ཁྱེད་ཀྱི་སྙིང་འདི་འཁྱགས་རོམ་སྲབ་མོས་བཟོས་པ་ཨེ་ཡིན་ཆུ་ལ་འདྲི།།
གཡོ་དང་གསང་བའི་ཡོལ་ཁེབས་མ་བཀླུབས་ཕྱི་ནང་ཁོ་ར་གསལ་དྭངས་དྭངས།།
སྒྲ་ཆེན་དྲག་པོ་གློ་བུར་གྲག་ཚེ་གས་པའི་རི་མོ་ཐགས་སུ་བཀྲ།།
ཕ་རོལ་བརྩེ་བའི་འགྱུར་འགུལ་ཙམ་གྱིས་ཆག་རལ་ཕྱེ་མ་མར་མར་འགྲིལ།།
ཁྱེད་ཀྱི་རྒྱུད་འདི་བལ་ཉག་ཕྲ་མོས་བཀལ་བ་ཨེ་ཡིན་ལུག་ལ་འདྲི།།
འཇིག་རྟེན་འཁོར་བའི་སྒྲིམ་ཤུགས་བཙན་པོས་ཅི་ཙམ་འཐེན་ན་དེ་ཙམ་ལྷོད།།
རྡེབ་རྡེག་དབྱུག་པས་གསེད་ཀྱིན་གསེད་ཀྱིན་འཇམ་པའི་བོངས་ཚད་ཆེ་རུ་སྦོས།།
ལྕགས་འཁྱག་ཁེ་གྲིའི་ཁ་ཟུར་བར་ན་དུམ་གཅོད་བརྒྱ་ཡི་གཉོམ་སེམས་ངུ་།།
ཁྱེད་ཀྱི་པང་འདི་སྡོང་མགོའི་མལ་གྱི་ཚང་དེ་ཨེ་ཡིན་བྱ་ལ་འདྲི།།
ལྷགས་རླུང་སྨྱོན་པའི་འཇབ་རྒོལ་འགོག་ནུས་ལྷུ་ལག་འཕལ་ཀ་འབྲེལ་ཞིང་དམ།།
ཚེ་སྲོག་ཕྲ་མོ་ལྗིད་དུ་ལྷུང་ཆོག་འཛིན་སྐྱོར་ཁྱོར་བའི་སྣོད་ཁ་གདང་།།
དྲོད་སྐྱིད་ཡོད་ཅོག་བསྡུས་ཤིང་བསྡོམས་ནས་གཅེས་པའི་མཆུ་ཏོ་གླན་རྐྱང་ཡིན།།
ཁྱེད་ཀྱི་བྲང་འདི་རང་འབབ་འདོད་འཇོའི་ནུ་མ་ཨེ་ཡིན་བ་ལ་འདྲི།།
འཚོ་བཅུད་ཁུར་གྱི་རྒྱགས་ཚུགས་མ་ཐེག་ལུས་གཟུགས་གཡང་ལས་ཐུར་དུ་དཔྱངས།།
ཉིན་མཚན་དུས་ཚིགས་དབྱེ་བ་མ་མཆིས་འབབ་ཁའི་ནུ་ཆུ་རྫོགས་མཐའ་བྲལ།།
སྲིད་པའི་བྱམས་བརྩེ་མཆུ་ཡིས་འཇིབ་པའི་སྟངས་སྟབས་འདི་ཀོ་སྙིང་དུ་སྡུག །
ཁྱེད་ཀྱི་བྱང་ཁོག་ཀུན་བཟོད་ས་གཞིས་བསྐྲུན་པ་ཨེ་ཡིན་རྟ་ལ་འདྲི།།
རྨིག་པའི་འཁོར་ལོ་ཤེད་ཀྱིས་བསྐོར་ཏེ་བང་རྒྱུགས་འགྲན་པའི་བས་མཐའ་ཡངས།།
ཤ་རུས་སྲོག་གི་སྦྲུམ་ཐེངས་མང་པོ་མི་ཤོང་དོག་པའི་སྣང་བ་དབེན།།
གདུག་ཚིག་མདའ་མོ་སྟོང་ཕྲག་ཕོག་ཀྱང་སྣང་མེད་རྡུལ་འཚུབ་དྭངས་ཏེ་འགྲོ།།
༢༠༡༧.༣.༥.