ཨ་མྱེ་རྒན་པོ་ཞིག་གི་རྒྱུན་འཁྱོངས།

        ང་ཚོས་དུས་རྒྱུན་དུ་རང་ཉིད་ལོ་ཆེན་པོ་ལ་སོན་འདུག་པར་ཁ་གཡར་ནས་བྱ་བ་མང་པོ་ཞིག་མི་འགྲུབ་པའི་རྒྱུ་མཚན་འཚོལ་གྱིན་ཡོད། ང་ཚོས་རང་ཉིད་ལོ་ཆེན་པོར་སོན་ཟིན་པའི་འདུ་ཤེས་བསྐྱེད་དུས་བྱ་བ་ཅིའང་མ་འགྲུབ་ན་བློ་སེམས་བདེ་བའི་ཚོར་སྣང་འབྱུང་བ་རེད། དེའི་ཕྱིར། བྱ་བ་མང་པོ་ཞིག་མ་འགྲུབ་ནའང་ཁ་གཡར་ས་སྟབས་བདེ་ཞིང་རྒྱུ་མཚན་ཉུང་ཙམ་ཡང་འཐུས་པའི་དོན་དག་རེ་རྙེད་ན་མི་ཀུན་གྱིས་ནོར་འཁྲུལ་འགའ་རེ་ཤིན་ཏུ་རྟབ་རྟབ་པོས་འདས་པར་བསྒྱུར་སྲིད། འདི་ནི་འཇིག་རྟེན་འདིའི་སྟེང་དུ་ཆགས་པའི་མི་ཤུགས་ཆེ་བའི་བསམ་བློ་ཕྱོགས་སའང་ཡིན། འོན་ཀྱང་། ལན་རེར་ལོ་ལོན་དུ་གྱུར་བའི་རྒས་མི་འགའ་རེ་ཡིས་ཁྲག་དར་ལུས་དར་གྱི་གཞོན་ནུ་ཚོས་ཀྱང་སྒྲུབ་མི་ནུས་པའི་བྱ་བ་རླབས་པོ་ཆེ་མང་པོ་སྒྲུབ་ནུས། དཔེར་ན་རྒས་ལོ་དྲུག་ཅུར་ཐོན་དུས་ལུས་པོ་བདེ་སྦྱོང་（健身）གི་མགོ་བརྩམ་ཞིང་བདུན་ཅུ་ཁ་ལྷག་ལ་ཐོན་དུས་གཟུགས་དབྱིབས་（模特）ཀྱི་ལས་འགུལ་ཐོག་ནས་ཀྲུང་གོ་རྒྱལ་ཡོངས་ལ་སྐད་གྲགས་ཁྱབ། རྒས་ལོ་བརྒྱད་ཅུར་བུད་པ་ནས་བཟུང་གློག་བརྙན་མང་པོའི་ནང་དུ་མི་སྣ་མི་འདྲ་བའི་འཁྲབ་སྟོན་མང་པོ་འཁྲབ་ནས་རྒན་གཞོན་མང་པོ་ཞིག་ཧ་ལས་སུ་བཏང་ཡོད་པའི་རྒྱ་ནག་ལྐུག་པའི་ཟློས་གར（哑剧）གྱི་སྲོལ་འབྱེད་པ་བྰང་དི་ཧྲིན་（王德顺）ལྟ་བུ་ཡིན། དེ་ལྟར་མི་ཀུན་ལ་ཆ་རྒྱུས་ཆེ་བའི་རྒྱལ་ནང་གི་འཁྲབ་སྟོན་པ་ཁྲེན་ལོང་（成龙）དང་ལོའུ་དེ་ཧྭ（刘德华）ཕྱི་རྒྱལ་གྱི་ཨ་ནོར་སི་བྰ་ཤིན་ཀེ（阿诺舍瓦辛格）དང་ཧྲི་ཐྰེ་ལོན（史泰龙）མྰེར་ཇེ་སིན（梅尔杰森）ཐྰང་མོས་ཧྰན་ཁི་སི（汤姆汉克斯）སོགས་ཀྱི་སྙན་གྲགས་གཞོན་དུས་ནས་འཛམ་གླིང་དུ་ཁྱབ་ཅིང་དཔལ་འབྱོར་ཀྱང་ཟད་མཐའ་མེད་པ་ཞིག་ཐོབ་རྙེད་བྱུང་ཡོད་མོད། རྒས་ལོ་ལྔ་བཅུ་དང་དྲུག་ཅུའི་ཐེམ་སྐས་བརྒལ་གྱིན་ཡོད་མོད། ཁོ་ཚོས་སྔར་བཞིན་མི་རྣམས་ཀྱི་སྤྱན་ལམ་དུ་གློག་བརྙན་ལེགས་པོ་ཕུད་ཀྱིན་ཡོད་པ་རེད། དེའི་རྐྱེན་གྱིས་དེང་སང་བོད་ཀྱི་གཞོན་ནུ་མང་པོ་ཞིག་གི་ལོ་ཚོད་

        སུམ་ཅུ་ཡས་མས་ལའང་བརྒལ་མེད་རུང་རང་ཉིད་རྒས་ཟིན་པར་རློམ་ནས་བྱ་བ་ཅི་ཡིན་ནའང་མི་བསྒྲུབ་པའི་ལེ་ལོ་ཡི་བསམ་སྤྱོད་འཆང་བ་ནི་ཚེ་སྲོག་ལ་འགན་མ་ཁུར་བའི་ཆེས་ཐབས་རྡུགས་ཤིག་མ་རེད་དམ།

        རྒྱུ་མཚན་དེ་ལྟ་བུ་ཞིག་ལ་བརྟེན་ནས་དེ་རིང་ངས་ཀྱང་འདི་ནས་ཨ་མྱེ་རྒན་པོ་ཞིག་གི་ལོ་རྒྱུས་སམ་དོན་དག་ཉུང་ཙམ་འབྲི་རྩིས་ཡོད། རེད་དེ། ངས་འདི་ནས་འབྲི་བར་རྩོམ་པའི་ཨ་མྱེ་རྒན་པོ་ནི་འཛམ་གླིང་དུ་སྐད་གྲགས་ཡོད་པའི་མི་སྣ་ཞིག་མ་ཡིན་ལ། རྒྱལ་ནང་དུ་དཔལ་འབྱོར་བསྒྲུབ་པར་མཁས་བའི་ཁེ་ལས་པ་ཞིག་ཀྱང་མིན། ཁོ་ནི་སྤྱིར་བཏང་ལས་སྤྱིར་བཏང་བ་ཞིག་སྟེ་སྡེ་བ་གཅིག་གི་ཡིན་རུང་ཁོ་རང་ངོ་མི་ཤེས་མཁན་གྱི་སྡེ་མི་མང་པོ་ཡོད་སྲིད་ལ། ནམ་ཞིག་འཇིག་རྟེན་འདི་ནས་འདས་རུང་དུས་ཚོད་མང་པོ་ཞིག་ཕྱིན་མི་དགོས་པར་མི་རྣམས་ཀྱིས་བརྗེད་སྲིད་པའི་ཨ་མྱེ་སྤྱིར་བཏང་བ་ཞིག་ཡིན།

        ཁོའི་མིང་ལ་ཨ་མྱེ་རྡོ་རྗེ་ཟེར་ཞིང་རྫོང་དང་བར་ཐག་ཤིན་ཏུ་རིང་བའི་མཐའ་འཁོབ་ཀྱི་སྡེ་བ་ཞིག་ཏུ་འཚོ་བ་རོལ་གྱིན་ཡོད། ངས་ཁོ་རང་ངོ་ཤེས་དུས་རྒས་ལོ་དྲུག་ཅུ་ལྷག་ལ་སོན་ཡོད་པས་མི་ཚད། མིག་ཡའི་ནང་དུ་ཚ་ལོང་བུད་དེ་མིག་གཅིག་ལ་མ་གཏོགས་མཐོང་ནུས་མེད། ད་ལྟ་ཕྱིར་འདང་ཞིག་བྱས་ན་ངེད་གཉིས་ཀྱི་ངོ་ཤེས་ནི་གློ་བུར་བ་ཞིག་ཀྱང་རེད་ལ། གློ་བུར་བ་འདི་བརྒྱུད་དེ་གྲོགས་པོའི་བར་གྱི་བརྩེ་བ་དང་འདྲ་ཞིང་དགེ་སློབ་བར་གྱི་དུང་བ། ཡང་ན་ཨ་མྱེ་དང་ཚ་བུའི་བར་དུ་ཡོད་པའི་གཉེན་ཉེ་ཡི་ཞེ་འདང་སོགས་སྣ་མང་ཞིང་རྙོག་འཛིང་ངམ་བརྩེ་བ་ཟབ་པའི་འབྲེལ་བ་ཞིག་རིམ་བཞིན་ཆགས།

        ཉི་མ་དེར་ང་རང་རྫོང་ནས་ཡུལ་ཚོ་འདི་རུ་སླེབས་མ་ཁད་ཡིན་ཞིང་ཇ་ཁང་དུ་ཟས་ཉུང་ཙམ་སྐོལ་བའི་གྲ་སྒྲིག་བྱེད་ཀྱིན་ཡོད་དུས། དངོས་པོ་གང་རུང་ཞིག་གིས་ཁང་སྒོ་བརྒྱུད་དེ་ནང་དུ་འཕྲོས་པའི་ཕྱི་དྲོའི་ཉི་འོད་ནག་གེར་འདན་སོང་བས་ངས་མྱུར་གྱིས་མགོ་བོ་དགྱེ་ནས་གཟབ་པར་བལྟས་པ་ན། ལོ་དྲུག་ཅུ་ཁ་ལྷག་ལ་སོན་པའི་ཨ་མྱེ་རྒན་པོ་མིག་ཡའི་ནང་དུ་ཚ་ལོང་བུད་པ་ཞིག་སྒོ་ནས་ཡར་འཛུལ་བྱུང་བས་དྲང་མོར་བཤད་ན་ང་ཁོའི་ཕྱི་ཡི་རྣམ་པ་ལ་བལྟས་ཏེ་ཅུང་ཙམ་སྐྲག་སོང་། སེམས་སུ་འདི་སྨྱོན་པ་འདྲ་ཞིག་ཡིན་ནམ་འདོད་དེ་ཁོ་ལ་ཁམས་བདེ་ཞུས་པ་ཡིན།ཁོས་ང་ལའང་ཁམས་བདེ་ཞུས་ཤིང་ཁོ་རང་ཡོང་བའི་དམིགས་ཡུལ་དང་འདུན་པ་བཤད་བྱུང་བས་ང་རང་སེམས་གཏིང་ནས་དགའ་སྤྲོ་སྐྱེས་པ་ཡིན། ང་རང་གནས་འདི་རུ་ཡོང་བ་ནི་གོང་གི་བཀོད་སྒྲིག་ཙམ་མ་ཡིན་པར་རང་གི་ནུས་པ་ཆུང་ཆུང་འདི་ལ་བརྟེན་ནས་ཡུལ་འདིའི་མི་དམངས་ལ་བོད་ཡིག་འགའ་རེ་ཁྲིད་རྩིས་ཡོད་མོད། སློབ་སྐབས་གོང་མར་ངས་ཁྱིམ་བདག་ཚོགས་འདུའི་ཐོག་ནས་བོད་ཡིག་སྦྱོང་བསམ་མཁན་ཡོད་ན་ངས་རིན་མེད་དུ་སློབ་ཅེས་ལབ་མོད་སུ་གཅིག་ཀྱང་མ་བྱུང་། འོན་ཀྱང་། དེ་རིང་ཨ་མྱེ་ལོ་ལོན་ཞིག་ང་འཚོལ་དུ་ཡོང་ནས་ཁོ་ལ་བོད་ཡིག་སློབ་དགོས་པའི་རེ་བ་ཞུ་དུས། སེམས་ནང་ཞིག་ལ་འདི་ནི་ཁོའི་རེ་བ་མ་ཡིན་པར་ངའི་རེ་བ་ཡིན་པའི་ཚོར་སྣང་དང་སྤྲོ་སེམས་འཛད་མེད་ཅིག་བྱུང་ནས་ཁས་བླངས་པ་ཡིན།

        ངས་གསལ་བོར་དྲན་པ་ནི། ཨ་མྱེ་རྡོ་རྗེ་དང་ངེད་གཉིས་ཀྱིས་བོད་ཡིག་སྦྱོང་བར་མགོ་རྩོམ་དུས་ཁྲིད་དེབ་གཅིག་ཀྱང་མེད། ཁོས་བླ་མས་ཁོ་ལ་སྟེར་བ་ཡིན་ཟེར་བའི་ཤོག་ལེབ་ཅིག་གི་ངོས་སུ་གསལ་བྱེད་སུམ་ཅུ་དང་མགོ་ཅན་དང་འདོགས་ཅན་ལས་བྲིས་མེད་པ་དེ་ཁྲིད་དེབ་བྱས་པ་ཡིན། ངས་ཁོ་ལ་ཀ་ཡིག་ནས་འགོ་བཟུང་ཞིང་ཡང་དང་བསྐྱར་དུ་ཉིན་རེར་སྐར་མ་བཞི་བཅུ་ལྷག་ཕུད་དེ་ཡི་གེ་འགའ་རེ་འགའ་རེ་བྱས་ཏེ་བསླབ་པ་ཡིན།

        ཨ་མྱེ་རྡོ་རྗེའི་མིག་ནུས་ཞན་པས་དུས་རྒྱུན་ཚི་དྲེག་གིས་ཟིན་པའི་ཤེལ་མིག་ཅིག་དང་ཐེད་རལ་དུ་གྱུར་གྱིན་པའི་ཤོག་ལེབ་དེ་གཉིས་ནི་ཁོས་ཉིན་རྒྱུན་ངའི་སར་ཡོང་སྟེ་ཡི་གེ་སྦྱོང་བའི་ཅ་ལག་གལ་ཆེན་ཞིག་ཏུ་གྱུར། ངེད་གཉིས་ཀྱིས་དཀའ་ལས་ཆེན་པོ་བྱེད་མ་དགོས་པར་གསལ་བྱེད་སུམ་ཅུ་དང་མགོ་འདོགས་ཅན་སོགས་རྨང་གཞིའི་འདོན་ཀློག་གི་ཆ་རྐྱེན་དུ་གྱུར་བའི་ཡི་གེ་འགའ་ཤས་སླ་མོར་ཤེས་ཐུབ་སོང་། རེད་དེ། ཐོག་དང་པོར་ཨ་མྱེ་རྡོ་རྗེ་ཡིས་གཙང་དག་ཏུ་བཟུང་བའི་ཤོག་ལེབ་དེ་ཟླ་གཅིག་འགོར་རྗེས་ཚི་དྲེག་དང་ཐེད་རལ་གྱིས་ཟིན་ནས་དེའི་ཐོག་གི་ཡིག་འབྲི་དག་ཀྱང་གསལ་བོར་མི་མཐོང་བས། ཁོ་ཕར་ཁྱིམ་དུ་སོང་ནས་སྦྱང་བརྩོན་ཅི་འདྲ་བྱས་ཡོད་མེད་ནི་ངས་མ་བཤད་ཀྱང་ཚང་མས་ཤེས་ཐུབ།

        ཨ་མྱེ་རྡོ་རྗེ་ལ་གསལ་བྱེད་སུམ་ཅུ་སོགས་རྩ་བའི་ཡི་གེ་དག་ཁྲིད་པའི་ཟླ་གཅིག་ལྷག་ནི་ཤིན་ཏུ་སྤྲོ་བ་དང་མཉམ་པོར་ཕར་འདས། ངས་དུས་ཚོད་བཀོད་སྒྲིག་གི་སྟེང་ནས་ཀྱང་རང་ལ་ཚོགས་ཐུན་སྔ་ཕྱི་ནམ་ཡོད་ན་ཨ་མྱེ་རྡོ་རྗེ་ལ་བོད་ཡིག་སློབ་པའི་དུས་ཚོད་ཅིག་ཕུད་ཀྱིན་ཡོད་པས། ཁོ་རང་བ་མོ་འཚོ་བ་དང་ཁྱིམ་ལས་ཙག་ཙིག་ལ་བྲེལ་དགོས་མོད་དུས་ལྟར་དུ་ངའི་སར་ཉིན་རྒྱུན་བོད་ཡིག་སློབ་ཏུ་ཐོན།

        ཧ་ལམ་འཇིག་རྟེན་འདིའི་སྟེང་གི་བྱ་བ་འགྲུབ་པའི་ཆོས་ཉིད་ནི་རྒྱུན་སྐྱོང་ཐུབ་པ་དེ་རྩ་བའི་ཆ་རྐྱེན་ཞིག་ཡིན་པ་འདྲ་སྟེ། དང་ཐོག་ཁྱོད་ལ་ཇི་ལྟར་གྱི་དགའ་ཞེན་དང་བློ་རིག་ཡོད་རུང་བྱ་བ་ཞིག་སྒྲུབ་པར་རྒྱུན་འཁྱོངས་མ་ཐུབ་ཚེ་ཡོན་ཏན་འགའ་རེ་ནི་ཁོར་ཡུག་ཆུང་ས་ཞིག་ལས་ཁྱབ་མཉམ་དུ་འགྲོ་མི་ཐུབ། དེའི་ཕྱིར། ང་རང་གིས་མེ་དང་མཚུངས་བའི་སྙིང་སྟོབས་ཤིག་ཐོགས་ཏེ་ཨ་མྱེ་རྡོ་རྗེ་ལ་བོད་ཡིག་ཁྲིད་དེ་ཟླ་གཅིག་འགོར་རྗེས། རིམ་བཞིན་ཁོ་རང་ཉིན་རྒྱུན་ངའི་སར་ཡོང་བ་ལ་སུན་སྣང་ཆེན་པོ་སྐྱེས། སུན་པ་འདི་ནི་ཨ་མྱེ་རྡོ་རྗེ་ལ་གཏད་པ་མ་ཡིན་པར་ཁོས་བསྒྲུབ་པའི་བྱ་བ་ལ་སྐྱེས་པ་ཡིན་པས། མཚམས་དང་མཚམས་སུ་ཁོ་རང་སློབ་གྲྭའི་སྒོ་འགྲམ་ནས་འཛུམ་དམུལ་དམུལ་ངང་ནང་དུ་འཛུལ་འོང་དུས་ང་ལ་རྨས་ཕོག་པའི་སྡུག་བསྔལ་ལྕི་མོ་ཞིག་ཡོང་གིན་འདུག

        ཨ་མྱེ་རྡོ་རྗེ་ཡིས་གསལ་བྱེད་སུམ་ཅུ་ཤེས་རྗེས་ངས་ཁོ་ལ་མིང་དང་ཚིག་ཐུང་རེ་འབྲི་དེབ་ངོས་སུ་བྲིས་ནས་བསླབ་པ་ཡིན། དེ་ལྟར་ནང་དོན་ཇེ་ཟབ་ཏུ་བཏང་བ་དང་བསྟུན་ནས་ཁོས་ཀློག་འདོན་གྱི་ཕྱོགས་ནས་དཀའ་ལས་དང་བར་ཆད་མང་ཙམ་མྱོང་དགོས་པས། ངའི་བར་གྱི་སུན་སྣང་དེ་ག་ལེར་སྙིང་རྗེ་ཞིག་ཏུ་གྱུར་ནས་ཁོའི་ཉམ་ཆུང་དང་ལྷོད་མེད་ཀྱི་འབད་བརྩོན་ལ་བཤད་མི་ཤེས་པའི་གུས་སེམས་ཤིག་སྐྱེས་ཏེ་རང་ནུས་ཅི་ལྕོགས་ཀྱིས་སྔ་དྲོ་དང་ཕྱི་དྲོ། མཚན་མོའི་གློག་སྒྲོན་སོགས་ཀྱི་འོག་ནས་སློབ་ཁང་དང་གཞུང་ལས་ཁང་། རྩྭ་ཐང་སོགས་ལ་ཕྱིན་ནས་རྒྱུན་རིང་གིས་ཤིན་ཏུ་ཞིབ་པར་བོད་ཡིག་གི་འདོན་ཀློག་བསླབས་པ་ཡིན།

        དེ་ལྟར་ངེད་གཉིས་ཀྱིས་ལོ་གཅིག་ལྷག་ལ་རྒྱུན་འཁྱོངས་བྱས་ཏེ་འབད་བརྩོན་མ་ལྷོད་པའི་དྲིན་གྱིས་ཨ་མྱེ་རྡོ་རྗེ་ཡིས་ཁ་འདོན་མང་པོ་ཞིག་ཆད་ལྷག་མེད་པར་འདོན་ཤེས་སོང་བས་ངའི་སེམས་ནས་དོན་ཆེན་ཞིག་འགྲུབ་པའི་ཚོར་བ་དྲོན་པོ་ཞིག་སྐྱེ་བྱུང་། དེའི་རྗེས་ནས་ངས་ཁོ་ལ་ང་རང་གི་ཤེས་ཚོད་དང་བསྟུན་ནས་རྒྱལ་སྲས་ལག་ལེན་དང་བདེ་སྨོན། བསམ་ལྷུན། བར་ཆད་ལམ་སེལ་སོགས་ཀྱི་ནང་དོན་ཁོ་རང་ཚོའི་སྐད་ཀྱིས་ཁྲིད་པས་ཁོ་རང་ཤིན་ཏུ་སྤྲོ་བ་ཆེན་པོས་ངའི་ས་ནས་ཉིན་རྒྱུན་དུས་ཚོད་གཅིག་ཁ་ལྷག་ལ་འགོར་འགྱང་བྱས་མོད། ཁོས་ད་ནི་དགེ་བ་བསྒྲུབ་དགོས་ཚེ་སྒྲུབ་ཤེས་ཀྱིན་འདུག་ལབ་ནས་ཤིན་ཏུ་ཡིད་ཚིམ་པའི་ཚུལ་བསྟན།

        ང་རང་ཡུལ་འདིར་ཐོན་ནས་ཡུལ་མི་ཉི་ཤུ་ཁ་ལྷག་ལ་བོད་ཡིག་ཁྲིད་པའི་ནང་དུ་ལོ་གཞོན་དང་རྒས་མི་མང་པོ་ཞིག་ཡོད་ལ། དེའི་ནང་ནས་གཞོན་ནུ་མང་པོ་ཞིག་གིས་སྔ་རྗེས་བྱས་ཏེ་རྒྱབ་ཏུ་དོར་སོང་ལ་རྒན་རྒོན་ཁར་ཁེར་རེ་ཆད་རེ་འོང་གིས་དུས་རྒྱུན་དོ་མི་སྙོམས་པར་སླེབས་ཀྱིན་འདུག ཡིན་ནའང་། ད་ལྟ་ཕྱོགས་སྡོམ་གྱི་ཚུལ་གྱིས་མི་ག་ཚོད་ཀྱིས་བོད་ཡིག་ལེགས་པོར་ཤེས་ཡོད་པར་ཞིབ་རྩིས་རྒྱས་དུས། རྒས་མི་གཉིས་གསུམ་ཞིག་ལས་ཕུད་ཚང་མ་ལོ་བཞི་བཅུ་ཡས་མས་ཀྱི་མི་དར་མ་དག་དག་རེད་འདུག དེ་ཚོའི་ནང་ནས་ཨ་མྱེ་རྡོ་རྗེ་ནི་ཨང་དང་པོའི་གྲས་སུ་ཐོན་ཡོད།མི་མང་པོས་དུས་རྒྱུན་རྒས་མི་ཚོའི་རིག་པ་གསལ་མིན་ལ་བརྟེན་ནས་ཡི་གེ་སོགས་སློབ་མི་སློབ་ཀྱི་དགོས་པ་གླེང་མོད། ངས་བལྟས་ན་རྒས་མི་ཚོའི་རིག་པ་ཆུང་དུས་དང་བསྡུར་ན་ཞན་པ་ཡིན་མོད། རྒས་མི་ཚོའི་རྒྱུན་འཁྱོངས་ཀྱི་སྙིང་སྟོབས་ནི་ལོ་ཆུང་ཚོ་དང་བསྡུར་ན་ལྡབ་ཀྱིས་རབ་ཀྱིན་འདུག དེའི་ཕྱིར། མི་ཞིག་ཇི་ལྟར་དབང་པོ་སྐྱོན་ཅན་དང་ཉམ་ཆུང་། དབུལ་པོ་སོགས་ཐབས་རྡུགས་ཤིག་ཡིན་རུང་། བྱ་བ་གང་རུང་སྒྲུབ་དུས་རྒྱུན་འཁྱོངས་ཀྱི་སྙིང་སྟོབས་ཤིག་ཡོད་ན་རྒྱལ་ཁ་ལོན་གྱིན་ཡོད།

        ང་ཚོས་གོ་ལ་ཆུང་ཆུང་འདིའི་ཐོག་གི་མི་འདྲ་མིན་སྣ་ཚོགས་རིག་ཐུབ་ལ་འཕྲད་ཀྱང་ཐུབ། དེ་ཚོའི་གྲས་ན་ཆ་རྐྱེན་མཐོ་དམན་དང་སྐྱེས་གཟུགས་ཡག་བཙོག སྟོབས་ཤུགས་རྒྱས་ཞན་གྱི་ཁྱད་པར་ཅི་རིགས་ཡོད་ནའང་། བྱ་བ་མང་པོ་ཞིག་གི་སྔུན་ནས་སྐྱེས་དུས་ནས་ཆ་རྐྱེན་ལེགས་པར་ལྡན་པའི་མི་ཚོས་ངང་ཐུང་གིས་རྒྱབ་ཏུ་འདོར་གྱིན་ཡོད་ལ། དུས་རྒྱུན་ཉམ་ཆུང་གིས་འཚོ་བའི་མི་མང་པོ་ཞིག་གིས་ལས་ཀའི་མཐའ་བསྐྱངས་ཏེ་གྲུབ་འབྲས་ལེན་གྱིན་ཡོད། དེ་ཚོའི་གྲས་ན་རྐང་ལག་བཞི་བོ་མེད་པའི་ལིས་ཁྰི་ཧོས་དྲི་ལྟ་བུ་ཡོད་ལ། འོན་ལྐུག་ལོང་བར་གྱུར་བའི་ཧེ་ལྰོན་ཁེ་ལི་ལྟ་བུ་ཡང་ཡོད། ད་རུང་རྗེ་བཙུན་མི་ལ་རས་པ་ལྟ་བུ་ཡོད་ལ། སློབ་དཔོན་ནག་མོ་ཁོལ་ལྟ་བུ་ཡང་ཡོད་དོ།།