སྙིམ་པ་ཇི་བཞིན པད་འདབ་ཇི་བཞིན
ཡོངས་སུ་ཞལ་ཁ་ཕྱེས་པའི་ཁྱེད་ནི་ཧ་ཅང་རྒྱུས་ཡོད་རྒྱུས་ཡོད་ཅིག་སྟེ
ལྷུན་གྱིས་གྲུབ་པ་དག་ཆར་གྱིས་བཀྲུས་ཤིང་རླུང་ལ་འབྱར་བའི་ཤུལ་དུ
མ་བཅོས་པའི་ལྡེབས་ངོས་ཤིག་ཀྱང་འདྲེན་བྱེད་ལ་བཀལ་ཡོང
ད་དུང་ཡོད་ཡོད་འདྲ་བ་མང་པོ་ཞིག་ཀྱང་དྲན་པས་ཟིན་ཡོང
གྱང་གོག་གི་ཁ་ནས་ཁྲ་ཆིལ་དགུ་ཆིལ་དུ་འཛུམ་པའི
ཉིན་སྲུབས་ཕུ་མདའ་གང་རུང་གི་གཡའ་སྤང་ལ་བཏབ་པའི
ཤུག་པའི་གསེབ་ཀྱི་ལྷ་ཁང དཀར་བོང་བོང་གི་མཆོད་རྟེན
བྲག་དམར་ཐེམ་གྱི་སྒྲུབ་ཕུག
ད་དུང་ཡང གླེགས་བམ་དང་ཡིག་འབྲུའི་བར་ན
འཛུམ་དམུལ་ལེར་བཞུགས་པའི
རང་སེམས་འོད་ཀྱིས་ཕྱེས་པ་དག་གི་ཞབས་རྗེས་དང
ཕྱག་རྗེས་དྲོན་མོ
དུས་ཚོད་ཀྱི་ལྟེབས་ཚིགས་སུ་ལུས་པའི་ལོ་རྒྱུས་ཀྱི་ཤོག་ལྷེ
རྟ་ཕོའི་རྨིག་སྒྲ མི་ཕོའི་བློ་གཤོགས
དུད་ཞགས་འཁྱིལ་བའི་གྲོང་ཚོ་དག་ལས་འོ་དྲི་འཐུལ་ཡོང
ཁོད་ཡངས་པའི་ཞིང་ཁ་ཀུན་ཏུ
བབ་ཆགས་པའི་ངོ་གདོང་མཐོང་ཡོང
བག་ལྷོད་པའི་འཛུམ་ཀོང་མཐོང་ཡོང
བདག་གིས་བོར་ཟིན་པ་དང་བརླག་འགྲོ་བ་དག་ཀྱང
མཐོང་ཡོང
དབེན་དགོན་མང་པོ་བཙུན་མས་སྲུང་འདུག་ཀྱང
མི་སེམས་དཀར་པོ་ཆོས་ལ་འཁོར་འདུག་ཀྱང
དུས་ཀྱི་ཐ་མ་ཞིག་ལ
དུས་ཀྱི་གཙང་པོའི་རྙོག་མ་བཞིན་འཁོར་ཡོང་བའི་ང
ཁྱེད་ཀྱི་དྭངས་གཙང་གི་པང་དུ་མཁའ་རླུང་ཙམ་རྔུབ་ཆོག་པར་ཞུ
འཕན་ཡུལ་སྟོང་སྡེ་ཁྲ་མོ བདག་གི་ས་མ་འབྲོག་གི་འཕན་པོ
ཕྱི་ལོ༢༠༡༨ཟླ༡༠ཚེས༢༩ལྷ་སར་བཅོས།