ཉག་ཆུ་སྔོན་མོ་ཁྱེད་ཀྱི་གཡས་ཕྱོགས་ནས་བབས་ཤིང
རྒྱལ་མོ་རྔུལ་ཆུ་ཁྱེད་ཀྱི་གཡོན་ཕྱོགས་ནས་བཞུར་འོངས་ཏེ
ལུང་ཁོག་འདིའི་སྐྱེ་འགྲོ་ཀུན་ལ་བདུད་རྩིའི་དངོས་གྲུབ་བསྩལ
ལོ་རྒྱུས་ཁྲོད་ལོ་ཆེན་བཻ་རོ་ཙ་ནས་འདི་རུ་འགྲུལ་ལམ་བསྐྱངས་ཤིང
རྒྱལ་དབང་སྐུ་ཕྲེང་དྲུག་པས་གནས་འདིར་ཞབས་ཀྱིས་བཅགས
གྲུབ་ཆེན་ཐང་སྟོང་རྒྱལ་པོས་འདི་རུ་ལྕགས་ཟམ་བཏིངས་ལ
པཎ་ཆེན་སྐུ་ཕྲེང་བཅུ་པས་འདི་རུ་ཕྱག་ཕེབས་གཟིགས་སྐོར་མཛད
ད་དུང་སྐྱེས་ཆེན་གང་མང་ཞིག་གིས་འདི་རུ་ལས་འབྲེལ་བཞག་སྟེ
སྲིད་སྐྱོང་ཆོས་འཁོར་བསྐོར་བའི་ངོ་མཚར་གླིང་ལ་གྲགས
དེ་ལྟ་ནའང དུས་རབས་ཕྱེད་ཀའི་ཡུན་ཙམ་གྱི་རིང་ལ
གནས་འདིར་རྒྱུས་ཡོད་རྒྱུས་མེད་ཀྱི་ངོ་གདོང་དག་ལྷགས་ཏེ
ཡིད་ཆེས་ཀྱི་མཁར་གྱང་བཤིགས་ཤིང་གཡོ་ཁྲམ་གྱི་གྲིབ་མ་བསྒོས་པས
སྤྱང་ཚོགས་ཀྱི་མཆེ་སྡེར་ལྟ་བུའི་ལག་པས་དབྱངས་གསལ་རྨས་ཤིང
འཐོར་རླུང་གི་གཤོག་པ་ལྟ་བུའི་འདོད་རྔམ་གྱིས་ས་གཞི་བྲུས
རིགས་རྒྱུད་ཅིག་གི་ཕྱི་ནང་ཚྭ་མཚོ་བཞིན་བསླད་ཅིང་སྦགས་པས
གྲོང་ཚོ་འདིའི་སྲང་ལམ་དང་གྲུ་ག་ཡོད་ཚད་རྦད་དེ་འགྱུར་འདུག
གྲོང་ཚོ་འདིའི་ཕྱི་ནང་གཉིས་ཀར་སྐྱུར་དྲི་ཁ་མོ་ཞིག་འཐུལ་འདུག
དེ་རིང་དར་རྩེ་མདོའི་སྤུ་གྲི་ལྟ་བུའི་རླུང་ཁར་འགྲེང་དུས
སྤྲིན་ཚོགས་ཀྱི་རྔམས་ཁ་མཐུག་པོས་རི་ཀླུང་བཀླུབས་ཀྱང
གཙང་ཆབ་ཀྱི་བཞུར་སྒྲ་རིང་མོ་ལས་གྲང་ངར་སྐྱེས་ཡོང
དེ་ནི་ཕ་སྐད་ཀྱི་ཀེང་རུས་འཐོར་བའི་ཧྲུག་སྒྲའམ
མི་རབས་ཤིག་གི་སྒལ་ཚིགས་ཆག་པའི་ངུ་སྐད་ཡིན་སྲིད
ཡང་ན་ཁྱེད་རང་ང་དང་རྒྱང་ཐག་རིང་བོར་ཕྱིན་པའི་སྔ་ལྟས་སམ
ལོ་རྒྱུས་ཀྱི་ཕྲེང་ཐག་ལས་ལྟུང་བའི་སྔོན་འགྲོའི་རོལ་མོར་འཁྲུལ་སོང
༢༠༡༨.༨.༢༡ཉིན་རྒྱ་ནག་དར་རྩེ་མདོ་རུ།