རྒྱལ་པོ་ཁ་དོག་དམ་པས།།
ཆོས་ཕྱིར་སྲས་བཙུན་དོར་བ།།
བྱམས་པར་སྙིང་ཆུང་ཕུལ་བར།།
ང་ཡང་འགྱོད་དགོས་མི་འདུག །
འཇིག་རྟེན་བྱ་བའི་ཕུན་ཚོགས།།
ཡིད་འོང་དབང་བོའི་གཞུ་རིས།།
ཚེ་ལོ་མཐའ་རུ་བསྐྱལ་བར།།
ནོར་ལ་འཐམ་དགོས་མི་འདུག །
ཁང་བ་གཡུང་དྲུང་ཕྱེད་མའི།།
གྲ་དང་རྩིག་མཆོག་མཚར་ཡང་།།
ང་རང་གཞིས་དེར་མི་འཚང་།།
བྱམས་པའི་ཕྱོགས་སུ་ཕྱིན་འགྲོ།།
སྟོན་ལ་ཆར་ཆུ་མོད་ཀྱང་།།
ཁིས་དང་ཉག་ག་རྟོལ་ཤོག །
ང་ཡིས་ཆུ་ཕྱིང་བསྣམས་ཏེ།།
ལུང་གསུམ་མདོ་རུ་འབྱོར་ཡོད།།
སྲིན་བལ་ཐགས་སུ་བཏགས་པའི།།
དར་ལ་དར་ཚོན་སྣ་ལྔ།།
ཆུང་འདྲིས་དར་དཀར་ཡུག་གཅིག །
ཡིན་འགྲོ་སེམས་ན་དགའ་བ།།
དབུས་ཀྱི་ཕོ་བྲང་དཀར་དམར།།
མེས་པོའི་རྔུལ་ཆུས་བཞེངས་པ།།
དབུས་སུ་བརྐྱངས་ཕྱག་འཚལ་ནས།།
འགྲོ་བའི་དབུས་ལམ་དཀར་བ།།
ལུས་ཀྱི་གཉན་ས་ཞིག་ཏུ།།
ནད་ཀྱིས་འཚེ་བ་མེད་ན།།
སེམས་ཀྱི་ཁང་བའི་ནང་དུ།།
གཏན་དུ་བཞུགས་རོགས་མཛོད་ཅིག །
བསམ་འཕེལ་མ་མའི་གཏིང་གི །
བསམ་འཕེལ་དབང་གི་རྒྱལ་པོ།།
བསྐལ་བརྒྱར་བསྲུབ་དགོས་བྱུང་ཡང་།།
འགྱོད་སེམས་ང་ལ་མི་འདུག །
ལྷ་སའི་བར་སྐོར་ཁྲོམ་གྱི།།
ནོར་བུ་ཆ་བདུན་ཡག་ཀྱང་།།
ནོར་བུ་ཆ་བདུན་མི་དགོས།།
བྱམས་པའི་སྙིང་ཆུང་དགོས་ཀྱི།།
ང་རང་དགུན་ལ་བབས་པའི།།
འདབ་དྲུག་ཁ་བར་སོམས་དང་།།
སེམས་པའི་རི་སྒང་ཀུན་ཏུ།།
ལ་ལུང་མེད་པར་དབབ་ཆོག །
ཇ་མཆོད་ལྷ་ལ་འཕངས་པ།།
ལྷ་བུས་བདུད་རྩིར་སོམས་དང་།།
མ་བཟང་བུ་མོ་ཞིག་གི།།
མཆོད་པའི་ཇ་ཕུད་ཡིན་གྱི།།
ཁྱེད་རང་སྟོད་ནས་བབས་པའི།།
རྫ་ཆུ་བསིལ་མ་ཡིན་ན།།
ང་ཡིས་དམའ་མོའི་གཞོངས་སུ།།
འཁོར་ས་འཁྱིལ་ས་ཞུས་ཆོག །
ང་གཉིས་སྒེར་གཞིས་གཅིག་ཏུ།།
མཉམ་དུ་འཛོམས་རྒྱུ་བྱུང་ན།།
འཇིག་རྟེན་བྱ་བའི་ལས་ལ།།
ཉིན་འཁེལ་མཚན་འཐག་གནང་ཆོག །
ཡིད་སེམས་གཉིས་ཀྱི་འཕར་འགྲོས།།
སྔས་ཐོག་གཅིག་ཏུ་ལྡང་དུས།།
འཇིག་རྟེན་སྣང་བའི་བདག་པོ།།
གཏན་དུ་མེད་ན་བསམས་བྱུང་།།
གཡང་ཆགས་གསེར་གྱི་སྙིང་བོར།།
གཞིས་སྡོད་ཁྱེད་ཀྱིས་གནང་ན།།
གསེར་བརྡུངས་གསེར་གྱི་རྣ་ཆ།།
ང་ལ་མེད་ན་ཆོག་པ།།
དྲན་ཚུལ་རི་ལ་བཀུག་ཚེ།།
རི་ཆེན་སྨུག་པས་བཟུང་འདྲ།།
ཁྱེད་རང་རླུང་ལ་སྤྲུལ་ཏེ།།
ང་ཡི་ཕྱོགས་སུ་གཡུགས་ཤོག །
ཀ་བ་གདུང་མ་གཉི་ག །
ཁང་ཁྱིམ་གཅིག་ཏུ་འཁོར་ཡོད།།
མཐུན་ཚེ་ཕར་མཛེས་ཚུར་མཛེས།།
མ་མཐུན་རང་རང་སོ་སོ།།
རྩིག་ལྡེབས་ཕྱི་མའི་ངོས་སུ།།
དགའ་འཁྱིལ་རི་མོ་བྲིས་ཀྱང་།།
ཁྲུང་ཁྲུང་ཚང་འཁོར་རི་མོ།།
མིག་གི་དགའ་སྟོན་ཡིན་སོང་།།
འཛབ་ལ་གསེར་འཛབ་དངུལ་འཛབ།།
བྱུ་རུའི་རྒྱན་དུ་འཁྲུངས་ཡོད།།
བྱམས་པས་གནང་བའི་དངུལ་འཛབ།།
གསེར་ལས་འདང་རྩིས་ཆེ་བ།།
དཀར་ཡོལ་འབྲུག་རིས་ཤིག་ལ།།
དངུལ་གྱི་རྐུབ་ཤན་བརྒྱབ་ཡོད།།
ཆུང་འདྲིས་ལོག་ཡོང་དུས་ལ།།
གསོལ་སྐྱེམས་དྲང་ན་བསམས་ཡོད།།
རྐེད་ཆབ་གསེར་ཆབ་དངུལ་ཆབ།།
ཆབ་རྒྱུན་ཆབ་མགོར་འཁྱུད་ཡོད།།
ཆབ་རྒྱུན་དམ་ལྷོད་རན་པ།།
ཆབ་མགོ་བསམས་པ་ལོས་ཡིན།།
དུངས་པའི་མིག་གི་མཐའ་ལ།།
བརྩེ་བའི་མཆི་མ་ཤམ་ཤམ།།
དྲན་པས་གདུང་བ་མིན་ཚེ།།
མགོ་རུས་བངས་དགོས་མི་འདུག །
རི་ལ་རི་ཆེན་རི་ཆུང་།།
རི་ཆེན་གཡང་ཆགས་རི་ཡིན།།
རི་ཆུང་བཀྲ་ཤིས་ལྷ་སྒང་།།
རི་ཆེན་བསྐོར་ཏེ་ཆགས་ཡོད།།