རོ་རྒན་དངོས་གྲུབ་རྒྱ་མཚོས་ཕུལ་བའི་འཕྲིན་ལན། —ན་རོ་ལ་ཕུལ་བ།

སྣང་མོ་ལགས

ཞུ་འཕྲིན་དང་པོ་འབྱོར་ལ་བྱུང

གཏམ་ལ་ཚིག་དྲི་ལྡང་ལ་བྱུང

སྒྲ་ལ་འཆེལ་བ་བྱུང་ལ་སོང

མཚུལ་བ་གཡའ་ཞིང་མིག་ནི་བད

ང་ཡི་གཤོག་སྟེང་གི་ཐན་པ

ཁྱོད་ཀྱི་སྙེམ་པའི་བཟོ་ལྟ་ལས་བྲིས་པར་བསམས་ན

གངས་རི་མཐོང་འདོད་ཀྱི་རེ་ཁ་ཚ་མོས

ང་ལ་མ་གསིར

ངའི་ལུས་སྟེང་གི་གསང་བ་ལྐོག་གྱུར་དག

ཤོར་ཚར

སྒྲུང་ལ་སྨུག་པ་འཐིབས་ན

སྐྱོ་བའི་སྤུ་ལོང་མ་གཡོ

ཚིག་ལ་གཏར་ཁ་གཞུས་དང

སྣང་སྲིད་དཔེ་རུ་འགོད་སྟངས་ནི

སྒྱུ་མ་ཅན་གྱི་མཚོ་ལས་བླངས་པ་མ་ཡིན

དྲི་མ་ཅན་གྱི་གངས་ལས་བཏོན་པ་མ་ཡིན

དྲན་པ་འཁྱག་གིས་བསྡམས་པའི་ཁབ་མིག་ལས་གྲུབ་པ་ཡིན

དབུགས་ཧལ་ཧལ་བྱེད་པའི་ཁྱོད་ཀྱི་སྐྱེ་བ་དེ

སྒྲུང་གི་སྔ་རུ་ལས་གྱེས་པ་ཡིན་མོད

ང་ད་ལྟ་སྒྲུང་གི་གསེབ་ན་མེད

ལུང་བའི་ཕུ་ན་མཆོད་རྟེན་ལ་མངོན་བརྗོད་མེད་པར་ལུས་ཡོད

བསིལ་བ་ཚལ་ན་རོ་ཤུན་ལ་དབུགས་རླུང་མེད་པར་བསྐྱུར་ཡོད

མ་མཇལ་ཡུན་རིང་སོང་བའི་བདེ་སྤྱོད་བཟང་བོའི

གཤོལ་ལྕགས་བཙའ་ལ་འབྱར་བས

རྐྱལ་བའི་ནང་གི་ཆང་སེར་ལ་ངར་ཡལ་རྗེས

ཐག་པས་བཀྱིགས་པའི་དམ་ཚིག་གློད་དེ

སེམས་ཀྱི་རྙོག་མ་བགྲུང་བའི་གར་ལ་བཞུགས


༢༠༡༨ལོའི་ཟླ༢པའི་ཚེས༢༠ཉིན་མགོ་ལོག་གཅིག་སྒྲིལ་ནས།