འདི་ནས་བརྩིས་པའི་མི་ལོ་བརྒྱ་ཙམ་ན
ཁྱེད་ཀྱི་རལ་གྲི་ལྟར་རྩུབ་པའི་མི་གཤིས་ཀྱི་དར་ཡུག་དེ
ཡང་ན་ཁྱེད་ཀྱི་ལྷ་དང་སྲུང་མར་བཅངས་པའི་རེ་བའི་དར་སྐུད་དེ
དེ་རིང་གི་ཁོ་བོ་ལྟར དྲན་པའི་ངོས་ན་ཕྱིར་འཁོར་འདུག
མི་ལོ་མང་པོའི་སྔོན་གྱི་དེ་རིང
རི་བོ་དང་འགྲོགས་ནས ཆུ་བོ་ལ་ཉན་ནས
རི་སྤྱང་སྔོན་མོ་ལྟར་ང་རྒྱལ་ཀྱིས་སྐྱོད་པའི
ཡབ་མེས་གནམ་ལྟས ཁྱེད་རང་བཞུད་ཅིག
དེ་རིང་ཡབ་མེས་གནམ་ལྟས་དྲན་པས
སྙན་ངག་ཅིག་མི་འབྲི་ཐབས་མེད་བྱུང
གཏན་ནས་འཕྲད་མ་མྱོང་བའི་ཡབ་མེས
སློག་པ་ཅན་གྱི་ཁྱེད སྨྱུ་གུ་ཅན་གྱི་ང
བར་དུ་ཆོད་པ་ནི་ཡབ་མེས་ཞེས་པའི་མིང་ཚིག་ལས
གཞན་ཁ་པར་དང་སྲབ་སྐྱོགས་སོགས་ཀྱི་མཚོན་བྱེད་དག
ལོ་རྒྱུས་སུ་ཡོད་པའི་ཡི་གེ་ལྟར་ན
ཁྱེད་དང་ཁྱེད་འདྲ་བ་དག་གིས
ང་ཚོར་གཏམ་དང་སྙིང་རུས་མཉམ་དུ་བསྐྱུར་འདུག
དེ་ལས་ཀྱང་རྐང་རྗེན་དུ་འགྲོ་བའི་སེམས་པ་བཞག་འདུག
ཡབ་མེས་གནམ་ལྟས གློ་བུར་དུ
ཁྱེད་རང་ཡིད་ལ་ཤར་བས
ལོ་ངོ་མང་པོའི་སྔ་རོལ་གྱི་ཁྱེད་ཅག་དྲན་སོང
ནོར་གནག་དང་བཅས་ཏེ རལ་གྲི་དང་བཅས་ཏེ
རྩྭ་དང་ཆུ་བོ མི་དང་མགོ་སྦྲ
དེ་ལས་ཀྱང་མ་དྲན་ཡུན་རིང་འགོར་བའི
མེས་པོ་དག་གིས་ཤ་ཟ་བའི་ཚུལ་ཡང་དྲན་སོང
དེ་རིང མི་ལོ་བརྒྱ་ཕྲག་གིས་ཆོད་པའི
སྐད་ཆ་བཤད་དོན
མོ་ཏྲ་དང་ཁང་བ ལྕགས་དང་ཟམ་ཆེན་གྱི་སྟེང་ནས
ངར་ཤུགས་ཀྱིས་སྐྱོད་པའི་སེམས་པ་ཅུང་ཟད་དུབ་པས་ཡིན་ནམ
ཡང་ན་གློ་བུར་དུ་ཕྱི་མིག་བལྟས་ནས
མེས་པོ་གནམ་ལྟས་དྲན་པས་ཡིན་ཡང་སྲིད
༢༠༡༧.༩.༩
མཆན།
གནམ་ལྟས་ནི་ཕྲན་གྱི་ཡབ་མེས་ཀྱི་མཚང་མིང་སྟེ། ཁོའི་དངོས་མིང་ལ་གང་ཟེར་སུ་ལའང་གསལ་ཆ་མི་འདུག