དཔོན་པོས་ང་ལ་གཞས་ཤིག་ཐོངས་ཟེར
ངས་གཞས་ཤིག་བཏང་བ་ཡིན
ནང་དོན་ནི་དཔོན་པོའི་སྐུ་ཚེ་རིང་བར་ཤོག་ཅེས་པ་དེ་ཡིན
དཔོན་པོས་ང་ལ་ད་དུང་གཞས་ཤིག་ཐོངས་ཟེར
ངས་ཡང་བསྐྱར་གཞས་ཤིག་བཏང་བ་ཡིན
ནང་དོན་ནི་དཔོན་པོའི་གོ་ས་འཕར་བར་ཤོག་ཅེས་པ་དེ་ཡིན
དཔོན་པོས་ང་ལ་མུ་མཐུད་དུ་གཞས་ཤིག་ཐོངས་ཟེར
ངས་ཡང་བསྐྱར་གཞས་ཤིག་བཏང་བ་ཡིན
ནང་དོན་ནི་ལྟས་ངན་སྡུག་ཤི་རྒྱག་རྒྱུ་བོ་ཞེས་པ་དེ་ཡིན
༢༠༡༧.༩.༡༧
གྲིབ་གཟུགས།
མཚན་མོ་འདིར་ངས་རང་ལ་གྲིབ་གཟུགས་ཤིག་ཡོད་ན་འདོད
རྒྱུ་མཚན་ནི ང་རང་ཁེར་རྐྱང་ལ་ཧ་ཅང་སྐྲག་པས་ཡིན
གཉིད་ཉལ་དུས་རྨི་ལམ་དུ
གྲིབ་གཟུགས་རིང་བོ་ཞིག་ཡོང་ནས་ང་ལ་འཁྱུད
ང་རང་སྐྲག་སྣང་གིས་གཉིད་ལས་སད
ཕྱི་ཉིན་ངས་ཉི་མ་དཀར་དཀར་ལ
རང་ལ་གྲིབ་གཟུགས་ཤིག་དགོས་དོན་མི་འདུག་སྙམ
༢༠༡༧.༩.༢༠
ཐེ་ཚོམ་གྱི་དྲི་བ།
ང་རང་ཉི་ཟླ་གཉིས་ཀྱི་ཁ་གཏད་ཀྱི
རང་གི་གོ་ལའི་སྤྱི་གཙུག་ཏུ་འགྲེང་ནས
སྟོང་ཁམས་ཆེན་མོར་ཀི་རིང་ལན་གསུམ་བཏབ
ཁ་བ་ལྷབ་ལྷུབ་འབབ་པའི་དགུན་གཞུང་ཞིག་ལ
ང་རང་རང་གི་འཇིག་རྟེན་ལས་ཤུད་དེ
སྟོང་ཁམས་ཆེན་མོའི་སྒྲ་མེད་པའི་མཐའ་མེད་ཀྱི་དབྱིངས་ལ་འདྲེས
ཆར་བ་ཤག་ཤག་འབབ་པའི་དབྱར་གཞུང་ཞིག་ལ
ང་རང་ཕྱིར་རང་གི་འཇིག་རྟེན་དུ་རྩྭ་ཕྲན་ཞིག་ཏུ་སྐྱེས་ཏེ
ལྗང་མདོག་མཐའ་མེད་པའི་སྒྲ་དང་དབྱངས
འོད་བཅས་ཀྱི་ངོ་བོར་འདྲེས་ཡོང་ངམ
༢༠༡༧.༨.༡༢ཉིན།