མར་ཁེ་སི་དང་མར་ཁེ་སིའི་རིང་ལུགས།

མར་ཁེ་སི་ནི་འཛམ་གླིང་ཡོངས་ཀྱི་འབྱོར་མེད་གྲལ་རིམ་དང་ངལ་རྩོལ་མི་དམངས་ཀྱི་གསར་བརྗེའི་སློབ་དཔོན་དང་། མར་ཁེ་སི་རིང་ལུགས་ཀྱི་གསར་གཏོད་གནང་མཁན་གཙོ་བོ། མར་ཁེ་སི་རིང་ལུགས་སྲིད་ཏང་གི་སྲོལ་གཏོད་པ་དང་རྒྱལ་སྤྱིའི་གུང་ཁྲན་རིང་ལུགས་ཀྱི་གསར་གཏོད་པ། ཉེ་རབས་ཚུན་དུ་རླབས་ཆེ་ཤོས་ཀྱི་བསམ་བློ་མཁས་ཅན་བཅས་རེད། མར་ཁེ་སིའི་སྐུ་ཚེ་ཧྲིལ་པོ་ནི་བླ་ན་མེད་པའི་ཕུགས་བསམ་སེམས་ལ་བཅངས་པ་དང་མིའི་རིགས་ཀྱི་བཅིངས་འགྲོལ་ལ་འབད་འཐབ་ལྷོད་མེད་གནང་བའི་སྐུ་ཚེ་དང་། དཀའ་ཉེན་ལ་མི་སྐྲག་པ་དང་བདེན་དོན་བརྩོན་ལེན་བྱ་ཆེད་བསམ་བློའི་ཡང་རྩེར་འཛེགས་པའི་སྐུ་ཚེ། འཛམ་གླིང་རྙིང་པ་མགོ་རྟིང་སློག་པ་དང་འཛམ་གླིང་གསར་པ་འཛུགས་ཆེད་འཐབ་འཛིང་ལྷོད་མེད་གནང་བའི་སྐུ་ཚེ་ཧྲིལ་པོ་ཞིག་རེད།

《གུང་ཁྲན་ཏང་གི་བསྒྲགས་གཏམ》སྤེལ་ནས་ལོ་170ཡི་རིང་། འཛམ་གླིང་ཡོངས་སུ་མར་ཁེ་སི་རིང་ལུགས་རྒྱ་ཁྱབ་ངང་ཁྱབ་སྤེལ་ཐུབ་ཡོད། མིའི་རིགས་ཀྱི་བསམ་བློའི་ལོ་རྒྱུས་ཐོག མར་ཁེ་སི་རིང་ལུགས་དང་འདྲ་བར་མིའི་རིགས་ལ་འདི་ལྟ་བུའི་ཤུགས་རྐྱེན་ཆེན་པོ་དང་གཏིང་ཟབ་པའི་བསམ་བློའི་རིགས་པའི་གཞུང་ལུགས་ཤིག་ཐོན་མྱོང་མེད། མར་ཁེ་སི་རིང་ལུགས་ཀྱིས་མིའི་རིགས་ཀྱི་ཤེས་དཔལ་དར་རྒྱས་ཀྱི་འཕེལ་རིམ་ལ་སྐུལ་འདེད་ཤུགས་ཆེན་བཏང་ཡོད་ཅིང་། ད་ལྟའི་དུས་སུའང་རྒྱལ་སྤྱིའི་ཤུགས་རྐྱེན་གལ་ཆེན་ལྡན་པའི་བསམ་བློའི་མ་ལག་དང་གཏམ་བརྗོད་ཀྱི་མ་ལག་ཅིག་ཡིན་པ་དང་། མར་ཁེ་སི་ཉིད་ད་ལྟའི་དུས་སུ་ཡང་ལོ་ངོ་སྟོང་གི་བསམ་བློ་མཁས་ཅན་ཞིག་ཡིན་པ་ཡོངས་སུ་ངོས་འཛིན་བྱེད་ཀྱི་ཡོད།

མར་ཁེ་སིས་ང་ཚོར་རིན་ཐང་ཆེ་ཤོས་ལྡན་པ་དང་ཤུགས་རྐྱེན་ཆེ་ཤོས་ལྡན་པའི་བསམ་པའི་རྒྱུ་ནོར་བཞག་གནང་ཡོད། དེ་ནི་ཁོང་གི་མཚན་ནས་མིང་བཏགས་པའི་ཚན་རིག་གི་རིགས་པའི་གཞུང་ལུགས་ཏེ། མར་ཁེ་སི་རིང་ལུགས་རེད། རིགས་པའི་གཞུང་ལུགས་དེ་ནི་བརྗིད་ཆགས་ཉམས་དགའ་བའི་ཉི་གཞོན་དང་འདྲ་བར་མིའི་རིགས་ཀྱིས་ལོ་རྒྱུས་ཀྱི་ཆོས་ཉིད་འཚོལ་ཞིབ་དང་རང་ངོས་བཅིངས་འགྲོལ་གཏོང་བའི་ལམ་བུ་འཚོལ་བའི་མུན་པ་གསལ་བར་བྱས་ཡོད། མར་ཁེ་སིའི་དགོངས་པའི་རིགས་པའི་གཞུང་ལུགས་ནི་དུས་རབས་དེ་ལས་བྱུང་བ་ཞིག་ཡིན་ལ། དུས་རབས་དེ་ལས་བརྒལ་བ་ཞིག་ཀྱང་ཡིན་པ་དང་། དུས་རབས་དེའི་བསམ་པའི་སྙིང་བཅུད་ཡིན་ལ། མིའི་རིགས་ཧྲིལ་པོའི་བསམ་པའི་སྙིང་བཅུད་ཀྱང་རེད། མར་ཁེ་སི་རིང་ལུགས་ནི་ཚན་རིག་དང་མཐུན་པའི་རིགས་པའི་གཞུང་ལུགས་ཤིག་ཡིན་ཞིང་། གསར་གཏོད་རང་བཞིན་གྱི་སྒོ་ནས་མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ཆོས་ཉིད་བསྟན་ཡོད། མར་ཁེ་སི་རིང་ལུགས་ནི་མི་དམངས་ཀྱི་རིགས་པའི་གཞུང་ལུགས་ཤིག་ཡིན་ཞིང་། མི་དམངས་ཀྱིས་རང་ངོས་བཅིངས་འགྲོལ་གཏོང་བའི་བསམ་བློའི་མ་ལག་ཐོག་མར་གསར་གཏོད་གནང་བ་ཞིག་རེད། མར་ཁེ་སི་རིང་ལུགས་ནི་ལག་ལེན་གྱི་གཞུང་ལུགས་ཤིག་ཡིན་ཞིང་། དེས་མི་དམངས་ལ་འཛམ་གླིང་སྒྱུར་བཀོད་བྱེད་པའི་བྱ་སྤྱོད་ཁྲིད་སྟོན་བྱེད་ཀྱི་ཡོད། མར་ཁེ་སི་རིང་ལུགས་ནི་ཟམ་མི་ཆད་པར་འཕེལ་རྒྱས་འགྲོ་བའི་སྒོ་འབྱེད་ཀྱི་རིགས་པའི་གཞུང་ལུགས་ཤིག་ཡིན་ཞིང་། དེ་སྔ་ཕྱི་བར་གསུམ་དུ་དུས་རབས་ཀྱི་མདུན་གྲལ་དུ་གནས་ཡོད། མར་ཁེ་སི་རིང་ལུགས་འཕེལ་རྒྱས་འགྲོ་བའི་ལོ་རྒྱུས་ནི་མར་ཁེ་སི་དང་ཨེན་ཀེ་སི། དེ་བཞིན་ཁོང་རྣམ་པའི་རྗེས་འབྲང་བ་ཚོས་དུས་རབས་དང་། ལག་ལེན། ཤེས་ཚོར་གོང་ནས་གོང་དུ་འཕེལ་བའི་ལོ་རྒྱུས་ལ་གཞིགས་ནས་འཕེལ་རྒྱས་བཏང་བའི་ལོ་རྒྱུས་ཤིག་ཡིན་པ་དང་། མིའི་རིགས་ཀྱི་ལོ་རྒྱུས་ཐོག་གི་ཕུལ་བྱུང་གི་བསམ་བློའི་རིག་གནས་ཀྱི་གྲུབ་འབྲས་ཟམ་མི་ཆད་པར་བླངས་ནས་རང་ངོས་ཕུན་སུམ་ཚོགས་སུ་གཏོང་བའི་ལོ་རྒྱུས་ཤིག་རེད། དེར་བརྟེན་མར་ཁེ་སི་རིང་ལུགས་ཀྱིས་ནམ་ཡང་དེའི་ངོ་མཚར་གྱི་གསོན་ཤུགས་རྒྱུན་འཁྱོངས་བྱས་ནས། དུས་རབས་གོང་འཕེལ་ལས་བྱུང་བའི་བརྗོད་གཞི་གསར་པ་འཚོལ་ཞིབ་དང་། མིའི་རིགས་ཀྱི་སྤྱི་ཚོགས་ལ་འཕྲད་པའི་འགྲན་སློང་གསར་པར་ལན་རྒྱག་ཐུབ་ཀྱི་ཡོད།

མར་ཁེ་སི་རིང་ལུགས་ཀྱིས་འཛམ་གླིང་ལ་འགྱུར་ལྡོག་གཏིང་ཟབ་བཏང་བ་མ་ཟད། ཀྲུང་གོར་ཡང་འགྱུར་ལྡོག་གཏིང་ཟབ་བཏང་ཡོད། ལག་ལེན་དངོས་ལས་ར་འཕྲོད་བྱུང་བར། མར་ཁེ་སི་རིང་ལུགས་ཀྱི་ལས་དབང་དེ་སྔ་ས་ནས་ཀྲུང་གོ་གུང་ཁྲན་ཏང་གི་ལས་དབང་དང་། ཀྲུང་གོའི་མི་དམངས་ཀྱི་ལས་དབང་། ཀྲུང་ཧྭ་མི་རིགས་ཀྱི་ལས་དབང་བཅས་དང་དམ་པོར་སྦྲེལ་ཡོད་ཅིང་། དེའི་ཚན་རིག་རང་བཞིན་དང་བདེན་དོན་རང་བཞིན་དེ་ཀྲུང་གོར་བརྟག་བཤེར་གང་ལེགས་བྱུང་བ་དང་། དེའི་མི་དམངས་ཀྱི་རང་བཞིན་དང་ལག་ལེན་གྱི་རང་བཞིན་ཀྲུང་གོར་ལག་བསྟར་གང་ལེགས་བྱུང་བ། དེའི་སྒོ་འབྱེད་ཀྱི་རང་བཞིན་དང་དུས་རབས་ཀྱི་རང་བཞིན་ཀྲུང་གོར་གང་ལེགས་མངོན་ཡོད། ལག་ལེན་དངོས་ལས་ད་དུང་ར་འཕྲོད་བྱུང་བར། མར་ཁེ་སི་རིང་ལུགས་ཀྱིས་ཀྲུང་གོའི་གསར་བརྗེ་དང་། འཛུགས་སྐྲུན། སྒྱུར་བཅོས་བཅས་ལ་བསམ་བློའི་མཚོན་ཆ་གལ་ཆེན་མཁོ་འདོན་བྱས་ནས་ཤར་ཕྱོགས་ཀྱི་གནའ་བོའི་རྒྱལ་ཁབ་ཆེ་མོ་སྟེ། ཀྲུང་གོར་མིའི་རིགས་ཀྱི་ལོ་རྒྱུས་ཐོག་སྔར་འབྱུང་མྱོང་མེད་པའི་འཕེལ་རྒྱས་ཀྱི་ངོ་མཚར་བཏོད་ཡོད། ལོ་རྒྱུས་དང་མི་དམངས་ཀྱིས་མར་ཁེ་སི་རིང་ལུགས་གདམ་ག་བྱས་པ་དེ་ནི་རྦད་དེ་ཡང་དག་པ་ཞིག་ཡིན་པ་དང་། ཀྲུང་གོ་གུང་ཁྲན་ཏང་གིས་མར་ཁེ་སི་རིང་ལུགས་རང་ཉིད་ཀྱི་དར་ཆར་བྲིས་པ་ནི་རྦད་དེ་ཡང་དག་པ་ཞིག་ཡིན་པ། མར་ཁེ་སི་རིང་ལུགས་ཀྱི་གཞི་རྩའི་ཆོས་ཉིད་དང་ཀྲུང་གོའི་དོན་དངོས་ཟུང་འབྲེལ་རྒྱུན་འཁྱོངས་བྱས་ནས། མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན་ལ་ཟམ་མི་ཆད་པར་སྐུལ་འདེད་བཏང་བ་དེ་ནི་རྦད་དེ་ཡང་དག་པ་ཞིག་རེད། མར་ཁེ་སི་ཐུགས་བློ་བདེ་པོ་གནང་ཆོག་པ་ཞིག་ནི། མར་ཁེ་སི་རིང་ལུགས་ཀྱིས་ཀྲུང་གོར་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་སྐྲུན་པའི་ལམ་ཆེན་དུ་བསྐྱོད་རྒྱུར་ཁྲིད་སྟོན་བྱས་པ་དང་། མར་ཁེ་སི་རིང་ལུགས་ལ་ཟོལ་མེད་དད་པ་བྱེད་མཁན་དང་ལག་ལེན་མཐའ་ཅིག་ཏུ་བསྟར་མཁན་ཀྲུང་གོ་གུང་ཁྲན་ཏང་མིས་མར་ཁེ་སི་རིང་ལུགས་མཐའ་འཁྱོངས་དང་གོང་འཕེལ་གཏོང་ཆེད་སྙིང་རུས་ཆེན་པོས་འབད་བརྩོན་བྱེད་བཞིན་ཡོད།

ཟླ་ཚེས་བསྡུ་སྒྲིག་བྱས།