བདག་གི་སེམས་ནི་རྣམ་པར་འཛིན།།
ལུས་ཀྱི་བ་སྤུ་གཡོ་བར་བྱེད།།
ཁྱེད་ནི་སྙིང་གི་ནགས་ཚལ་དུ།།
མ་ཆགས་ཆགས་པའི་ལྷའི་བུ་མོ།།
ཅི་ཞིག་ལྟར་ཏེ་ཁྱེད་ཀྱི་ལུས།།
མ་རྙོག་པ་ཡི་རྫིང་བུ་ཞིག །
བདག་གི་རྣམ་པར་ཤེས་པ་ཡི།།
ངང་བ་དེ་འང་དེ་ལ་འཁོར།།
ནམ་ཞིག་ཟླ་བའི་འོད་ཀྱི་ངོགས།།
འདྲིས་པའི་གདོང་ལ་གདོང་ཕྱོགས་ཏེ།།
ཡིད་ཀྱི་ཟེའུ་འབྲུའི་རྩེར་སྨིན་པའི།།
སྦྲང་རྩི་དང་མཚུངས་གཏམ་དེ་འབྱོ།།
ཀྭ་ཡེ་ཁྱེད་ཀྱི་སྤྲིན་གྱི་གོས།།
བདག་གི་རི་བོའི་པང་ལ་གཡོ།།
སྤྲིན་དེས་རྟག་ཏུ་གཡོགས་པའི་བདག །
ཁྱེད་ཀྱི་པང་ན་རྟག་ཏུ་ཉལ།།
གཟའ་གཏད་མེད་པའི་དམིགས་པ་ལ།།
རྟོག་པའི་ན་བུན་ཀུན་བྲལ་ཀྱང་།།
ཟིལ་བ་ལས་ཀྱང་དྭངས་པ་ཁྱེད།།
སྒྱུ་འཕྲུལ་ཆེན་པོའི་ཚུལ་དུ་བསླེབས།།
ཁྱེད་ཀྱི་ལས་དང་བསོད་ནམས་ཀྱི།།
རི་མོ་དེ་འང་གཟུགས་ཅན་དུ།།
འགྱུ་དང་འཆག་དང་འགྲེང་བ་ཡི།།
སྤྲུལ་བ་འདི་ཡང་སྤྲུལ་བ་འོ།།
རྣམ་པར་རྟོག་དང་མ་རྟོག་པའི།།
ཡུལ་དུ་མ་ཤོང་ཕྱི་ནང་གི །
བསམ་མི་ཁྱབ་པའི་ཡོན་ཏན་ལ།།
ཉིན་རེར་བདག་ཡིད་གཅིག་ཏུ་ཕྱོགས།།
ཞུ་མགུར།
སངས་རྒྱས་གཞན་ནས་མ་བཙལ་རང་གི་སེམས།།
རིག་པ་རྗེན་པ་འདི་ཡི་ཕ་རོལ་ན།།
གདོད་མའི་ཀུན་ཏུ་བཟང་བོ་མ་མཆིས་པས།།
རང་རིག་གཏན་གྱི་སྐྱབས་གནས་ཡིན་པར་གསུངས།།
སྒོ་ལྔའི་ཤེས་པ་ལྔ་ཡི་གཟུང་བྱའི་ཡུལ།།
འདོད་ཡོན་ལྔ་ཡི་མཛེས་དང་མི་མཛེས་དང་།།
ཞིམ་དང་མི་ཞིམ་རང་གི་སེམས་ལ་བལྟས།།
བལྟས་ཚེ་གཉིས་ཀ་སྟོང་བ་རོ་མཉམ་དུ།།
མ་ཤར་འཛིན་པ་མཁྲེགས་སོ་ཞབས་དཀར་བ།།
ད་ནི་ཅི་ཞིག་སྒོམ་ན་ཕན་ལགས་སམ།།
བྱ་ལམ་རྗེས་མེད་བཞིན་དུ་རང་སེམས་ཀྱི།།
འགྱུ་བ་གང་ལ་ཞེ་འཛིན་མ་བྱས་ཀྱང་།།
གཞི་ཡི་ངོ་བོ་མ་མཐོང་རྟོག་པས་བསྒྲིབས།།
དྲ་བ་འདི་ལས་ཐར་བའི་འཕྲང་གི་སྒོ།།
ཅིག་ཅར་བསལ་བའི་ཐབས་དེ་གང་ཞིག་ལགས།།
དུག་ལྔ་རང་སར་གྲོལ་ལ་རྩོལ་བཅས་ཀྱི།།
ཤུགས་དང་མ་འབྲེལ་ཚིག་དང་ཐ་སྙད་ཀྱིས།།
མི་ཟིན་ཟད་སར་འཁྱོལ་བར་གསུངས་ན་འང་།།
སེམས་དང་རིག་པའི་ཤན་ལ་འཐོམས་པ་གང་།།
ཇི་ལྟར་གཟེབ་འདིའི་རྒྱ་ལས་ཐར་རམ་ཀྱེ།།
སྣང་བ་བཅའ་བཅོས་མ་བྱས་རང་སར་བཞག །
དུག་ལྔ་རྗེས་འདེད་མེད་པར་དཔུང་ཆད་བྱས།།
ཡུལ་ལ་གཟའ་གཏད་མེད་པར་བསྐྱུར་ན་འང་།།
ཡིད་ཀྱི་གུད་དུ་གནས་འདྲའི་ང་ཡི་བ།།
སྒོ་རུ་མ་ཕྱུང་རྩོལ་མེད་ཆོས་ཉིད་སར།།
གྲོལ་བར་དཀའ་འོ་བླ་མ་ཞབས་དཀར་བ།།
མན་ངག་ཚིག་གིས་མ་རྙེད་རྟོག་གེ་བ།།
ཐ་སྙད་སྤྲོས་པའི་གཅོང་ལ་ལྟུང་བའི་ཚེ།།
ཡེ་གྲོལ་གཞི་ཡི་ཀ་དག་ངོ་ཤེས་ཤིང་།།
རང་བཞིན་གསལ་བའི་སྣང་ཚུལ་བརྡ་འཕྲོད་ནས།།
ཐུགས་རྗེ་ཀུན་ཁྱབ་རྩོལ་མེད་གདེང་རྙེད་དེ།།
གླང་བོ་ཁྱིམ་དུ་བཞག་ནས་གླང་བོའི་རྗེས།།
ནགས་སུ་འཚོལ་བའི་འཁྲུལ་བ་སྤོང་བ་ལ།།
བྱིན་རླབས་གནང་བ་མ་ཆུང་ཞབས་དཀར་བ།།