ང་རྣང་ཞིང་གི་གསེབ་ཏུ་མ་འཚོལ
ང་མུག་སྐྱོབ་ཀྱི་རྒྱ་མའི་སྟེང་ན་མེད
ང་ཉི་ནུབ་ཀྱི་འོག་ཏུ་མ་འཚོལ
ང་བཙའ་ལ་འབྱར་བའི་ལྡ་ལྡི་དེ་དག་མིན
ང་དག་སྣང་གི་ཕྱིར་ཏུ་མ་འཚོལ
ང་བདེན་རྫུན་གྱི་རྒྱལ་ཕམ་འོག་ན་མེད
ང་རྟོག་བཏགས་ཀྱི་ཁམས་སུ་མ་འཚོལ
ངའི་ལུས་སྟེང་ན་མཚུངས་གསལ་གྱི་རྨིག་རྗེས་གང་ཡང་མེད
ང་ནམ་མཁའ་སྟོང་བའི་ཕྱིར་ཏུ་མ་འཚོལ
ང་རྒྱ་ཅོག་གྲུ་བཞིའི་མཐའ་དང་ཟུར་གང་ལའང་མི་གཏོགས
ང་སྐར་མའི་མིག་འོད་ཀྱིས་མ་འཚོལ
ང་ཟླ་བའི་ངོས་ཀྱི་ར་རི་ལ་ཆགས་མེད
ང་མནའ་འབྲེལ་མཐུན་ཚོགས་ནང་དུ་མ་འཇོག
ང་ལ་སྐྱེས་པ་འདིའི་མི་ཚད་པའི་དྲན་སྒོ་མང་པོ་ཡོད
སྡོད་ཁང་ལ་རྩི་བརྒྱག་འདོད་ན་ང་མ་འཚོལ
ང་ལྟར་སྣང་གི་ཐུན་པ་དེ་ཚོ་དང་འབྲེལ་བ་ཅི་ཡང་མེད
ང་གནམ་གང་ནས་ཚེས་གཅིག་བར་དུ་མ་འཚོལ
ངས་རང་གི་གཉིད་མ་སད་ཀྱི་ལུས་པོ་བསྐྱོར་ནས་ཡོད
༢༠༡༧.༩.༤
རོ་སྒྲུང་།
ལུང་བའི་ཕུ་མདའ་བར་གསུམ
བདེ་སྤྱོད་བཟང་བོའི་རལ་བའི་ཟིལ་བ་འཐོར་ས
སྐོམ་གདུང་གི་གཞས་ཆུང་ལེན་ས
གངས་རིའི་ཟོམ་གྱི་གཏམ་རྒྱུད་སྒྲུག་ས
རྫུན་མི་སྨྲ་བའི་མི་ཕོ་ཞིག་གིས་རྟ་ཁྱུ་འདེད་ས
ཁ་མི་གྲག་པའི་བུ་མོ་ཞིག་གི
སེམས་ཁོང་འཁྱག་གིས་བསྡམས་ཏེ
བརྩེ་བ་ཐན་པས་གདུང་ས
༢༠༡༧.༨.༦
བྱ་བྱེད་ལས་གསུམ་ཚང་བའི་འུག་པ།
མཚན་མོའི་སླ་ངའི་ནང་དུ
འུག་པའི་མཆེ་སྡེར་དང་ཧབ་དགོད་བཙོས
སྟོང་བསམ་དང་གླེན་རྟགས་བཙོས
རི་བྲག་གི་འགག་ནས་བསླབས་པའི་འཕུར་རྩལ་བཙོས
འུག་པས་མི་ཡུལ་འགྲིམ་བྱེད་ཀྱི
འཁྲབ་ཆས་ཡོངས་རྫོགས་བཙོས
འུག་པའི་སྣང་ངོར་དཔྱངས་པའི
ཉིན་མོའི་ཐག་པ་ནག་པོ་བཙོས
འོན་ཀྱང
གངས་རི་ཞིག་གི་ཕང་བར་འཐོར་བའི
འུག་སྒྲོ་ཐར་ཐོར་དེས
འུག་པའི་རྫོགས་ལྡན་གྱི་རྒྱལ་རབས་མཚོན་ནམ