སྙིང་སྡུག་སྐྲ་ལོ།

ཁྱོད་ནི་མཚོན་བྱེད་ཅིག་ཡིན

མགོ་བོ་གཏུན་ཤིང་ལ་ཤོར་ཡང

དཔའ་མི་ཞུམ་པའི་སྤོབས་པ་ཞིག་ཡིན

བརྩེ་བ་འཁྱིལ་བའི་སྐྲ་ལོ་ཁྱོད་ལ

སྙིང་སྟོབས་ཀྱི་སྲོག་ཤིང་ཀེར་ཡོད

དཔྱིད་ཀ་ནག་པོའི་ས་མུན་གྱི་ཁྲོད་དང

དགུན་ཁ་འཁྱག་པོའི་བཙོན་ཁང་གི་ནང་ན

ཁྱོད་ནི་རང་ཚུགས་ཐུབ་པའི་མར་མེ་རྐང་གཅིག་ཡིན

ཁེངས་དྲེགས་འབར་བའི་ཁྱོད་ཀྱི་ཕ་རོལ་ན

གཉེན་ཉེ་སུས་ཀྱང་གླེང་མི་ཕོད་པར་ལུས་པའི

ཡ་ང་བའི་དཀའ་སྡུག་དང་གསང་བ་བསྐུངས་ཡོད

ཁྱོད་རང་སྨིན་ཐག་ཆོད་མེད་ན་ཡང

འགན་འཁྲི་ལྕི་མོ་ཁུར་དུ་བླངས་ཡོད་པས

སྙིང་སྡུག་ཁྱོད་ལ་གཏུབ་འབྲེག་ཐེབས་པ་ནི

ང་རང་གཉིད་མི་ཁུག་པའི་སེམས་ཀྱི་གོད་ཆག་ཡིན

ཁྱོད་ནི་ལང་ཚོ་དང་ང་རྒྱལ་མཚོན་བྱེད་ཡིན་པས

མི་གང་ཡིན་གྱི་ལག་པས་བྲེགས་ཏེ

གནས་གང་ཡིན་དུ་ས་རུ་ལྷུང་ག་ལ་ཉན

ཁྱོད་རང་ས་ལ་ཟགས་པའི་ཕངས་པ་དེས

ངའི་མཚན་མོའི་རྣམ་ཤེས་གཏོར་ཅིང

ངའི་གཉིད་ཀྱི་རྒོ་ཁྱུ་དཀྲོགས་ཏེ

ཁྱོད་དང་འབྲེལ་བའི་ངའི་སྙིང་སྡུག་མང་པོ་དྲན

སྐྲ་ལོའི་ང་རྒྱལ་ལ་སུས་ཀྱང་ལག་ལྕག་མ་ཐེབས་ན

སྐྲ་ལོའི་བཞུར་རྒྱུན་ལ་སུས་ཀྱང་བར་ཆད་མ་བཏང་ན

སྐྲ་ལོའི་འོད་ཟེར་ལ་སུས་ཀྱང་མུན་ནག་མ་བྱུགས་ན

སྐྲ་ལོའི་སྐྱེས་སྟོབས་ལ་སུས་ཀྱང་གཏུབ་འབྲེག་མ་བྱས་ན

འུ་ཅག་གི་སྐྲ་ལོར་དཔུང་སྟོབས་ག་ཚོད་རྒྱས་ཡོད་ཨང

གཉིད་མི་ཁུག་པའི་མཚན་མོའི་ངོགས་སུ

ངས་ཕངས་སེམས་ཀྱི་སྒོ་ནས་འདི་ལྟར་བསམས

༢༠༡༦ལོའི་ཟླ༤བའི་ཚེས༡༡གི་ནམ་གུང་ཆུ་ཚོད་གསུམ་པར།

ཟླ་བའི་གཙང་པོ། རྩོམ་སྒྲིག་འགན་འཁུར་པ། གདུགས་དཀར་སྐྱིད།