གཟུགས་མེད་ཀྱི་སྟོབས་ཤུགས།

ཡིད་ནི་རྐང་འཐུང་གཞོན་ནུ་ཡི།།

མཉེན་ལྕུག་ལྡེམ་པའི་འདབ་ལོ་དག །

རླུང་གིས་བསྒུལ་བའི་རྫུ་བག་གིས།།

ཤ་བ་ཡུ་མོ་དཀྲོགས་པ་འདྲ།།

ཨེ་མ་སྔོན་བསགས་ལས་ཀྱི་འབྲས།།

སྨིན་པའི་སྐལ་བཟང་ཟླ་ཡི་འཛུམ།།

ཞེན་པ་གླེགས་བམ་རྒྱ་མཚོ་མའི།།

ནང་དུ་ལྷུང་བའི་ངང་ཚུལ་མཐོང་།།

དེ་ཚེ་རྒྱང་རིང་ལྷོ་ཕྱོགས་ན།།

དཀའ་ཐུབ་སྤྱོད་པའི་ནག་ཁོལ་གྱིས།།

འཕྲིན་པའི་ཚོགས་ནི་སྤྲིན་པ་རུ།།

བཅོལ་བའི་ལས་ནི་སེམས་སུ་འཛུམ།།

འདྲིས་པའི་དུངས་སེམས་ནམ་མཁའ་ལས།།

གློ་བུར་སྨིན་མ་བྱ་རྒོད་ཀྱིས།།

གཤོག་ཟུང་བརྐྱངས་ཏེ་འཕུར་བ་ན།།

སུ་ཞིག་འཁྲེང་པའི་སྨྲེང་གླུ་ལེན།།

སྤྱན་གྱི་ཨུཏྤལ་གྲོལ་བའི་ཚེ།།

བས་མཐའི་བུང་བ་སྤྲིན་ལྟར་འཁྲིགས།།

རི་ཆུས་ཆོད་པའི་ས་མཐའ་ནས།།

ལན་གཅིག་འཛོམས་པ་ངོ་མཚར་ཆེ།།

འདུ་ཤེས་གངས་ཀྱི་འདབས་རོལ་ནས།།

གཉེན་གྱི་ཤ་དང་རུས་པའི་ཆུ།།

ལྷན་དུ་འདྲེས་པའི་རྒྱུན་བཟང་ཡང་།།

འཕྲད་པའི་བསྐལ་པ་མེ་ལས་ཚ།།

ཨེ་མ་བས་མཐའི་གྲོང་ཁྱེར་གྱི།།

འདུ་འཛི་རྒོད་པའི་བར་ལྷག་ནས།།

བཤད་པའི་སྐད་ཆ་ཐར་ཐོར་ནི།།

བྲག་ཅར་འཆའ་བའི་ཁུ་བྱུག་སྐད།།

ཚིག་གི་རྒྱུན་ཐག་ལྷོད་སོང་ལ།།

ངག་གི་མུ་ཏིག་འཐོར་སོང་བས།།

ཡིད་ཀྱི་གཏིང་ནས་གཟུགས་མེད་ཀྱི།།

སྟོབས་ཤུགས་སྟོང་གི་རམ་འདེགས་ཐོབ།།

མ་བོས་ཚོང་འདུས་མགྲོན་གྱི་ཚོགས།།

ནགས་ལ་འཁོར་བའི་སྟག་མོ་བཞིན།།

ཁྱེད་ནི་གནམ་གྱི་ཕྱེད་ཀ་ཞེས།།

ཟློས་པའི་ཚིག་གིས་སེམས་པ་བསྲེག །

ཡང་ཡང་བགད་པའི་གད་མོའི་སྒྲ།།

རི་ལུང་དཀྲོགས་པའི་ཅོང་བརྡ་མིན།།

མཚར་མཚར་སྨྲ་བའི་འབབ་སྟེགས་ལས།།

ཅི་ཞིག་བརྡོལ་བ་མ་ཤེས་སོ།།

གཟུགས་མེད་ཞེན་པའི་སྨུག་སྤྲིན་སྟོང་།།

རི་ལ་མ་འཁོར་སེམས་སུ་འཁོར།།

སེམས་ཀྱི་གསང་བའི་རི་མདོ་ན།།

ངག་རིག་ཆང་གིས་མྱོས་པ་ཡོད།།

ཀྱེ་མ་དམ་ཚིག་སྡོམ་པའི་རྒྱ།།

ལྷོད་པའི་ལས་ནི་ག་ལ་སྲིད།།

དྲོད་འཇམ་དཔུང་བའི་འདབ་མ་ཟུང་།།

ཕན་ཚུན་འཁྱུད་པའི་ལས་འདི་གང་།།