མིག་མདུན་གྱི་འཕོ་འགྱུར།

བསིལ་ལྡན་བདག་གི་ཕ་ཡུལ་བོད་ལྗོངས་འདིར།

ལྷུན་པོ་མུ་འཁྱུད་དར་ལ་སྤོས་ཤེལ་བརྒྱུད།

ཟླ་མེད་སྲིད་ཇུས་སྒྱུར་བཅོས་སྒོ་དབྱེའི་སྦྱིན།

ཚེ་བསོད་དག་པའི་གནའ་གྲོང་དཔྱིད་དཔལ་བཞད།

ཏང་གི་ཡང་དག་སྲིད་ཇུས་ཉི་གཞོན་ཁྲོད།

ཉི་མ་ལྷ་སར་སློབ་གསོའི་གྲོང་གསར་གཏོད།

སྐལ་ལྡན་བློ་གསར་འབུང་བ་ཚོགས་བཞིན་འཁོར།

འཛམ་གླིང་ཤེས་རིག་དཔལ་ལ་ལོངས་སུ་སྤྱོད།

གྲོང་ནང་སྤྱི་སྤྱོད་རླངས་འཁོར་ཁང་བཟང་འདྲ།

རིན་མེད་རྒན་རྒོན་བག་ཕེབས་ངང་ནས་བཞུགས།

སྤྱི་གླིང་ལྡུམ་ར་ཁོར་ཡུག་ཉམས་དགའ་བར།

རྒན་བྱིས་གླུ་དང་ཞབས་བྲོ་དབྱིངས་ལ་ཞུགས།

གཡུ་མདོག་ལང་ལོང་རྒྱུག་པའི་སྐྱིད་ཆུའི་སྟེང་།

པ་ཊའི་མཛེས་ལྡན་ཟམ་ཆེན་གཞལ་ཡས་ཁང་།

ལྷོ་བྱང་རི་རྒོད་སྡེར་བགྲད་བྲག་རིའི་གསེབ།

བདེ་ཞིང་ཡངས་པའི་ཨར་ལམ་ལེགས་པར་བསྐྲུན།

ལྗིད་ཆགས་ཕོ་བྲང་ཕྱོགས་བཞི་མཚམས་བརྒྱད་ལ།

མཛེས་ཤིང་སྐྱིད་པའི་སོས་དལ་ལྡུམ་རས་བརྒྱན།

དད་ལྡན་སྤྲོ་བའི་བཞིན་བཟང་འཛུམ་པ་ཉིད།

དགའ་མགུ་ཡི་རངས་ཉམས་སྣང་མིན་པ་ཅི།

གྲོང་ཁྱེར་མཐའ་དབུས་བར་སྟོང་ཡོད་དོ་ཅོག

མྱུར་ལ་ཉམས་བཟང་རླངས་འཁོར་གློག་ལྟར་འཁྱུག

དོན་གཉེར་མི་རྣམས་ཡུད་ཙམ་གང་འདོད་སླེབས།

མཛད་འཕྲིན་དབྱར་མཚོ་རྒྱས་ཞེས་ཧ་ཅི་ལས།

ཞིང་འབྲོག་འབབ་འཕར་ཟས་གོས་སྡོད་ཁང་དག

གྲོང་ཁྱེར་མི་དང་ཁྱད་པར་མི་སྣང་ཞིང་།

ལྗོངས་ཕྱིར་ཡུལ་སྐོར་ངོ་མཚར་མཐོང་ཐོས་བསག

རྒྱ་སྐད་ལ་སོགས་གཞན་སྐད་ཐོག་མེད་རྒྱག

བག་ཁུམ་རྙིང་ཞེན་བསམ་པ་ཡོངས་བསལ་ནས།

ཁྱད་འཕགས་ཡུལ་ཟོག་ཚོང་གཉེར་ལེགས་པར་བསྐྱངས།

སྒོ་དབྱེ་ནང་འདྲེན་སྤུས་རྟགས་འཚོ་བར་རོལ།

མིག་མདུན་བྱུང་བའི་འགྱུར་བ་མང་ཐག་ལགས།

ལོ་རྒྱུས་གཙང་ཆབ་དལ་མེད་མདུན་དུ་བསྐྱོད།

བགྲང་བྱ་བཞི་བཅུ་སེ་གོལ་གཏོགས་ཙམ་འདས།

འཕེལ་རྒྱས་འབྱུང་བ་མཁའ་དབྱིངས་སྐར་ཚོགས་འདྲ།

ཤོད་བཞིན་འབྲི་བཞིན་བདག་ཀྱང་ངལ་བར་གྱུར།