རྒན་པ་རྣམས་ལ་རྒྱུན་དུ་དབུགས་འཚང་བ་དང་སེམས་འཚུབ་པའི་ནད་རྟགས་འབྱུང་བར་མ་ཟད། གཉིད་མི་ཁུག་པ་དང་སེམས་ཁམས་མི་སྐྱིད་པའི་སྣང་ཚུལ་འབྱུང་སླ། རྒན་པའི་ཡི་མུག་ནད་ནི་དོན་དངོས་སུ་བཤད་ན་རྒྱུན་མཐོང་གི་སེམས་ཁམས་ནད་རིགས་ཤིག་ཡིན་མོད། འོན་ཀྱང་དེང་སྐབས་རྒན་པ་རང་ཉིད་དང་སྤྱི་ཚོགས་གང་ཞིག་ཡིན་རུང་དེ་ལ་དོ་སྣང་བྱེད་ཀྱིན་མེད་པར་མ་ཟད། ཡི་མུག་ནད་ལ་དབྱེ་བ་འབྱེད་པའི་ནུས་པའང་ཧ་ཅང་ཞན་པ་རེད། འཛམ་གླིང་འཕྲོད་བསྟེན་རྩ་འཛུགས་ཀྱིས་སྡོམ་རྩིས་བྱས་པ་ལྟར་ན། ལོ60ཡན་གྱི་རྒན་པའི་ཁྲོད་ཡི་མུག་ནད་བྱུང་བའི་ཚད7%ནས10%ཡིན་ལ། ཁྲག་ཤེད་མཐོ་བའི་ནད་དང་ཏོག་དབྱིབས་ཁྲག་རྩ་སྲ་འགྱུར། གཅིན་སྙི་ཟ་ཁུའི་ནད་སོགས་བྱུང་ཡོད་པའི་རྒན་པའི་ཁྲོད་ཡི་མུག་ནད་བྱུང་བའི་ཚད50%ལ་བུད་ཡོད། རྒད་པོ་རྣམས་དང་བསྡུར་ན་རྒན་མོ་རྣམས་ཀྱི་ཡི་མུག་ནད་ཕོག་ཚད་དེ་ལས་ཀྱང་མཐོ་བས། ཚང་མས་ཡིད་འཇོག་བྱེད་རན་འདུག
ཡི་མུག་ནད་ཀྱིས་རྒན་པའི་འཚོ་བའི་སྤུས་ཀར་གནོད་འཚེ་ཐེབས་པར་མ་ཟད། ལྕེབས་པའི་ཚད་ཀྱང་ཇེ་མཐོར་འགྲོ་བཞིན་ཡོད། ལུས་པོའི་སྟེང་དུ་ནད་གང་ཡང་མེད་པའི་རྒན་པ་རྣམས་ལ་མཚོན་ནའང་། ཡི་མུག་པའི་ནད་བྱུང་རྗེས།ཁྲག་ཤེད་མཐོ་བ་དང་ཏོག་དབྱིབས་ཁྲག་རྩ་སྲ་འགྱུར་སོགས་དེ་དང་བསྟུན་ནས་འབྱུང་བཞིན་ཡོད།
རྒན་པའི་ཡི་མུག་ནད་སྔོན་འགོག་བྱེད་ཆེད། རྒན་པ་རྣམས་ཀྱིས་རང་རང་གི་དགའ་ཕྱོགས་སྐྱེད་སྲིང་བྱེད་དགོས་ལ། སྤྱི་ཚོགས་དང་འབྲེལ་འདྲིས་བྱེད་པའི་ཚད་ཇེ་མཐོར་བཏང་ནས། རྒྱུན་དུ་གྲོགས་པོ་དང་མཉམ་དུ་ཇ་འཐུང་ཞོར་ཁ་བརྡ་བྱེད་པ་དང་ཡང་ན་ལུས་སྦྱོང་བྱས་ཏེ། རང་ཉིད་ཀྱི་འཚོ་བ་སྐྱིད་པོ་ཡོང་གང་ཐུབ་བྱེད་དགོས། དེ་ལས་གཞན་ད་རུང་བུ་ཕྲུག་རྣམས་ཀྱིས་རྒྱུན་དུ་རྒན་པར་ཁ་བརྡ་བྱེད་པ་དང་། ཁོ་ཚོའི་ཉོག་བཤད་ལ་ཉན་དགོས་པར་མ་ཟད། རྒྱུན་དུ་ཕྱི་རུ་ཁྲིད་ནས་སེམས་པ་གཡེང་དུ་འཇུག་དགོས་སོ།།