སྟོན་མཇུག

ཁྲུང་ཁྲུང་ལ་འཕྲིན་ཡིག་འབྱོར་སོང

འགྲུལ་བཞུད་ཀྱི་ལམ་ཁར་འཇའ་འོད་འཚེར


རླུང་བུ་ལྡོམ་པོ་ཚོས་ལྕང་སྡོང་གི་རལ་བ་བཅད

ས་གཞིའི་ཁུད་དུ་སྐར་ཚོགས་ཀྱི་གྲུ་གཟིངས་རྩེན

རྩྭ་ཕྲན་དག་མྱ་ངན་གྱིས་གཙེས་ཏེ་སྨྲ་བ་མེད་པར་འཁུམས


མཚོན་དོན་གྱི་ནགས་ཚལ་གཅེར་བུར་ཕུད

དྭ་ཕྲུག་ཏུ་ལུས་པའི་ཁྱིམ་བྱིའུ་དག་གྲང་ཅང་ཅང


འཆི་བ་མཚོན་བྱེད་ཀྱི་དུས་ཚིགས་འདིར

ཁྲུང་ཁྲུང་ལྷོ་ཕྱོགས་སུ་མ་འཕུར

སྐྱོ་གདུང་རིགས་ཤིག་གིས་ཁྲུང་ཁྲུང་གི་གཤོག་པ་རྨས


སྐམ་རིད་དུ་གྱུར་པའི་ལོ་མ་དག

དུར་ཁྲོད་ན་རུས་སྐོགས་སུ་འགྱུར་ལ་ཉེ


སྟོན་ལོ་ཁ་བ་བཞིན་བབས

དགུན་ཁ་མ་སླེབས་པའི་སྔ་རོལ་འདིར

དྭངས་གཙང་གི་ཁ་དོག་ཅིག་ངའི་སྙུ་གུའི་མངལ་དུ་སྦྲུམ


དེ་ནི་ལོ་མའོ དེ་ནི་ཁ་བའོ དེ་ནི་མིག་ཆུའོ