི་ཤིང་གང་མང་ཞིག་མཐོང་མྱོང་ཡང་། ད་སྔོན་བར་དུ་འདི་འདྲ་བོའི་མེ་ཏོག་བཞད་པའི་ལྡུམ་བུ་ཞིག་མཐོང་བ་ནི་ཐེངས་དང་པོ་ཡིན་པས་དེའི་མིང་ཡང་མི་ཤེས་མོད། ལྡུམ་བུ་དེ་རྩ་བ་ནས་བརྐོས་ཏེ་ཐུན་མོང་སྤྱི་ལ་དབང་བའི་མེ་ཏོག་དམར་སེར་ཞིག་རང་ཁྱིམ་དུ་སྤོས་ཏེ་སྒེར་གྱིས་བདག་འཛིན་བྱས།

        ཁྱིམ་ནང་མགྲོན་པོ་རྩ་ཆེན་ཞིག་སླེབས་པ་ལྟར། ངས་མེ་ཏོག་དེ་རྫ་བུམ་ཞིག་ནང་བཙུགས་རྗེས་དཔེ་སྒྲོམ་གྱི་འགྲམ་ལ་བཞག དང་ཐོག་ལོ་མ་དང་བཅས་པ་ཅུང་རྙིད་ཀྱང་ཕྱི་རོལ་ནས་སྒེའུ་ཁུང་ནང་ལྡང་བའི་རླུང་དང་། འཇམ་ལྷོད་ཀྱིས་ཤར་བའི་ཉི་འོད་ཀྱི་དྲིན་ལས་རིམ་བཞིན་སྔ་ལྟར་གསོན་ཉམས་དོད་པས་དཔེ་ཆའི་འགྲམ་དུ་མེ་ཏོག་བཞད་པ་ནི་ཡིད་བརྙན་ཅན་གྱི་རི་མོ་ཞིག་དང་འདྲ།

        མཚན་ཉིད་པ་ཞིག་གིས་ཁྱེད་ཀྱིས་མེ་ཏོག་ཅིག་ལོན་ནས་དེ་ལ་དགའ་ན་མེ་ཏོག་དེའང་དེ་བས་ཁྱེད་ལ་དགའ་ངེས་ཞེས་པ་ལྟར། ཉིན་མོར་ངས་དཔེ་སྒྲོམ་གྱི་ཟུར་དུ་མེ་ཏོག་དང་ལྷན་དུ་དཔེ་ཀློག་བྱས། མཚན་མོར་མེ་ཏོག་དང་ཁ་གཏད་དེ་ཆང་འཐུང་ཞོར་ལབ་བརྡོལ་ཡང་གང་མང་བྱས་མྱོང་།

        ངའི་སྣང་བར་མ་གཞིར་རི་རྒོད་ཀྱི་ཐང་ཤིང་བར་དུ་བཙིར་ནས་སྐྱེས་ཡོད་པ་ཞིག་ད་ནི་ཆར་རླུང་ཆེན་པོ་དང་ཉི་མ་ཚ་མོའི་འཇིགས་པ་མེད་པའི་ཁྱིམ་དུ་སྤོས་པ་ན། རྩ་ལག་ལོ་འབྲས་ཀུན་སྔར་ལས་གཟི་མདངས་རྒྱས་ལ་གསོན་ཉམས་དོད་དེ་མེ་ཏོག་ཅིག་ལ་འཛོམས་ཚད་ཀྱི་ལང་ཚོ་ངོམ་ངེས་རེད་བསམས་ཏེ། ལོ་མའི་བར་དུ་ཡིབས་ནས་ཡོད་པའི་མེ་ཏོག་གོང་བུ་དེ་གཉིས་ལས་ཀྱང་ཟེའུ་འབྲུ་བཞད་པར་རེ་ཞིང་སྒུག་མོད། ཉིན་མོར་ཉི་འོད་ལྡེ་ཆོག་ཆོག་དང་། མཚན་མོར་བསིལ་རླུང་འགམ་ཆོག་ཆོག དགོས་དུས་གཙང་ཆུ་འཐུང་ཆོག་ཆོག་གི་སྐལ་བ་བཟང་པོར་གོང་བུ་དེ་གཉིས་ལ་མེ་ཏོག་བཞད་རྒྱུ་ལྟ་ཞོག མ་གཞིར་ཡལ་གའི་རྩེ་མོར་བཞད་ནས་ཡོད་པའི་མེ་ཏོག་དེའང་ཡུན་མི་རིང་བར་རྙིད་ཅིང་། ལོ་མ་དང་ཡལ་གའང་སྟོན་དུས་མ་ཤར་གོང་ནས་སེར་ཏེ་མེ་ཏོག་གི་རྣམ་ཤེས་བུམ་པའི་ནང་དུ་ཐིམ་སོང་།

        རྫ་བུམ་སྟོང་བ་ཞིག་གི་ཟུར་དུ་དཔེ་ཀློག་བྱས་པ་ནི་འདུག་ས་སྟོང་པ་ཞིག་གི་འགྲམ་ལ་འོང་རྒྱུ་མེད་པའི་གྲོགས་པོ་ཞིག་སྒུག་པ་དང་འདྲ། མཚན་མོར་ཆང་འཐུང་གླུ་ལེན་བྱེད་པའང་བྲག་ཕུག་སྟོང་བ་ཞིག་གི་ནང་དུ་འདས་དོན་ལ་ཕྱིར་དྲན་བྱེད་པ་དང་མཚུངས།

        དོན་དུ་རང་བྱུང་ཁམས་ཀྱི་ཕ་གཞིས་སུ་དཔྱིད་ཀར་མྱུ་གུ་འབུས་ཏེ་དབྱར་ཁར་ལང་ཚོ་རྒྱས་བཞིན། སྟོན་ཁར་ས་གཞིར་ཐིམ་སྟེ་དགུན་ཁར་རེ་བ་སྦྲུམ་པའི་མེ་ཏོག་གི་ལྷན་སྐྱེས་ཀྱི་སྐྱེ་རྒྱུན་ལ་མི་ཡིས་བར་ཆད་བཏང་སྟེ། ས་ལ་མ་རེག གནམ་ལ་མ་ཐུག་པའི་བར་སྣང་དུ་ཁྱིམ་ཚང་སྐྱིད་པོར་མི་དང་འགྲོགས་པར་སྣང་ཡང་། རང་བྱུང་ཁམས་སུ་ལྗོན་ཤིང་དང་རྩྭ་ལྡུམ་ཚོ་དང་ལྷན་དུ་ཆར་རླུང་འཕྲོག་རྩོད་ཀྱི་ལས་ལ་རྒྱབ་ཀྱིས་ཕྱོགས་ཏེ་མི་ཡི་ཁྱིམ་དུ་མི་ཡི་དུག་མྱོང་དགོས་པས། མེ་ཏོག་གོང་བུའི་མངལ་མི་ཤོར་ཅི་ལ་སྲིད། ལར་རྒྱུ་ཡོད་པ་ཙམ་ལས་མཐུན་རྐྱེན་མ་འཛོམས་ན་འབྲས་བུ་འབྱུང་མི་སྲིད་པས། ངས་ཀྱང་མེ་ཏོག་དེའི་སྦྲུམ་མ་མངལ་ཤོར་གྱི་སྡུག་བསྔལ་ནན་གྱིས་མི་བཟོད་ཐབས་ཅི་ཡོད།

        འཇིག་རྟེན་ཐོག་རང་འདོད་བཙན་པོས་རང་སྣང་གང་དྲན་གྱིས་བྱས་པའི་བྱ་བར་རེ་འབྲས་ཤིག་ཨེ་སྨིན་སྙམ་པ་ནི་དངོས་གནས་དགོད་ཤོར་བ་ཞིག་རེད།

        ཁྱིམ་དུ་སྤོས་ཡོང་བའི་མེ་ཏོག་དེ་སྟོན་དུས་མ་ཤར་གོང་ནས་རྙིད་དེ་འབྱུང་བཞི་བུམ་པ་དོག་པར་ཐིམ་པ་ནས་བཟུང་། རྫ་བུམ་སྟོང་པ་དེ་སྔ་ལྟར་དཔེ་སྒྲོམ་གྱི་འགྲམ་དུ་བཞག་པ་ལས་དགུན་ཟླ་རིང་མོར་ངས་ལྟ་རྟོག་ཙམ་ཡང་བྱས་མ་མྱོང་།

        བསམ་ལོང་དྲན་ལོང་མེད་པར་དགུན་གྱི་དུས་ཚིགས་བརྒལ་ཏེ་དཔྱིད་རླུང་དྲོན་མོ་ལྡང་། སྦྲང་ཆར་བསིལ་མ་བབས་ཏེ་ལྗོན་ཤིང་རྣམས་ཀྱི་ཡལ་གར་ལོ་མའི་ནུ་མ་འབུས། ས་གཞིའི་གཏིང་རིམ་ནས་ས་བོན་ལས་མྱུ་གུ་འཁྲུངས།

        འབྲུག་སྒྲ་ལྡི་རི་རི་གྲག་ཅིང་ཆར་པ་ཟིམ་ཟིམ་དུ་འབབ་པའི་དགོང་མོ་ཞིག་ལ། ང་རང་དཔེ་སྒྲོམ་གྱི་འགྲམ་དུ་བསྡད་དེ་དཔེ་ཀློག་བྱེད་དུས། གློག་བུར་དུ་མིག་ལམ་དུ་ལྗང་མདོག་ཕྲན་བུ་ཞིག་མངོན། ནན་ཏན་གྱིས་བལྟས་དུས། རྫ་བུམ་གྱི་དཀྱིལ་ནས་མྱུ་གུ་ཞིག་ས་འོག་ནས་མངོན་ལ་མ་མངོན་ཚུལ་གྱིས་འབུས་ཀྱིན་ཡོད་པ་མཐོང་། རང་གི་མིག་ལའང་ཡིད་མ་ཆེས་ཏེ་ལག་པས་རེག་ཙམ་བྱས་པ་ན། ན་ནིང་རྙིད་དུ་སོང་བའི་མེ་ཏོག་དེའི་རྩ་བར་འཇམ་ཞིང་མཉེན་པའི་གཞུང་རྟ་ཕྲ་མོར་ལོ་མ་གཉིས་སེམས་ཆུང་ངང་འཁྲུངས་འདུག མ་མོ་ལས་ལུ་གུ་སྐྱེས་དུས་ཀྱི་རྫི་བོའི་སེམས་པ་ནང་བཞིན་ངའི་སེམས་ནང་དེ་སྔོན་གྱི་འཁང་ར་ཤུལ་ཙམ་ཡང་མ་ལུས་པར་ཚེ་སྲོག་ཆུང་ཆུང་ཞིག་ལ་བྱམས་དང་སྙིང་རྗེ་སྐྱེས་ཏེ། ལམ་སང་རྫ་བུམ་གཙང་མར་ཕྱིས་ཏེ་དེའི་ནང་ཆུ་གཙང་མ་སྐྱོགས་གང་ཙམ་བླུགས།

        དེ་ནས་བཟུང་། ཉིན་མོར་ཚ་གདུང་གིས་འཚིག་པར་དོགས་ནས་བསིལ་མར་བཞག མཚན་མོར་གྲང་ངར་གྱིས་འཁེང་བར་དོགས་ནས་སྒེའུ་ཁུང་དམ་པོར་བརྒྱབ། ན་ནིང་རེ་བ་སྟོང་ཟད་དུ་གྱུར་ཡང་། ད་ལོའི་རེ་སྒུག་གི་ཁྲོད་དུ། མེ་ཏོག་དེའི་ལོ་མ་ཇེ་མང་དང་ཇེ་ཆེ། གཞུང་རྟ་ཇེ་སྦོམ་དང་ཇེ་སྲར་གྱུར་པ་ནི་བྱིས་པ་ཞིག་འདུག་ཐུབ་པ་ནས་གོག་ཤེས་པ། གོག་ཤེས་པ་ནས་འཁྱར་འཁྱོར་ངང་འགྲོ་ཕོད་པ་ལྟར་རེ་སྒུག་ནི་དཀའ་སྡུག་ལྡན་པ་ཞིག་ཡིན་ཡང་། སྤྲོ་བས་ཁྱབ་པའི་གོ་རིམ་ཞིག་ཀྱང་ཅི་ལ་མིན།

        ཕྱི་རོལ་ནས་ལྡང་བའི་རླུང་དང་ཕྱི་རོལ་ནས་ཤར་བའི་ཉི་འོད། ཕྱི་རོལ་ནས་དྲངས་པའི་གངས་ཆུའི་དྲིན་གྱིས་མེ་ཏོག་དེར་གོང་བུ་གསུམ་བཞི་ཙམ་འབུས། དེ་ནས་སྙིང་རྗེ་བའི་མེ་ཏོག་དམར་སེར་ཅན་གཅིག་རྗེས་གཉིས་མཐུད་ཀྱིས་བཞད་པ་ནི་བྱིས་པའི་འཛུམ་མདངས་དང་ཀུན་ནས་མཚུངས།

        ན་ནིང་མིའི་རང་འདོད་བཙན་པོས་མེ་ཏོག་དེ་རང་བྱུང་གི་ཕ་ཁྱིམ་ནས་བར་སྣང་གི་ཁང་པ་ཞིག་ཏུ་སྤོས་པས་འབྱུང་བཞི་མ་འཕྲོད་དེ་ཚེ་ལ་བར་ཆད་ཕོག་མོད། དཔེ་ཆོས་རིན་ཆེན་སྤུངས་པ་ལས་ས་ལ་འགྱེལ་བ་ས་ལ་བརྟེན་ཞེས་པ་ལྟར། ད་ལོར་གནས་སྐབས་སུ་ཁོར་ཡུག་བསྒྱུར་མ་ཐུབ་ཡང་དེ་ལ་བསྟུན་མཁས་པའི་བློ་བསྐྱེད་ཆེན་པོས་རྫ་བུམ་དོག་མོ་ནས་ཚེ་སྲོག་གི་གཞུང་རྟ་བརྐྱངས། ལང་ཚོའི་ཡལ་ག་རྒྱས། རྣམ་ཤེས་ཀྱི་མེ་ཏོག་འབུས་པ་རེད།

        དེ་ནས་བཟུང་།ངས་ཕྱི་དྲོར་ལས་མཚམས་བཞག་སྟེ་ཁྱིམ་དུ་ལོག་མ་ཐག་ལག་པས་རེག་རེག་དང་སྣ་ཡིས་སྣོམ་སྣོམ་བྱས། སྐབས་འགར་དགོང་མོར་མེ་ཏོག་གི་འགྲམ་དུ་བསྡད་དེ་སྐད་གསེང་མཐོན་པོས་སྙན་རྩོམ་བཀླགས། མཚམས་རེར་ཇ་ཆང་འཐུང་གིན་དྲན་གླུ་བླངས།

        ངས་དགོང་མོ་རེ་ལ་མེ་ཏོག་དེའི་ཁ་རང་ཕྱོགས་སུ་བསྐོར་ཡང་། ཧ་ལས་པ་དགོས་པ་ནི་ཞོགས་པར་སླར་ཡང་ཁ་སྐར་ཁུང་གི་ཕྱོགས་སུ་འཁོར་གྱིན་འདུག དེའང་ལོས་ཡིན་ཨང་། སྒེའུ་ཁུང་གི་ཕྱི་རོལ་ནི་ཁོང་གི་རང་བྱུང་གི་ཕ་ཁྱིམ་ཏེ། དེ་ན་རང་བྱུང་གི་ཉི་འོད་དང་ཆར་ཆུ། བསིལ་རླུང་འཛོམས་ལ་ས་ཚིགས་དང་དྲག་ཆར། ཐན་རླུང་ཡང་འདུས་པར་མ་ཟད། བུང་བའི་མགྲིན་དབྱངས་སྙན་པོ་དང་ཕྱེ་མ་ལེབ་ཀྱི་གཤོག་འགྱུར་ཡག་པོ་ཡང་འཁོར་ངེས། མ་གཞིར་འཚོ་བ་ཞེས་པ་ནི་ཚ་གྲང་གཉིས་འཐབ་ཅན་དང་སྐྱིད་སྡུག་རེས་འཁོར་ཅན་ཞིག་ཡིན་ལ། འཚོ་གཞེས་ཞེས་པ་ནི་རང་ལ་ངོམ་རྒྱུ་ཞིག་དང་གཞན་ལ་སྤྱོད་རྒྱུ་ཞིག་བཅས་གཅིག་རྟེན་གཅིག་འབྲེལ་མིན་ནམ།

        ལ་ལ་ཡིས།རླུང་ཁ་ཡིས་བརྡབ་གསིག་བཏང་མ་མྱོང་བའི་མེ་ཏོག་ལ་དྲི་ཞིམ་མེད་ཟེར།

        ངས་མེ་ཏོག་དེ་ཕྱི་ནང་སོ་སོར་ཡོད་དུས་ཀྱི་དྲི་ཞིམ་གྱི་ཁྱད་པར་མི་ཤེས་མོད། ང་ལ་མཚོན་ན། ཁམ་བུ་དང་སྟར་ཀ་ལྟ་བུ་ཁ་ནང་བཟའ་རྒྱུ་དགོས་ལ། མེ་ཏོག་འདི་ནང་བཞིན་མིག་གིས་བལྟ་རྒྱུ་ཞིག སྣ་ཡིས་སྣོམ་རྒྱུ་ཞིག སེམས་ཀྱིས་མྱོང་རྒྱུ་ཞིག་ཡོད་ན་ད་གཟོད་མི་ཚེ་ཞེས་པ་ནི་ལུས་བདེ་ཞིང་སེམས་སྐྱིད་པ་ཞིག་རེད།

        དགོང་མོ་ཞིག་ལ། ང་ཆང་གིས་ཅུང་བཟི་སྟེ་མེ་ཏོག་དེར་ཁ་འཁོར་ཏེ་ཉལ་སྐབས། སྐར་ཁུང་ལས་ལྡང་བའི་བསིལ་རླུང་གིས་མེ་ཏོག་དེ་སིག་སིག་ཏུ་འདར། གཞི་ནས་མེ་ཏོག་དེར་ད་དུང་མིང་མེད་པར་དྲན་དུས། དེའི་སྐར་མའི་དབྱིབས་དང་འདྲ་བའི་མེ་ཏོག་ནི་སྐར་ཁུང་དང་ཁ་གཏད་དེ་ནམ་མཁའི་སྐར་མའི་ཕྱོགས་སུ་བཞད་ནས་འདུག་པས་ཁ་ནས་རང་དབང་མེད་པར་སྐར་མའི་མེ་ཏོག་ཅེས་བོས།

        རྨི་ལམ་དུ། ཁ་ཕར་འཁོར་དུས་བོད་པའི་བུ་མོ་མཛེས་མ་ཞིག་གི་སྒེག་ཉམས་ལྡན་ལ། ཁ་ཚུར་འཁོར་དུས་བོད་ཀྱི་སྟག་ཤར་དཔའ་མཛངས་ཅན་ཞིག་གི་གཟི་ཉམས་ལྡན་པ་ཞིག་གིས། ང་ལ་མིང་མི་དགོས། མིང་གིས་རྐང་ལག་བཅིངས་ན་ཅི་བྱ། མིང་གིས་སྣ་ལོ་གཅུས་ན་ཅི་ཁག ང་ལ་དགོས་རྒྱུ་ནི་རང་བྱུང་ཁམས་ཡིན། ལྷན་སྐྱེས་ཀྱི་གཤིས་རྒྱུད་དང་གནའ་ཆགས་ཀྱི་དྲི་ཞིམ་གྱིས་རང་བྱུང་ཁམས་དང་བསྟུན་དགོས་ཞེས་ཡང་ནས་ཡང་དུ་གསུངས།།