ན་ནིང་ལི་ཡུལ་ནས།（ཞར་བཀོད་གཉིས）
གེ་སར།（ཟི་ལིང）
རླུང་བུ་ཐག་རིང་ནས་གཡུགས་འོངས་ཤིང
སླར་ཡང་ཐག་རིང་ལ་བུད་སོང
རྗེས་ཤུལ་སྐྱ་བོ་ཞིག་བཞག་ནས་བུད་སོང
ངས་སྨྲེང་བ་ཁོག་ཏུ་སྦས་ནས
ལི་ཡུལ་རྩྭ་ཐང་གི་མཐའ་སྣེར་འགྲེང་དུས
དུས་དང་བར་སྟོང་སྤྲིན་བཞིན་འཁྲིགས་ཤིང
འདས་སོང་དང་མ་འོངས་པ་ཡང་རྒྱུན་མར་བསྣོལ་པས
ལོ་རྒྱུས་ནི་ནམ་མཁའི་དབྱིངས་སུ་བཙེམས་པའི་ལྷན་པ་ནག་པོ་ཞིག་དང་མཚུངས
བྱ་རྒོད་ཅིག་རླུང་ནང་ནས་ཐག་རིང་དུ་འཕུར་སོང་རྗེས
ངས་རྒྱ་ཆེ་བ་དང་འབྱམས་ཀླས་ཀྱི་ཀློང་ལ་དྲན་པ་བཞག
ངས་ལོ་རྒྱུས་དང་མེས་པོ་ཚོའི་སེམས་ཁོང་ལ་དྲན་པ་བཞག
དེ་ནི་འགྲུལ་བཞུད་རིང་མོ་ཞིག་རེད
སེམས་ཀྱི་མྱ་ངམ་ཐང་ལ་འཁྱམ་ཉུལ་བྱེད་སྟངས་ཤིག་རེད
མེས་པོ་རྟ་བཞོན་དེ་དག་གི་རྡུལ་འཚུབ་གང་ལ་ཡལ་སོང་ཨང
མི་བུ་རུས་རྐང་ཅན་དེ་དག་གི་རྒྱབ་གཟུགས་གང་ལ་ཡལ་སོང་ཨང
ལི་ཡུལ་རྩྭ་ཐང་གི་མཐའ་སྣེ་ནས་ནོར་ནག་གི་ཁྱུ་ཚོགས་མ་མཐོང་བས
ངས་སེམས་པ་རླུང་ལ་ཇི་ལྟར་བརྡར་ནའང
ལོ་རྒྱུས་ཀྱི་ལྷན་པ་ནག་པོ་དེ་བརྟོལ་མ་ཐུབ
ན་ནིང་ལི་ཡུལ་ནས
ངས་རང་སེམས་ལ་ཨག་སྐད་ཐེངས་ཤིག་བརྒྱབ་པས
བྲག་ཅ དེ་རིང་ད་དུང་ཡང་ལྷང་ལྷང་ངང་མཆེད་ཀྱིན་འདུག་ཨང
༢༠༡༧.༤.༢༢ཉིན།
བྱིས་དུས་དྲན་སྟངས་ཤིག
བྱིས་དུས་ནི་དྭངས་གཙང་གི་བྱིས་སྒྲུང་ཚར་གཅིག་ནང་བཞིན
ནམ་ཡང་བདག་གི་དྲན་ངོགས་སུ་འཁྲིལ་འདུག
བྱིས་དུས་ནི་ཡིད་དབང་འགུགས་པའི་གློག་བརྙན་ཞིག་ནང་བཞིན
ནམ་ཡང་བདག་གི་ཞེ་བློ་ནང་དཔར་འདུག
བྱིས་དུས སྒྱུ་འཕྲུལ་དང་མཚར་སྣང་ཀློང་ན་འཁྱིལ་བའི་བྱིས་དུས
བྱིས་དུས སྨོན་འདུན་དང་རེ་ལྟོས་ཁྲོད་ན་གསོན་པའི་བྱིས་དུས
ད་ལྟ ང་རང་མི་ཚེའི་ལ་མགོར་འགོས་ནས་རྒྱང་ལྟ་ཞིག་བྱས་པས
ངས་སྨུག་པ་ལང་ལོང་གསེབ་ཀྱི་སྐྱོ་བ་ཞིག་ཚོར་བྱུང
ངས་སྣང་བ་བན་བུན་ཁྲོད་ཀྱི་ཤུགས་རིང་ཞིག་ཐོས་བྱུང
༢༠༡༨.༧.༡༠ཉིན།
ནམ་ལངས་རྒྱུ་ཞིག་མི་འདུག
ནམ་གུང གློ་བུར་དུ་གཉིད་ལས་སད་དུས
སྐར་མ་ཁེར་རྐྱང་རེ་གཉིས་ཕྱི་རོལ་གྱི་ནམ་མཁའི་དབྱིངས་སུ་འབྱར་ནས་འདུག
ཆུང་མའི་གཉིད་གཏམ་ལྡབ་ལྡིབ་ཁང་ཆུང་ནང་བྲག་ཅར་འཁོར་ནས་འདུག
ནམ་གུང གློ་བུར་དུ་གཉིད་ལས་སད་དུས
རང་ཉིད་ནི་གཏིང་མེད་ཞབས་མེད་ཀྱི་བྲག་རོང་ཞིག་ཏུ་ཡོད་སྣང་འཆར་ཞིང
སེམས་པ་ནི་མཐའ་ཡས་པའི་སྟོང་ཁམས་ནང་བཞིན་སྟོང་སང་ངེར་ལུས་འདུག
ནམ་གུང གློ་བུར་དུ་གཉིད་ལས་སད་དུས
སག་སྒྲ་དེ་ནི་སྟོན་མཇུག་གི་ལོ་མ་ས་རུ་ལྷུང་བའི་སྒྲ་དབྱངས་ཡིན་པ་ཤེས་ལ
འུ་ཤུ་དེ་ནི་སེམས་ངལ་གྱིས་མནར་བའི་མི་བུ་ཞིག་གིས་ཨ་མ་དྲན་པའི་དངན་པ་ཡིན་པ་ཤེས
ནམ་གུང གློ་བུར་དུ་གཉིད་ལས་སད་པས
མགོ་བོ་ཉལ་ཐུལ་གྱིས་ཡང་ཡང་བཏུམས་ནའང
ད་ནི་གཉིད་དུ་ཡུར་ཐབས་ཤིག་མི་འདུག་ལ
ནམ་ལངས་རྒྱུ་ཞིག་མི་འདུག
འེ ནམ་ལངས་རྒྱུ་ཞིག་མི་འདུག་ཨང
༢༠༡༨.༡༠.༢༡གི་ནམ་གུང་།