ལྷ་སའི་ནམ་མཁའ་དྭངས་སང་ངེ་ཡོད། མགོ་བཀྱགས་ནས་ནམ་མཁར་བལྟས་ན་དྭངས་ཤེལ་དྲི་བྲལ་གྱི་མེ་ལོང་ཞིག་གི་ནང་དུ་ལྟ་བཞིན་ཡོད་པ་དང་མཚུངས། ནམ་མཁར་ལྟ་བཞིན་སེམས་ཁ་ཅུང་ཟད་རེ་ནང་དུ་བཀུག་ཚེ། ཨ་ཙི་ཨ་ཙི་འདིའི་ནང་དུ་གཟུགས་བརྙན་ཞིག་ཀྱང་ཤར་ལོས་ཡོང་སྙམ་བྱུང་། འདི་ལྟ་བུའི་ནམ་མཁའ་འདི་འུ་གཉིས་ཀྱི་མགོ་ཐོག་ལ་ཕུབ་ཡོད་པ་རེད།
ང་རང་ཁང་བ་ཐོག་སོ་བཅུ་པ་ཞིག་ཏུ་བསྡད་ཡོད། ཁང་བ་འདིའི་སྒེའུ་ཁུང་ནི་ཆེ་ཞིང་དྭངས། སྒེའུ་ཁུང་འདིའི་ནང་ནས་རྒྱང་རིང་རྒྱང་རིང་ལ་ལྟ་བ་ནི་ངའི་དགའ་ཕྱོགས་ཤིག་ཏུ་ཆགས་ཡོད། དེ་ནི་ཁྱེད་ཉིད་རྒྱང་རིང་དུ་ཡོད་པས་ཀྱང་ཡིན་པ་འདྲ། དེ་རིང་ཡང་སྒེའུ་ཁུང་འདིའི་ནང་ནས་རྒྱང་རིང་རྒྱང་རིང་དག་ཏུ་ལྟ་བཞིན་ཡོད། འདྲེན་བྱེད་ཀྱིས་སྩེབས་ཚོད་དག་ཏུ་མིག་གི་བྱ་རྒོད་འཕུར་དུ་བཅུག་ནས་ལྟ་བཞིན་ཡོད། བལྟས་བལྟས་མཐར། ཅི་ཡང་མ་མཐོང་བ་འདྲ་བྱུང་ལ་ཅི་ཡང་མཐོང་བྱུང་བ་དང་ཡང་འདྲ་བྱུང་།
ད་ནངས། རྒྱང་རིང་རྒྱང་རིང་དུ་སྤྲིན་དཀར་པོ་གཅིག་ལང་ལིང་དུ་སྐྱོད་པ་མཐོང་བྱུང་། སྤྲིན་དེས་གྲིབ་མ་ནག་རོག་གེ་བ་ཞིག་དྲུད་ནས་ད་དུང་རྒྱང་རིང་ཞིག་ཏུ་འགྲོ་བཞིན་འདུག གྲིབ་མ་དེར། ལ་ཐུར་དང་རི་ཆུ་སོགས་ཀྱི་ཤུགས་རྐྱེན་ཅི་ཡང་མེད་པར་ཟང་ཐལ་དུ་བརྒལ་ནས་རྒྱང་རིང་དུ་བུད་ཐལ། ལ་ཐང་མེད་ན་སྤྲིན་པ་དེ་ཁྱེད་ཀྱི་མགོ་ཐོག་ཏུའང་འཁོར་ཞིང་ཡོང་ཡང་སྲིད་དོ།། སྐབས་འདིར་ངའི་ནང་སེམས་ཀྱི་ལོ་འདབ་དག་ཏུ་ཆུ་ཐིགས་ཕྲ་མོའི་ཚོགས་མང་པོ་ཞིག་འཛུམ་བྱུང་། ཆུ་ཐིགས་དེ་དག་ནི་འདར་ཡོམ་མེ་བྱེད་པའི་དངོས་པོ་སྐོར་ཞིག་སྟེ། རྒྱུ་རྐྱེན་ཕྲ་ཞིང་ཕྲ་བ་རེས་ཀྱང་འདར་ཡོམ་མེ་བྱས་ཏེ་ལྷུང་ལ་ཁད་དང་ལྷུང་ལ་ཁད་བྱེད།
སྒེའུ་ཁུང་ཕྱེས་ཚེ། རླུང་བུའི་ཚོགས་ཀྱིས་འཁྱུག་འགྲོས་ངོམ་བཞིན་ངའི་ངོ་གདོང་དང་བ་སྤུའི་བུ་ག་རྣམས་སུ་འཛུལ་ཏེ་ཡོང་། དེ་ཡིས་དེ་མ་ཁད་དུ་བསིལ་ཧང་ངེ་བྱེད། རླུང་གི་ཚོགས་ཇེ་བསིལ་ལ་སོང་འདུག་པ་ནི་སྟོན་མགོ་བཀུག་པས་ལོས་ཡིན། རྒྱང་རིང་དུའང་སྟོན་མགོ་བཀུག་ཡོད་དམ། སྤྲིན་ལང་ལིང་དུ་སྐྱོད་པའི་རྒྱང་རིང་དུ་རྩི་མགོ་ཐམས་ཅད་སེར་ལམ་ལམ་བྱེད་ཀྱི་ཡོད་དམ། ཁྱེད་ཀྱི་ཐོད་སྐྲའང་སྟོན་རླུང་གིས་བསེད་དེ་ཟིང་ཟིང་དུ་བཟོས་ཡོད་དམ། ཐོད་སྐྲའི་འོག་གི་བཞིན་རས་ལས་རྣམ་འགྱུར་ཅི་ཞིག་མངོན་གྱི་ཡོད་དམ། ངས་ཏག་ཏག་འདི་ལྟར་དང་དེ་ལྟར་ཡོད་ངེས་པའི་ཀུན་རྟོག་སྣ་ཚོགས་བྱས་ཤིང་བསྡད་ཡོད།
ས་སྲོད་དུ་སླེབས་ཚེ། ཉི་འོད་ཀྱིས་རི་རྩེ་ནས་དམར་སེར་གྱི་ཕྱི་མིག་འཕངས་ནས་འབྲལ་དཀའ་བའི་རྣམ་འགྱུར་སྙིང་དུ་སྡུག་པ་རེ་བསྟན་ཡོང་། ང་ལ་མཚོན་ན་དེ་ལྟ་བུའི་རྣམ་འགྱུར་དག་ཀྱང་རྒྱུ་རྐྱེན་གཞན་ཞིག་གི་ངོ་བོར་ཤར་ཏེ་ཁྱེད་ཀྱི་མིག་མདངས་སུ་འཁྲུལ་བར་བྱེད།
སྒེའུ་ཁུང་འདིའི་ཁ་ནས་ཕྱི་ལ་བལྟས་ན། ནམ་མཁའ་ནི་མཐིང་མདོག་གིས་ཕུབ་པའི་ཁང་བ་ཞིག་དང་མཚུངས་ལ། ཁྲ་དཔུང་ངེ་རྒྱས་པའི་སྐར་ཚོགས་ཀྱི་ཚུལ་ནི་ཡིད་དུ་འོང་བའི་གནམ་གཅལ་ཞིག་འཐེན་ཡོད་པ་དང་མཚུངས། སྐབས་རེར་ངས་འདི་ལྟར་བསམ་བློ་བཏང་བ་ཡིན། འུ་གཉིས་ཀྱི་བར་ཐག་ཀྱང་དེ་ལྟའི་རིང་བོ་རིང་བོ་མ་ཡིན་པར་འདི་ལྟ་བུའི་འཆར་ཡན་གྱི་ཁང་མིག་གཅིག་གི་ནང་རོལ་ཏུ་ཡོད་པར་བསམས་པ་ཡིན།
འོད་གཤོག རྩོམ་སྒྲིག་འགན་འཁུར་པ། སངས་རྒྱས་སྒྲོལ་མ།