འདོད་པའི་ནགས་ཚལ་མེ་རུ་བསྒྲོན་ནས
ལས་འབྲས་ཀྱི་ཐག་པའི་རྐྱ་བཤིག་ནས
མེ་ལོང་ངོས་སུ་ཆགས་པའི་རྡུལ་སྤྲུགས་ནས
མར་མེ་ཤི་བའི་རོ་ལ་བལྟས་ནས
བུད་ཤིང་ཟད་པའི་མེ་ལ་མྱངས་ནས
ཀུན་རྟོག་གི་རླུང་གཡོ་བའི་ཚུལ་ལ་བརྟགས་ནས
ཤ་དང་རུས་པའི་དྲ་བ་ཕྱེས་ནས
རྒྱུ་འབྲས་འགག་པའི་བར་ཆད་ལ་བསྙབས་ནས
ཆུ་རིས་ཀྱི་གཉེར་མདུད་མཐུག་ཏུ་ཕྱིན་པར་ཧད་ནས
ལང་ཚོའི་སོག་མ་ཆུ་བོས་ཁུར་བར་སྔངས་ནས
སྙིང་རྗེའི་ཤེས་རབ་ཚེ་ཡིས་བརླགས་པར་ཉན་ནས
གཤིན་རྗེའི་ཕོ་ཉ་སྒོ་འགྲམ་དུ་བསླེབ་པར་བསྒུགས་ནས
ཚེ་ཡི་ཚད་ནི་འཆར་ཡན་གྱི་སྡོམ་རྒྱ་ཞིག་ཏུ་དཔགས་ནས
མི་རྟག་པ་བཙལ
སྙན་ངག་པ་ཞིག་ལ་ཕུལ་བ།
མགོ་ལོག་ནི་ས་འཁྱགས་ས་ཞིག་ཁོ་ན་མ་རེད
སེམས་འཁྱགས་ས་ཞིག་རེད
ཁེར་རྐྱང་གི་རྐང་གླིང་ཇི་ལྟར་བུས་ན་ཡང
དུར་ཁྲོད་དུ་འདྲེ་ཚོགས་རྒྱག་མི་ཐུབ་པ་དེས
ཁྱེད་ཀྱི་སེམས་རྩ་ཤིན་ཏུ་འཁྱགས་ཡོད་ངེས
རང་གི་ངོ་གདོང་དང་མེ་ལོང་མཉམ་དུ་བོར་བའི
ཡུལ་གྱར་བ་དག་གི་མདུན་དུ
ཁྱེད་གླུ་བ་ཞིག་ཡིན་ནམ བསམ་གཏན་པ་ཞིག་ཡིན
སྐྱེ་བ་གཅིག་ལ
གླང་སྨྱོན་ལྟར་རྒོད་པའི་ཚེ་དང་སྲོག་གི་རླུང་དེས
ཁྱེད་ཀྱི་ནང་སེམས་ལ་རྨ་ཁ་བཟོས་ཀྱང
རྨ་ཤུལ་མཐོང་རྒྱུ་མེད་པ་དེར་བལྟས་ནས
ངས་སྤྲོ་དགོས་པའམ་སྐྱོ་དགོས་པར་ཁ་ཚོན་མ་ཆོད
བལྟས་ཚོད་ཀྱིས
ཁྱེད་ཀྱི་མིག་ནང་དུ
ཉི་འོད་འཁྱགས་པ་འཁྲིགས
ཡིན་ན་འང
ཁྱེད་ཀྱི་སྙིང་ཁམས་ས་སྲོད་དང་རྒྱང་ཐག་རིང
བལྟས་ཚོད་ཀྱིས
ཁྱེད་ཀྱིས་རང་ལ་སྨྲ་དགོས་པ་དག
གཏན་ནས་གཞན་ལ་བརྗོད་ཀྱིན་མེད་པ་འདྲ
གང་ལྟར རྡོ་བ་དང་ཐ་སྙད་ཀྱི་མདུན་དུ
ཁྱེད་ཁོ་ན་གླུ་བར་གྲུབ