མགུར་གླུ་ཆུ་ཡི་གཉེར་མ།

ཆགས་སྲེད་མེ་ཆེན་འབར་བའི་གྲོང་ཚོ་ན།།

དངུལ་གྱི་དྲིལ་བུ་ཏིང་ཏིང་ཟེར་བ་མེད།།

རླུང་བུ་བསིལ་བསིལ་ལྡང་བའི་མཚན་མོ་ན།།

འཁུན་སྒྲ་ངར་ངར་བྱེད་པའི་ཕག་པ་མེད།།

ང་ལ་དེ་ལྟར་ལྟོས་དང་སྙན་ངག་པ།།

ཁྱོད་ཀྱི་མི་ཚེ་རིང་ཐུང་ཅི་ཡང་རུང་།།

མིག་ལ་འོད་དཀར་སྣང་བ་བརྗེད་པ་མེད།།

ཤངས་ལ་དྲི་ངད་འཐུལ་བའང་བརྗེད་པ་མེད།།

གཉིས་པ།

བུང་བས་གླུ་དབྱངས་ལེན་པ་མ་ཐོས་སོ།།

རྫི་བོས་གླུ་དབྱངས་ལེན་པ་མ་ཐོས་སོ།།

སྙིང་ཁ་ཏིག་ཏིག་བྱེད་པའི་ལས་ལྡན་མ།།

ཅུང་ཟད་བཟོད་པར་འདུག་གམ་ལས་ལྡན་མ།།

རྩྭ་སྔོན་ཟིལ་པ་ཁྲོམ་ཁྲོམ་བྱེད་པ་དང་།།

དེ་ལ་ཉི་འོད་ཕོག་པ་ཨེ་མཐོང་ལགས།།

རང་སེམས་སྨུག་པར་འདྲེས་པའི་ཡུ་མོ་འདིས།།

ཤེའུ་གཏན་དུ་བོར་བ་ཨེ་ཚོར་ལགས།།

གསུམ་པ།

ལ་ལུང་ཀུན་ལ་ལམ་དང་ཟམ་པ་འཐེན།།

ལམ་དང་ཟམ་པ་གཏམ་དང་སྙན་པས་འཐེན།།

གཏམ་སྙན་རེ་རེའི་རྩེ་ན་བབས་པ་ཡི།།

བྱིའུ་ལྟ་བུའི་ཁྱེད་རང་གང་དུ་ཡོད།།

དྲན་པའི་རི་མོ་གྱང་ལ་མ་འབྲི་རོགས།།

གྱང་རོ་འདི་དག་སྐྱོ་གདུང་འཇག་སྐྱ་འཕྱུར།།

གླིང་བུ་མཛུབ་རྩེར་བབ་པའི་སྐད་ཅིག་མར།།

ང་ཡི་དྲན་པ་ཉམས་ཤིང་རྩ་སྒོ་འགག།

བཞི་པ།

ཆུ་ཚན་ཁོལ་མ་འཇམ་ཞིང་འཁྱག་པ་ན།།

ཟླ་བ་དཀར་པོ་ཡིད་ཀྱི་དགུང་དུ་འཕགས།།

རི་བོང་རི་བོང་མ་ཟེར་བྱིས་པ་ཚོ།།

མུན་པ་འདི་ལ་མུན་པའི་གོས་མ་བཟོ།།

མུན་པ་འདི་ལ་མུན་པའི་གོས་བཟོས་ན།།

དབྱངས་དང་གསལ་བྱེད་ཙམ་ཡང་རྟོགས་དུས་མེད།།

བྲོ་དང་ཟློས་གར་ཙམ་ཡང་མཐོང་དུས་མེད།།

ཆུ་སྒྲ་ཤག་ཤག་དེ་ཡང་ཐོས་དུས་མེད།།

ལྔ་པ།

ཁྱོད་ཀྱིས་མི་ལོ་བཅུ་ལ་ཚུལ་འཆོས་བྱས།།

ང་ཉིད་བསྙེན་ཞིང་ང་ལ་གསོལ་བ་བཏབ།།

གླེགས་བམ་མཐུག་པོ་བཀླགས་ཤིང་གླེགས་བམ་བརྩམས།།

ཁྱོད་ཀྱིས་སྐྱེ་བ་བརྒྱ་ལ་སྣལ་མ་བཏགས།།

ང་ལ་མཆོད་ཅིང་ང་ཉིད་སྙིང་ལ་སྒོམ།།

སློབ་མ་སྟོང་ཕྲག་དག་ཀྱང་ཕག་བཞིན་བསྐྱངས།།

ང་ནི་རི་བོང་བཞིན་དུ་འཇིགས་ཤིང་སྐྲག།

ང་ནི་ངོ་ཚའི་དབང་གིས་གབ་ཅིང་བྲོས།།