ཨ་མས་སྒོར་མོ་སློང་དུས་ངོ་ཚ་མི་ཉན།ཁྱེད་རང་སློབ་གྲྭ་རུ་འགྲོ་བསམ་ན་ངེས་པར་དུ་ཟླ་བ་གཉིས་ལ་སྒོར་སྟོང་གསུམ་ཁྱེར་ཤོག་ཟེར།
སྐོར་རྩེ་ལུང་ཟེར་བའི་ས་ཆ་འདིའི་དགུན་དུས་ནི་གྲང་ངར་རྒོད་ས་ཞིག་རེད།ཁ་བ་མ་བབ་རུང་གྲོང་བར་ནས་ཡར་མར་སོང་ན་ངོ་གདོང་དང་རྒྱབ་གཞུང་།ལག་མགོ། པུས་མོ་སོགས་སུ་རླུང་དང་ཙག་བརྒྱབ་སྟེ་སྨུག་པོར་བསྒྱུར་འོང་། ང་རང་ས་ཆ་འདིར་འོང་འདོད་གཏན་ནས་མེད་ཀྱང་ཕ་མ་གཉིས་ཀྱིས་འདི་རུ་མི་མང་བས་ང་ཚོ་རྒྱུ་ཐོག་ཏུ་རྒྱག་པ་རེད་བཤད་དེ་ང་དང་ནུ་མོ་གཉིས་བཙན་གྱིས་ཁྲིད་ནས་ཡོང་བ་རེད།
སློབ་གྲྭ་ན་ཡོད་དུས།སློབ་གྲོགས་འགའ་རེ་སློང་མོར་འགྲོ་རན་དུས་དགའ་སྤྲོས་ཁེངས་ཏེ་དཔེ་ཁུག་ལ་རྡོག་པས་རྫི་བཞིན་ཁྱིམ་དུ་བརྒྱུགས་འགྲོ དྲང་མོར་བཤད་ན།ང་ནི་ཁོ་ཚོའི་བྱ་སྤྱོད་ལ་ཡ་མཚར་སྐྱེས་པ་ཞིག་རེད།ངས་ནམ་རྒྱུན་སློང་མོར་འགྲོ་དུས།ཁོ་ཚོའི་དགའ་སྤྲོ་དེ་ནི་སློབ་སྦྱོང་བྱེད་མི་དགོས་པའི་རྒྱུ་མཚན་གྱིས་བྱུང་བ་ཡིན་ནམ།ཁོ་ཚོ་མ་གཞི་ནས་སྤྲང་པོའི་ལས་རིགས་འདི་ལ་དུང་བའི་རྒྱུ་མཚན་གྱིས་ཡིན་པ་རེད་འདོད་མྱོང་།གང་ལྟར།ང་ནི་ལས་ཀ་འདི་ལ་མི་དགའ་ཡང་མུ་མཐུད་དུ་སློབ་གྲྭར་འགྲོ་དགོས་ན་གནས་སྐབས་སུ་ངོ་ཚ་འདི་མི་སྤངས་ཀ་མེད་རེད།
ང་ཚོ་གླ་འཁོར་ཞིག་ལ་བསྡད་དེ་རྒྱུ་ལ་ཕྲ་མོ་ནས་མར་འབབ་དུས།རླངས་འཁོར་ནང་གི་གཞོན་ནུ་ཞིག་དང་ཁ་ལོ་བ་གཉིས་ཀྱིས།དེང་སང་ཕྱོགས་སོ་སོ་ན་འགྲོ་བཞིན་པའི་སྤྲང་པོ་ཚོའི་དབང་བོར་སྐྱོན་ཅིའང་མེད་མོད།སྤྲང་ལས་རྐྱང་རྐྱང་ལ་འབད་ཀྱིན་འདུག དངོས་གནས་མཚར་བོ་རེད་ཟེར་བཞིན་རང་རང་གི་ལྟ་ཚུལ་སྐད་གསང་མཐོན་པོས་འཆད་ཀྱིན་འདུག སྐད་ཆ་དེ་གོ་བས་ང་ནི་ཆུ་ཚའི་ནང་དུ་འཕངས་བ་བཞིན་ནག་པོར་གྱུར་བའི་འགྲམ་ཤ་གཉིས་ཚ་བོར་གྱུར་ནས་ཅི་བྱེད་འདི་བྱེད་མེད་པར་ཕ་མ་གཉིས་ལ་ལྟ་དུས།ཨ་ཕ་ནི་གཉིད་དུ་ཡུར་ནས་སྔུར་བ་ཡང་འཐེན་གྱིན་འདུག་པས་སྐད་ཆ་དེ་གོ་མེད་ཚོད་རེད།འོན་ཀྱང་།ཨ་མ་གཉིད་མེད་རུང་སྒེའུ་ཁུང་གི་ཕྱི་རོལ་དུ་བལྟས་ནས་སྐད་ཆ་དེ་ལ་དོ་སྣང་ཙམ་ཡང་བྱེད་ཀྱིན་མི་འདུག
ང་ཚོ་ནི་དུས་རྟག་ཏུ་འཕྱ་སྨོད་འདི་དག་གི་ཁོར་ཡུག་ནས་འཚོ་གནས་ལ་འབད་ཀྱིན་པའི་མི་ཡི་རིགས་ཤིག་ཡིན་པས།ད་ཆ་ཞིག་ལ་མི་ཆེན་ཚོ་དང་བྱིས་པ་འགའ་རེ་ཡིས་ཁྲབ་རྨོག་གྱོན་པ་ལྟར་འཕྱ་སྨོད་འདི་དག་ལ་སྔར་ནས་ལོབ་ཟིན་ལ།རྨས་སྐྱོན་ཡང་བཟོ་མི་ཐུབ།
ཉིན་དེར་ང་ཚོ་ཕྱི་དྲོའི་ཆུ་ཚོད་ལྔ་པ་ཡས་མས་ཤིག་ལ་དར་རྩེ་མདོའི་གྲོང་ནང་དུ་ཐོན་པ་ཡིན།ད་ལྟ་ངས་གསལ་བོར་དྲན་པ་ནི།གྲོང་བར་དུ་འབུ་གྲོག་མ་ལས་ཀྱང་མང་བའི་རླངས་འཁོར་ནི་སྐད་ཅིག་ལ་ཡང་མི་སྡོད་པར་མདུན་ནས་མདུན་དུ་བརྒྱུགས། གཟུགས་རིང་ཐུང་དང་ཤ་ཚོ་ཞན།ལོ་རྒན་གཞོན།སྐྱེ་ཕོ་མོ་སོགས་ནི་ང་ཚོའི་ཕ་ཡུལ་གྱི་སྤྲང་ནག་དག་དང་འདྲ་བར་འུར་འུར་ཟང་ཟིང་གིས་འཚང་ཀ་རྒྱག་གིན་གྲོང་ཁྱེར་འདིའི་གྲུ་ག་སོ་སོར་མཆོངས་ཤིང་བཞུད། རི་བོ་དང་འདྲ་ཞིང་ནགས་ཚལ་ལས་ཀྱང་སྟུག་པའི་ཁང་བརྩེགས་ནི་བརྟན་བརླིང་ངང་གྱེན་དུ་འགྲེང་ཡོད་ཅིང་།དེ་ཚོའི་སྒེའུ་ཁུང་དང་སྒོ་ཆེན་ལས་མི་མང་པོ་ནག་རིག་རིག་ངང་འགུལ་བསྐྱོད་བྱེད་ཀྱིན་པ་གསལ་བོར་མཐོང་ཐུབ།
ང་ཚོ་རླངས་འཁོར་ལས་འབབ་དུས།ཁ་ངོ་སྐེ་དཀྲིས་ཀྱིས་བཏུམ་པའི་བུད་མེད་འགའ་ཐོན་ནས་རྩོད་རེས་རྒྱག་གིན་ང་ཚོར་རྒྱ་བོད་འདྲེས་མའི་སྐད་ཀྱིས།ཨ་ཤ།ལིའུ་ཀན༼མགྲོན་ཁང་༽དུ་ཨེ་འདུག གོང་སླ་མོ་ཡིན་ཟེར་ཞོར་ཕ་མ་གཉིས་ལ་ཅ་ལག་འཛིན་རོགས་བྱེད་མོད།ཕ་རྒན་གྱིས་མི་འདུག་མི་འདུག་ཅེས་ལན་བཏབ་པས།བུད་མེད་དེ་ཚོས་མྱུར་གྱིས་ཅ་ལག་དག་ཐང་དུ་བཞག་ནས་ཡང་རླངས་འཁོར་གཞན་པ་ནས་འབབ་ཀྱིན་པའི་མི་ཚོར་འཐམ་སོང་།ཨ་ཕས་ང་ཚོའི་ཅ་ལག་ཐང་དུ་དོར་ནས་འགྲོ་བའི་བུད་མེད་དེ་དག་ལ་ལྟ་བཞིན།སྙིང་རྗེ།ལས་ངན་པ་རེད་ཅེས་སྨྲས་ཏེ་ཐང་དུ་ལྷུང་བའི་ཅ་ལག་དེ་ཚོ་ང་ལ་འཛིན་དུ་བཅུག
ཕ་མ་གཉིས་དེ་སྔོན་ཐེངས་མང་པོར་གྲོང་འདིར་ཐོན་ཡོད་པས།སྲོད་ཁའི་དུས་འདིར་ཁོ་གཉིས་ཀྱིས་རང་གི་ཡུལ་ཁོག་ལས་ཀྱང་བྱང་ཆ་ཆེ་བའི་ཚུགས་ཀ་ཞིག་བཟུང་ནས་གཞོགས་ཀྱི་ཤིང་གསེབ་ཅིག་བསྙེགས་ཏེ་མདུན་དུ་བུད་སོང་།ང་ཚོ་མདུན་དུ་སོང་གིན་ལམ་མེད་པའི་ཤིང་གསེབ་དེ་དག་ན་སྐྱག་ལོག་མང་པོས་གང་སར་བརྫད་ཡོད་པས་ཁོ་ཚོའི་མགོ་ཐོག་ཏུ་བརྐྱངས་བའི་ཤོག་དཀར་དེ་དག་མེད་ན་ང་ཚོ་སྔ་མོ་ནས་ནང་དུ་སྤོས་ཟིན།ང་ཚོ་ནི་ཤར་ཕྱོགས་སུ་བསྐྱོད་པའི་རྣམ་ཐར་ནང་གི་མི་སྣ་དེ་དག་དང་འདྲ་བར་གག་དང་མཚུངས་བའི་སྐྱག་ལོག་དང་རྡོ་འབུར་འཇོང་མང་བོ་ཞིག་བརྒལ་རྗེས་གཞི་ནས་བྲག་སྐྱིབས་ཤིག་ལ་ཤིང་ལོ་འགའ་བཀབ་ཡོད་པའི་སྡོད་གནས་དེར་འབྱོར།
ཕ་མ་གཉིས་ཀྱིས་ཞིག་རལ་དུ་གྱུར་བའི་སྡོད་གནས་དེའི་ཤིང་ལོ་དང་བྲག་ཕྱེ་སོགས་སོ་སོར་བསལ་ནས་གཙང་སྦྲ་རོབ་ཙམ་བྱས་རྗེས།ཨ་ཕས་འགྱིག་ཁུག་ཏུ་ཡོད་པའི་ཤིང་སྟར་ཆུང་ཆུང་དེ་ཕྱི་རུ་བླངས།དེ་ནས་ད་ལྟ་ཅ་ལག་ཁུར་བྱེད་ཀྱི་ཐག་པ་སེར་བོ་ཞིག་ཡོད་པ་དེ་ང་ལ་འཛིན་དུ་བཅུག་སྟེ་ནགས་ལོ་འགའ་གཅད་དུ་སོང་ཞིང་བྲག་སྐྱིབས་དེར་ར་སྐོར་རམ་སྔུན་སྒོ་ཞིག་བཟོས་པས།སྡོད་གནས་དེ་ཙག་རླུང་དང་ཁ་བ་འགོག་ཐུབ་པའི་ཁང་པ་ཆུང་ཆུང་ཞིག་ཏུ་གྱུར་ནས་ཡིད་སེམས་ལ་རེ་ཞིག་ངལ་གསོ་ཉུང་ཙམ་ཐོབ།
ང་ཚོ་སྡོད་ས་ནི་གྲོང་མཐའ་ཞིག་ཡིན་བཤད་པ་ལས།གྲོང་དཀྱིལ་ཞིག་རེད་བཤད་ན་འཚམ་པོ་འདུག ཁང་ཆུང་དེ་ལས་མདུན་དུ་གོམ་པ་བཅུ་ཙམ་སོང་ས་ནས་མར་བལྟས་ན།ང་ཚོ་ནི་བྱ་ཞིག་གི་གཤོག་པ་སྟོད་སྨད་དུ་བརྐྱངས་བ་ལྟ་བུའི་གྲོང་པ་འདིའི་དཀྱིལ་དབུས་ཀྱི་ཐད་དུ་རེད། གནས་དེ་ནས་ཕར་བལྟས་ན།སློབ་ཁང་གི་སྒོ་རྩ་རུ་ལངས་སུ་བཅུག་པའི་སློབ་མ་པྲ་ཆལ་ཞིག་དང་འདྲ་བའི་ཁང་བརྩེགས་འགའ་རེ་དྲང་པོར་འགྲེང་ནས་རི་ལུང་འདིའི་གྲག་འགུལ་ལ་ཉན་གྱིན། ནག་བེར་བེར་གཤར་གྱིན་པའི་མི་ཚོགས་རྐང་པས་བརྫིས་ཏེ་རྒྱང་རིང་ཞིག་ལ་བྱོལ་འགྲོ་བའི་ཉམས་སྣང་ཞིག་ཀྱང་མཚམས་མཚམས་སུ་སྐྱེས་ཀྱིན་པ་དང་མཚུངས།
ང་ཚོས་ནུབ་ཟས་བཟས་རྗེས་མལ་དུ་ཉལ་བ་ཡིན།ཉིན་གཅིག་གི་འགྲུལ་བཞུད་ཀྱིས་ཕ་མ་དང་ནུ་མོ་སོགས་རྨི་ལམ་དུ་ཁྲིད་དེ་སྔུར་བ་རིང་ཐུང་འགའ་ཡང་འཕྲོར་འཕྲོར་ཐོན་ནས་ཁང་ཆུང་འདི་སྡུག་བསྔལ་གྱི་མཚན་མོ་ཞིག་ཏུ་བསྐྱལ་སོང་མོད།ང་ལ་ནི་ངལ་དུབ་ཡོད་ཀྱང་གཉིད་མོས་གཏན་ནས་མ་བྱུང་།
ངས་གེ་སར་གྱི་སྒྲུང་དེབ་ཅིག་ཡོད་པ་དེ་བྲང་གཞུང་དུ་གླན་ནས་བསམ་གཞིག་མི་གཏོང་ཀ་མེད་བྱུང་།ང་ནི་ང་ཚོ་སྡེ་བའི་ནང་གི་བྱིས་པ་གཞན་དང་བསྡུར་ན་ལས་བཟང་ཞིག་ཡིན།འོན་ཀྱང་། ང་ཚོ་སྡེ་བའི་བཤད་སྟངས་ལྟར་བྱས་ན་ང་ནི་བྱིས་པ་ལས་ངན་ཞིག་ཡིན།ང་ཚོ་སྡེ་བའི་བྱིས་པ་གཞན་པ་ཚོ་ལོ་གསུམ་བཞིར་བུད་པ་ནས་གང་སར་སློང་མོར་ཁྲིད་དེ་སྤྲང་པོ་ཞེས་པའི་ལས་ཀ་འདིར་དངོས་སུ་ཞུགས་དགོས་བྱུང་གིན་ཡོད་མོད།ང་ནི་ཆུང་དུས་ནས་ལུས་ཟུང་སྡུག་ཅིང་ནད་ཆེ་ཆུང་མང་པོ་དུས་རྒྱུན་ལུས་པོ་འདིར་འཐམ་ཡོང་བས།ད་བར་རང་ས་ལས་གང་དུ་ཡང་འགྲོ་མྱོང་མེད།
ཡིན་ནའང་།ད་ནི་ཕོ་ལོ་བཅུ་གསུམ་ལ་བུད་པས་ནད་བརྒྱ་ཡོད་ཀྱང་སློང་མོར་མི་འགྲོ་བའི་ཁ་གཡར་ས་མེད།སྡེ་བའི་བཤད་སྲོལ་ལྟར་བྱས་ན།སྐྱེ་པ་ཕོ་ཞིག་གི་མི་ལུས་བླང་པ་འདི་འཕྲོ་བརླག་བྱས་པས་ཤི་སོང་ན་དགའ་བའི་ལོ་ཚོད་འདིར་ཐོན་རྐྱེན།ཕ་མ་གཉིས་ལ་ཞུ་བ་བྱས་ཀྱང་ཕྱི་ནས་ཐོན་པའི་མི་ཁ་དེ་དག་གིས་སྦུར་ནས་ཡོང་དགོས་བྱུང་།
ཐབ་ཁ་ནས་གྱེན་དུ་རྒྱུ་བཞིན་པའི་དུ་བ་ཕྲ་མོ་དེ་རིམ་བཞིན་ཡལ་ཞིང་ཁང་པའི་ནང་དུ་གྲང་ངར་ཡང་ཇེ་རྒོད་དུ་བུད་སོང་།ངས་སང་ཉིན་བསྒྲུབ་དགོས་པའི་ལས་ཀ་དེར་བསམ་བློ་གཏོང་ཐེངས་རེ་ཡིས་སེམས་རྩ་རུ་ཚ་ཤེད་བརྒྱུགས་ཏེ་གཉིད་མོས་གཏན་ནས་མ་བྱུང་།དོན་ངོ་མས་བཤད་ན།ང་ལས་ཀ་དེར་ངོ་ཚ་ལས་འཇིགས་སྐྲག་སྐྱེས་ཀྱིན་འདུག ང་ཕར་ངོ་ཚུར་ངོ་མི་ཤེས་པའི་མི་ཚོགས་ལ་ལག་པ་འདི་བརྐྱངས་ནས་ཁ་དྲོ་ཟེར་བ་ལ་སྐྲག ང་རྒྱུས་མེད་ཀྱི་མི་ཚོའི་ལག་ནང་ནས་སྟེར་བའི་སྒོར་མོ་དེ་ཇི་ལྟར་ལེན་དགོས་པར་སྐྲག ང་མི་དག་གི་མིག་ནང་ནས་འགྱེད་པའི་ཤ་ཚ་དང་མཐོང་ཆུང་གི་ལྟ་སྟངས་ལ་སྐྲག
མདོར་ན།ང་ནི་སང་ཉིན་ཐོན་པར་ཤིན་ཏུ་སྐྲག ངས་གེ་སར་ལ་གསོལ་བ་བཏབ་སྟེ་ཨ་མྱེ་ཉི་མ་རེ་ཞིག་མལ་དུ་ཉལ་དགོས་པའི་བཀའ་རྒྱ་སྒྲོག་རོགས་ཞེས་ཞུས་མོད།བསམ་བློ་རེ་བཏང་ན།ད་ནི་མྱུར་གྱིས་གཉིད་པ་ལས་སེམས་འཚེར་དེ་ལ་བྱོལ་བའི་ཐབས་ཤིག་མི་འདུག་པས།རབ་རིབ་ཀྱི་སེམས་ངལ་ཁྲོད་ནས་གཉིད་དུ་ཡུར།
ཕྱི་ཉིན་སྔ་མོར་གྲང་རླུང་བཙན་པོ་ཞིག་གིས་ང་རང་གློ་བུར་སད་དུ་བཅུག་སོང་།འདྲེ་ས་འདིའི་ཡོད་ཚད་ལ་ངས་དམོད་དོར་བ་ཡིན།མདང་དགུང་གི་མལ་ས་འདི་སྲ་ཞིང་མཁྲེགས་ལ།ཞོགས་པའི་ཙག་རླུང་ཡང་དམྱལ་ཁམས་སུ་འཕེན་དགོས་རྒྱུའི་གྲང་མོ་ཞིག་རེད།ང་རང་དུས་རྒྱུན་མལ་ལས་ལང་དུས་མི་ཆེན་ཚོའི་ཤུགས་རྐྱེན་གྱིས་ཁ་འདོན་ཉུང་ཙམ་འདོན་པར་གོམས་ལོབ་ཡོད་མོད།ཉིན་དེའི་སྔ་མོར་ངས་སྡུག་བཤད་བྱེད་ཞོར་རྐང་ཤུབས་གོན་ཞིང་།སྡུག་བཤད་བྱེད་ཞོར་རྐང་ལྷམ་གོན།ཡང་སྡུག་བཤད་བྱེད་ཞོར་ཕྱྭ་ཚར་དེ་གོན་ནས་སྐ་རགས་བཅིངས་པ་ཡིན།
ང་ཚོ་ཡོད་ས་ནས་ཕར་ལ་བལྟས་ན།ཉི་མ་སེར་བོ་ནི་ཨ་མྱེ་རྒན་པོ་ཞིག་དང་འདྲ་བར་འགྲོ་ཙམ་དང་འདུག་ཙམ་གྱིས་མར་ལ་འབབ་ཀྱིན།ཁོ་རང་བགྲོད་པའི་རྐང་རྗེས་ལ་གསེར་ཕྱེ་མང་ཙམ་འཕོས་པས་ངམ་གནག་གི་རི་ལུང་འདི་ལ་རིམ་བཞིན་འཛུམ་མདངས་ཤིག་ཀྱང་རྒྱས་མགོ་བརྩམས།
ངས་ནང་ཇ་འཐུང་བཞིན་ཕ་མ་གཉིས་ཀྱི་གདོང་ལ་བལྟས་པ་ན།ཁོ་གཉིས་ནི་ཡིད་ཆེས་དང་རྒྱལ་ཁ་ཡིས་ཁེངས་པའི་དཔའ་བོ་ཞིག་དང་འདྲ་བར།ང་དང་ནུ་མོ་གཉིས་ལ་སློང་མོའི་སྐོར་གྱི་ཤེས་བྱ་བཤད་ཞོར། ཕོར་བའི་རྐུབ་ཏུ་འཐུམ་པའི་རྩམ་ནག་དེར་ལྕེ་ཡིས་ཡང་ཡང་ལྡག
ངས་ཕ་མ་གཉིས་ལ་ཁྱེད་ཚོ་སློང་མོར་དེ་འདྲའི་དགའ་དོན་ཅི་ཡིན་ཞེས་འདྲི་བསམ་ཡང་།སྐད་ཆ་དེ་མུད་ཁ་རུ་ཐོན་དུས་སྙིང་གསེང་ནས་བྲེད་ཤ་ཞིག་ཐོན་ཏེ་ཁོ་གཉིས་ཀྱིས་བཤད་པར་མགོ་བོ་ལྡེམ་པ་ལས་སེམས་ཚོར་དེ་བཤད་པའི་སྤོབས་པ་གཏིང་ནས་ཡལ།ཡང་གཅིག་བཤད་ན།ཕ་མ་གཉིས་ལ་ཡོད་པའི་དགའ་སྤྲོ་དེའི་འབྱུང་ཁུངས་ངས་ནམ་ཡང་རྟོགས་དཀའ་ཞིང་།གལ་ཏེ་རྟོགས་ནའང་དེ་དུམ་བུར་གཅོད་པའི་དབང་ཆ་ཞིག་ང་ལ་ཡོད་མི་སྲིད་འདོད་པ་ཡིན།
ནངས་ཇ་བཏུང་ནས་ཚར་ལ་ཉེ་དུས་ནུ་མོ་གཞི་ནས་གཉིད་ལས་སད་སོང་།ཨ་མས་ལོ་བཞི་ལ་སོན་པའི་ནུ་མོར་གོན་པ་བསྐོན་ནས་རང་གི་ནུ་འོ་བསྣུན། ཕར་བལྟས་སོང་ན།ནུ་མོ་ལ་གཉིད་སྐྱིད་པོ་ཞིག་ཡོང་བ་འདྲ་སྟེ་མིག་མཐའ་ཡོངས་མིག་སྐྱག་གིས་ཟིན་ནས་རྫི་མ་ཡང་ཕན་ཚུན་འབྱར་འདུག
གྲོང་ནང་གི་འུར་ཟིང་ནི་ཁ་སང་ཕྱི་དྲོ་ལས་ཀྱང་དྲག་པོ་འདུག མི་འགའ་རེ་ཡིས་དཔེ་ཁུག་དང་འདྲ་བའི་ཁུག་མ་ཞིག་ལག་ཏུ་ཐོགས་ཏེ་བྲེལ་ཚུབ་ཀྱིས་ཁང་བརྩེགས་མང་པོའི་སྒོ་ཆེན་བསྙེགས་ཏེ་གཤར་གྱིན་འདུག ང་ཚོ་བྱིས་པ་ཚོའི་རྩེད་ཆས་དང་འདྲ་བའི་རླངས་འཁོར་ལྗང་གུ་མང་པོ་གཅིག་རྗེས་གཉིས་མཐུད་དུ་གྲོང་སྟོད་ནས་གྲོང་སྨད་དུ་བརྒྱུགས་འགྲོ་ལ།གྲོང་སྨད་ནས་གྲོང་སྟོད་དུ་ཏུས་་ཏུས་་སྒྲོག་བཞིན་བརྒྱུགས་འགྲོ མཚམས་མཚམས་རེར་འོག་གི་སྒོ་ནང་ནས་མི་འགའ་རེ་དོར་རྗེས་ཡང་གནས་གཞན་ཞིག་ནས་མི་འགའ་རེ་བཅུག་སྟེ།སྐད་ཅིག་ཙམ་ལ་མཐོང་ལམ་ནས་ཡལ་འགྲོ།
ང་ཚོ་བཞི་བོ་གྲོང་དཀྱིལ་གྱི་ཐང་ཆེན་ཞིག་ཡོད་ས་དེར་ཐོན་དུས།ཨ་ཕས་ཕྱོགས་སོ་སོ་རུ་སོང་ནས་ལས་ཀ་བསྒྲུབ་དགོས་པའི་བཀའ་སྐུལ་གནང་རྗེས།ཁོ་རང་གྲོང་སྟོད་དུ་བུད་སོང་ལ་ཨ་མ་གྲོང་སྨད་དུ་བུད་སོང་།ང་དང་ནུ་མོ་གཉིས་ཐང་དེའི་ཟུར་དག་ནས་སློང་བཞིན་སྡོད་དགོས་ཟེར།
ནུ་མོ་དང་ངེད་གཉིས་སྐས་ལྟེམ་ཞིག་གི་ཐོག་ཏུ་བསྡད་དེ་འགྲམ་ནས་ཡར་མར་བགྲོད་ཀྱིན་པའི་མི་དག་ལ་ལྟ་བཞིན།ཅི་ཞིག་བཤད་འདོད་ཀྱི་ངག་སྒོ་ཕྱེ་ཙམ་བྱེད་དུས་ངོ་གདོང་ནས་འཕྱུར་བའི་ཚ་རླབས་ཤིག་གིས་ཡང་ནས་ཡང་དུ་ཚིག་འགོ་བསྒགས།ང་ནི་དངོས་གནས་སྐྲག་ཀྱང་སྐྲག་ལ་ངོ་ཡང་ཚ།ངས་ཐེངས་དུ་མར་མི་ཚོའི་ལྭ་སྣེ་ལ་འབྱར་ནས་སྒོར་མོ་སློང་དགོས་བསམ་དུས།ཐེངས་དུ་མར་འཇིགས་སྐྲག་སྐྱེས་ཏེ་མྱུར་གྱིས་ཕྱིར་ནུར་བྱེད་དགོས་བྱུང་།
ཐེངས་ཤིག་ངས་སེམས་ཐག་བཅད་དེ་ལྷུག་ལྷུག་གིས་འགྲོ་བཞིན་པའི་གྲྭ་བ་ཞིག་ལ་སློང་དགོས་བསམས་ནས་ཡར་ལ་ལང་དུས།གློ་བུར་དུ་འགྲམ་ན་སྡོད་པའི་ནུ་མོ་བརྒྱུགས་ཏེ་གྲྭ་བ་དེའི་གཟན་ཤམ་ལ་འབྱར་ཞོར།ཨ་ཁུ།ཨ་ཁུ་་སྒོར་མོ་ཞིག་སྟེར་རོགས།སྒོར་མོ་ཞིག་སྟེར་རོགས་ཞེས་བཤད་སོང་བས་ང་རང་ཧད་དུ་བཅུག ཕོ་བ་དབུགས་ལྒང་ཞིག་དང་འདྲ་བའི་གྲྭ་བ་དེས་ཆུང་ཞིང་རུད་པའི་ནུ་མོར་ལྟ་ཙམ་བྱས་རྗེས།གཡས་ཕྲག་ཏུ་བཀལ་བའི་ཁུག་མ་སེར་བོ་དེའི་ནང་དུ་ལག་ཉུལ་ཞིག་བྱས་ཏེ་སྒོར་གཅིག་ལོན་པ་དེ་ནུ་མོར་སྦྱིན་སོང་།ནུ་མོས་དེ་མ་ཁད་སྒོར་གཅིག་དེ་ལག་ཏུ་བླང་ནས་ཁ་དྲོ་ཡང་མི་ཟེར་བར་མི་གཞན་ཞིག་ལ་སློང་དུ་བརྒྱུགས་སོང་།
ནུ་མོའི་སྤྱོད་པ་དེར་ང་རང་ཧ་མི་ལས་ཀ་མེད་བྱུང་།ལོ་བཞི་ལས་སོན་མེད་ཅིང་ཐ་ན་སྐད་ཆ་ཡང་མགོ་མཇུག་ཆ་ཚང་བ་ཞིག་སྨྲ་མི་ཤེས་པའི་ཁོ་མོས།འགྲམ་ནས་ཕྱོགས་སོ་སོར་བགྲོད་ཀྱིན་པའི་མི་རྣམས་ལ་འབྱར་ནས་སྒོར་མོ་སྟེར་རོགས་ཞེས་པའི་སྐད་ཆ་དེ་དང་ཚུགས་ཀ་དེ་ནི་མི་ཆེན་ཞིག་དང་ཅི་འདྲའི་འདྲ་པོ་འདུག བལྟས་ཡོང་ན།ནུ་མོ་ཆུང་ནི་མ་ཡིན་པར་ང་རང་གླེན་ནི་ཡིན་པ་འདྲ་སྟེ།ཅིག་ཅིག་སྒོར་མོ་སྟེར་རོགས་དང་ཉིག་ཉིག་སྒོར་མོ་སྟེར་རོགས་ཞེས་པའི་སྐད་ཆ་དེ་ནི་དངོས་གནས་རྙོག་འཛིང་མིན་མོད།ངས་ཇི་ལྟར་ཨུ་ཚུགས་བྱས་ཀྱང་ཚིག་གཅིག་ཙམ་ཡང་ཁ་ནས་མི་ཐོན་པར་བལྟས་ན།ང་ནི་དངོས་ནས་གླེན་པ་ཞིག་རེད།
ཉི་མ་ཡོངས་སུ་གྲོང་འདིའི་སྣེ་སོ་སོར་འགྱེད་དེ་མི་ལ་དྲོ་སྣང་སྐྱིད་པོ་ཞིག་སྟེར་མོད།ངས་ནི་ནུ་མོས་ངའི་ལག་ཏུ་བཞག་པའི་སྒོར་མོ་དག་ལག་མཐིལ་དུ་བསྡམས་ཏེ་སྐས་ཐེམ་ཐོག་བསྡད།འགྲམ་ནས་མི་ཚོགས་ཀྱི་བཞུར་རྒྱུན་ཇེ་སྟུག་ནས་ཇེ་སྟུག་ཏུ་ཕྱིན་གྱིན་འདུག་ཅིང་།བག་ཡངས་ཀྱིས་ཟིན་པའི་གཞོན་ནུ་མང་པོ་ཐང་ཆེན་དེའི་འདུག་སྟེགས་སུ་སྡོད་ཀྱིན་ང་དང་ནུ་མོ་གཉིས་ལ་ལྟ།མཚམས་མཚམས་རེར་མགོ་བོ་ནང་དུ་གུག་སྟེ་སྐད་ཆ་གང་རུང་ལབ་ཀྱིན་ཡང་བསྐྱར་ངེད་གཉིས་ལ་ལྟ་འོང་།
གྲོང་འདིའི་ནང་གི་མི་རྣམས་ནི་ངའི་ཕ་ཡུལ་གྱི་མི་རྣམས་དང་མི་འདྲ་བར་གོས་གྲ་དག་ཏུ་གྱོན་ཞིང་གཙང་སྦྲ་ཤིན་ཏུ་ལེགས།དེ་ལས་ལོ་ལོན་ཚོས་མགོ་ཐོག་ཏུ་ཞྭ་ལེབ་རེ་འཕངས་ཏེ་ཉི་མར་ལྡེ་བཞིན་ཤོག་ཤོ་རྩེ། མགོ་སྐྲ་སེར་བོ་དང་དམར་བོར་བསྒྱུར་བའི་ཕོ་སར་འགའ་རེའི་ལག་པར་བུ་མོ་ལོ་ཆུང་རེ་ཁྲིད་དེ་དགོད་སྒྲ་སྒྲོག་ཞོར་ག་ཤེད་ཅིག་ཏུ་བུད་འགྲོ ཚོང་ཁང་དང་ཟ་ཁང་གི་སྒོ་འགྲམ་བརྒྱུད་དེ་འགྲོ་བཞིན་པའི་མི་ཚོགས་ལ་སྦྱིན་བདག་གིས་འཛུམ་མདངས་དང་བཅས་ནང་དུ་བསུ་བཞིན་ཅི་ཡང་མི་སྙམ་པར་ནང་ནས་ཕྱི་རུ་གཏོང་།མདོར་ན།གྲོང་ཁྱེར་འདི་ནི་ང་ཚོ་ཡོད་སའི་སྡེ་བ་དང་མི་འདྲ་བར།ཡོད་ཚད་འདུ་འཛི་དང་བྲེལ་ཟིང་གིས་ཁེངས་དེ།ངའི་རྣ་བ་བོང་བོང་དང་སེམས་པ་བློང་བློང་པོར་བསྒྱུར་སོང་།
ང་ཁོར་ཡུག་གི་འགྱུར་ལྡོག་རྒོད་པོར་སེམས་གཡེང་ནས་སྐབས་ཤིག་ནུ་མོ་ཡང་ང་དང་མཉམ་པོར་ཡོད་པ་བརྗེད་སོང་།ངས་ལག་ཏུ་བཟུང་བའི་སྒོར་མོ་དག་མ་ཁ་རུ་བྱིལ་གྱིན་བུ་མོ་ལོ་ཆུང་ཞིག་གིས་ཕོ་སར་གཟུགས་རིང་ཞིག་ལ་འགྲམ་ལྕག་གཞུས་ཀྱིན་པར་སེམས་ཤོར་ནས་ཡོད་དུས།མི་ཞིག་གིས་ངའི་མགོ་རུ་ལག་པ་ཐུག་ཞོར་སྒོར་མོ་ལྔ་ལག་དུ་བརྫངས་སོང་བས།ངས་མྱུར་གྱིས་མགོ་བོ་དགྱེ་ནས་མི་དེར་ལྟ་དུས།གཟུགས་རིང་ཞིང་ཤ་ཞན་བའི་རྒྱབ་གཟུགས་ཤིག་ང་དང་རིང་དུ་གྱེས་སོང་།རྒྱབ་གཟུགས་དེ་ནི་ངས་གནས་གང་ཞིག་ནས་མཐོང་མྱོང་བ་འདྲ་སྟེ།ལྷག་པར་དུ་བུ་མོ་ཞིག་གི་འགྲོ་སྟངས་ལ་ཤིན་ཏུ་མཚུངས་བའི་གོམ་ཁ་དེ་ནི་ང་ལ་རྒྱུས་མངའ་ཟབ་མོ་ཡོད་མོད།ཡང་དེ་སུ་ཞིག་ཡིན་པར་བསམ་བློ་གཏོང་དུས་ངས་ཅིའང་དྲན་མ་ཐུབ།
ཉིན་དེར་ཨ་ཕ་དང་ཨ་མ་གཉིས་ཀྱི་སྒོར་མོ་མཉམ་དུ་བསྣན་ན་བཞི་བརྒྱ་ལྷག་ཡོད་ལ།ནུ་མོས་སྒོར་མོ་བརྒྱ་ལྷག་སློང་ཐུབ་འདུག ཡིན་ནའང་།ངས་ནི་རྒྱུས་ཆ་ཆེ་བའི་མི་དེས་སྟེར་བའི་སྒོར་ལྔ་ལས་རྙེད་མེད་པས།དགོང་ཇ་འཐུང་དུས་ཨ་ཕའི་སྨུག་ཅིང་ནག་པའི་ངོ་གདོང་ལས་ཞེ་འདར་བའི་སྤྲིན་པ་ཞིག་འཐིབ་ཀྱིན་འདུག་པར་བལྟས་ན།དོ་དགོང་ཁང་ཆུང་འདིའི་ནང་ནས་ངས་ཐོག་དང་པོར་ཁྲིམས་ཆད་ལྕི་མོ་ཞིག་མྱོང་དགོས་པ་གཏན་འཁེལ་ཡིན་ཞིང་།ངའི་ཉིན་དཀར་གྱི་སྡར་གཤིས་སམ་སྤྱོད་པ་དེ་ལ་འགྱོད་སེམས་ཤིག་རང་དབང་མེད་པར་སྐྱེས།
ལོས་ཡིན་ཏེ། ནུབ་ཇ་འཐུང་ནས་ཚར་ལ་ཡོད་དུས།ངས་སྐད་ཆ་བཤད་ནོར་ཞིག་གིས་ཕ་རྒན་གྱི་ཁུ་ཚུར་དེས་མིག་ནང་ནས་སྐར་མ་མཆེད་པ་ཞིག་མགོ་ལྟག་ཏུ་བརྒྱབ་བྱུང་བས།ང་ངུ་ཡང་མ་ཕོད་པར་རང་ས་རུ་སྒོང་སྒོང་བྱས་ཏེ་ཐེངས་རྗེས་མའི་ཆད་པར་བསྒུགས ཨ་ཕས་གཤེ་གཤེ་གཏོང་ཞོར་ཇ་ཧུབ་གང་འཐུང་ནས་མུ་མཐུད་དུ་ལག་པ་ཚུར་ལ་རྐྱོང་དུས།ངའི་ཉམ་ང་བའི་རྣམ་འགྱུར་དེས་ཁོ་ལ་སྙིང་རྗེ་བསླངས་སོང་བ་འདྲ་སྟེ།ངའི་མགོ་ལ་ལག་པ་ཐུག་ཙམ་བྱས་ཏེ་ཕྱི་རུ་བླངས་སོང་།
འོན་ཀྱང་།ངས་ཆེས་བཟོད་ཐབས་མེད་པ་ནི་ཨ་ཕའི་གཅར་རྡུང་དྲག་པོ་དེ་མ་ཡིན་པར།ནམ་རྒྱུན་གཅར་རྡུང་རྗེས་ནས་ཨ་མའི་འཛད་མཐའ་མེད་པའི་སྡུག་བཤད་དེ་དག་ཡིན།ཁོ་གཉིས་ཀྱིས་ཁྱིམ་ནས་ལས་བགོས་བྱས་པ་དང་འདྲ་བར།ཨ་ཕ་ནི་ང་དང་ནུ་མོ་གཉིས་རྡུང་མཁན་ཡིན་ལ།ཨ་མ་ནི་ཨ་ཕས་ཅིའི་ཕྱིར་རྡུང་དགོས་པའི་རྒྱུ་མཚན་བཤད་མཁན་དེ་ཡིན།གལ་ཏེ་ཉིན་ཞིག་ཨ་མས་ཀྱང་ཨ་ཕའི་ལས་ཀ་དེ་བསྒྲུབས་སོང་ན།ང་དང་ནུ་མོ་གཉིས་ལ་ལྤགས་རུས་ཀྱི་ཟུག་གཟེར་མི་ཉུང་བ་ཞིག་ཐོན་སྲིད་ཀྱང་།རྣ་ཅོ་བོང་བོང་དུ་གཏོང་བའི་སྡུག་བཤད་རིང་མོ་དེར་ཉན་མ་དགོས་པ་རེད།ཡིན་ནའང་།བསམ་བློ་རེ་བཏང་ན།ཨ་མའི་ཁ་དེ་ཇི་སྲིད་དུ་གནས་པའི་བར་ཁོ་མོའི་སྡུག་བཤད་ཀྱང་དེ་སྲིད་དུ་གནས་ངེས་པ་ནི་ངེད་ཚང་ལ་མཚོན་ན་གནས་ལུགས་ཤིག་ཡིན།
ཁྱོད་ཀྱིས་ཟ་མ་བཟའ་མི་དགོས་པ་ཨེ་རེད།གོན་པ་གྱོན་མི་དགོས་པ་ཨེ་རེད།ཨ།ད་ཡར་སྐྱེས་ཏེ་ཐུར་དུ་སྒུར་གྱིན་འདུག་མོད།སྒོར་མོ་སློང་བ་ལྟ་བུའི་བྱ་བ་སླ་མོ་ཞིག་ཀྱང་སྒྲུབ་མི་ཤེས་པ་ཨེ་རེད།ནམ་རྒྱུན་སློབ་གྲྭར་འགྲོ་དགོས་བཤད་དེ་ཕ་མ་གཉིས་ལ་སེམས་ཁུར་ཡང་བྱེད་ཤེས་པ་མ་རེད།ཨ།འདྲེ་ཕྲུག ཁྱོད་ཀྱིས་ནུ་མོ་ལ་ལྟོས་དང་།ཕར་བལྟས་ན་ཙིག་ཕྲུག་ཅིག་དང་འདྲ་མོད།ཆུང་དུས་ནས་སློང་མོ་བྱས་ཏེ་ཡོང་བས་ད་ལྟ་ཅི་འདྲའི་གོ་ཆོད་ཀྱིན་འདུག སྤྲང་ཕྲུག ཉོན་ཞིག ངས་སྔོན་ནས་ཁྱོད་ལ་བཤད་ཡོད།ཟླ་གཉིས་ལ་སྒོར་སྟོང་གསུམ་ཡང་མ་ལོན་ན་ཡི་གེ་འདོན་མི་དགོས།གོ་ཨེ་སོང་།ཨེ། རྒད་པོས་ལྟོས་དང་།འདྲེ་ཕྲུག་འདིས་ངའི་སྐད་ཆ་ལ་ཉན་གྱིན་མི་འདུག་ཅེས་དྲག་ཆར་ཞིག་དང་འདྲ་བའི་ཚིག་གི་ཚོགས་དང་གཏམ་གྱི་ཚོགས་ནི་འཛད་མཐའ་མེད་པར་སྔར་བཞིན་ཨ་མའི་ཁ་ནང་ནས་ཡང་ནས་ཡང་དུ་ཐོན།
དངོས་གནས་རེད།ང་ཚོའི་བོད་ཡིག་དགེ་རྒན་གྱིས་གསུངས་པ་ལྟར།ཕ་ཡུལ་གྱི་སྲོལ་རྒྱུན་འདི་མེད་པར་བཏང་ནས་རང་ལག་དྲོན་མོས་རང་ཁ་གསོ་དགོས་ན།དཔེ་ཁུག་རྒྱབ་ཏུ་ཁུར་ནས་སློབ་གྲྭ་འགྲིམ་བཞིན་པའི་སློབ་མ་ང་ཚོ་ནས་འགོ་བརྩམ་དགོས། འོན་ཀྱང་།མིག་སྔོན་དུ་བསམ་བློ་བཏང་ན།ང་སྒོར་མོ་སློང་དུ་མ་སོང་ཚེ་སློབ་གྲྭར་འགྲོ་མི་ཐུབ།སློབ་གྲྭར་མ་སོང་ན་ཕ་ཡུལ་གྱི་མི་རྣམས་དང་འདྲ་བར་སྤྲང་པོར་འགྱུར་བས།དེས་ན་ང་ངེས་པར་དུ་སློང་མོར་འགྲོ་དགོས།དེས་ན་ངས་ཟླ་གཉིས་ལ་སྒོར་མོ་སྟོང་གསུམ་ངེས་པར་དུ་ལོན་དགོས།
ཡིན་ནའང་།ང་ཕ་ཡུལ་དང་རྒྱང་ཐག་རིང་བའི་གྲོང་ཁྱེར་ཞིག་ཏུ་སློང་མོར་འགྲོ་བཞིན་པའི་དོན་དངོས་འདི་བོད་ཡིག་དགེ་རྒན་གྱིས་གོ་སོང་ན་ཁོས་ཅི་ལྟར་བསམ་སྲིད།སློབ་མ་འདི་ལ་རེ་བ་མི་འདུག་བསམ་སྲིད་དམ།ཡང་ན་སློབ་མ་འདི་ཡང་ས་ཆ་འདིའི་མི་དག་དང་འདྲ་བར་སློང་མོ་ལ་དགའ་མཁན་ཞིག་རེད་བསམ་སྲིད་དམ།
ཨ་ཕ་དང་ཨ་མ།ནུ་མོ་བཅས་ནི་མལ་དུ་གཉིད་དེ་ཡིད་སྨོན་ཤོར་བའི་བག་ཡངས་ཤིག་གིས་ཡོངས་སུ་ཁེངས། གང་ལྟར།ཁོ་ཚོ་ཁ་གསོ་ཐབས་འདི་ལ་སེམས་གཏིང་ནས་ཞུགས་ཟིན་པས་སྨག་ནག་དང་གྲང་ངར་གྱིས་ཟིན་པའི་མཚན་མོ་མང་པོར།ཁོ་ཚོས་གཉིད་མི་ཁུག་པའི་སེམས་ཁུར་ཅིའང་བྱེད་མི་དགོས།
ངས་སྤྲ་སྒྲོན་འོག་ནས་ཧོར་གླིང་གཡུལ་འགྱེད་ལ་ཉུང་ཙམ་བལྟ་འདོད་ཆེ་མོད།ཡིག་འབྲི་རེ་རེ་ཁ་ནང་ནས་ཕྱི་རུ་ཕུད་དུས་རྣམ་ཤེས་མེད་པའི་བེམ་པོ་ཞིག་དང་འདྲ་བས།རྟ་རྒན་ཞིག་དང་མཚུངས་བའི་སེམས་པ་འདི་སྤྱང་ཚོགས་དང་ཁྱི་ཚོགས་མང་པོས་སྐོར་བཞིན།མཆེ་བ་ཡིས་བསྐྱེད་པའི་ཟུག་གཟེར་དང་བྲོས་བྱོལ་གྱིས་བསླངས་པའི་ངལ་དུབ་ཀྱང་མྱོང་གིན་ཡོད་པས།རང་གི་ཁ་ནང་ནས་ཐོན་པའི་ཡིག་འབྲུ་དེ་ཚོའི་བྱད་གཟུགས་ལ་ཅེར་གྱིན་རྨོངས་འཐོམ་དུ་གྱུར་རྐྱེན།གླིང་སྒྲུང་གི་དེབ་དེ་བྲང་ཁ་རུ་ལག་པས་བསྡམས་ནས་ཉལ་དགོས་བྱུང་།
མཚན་མོ་དེར་ང་ལ་གཉིད་སྐྱིད་པོ་ཁུག་བྱུང་། ཉིན་གཉིས་ཀྱི་གཉིད་ཆགས་ཀྱིས་ང་རང་ཤི་བ་ནང་བཞིན་གཉིད་ཐེངས་གཅིག་གིས་ཕྱི་ཉིན་གྱི་ཞོགས་པ་རུ་བསྐྱལ་འདུག
ང་རང་སྒྱིད་ལུག་གིས་མལ་ལས་ལང་ནས་ཁ་ངོ་བཀྲུ་འདོད་ཆེ་མོད།ཨ་ཕའི་ནག་རོག་རོག་གི་གདོང་ནས་རྔུལ་ཆུ་གཤར་བའི་རྗེས་ཤུལ་དང་ཨ་མའི་ཆུང་ཞིང་རིད་པའི་ལག་མགོ་ནས་ཚི་དྲེག་གིས་བཀང་བའི་སྐོགས་ཤུན།ནུ་མོའི་ཕྱོགས་སོ་སོར་བརྐྱངས་ཤིང་འཕྱིང་བའི་སྐྲ་རྫོང་མཐུག་པོ་དང་རྫི་མའི་རྩ་རྩེ་རུ་འདམ་བག་བཞིན་འབྱར་བའི་མིག་སྐྱག་སོགས་མིག་ལམ་དུ་མངོན་བྱུང་།གལ་ཏེ་ངས་ལས་ཀ་འདི་ངེས་པར་བྱེད་དགོས་ན།ང་རང་ཁོ་ཚོ་དང་མི་འདྲ་བའི་རིགས་དབྱེ་བཞིན་ཡོད་པ་དང་མཚུངས་བས།ངས་རེ་འདུན་ཆུང་ཆུང་འདི་སྙིང་གཏིང་ནས་གསོད་དགོས་བྱུང་།
ང་ཚོ་རི་ངོས་ནས་མར་ལ་འབབ་དུས་ཤིང་འཚུབ་ལ་ལག་སྙོབ་ཀྱིས་བཀར་བའི་ཁུང་གསེང་ཆུང་ཆུང་དེ་བརྒྱུད་དེ་འགྱེལ་ཞོར་དང་འདྲེད་ཞོར་གྱིས་གཞི་ནས་ལ་འདབས་སུ་འབྱོར།ཨ་ཕས་ཁང་པ་ཞིག་ཚིག་ནས་དེའི་རྗེས་ཤུལ་མཚོན་པའི་འདྲ་པར་དང་བདེན་དཔང་ཡི་གེ་འགའ་བཅུག་པའི་པར་སྒྲོམ་གྱི་ཐོག་ཏུ་ལྷུང་བའི་ཤིང་ལོ་འགའ་བསལ་རྗེས།གཟབ་ནན་གྱིས་པར་སྒྲོམ་དེར་ཡུད་ཙམ་བལྟས་ནས་ཡིད་ཚིམ་པའི་འཛུམ་ཆུང་ཞིག་བསྟན་ཏེ་མདུན་དུ་བུད་སོང་།
ང་ཚོ་ལ་འདབས་ནས་གྲོང་དཀྱིལ་དུ་འགྲོ་བཞིན་ཡོད་དུས།སྤོས་དྲི་དང་ཤུག་དྲི་ལྷད་མའི་དྲི་ཞིམ་ཞིག་སྣ་སྒོ་རུ་ཐོན་བྱུང་བས་ངས་མགོ་བོ་དགྱེ་སྟེ་ཁོར་ཡུག་ལ་ཡར་མར་བལྟས་ཚེ།ལམ་ཆེན་དང་ཐག་མི་རིང་བའི་ངོས་གཟར་ཞིག་ན་དགོན་པ་སྙིང་རྗེ་བོ་ཞིག་བརྗིད་རྔམ་གྱིས་འགྱིང་འདུག་པས།ངའི་སེམས་ཀྱི་ཟབ་ས་ཞིག་ནས་རྒྱུས་ཆེ་ཞིང་དྲོ་སྣང་ལྡན་པའི་ཚོར་བ་འཇམ་པོ་ཞིག་འཕྱུར་ནས་ཐོན།
དེ་རིང་གི་གྲོང་ཁྱེར་ནི་ཙག་རླུང་གིས་བཀང་བའི་ཤིང་སྒམ་ཞིག་རེད།གྲུ་ག་གང་ཞིག་ཏུ་བསྐོངས་ཀྱང་གང་སར་ཉུལ་གྱིན་པའི་གྲང་ངར་ལ་གཡོལ་ཐུབ་བྲལ།གྲང་ངར་འདིའི་ཁྲོད་ནས་ཆུང་ཞིང་རིད་པའི་ནུ་མོ་ལ་ལྟ་དུས།ཁོ་མོའི་དམར་སྨུག་ཏུ་གྱུར་བའི་ལག་མགོ་ནི་སྐྲངས་འདུག་ཅིང་།སྣབས་ཀྱིས་ཤན་པའི་སྣ་ཆེན་པོ་དེ་ནི་འཁྱག་སྟེ་ཡོངས་སུ་དམར་པོར་གྱུར་འདུག་པས།ང་ལ་སེམས་ཚོར་སྐྱུར་མོ་ཞིག་འཕྲོར་འཕྲོར་བསླངས་བྱུང་།
ངས་ནུ་མོ་ཟ་ཁང་ཞིག་གི་སྒོ་འགྲམ་དུ་སྐས་ཐེམ་ཆུང་ཆུང་ཞིག་ཡོད་པའི་ཐོག་ཏུ་སྡོད་དུ་བཅུག་སྟེ།ངའི་བལ་གྱིས་བཟོས་པའི་སྐེ་དཀྲིས་དམར་བོ་དེ་ཁོ་མོའི་གདོང་ལ་དཀྲིས་ནས་གནས་དེ་རུ་ཁོ་མོར་ངལ་གསོ་བྱེད་དུ་འཇུག་བསམ་ཡང་།ཁོ་མོ་དེ་མ་ཁད་ཡར་ལངས་ཏེ་ང་ལ་འོ་ཞིག་བསྐྱལ་རྗེས།སྨུག་སྐྲངས་སུ་ཡོད་པའི་མཐེ་བོང་མདུན་དུ་བཏེགས་ནས་སྒོར་མོ་སློང་དུ་བརྒྱུགས་སོང་།ཁོ་མོ་རྒྱུག་གིན་མི་དེ་ལ་འབྱར་ཙམ་དང་ཡང་གཞན་ཞིག་ལ་འབྱར་བའི་རྣམ་པ་དེ་ནི།ཕོ་བྲང་ལ་འདྲ་བའི་ཁང་པའི་ནང་དུ་སྐྱིད་ཉལ་བརྒྱབ་རྗེས་པྲ་ཆལ་གྱི་བྱ་ངན་སྒྲུབ་ཀྱིན་པའི་བྱིས་པ་མང་པོ་དང་བསྡུར་ན་དཔའ་མཛངས་རྟུལ་ཕོད་ཀྱི་དམག་དཔོན་ཞིག་དང་མི་འདྲ་འམ།
ངས་ཀྱང་ནུ་མོ་དང་འདྲ་བར་མཐེ་བོང་གོང་དུ་བསྒྲེངས་ཏེ་ངོ་མི་ཤེས་པའི་ཨ་ཁུ་དང་ཨ་ནེ།ཨ་ཅེ་དངཨ་ཞང་། ཨ་མྱེ་སོགས་ཀྱི་ལག་ནས་སྒོར་ཟུར་བསླངས། ཉིན་ཕྱེད་ཙམ་ཕར་ལ་འདས་རྗེས།ང་ནི་ལས་ཀ་འདི་ལ་དངོས་གནས་བྱང་ཟིན།ངོ་ཚ་དང་འཇིགས་སྐྲག་དོར་ནས།རང་བཀུར་དང་བརྩི་མཐོང་དོར་ནས།ང་རྒྱལ་དང་སྡར་གཤིས་དོར་ནས་བློ་གཅིག་སེམས་གཅིག་གིས་སྒོར་མོ་སློང་ཤེས་སོང་།
ངས་ཕྱིར་འདང་ཞིག་བརྒྱབ་ན།སློང་མོར་སོང་བའི་དོན་དག་འདི་ནི་ངའི་མི་ཚེའི་གྲུབ་ཆ་གཙོ་བོ་ཞིག་ཡིན།གལ་ཏེ་ང་རང་ལས་ཀ་འདི་ལ་ཞུགས་མེད་ན།ངས་རྗེས་ནས་བྱུང་བའི་བར་ཆད་ལ་བརྟེན་ནས་ཚེ་སྲོག་གི་རིན་ཐང་དང་ཕུགས་བསམ་གྱི་སྟོབས་ཤུགས་ཇི་ལྟར་ལས་དབང་གིས་ཁ་ལོ་བསྒྱུར་གྱིན་པའི་གནས་ལུགས་དེ་ནམ་ཡང་རྟོགས་མི་ཐུབ།
དགུན་དུས་རིང་མོ་རིམ་བཞིན་རྫོགས་ལ་ཉེ་ཡང་དར་རྩེ་མདོ་ཡི་རི་ལུང་ལ་གྲག་འགུལ་སྤུ་ཙམ་མེད་པར་ནག་རོག་གེར་གནས།གྲོང་ཁྱེར་འདི་ཕྱོགས་གཉིས་སུ་བཀར་བའི་གཙང་བོ་ཆུང་ཆུང་དེས་ཆབ་རོམ་གྱི་ཆག་གྲུམ་དུ་མ་གྲུ་གཟིངས་བཞིན་གཡོ་སྐྱོམས་ཀྱིས་བསྒུལ་ནས་སྨད་ནས་སྨད་དུ་དྲངས།
གནམ་གཤིས་ལ་འགྱུར་བ་མེད་ཀྱང་།སྡོད་བཟོད་མེད་པའི་དུས་ཚོད་ཀྱིས་ཉིན་མཚན་མང་པོ་མུ་ཏིག་གི་ཕྲེང་བ་སྐུད་པར་བརྒྱུས་པ་ལྟར་སྐད་ཅིག་ཙམ་ལའང་འགྱུར་བ་བསྐྲུན་དུས།ང་ནི་འགྱུར་བག་རྒོད་པོ་འདི་ལ་འཐད་བརྡ་གཏོང་མཁན་གྱི་ཚེ་སྲོག་རྐྱང་པ་དེ་ཡིན་སྲིད་དེ།ངས་ཉལ་འགྲམ་གྱི་བྲག་ངོར་བརྐོས་པའི་རྟགས་ཤད་ཀྱི་གྲངས་ཀ་ཇེ་མང་ནས་ཇེ་མང་དུ་འགྱུར་གྱིན་འདུག་པར་བལྟས་ན།ད་ནི་སློབ་གྲྭ་རུ་འགྲོ་བའི་དུས་ལ་ཐོན་འདུག
དགོང་ཇ་འཐུང་དུས།ཨ་ཕས་ངས་ཟླ་གཉིས་ལ་བསླངས་བའི་སྒོར་མོ་བརྩིས་ཏེ་ང་ལ་བསྔགས་བརྗོད་གནང་བས།ང་རང་ཤིན་ཏུ་དགའ་ནས་ཁོང་དགོད་བྱས་ཤིང་ནུ་མོ་ལ་ང་རྒྱལ་གྱི་མིག་བརྡ་གཏོང་ཞོར།ཨ་མ་ལ་ཀུ་རེས་ལྕེ་སྣར་བྱས།
ཡིན་ནའང་།ང་དགའ་བ་སྔ་དྲགས་སོང་།ཨ་ཕས་གློ་ལུ་ཞིག་བྱས་ཏེ་བཤད་རྒྱུར།ཁྱོད་ནི་བུ་གོ་ཆོད་ཅིག་ཏུ་གྱུར་འདུག ཟླ་གཉིས་ལ་སྒོར་སྟོང་བཞི་ལྷག་སློང་ཐུབ་འདུག ང་དང་ཨ་མ་གཉིས་ཀྱིས་གྲོས་བྱས་རྗེས།ཁྱོད་རང་སློབ་གྲྭ་ནས་འཐེན་རྒྱུ་བྱས་པ་ཡིན།
སྐད་ཆ་དེས་ང་ཧ་ལས་སུ་བཅུག་སོང་།ངས་མྱུར་གྱིས་ངོ་རྒོལ་བྱས་པ་ཡིན།
ངས་ཨ་ཕ་ཁ་དྲོ།ཁ་དྲོ།ཁྱེད་གཉིས་ཀྱིས་སྔུན་ནས་ང་ལ་བཤད་ཡོད་པ་མིན་ནམ།ངས་ཟླ་གཉིས་ལ་སྒོར་སྟོང་གསུམ་སློང་ཐུབ་ན་སློབ་གྲྭ་རུ་མངག་དགོས་པའི་སྐད་ཆ་བཤད་ཡོད་པ་མིན་ནམ་ཞེས་ལབ་པ་ན།
ཨ་མས།ཨ་ཕའི་ཁར་ཉོན།སློབ་གྲྭར་འགྲོ་བ་ལས་སློང་མོར་སོང་ན་དགའ།ཁྱོད་ཀྱིས་ལྟོས་དང་།སྒོར་མོ་འདི་འདྲའི་མང་བོ་ལོན་གྱིན་འདུག་ཅེས་ཟེར།
ང་ཕ་མ་གཉིས་ལ་རྒོལ་བ་བྱ་རྒྱུར་སྐྲག་མོད།ད་ཐེངས་བཤད་མ་ཐུབ་ན་ངའི་ཚེ་གཅིག་ཚར་སོང་བས།འདུག་ས་ནས་ཡར་ལངས་ཏེ།མི་ཐུབ།མི་ཐུབ།རྫུན་རྐྱལ་གཉིས་ཞེས་ཁྲོ་གཏམ་བཤད་ཞོར་སྒོ་ཁ་རུ་འགྲོ་དུས།ངའི་མགོ་བོ་གློ་བུར་དུ་ཚ་བྲེག་གེར་བུད་སོང་། ངས།ཧད།ད་ཚར་ཐལ་སྙམ་ཞོར་ཨ་ཕའི་ལག་ནང་ནས་འབྲོ་རྩིས་བྱས་ཀྱང་།ཨ་ཕའི་ཁུ་ཚུར་སྲ་མོ་དེ་འཚུབ་མ་ཞིག་དང་མཉམ་པོར་ངའི་མགོ་དང་ཁ་ངོ་།ངའི་རྒྱབ་དང་རྐུབ།མདོར་ན།ངའི་ལུས་འདི་གཅར་རྡུང་བྱས་ཏེ་མནར་གཅོད་ཀྱི་དམྱལ་ཁམས་སུ་འཕངས།
སྒོར་མོ་མ་ལྷག་ན་སློབ་གྲྭར་མི་གཏོང་ཟེར།འོན་ཀྱང་།སྒོར་མོ་རྙེད་པ་མང་དྲགས་ན་ཡང་དེ་ལས་སློབ་གྲྭར་མི་གཏོང་བ་འདི་སྐྱོ་བ་ལ། མི་ཆེན་འདི་ཚོར་དབང་ཆ་ཉུང་ཙམ་ཡོད་དུས་རང་གི་བུ་ཕྲུག་ལའང་ཤ་ཚ་ཤེས་ཀྱིན་མི་འདུག
ང་རང་བློ་ཕངས་སོང་།སེམས་པ་སྡུག་སོང་།མཐར་བཤད་ན་འདི་ནི་ང་ཉམ་ཆུང་ཡིན་པས་རེད།
ངས་ཞག་གང་བོར་བསམ་བློ་བཏང་བ་ཡིན། ང་ལ་རོགས་བྱེད་མཁན་སུ་ཡང་མེད་པས་མི་གཞན་ལ་རེ་བ་ནི་མཇུག་འབྲས་མི་འགྱུར་བའི་བྱ་བ་ཞིག་དོན་མེད་དུ་སྒྲུབ་པ་དང་འདྲ། ངས་བློ་ཐག་རྦད་ཆོད་ཀྱིས་རྒོལ་བ་བྱེད་ཆོག་ཀྱང་དེ་ལ་ཐོབ་པའི་འབྲས་བུ་ནི་སྔར་བཞིན་གཅར་རྡུང་དྲག་པོ་ཞིག་ལས་ཅིའང་ཡིན་མི་སྲིད།དེས་ན།གལ་ཏེ་ངས་བློ་ཐབས་སྟབས་བདེ་དང་གོ་ཆོད་ཅིག་མ་རྙེད་ན་ང་ནི་ཕ་མ་གཉིས་དང་འདྲ་བའི་སྤྲང་པོ་ཞིག་ཏུ་ཆགས་ཁོ་ཐག་རེད།
མཚན་གོང་གི་ཟླ་འོད་མག་མོག་ཅིག་སྒོ་སྲུབས་ནས་ག་ལེར་རྐུན་མ་ཞིག་དང་འདྲ་བར་ནང་དུ་འཛུལ་འོང་བས།ལག་པ་ཡང་མཐོང་དཀའ་བའི་མུན་པ་ནས་ཉེ་འཁོར་གྱི་དངོས་པོ་དག་རིམ་བཞིན་རབ་རིབ་ཅིག་མིག་ལམ་དུ་མངོན་འོང་། ངས་ཐབས་ཁའི་ཕར་ཕྱོགས་ན་གཉིད་དུ་ཡུར་བའི་ཕ་མ་གཉིས་ལ་ལྟ་བཞིན་ཁ་ཞེ་གཉིས་མེད་ཀྱིས་ཁོང་ཁྲོ་ལངས། ཁོ་གཉིས་ལ་ང་རང་འདི་རུ་བཀག་དགོས་པ་སུ་ཡིས་དབང་ཆ་སྤྲོད་པ་རེད། ལྷག་པར་དུ་ཨ་མའི་མགོ་སྐྲ་འཛིང་བོ་དེ་མལ་ཆས་དང་མགོ་སྔས་བར་ནས་མངོན་དུས།ངས་ཨ་ཕས་ཁོ་མོ་གཅར་དུས་སྨྲས་ངག་བཏོན་ནས་བར་དུ་མཆོངས་བའི་དོན་དེ་ཚོར་ཞེ་འགྱོད་བྱས།བརྡུང་ན་བརྡུང་། ང་ཨ་ཕས་གསོད་གྲབས་བྱས་ཏེ་གཅར་དུས་ཁོ་མོས་ཚིག་གཅིག་ཀྱང་མི་ལབ་པར་ཇ་འཐུང་བཞིན་རང་སར་ལྷོད་བག་གིས་སྡོད།
ངས་ཧ་ལམ་མཚན་མོ་འདིའི་ནམ་སྟོད་ཧྲིལ་བོ་སྤྱད་དེ་ད་གཟོད་བློ་ཐབས་ཡག་པོ་ཞིག་རྙེད་བྱུང་།
ཞོགས་ཇ་བཏུང་རྗེས་ང་ཚོ་ཡང་བསྐྱར་གཟར་ངོས་དེ་ནས་གྲོང་དུ་བབ།དང་ཐོག་ཤིང་འཚུབ་དང་ཁུག་འབུར་གྱིས་ཟིན་པའི་གཟར་ངོས་དེ་རུ་ད་ལྟ་ཀྱ་ཀྱུའི་ལམ་ཕྲན་སྐྱ་བོ་ཞིག་གསལ་ལེར་ཆགས་འདུག རང་གིས་རང་ལ་སྲུང་སྐྱོབ་ཅིག་མ་ནུས་ན་རང་བྱུང་ཁམས་ཀྱང་མིའི་སྔུན་ནས་གཉོམ་ཆུང་རེད།
ཟམ་ཁ་ནས་ཕར་བལྟས་ན།ཕ་མ་གཉིས་ང་དང་གོམ་པ་བཅུ་ཙམ་གྱི་བར་ཐག་ཏུ་སླེབས་དུས།ངས་ངུ་སྐད་བརྒྱབ་ཅིང་སྨྱོས་པ་ལྟར་ཟམ་པའི་སྒྲོམ་སྐྱོར་ལ་འབྱར་ནས་ཆུ་ནང་ལ་ལྡིང་གྲབས་བྱས་པས།ཕ་མ་གཉིས་ཧོར་འཐོར་ནས་རེ་ཞིག་རང་ས་རུ་ཧད་ནས་འདུག སྐབས་དེར་ལམ་འགྲམ་ནས་ཕྱིན་གྱིན་པའི་མི་ཚོགས་ཕྱོགས་གཅིག་ཏུ་འདུས་ཏེ། ཞི་ལི་ལོ་ལོ།དེ་འདྲ་མ་བྱེད།ག་ལེ་མར་བོབ་ཅེས་དང་།གཅེས་ཕྲུག ཁྱོད་ལ་ཅི་ཞིག་བྱུང་བ་རེད།དེ་འདྲ་གཏན་ནས་བྱེད་མི་རུང་ཞེས་སོགས་བཤད་དེ་ང་ལ་སེམས་གསོ་བྱེད་མོད།ཕ་མ་གཉིས་ཀྱིས་ངས་ཅིའི་ཕྱིར་འདི་ལྟར་བྱེད་དགོས་དོན་རྩ་བ་ནས་གོ་བས།ཕ་རྒན་གྱི་མིག་ནང་ནས་མེ་ལྕེ་ཞིག་ཀྱང་མཆེད་ཨེ་སོང་སྙམ་ཞོར་མྱུར་གྱིས་མི་ཚོགས་བརྟོལ་ཞིང་ང་ལ་དམོད་དོར་གྱིན་ཤེད་ཀྱིས་བརྒྱུགས་བྱུང་།
ཨ་ཕ་ནི་ཁྲོ་བོ་ཞིག་དང་འདྲ་ལ་གཅན་གཟན་ཞིག་ཀྱང་དེ་ལས་འདྲ་བོ་འདུག ཁོས་ང་གསོན་ལོག་ལོག་ཏུ་འཁྱུར་མུད་གཏོང་འགྲོ་བའི་རྣམ་པ་དེས་ང་རང་དངོས་གནས་སྐྲག་སོང་བས།ང་ལ་རང་དབང་མ་བྱུང་བར་མྱུར་གྱིས་སྒྲོམ་སྐྱོར་ནས་ཕྱིར་ནུད་ཅིག་བྱེད་དུས། ཨ་ཙི།ཚར་ཐལ།ང་སྒྲོམ་སྐྱོར་ནས་འདྲེད་དེ་ཐུར་དུ་ལྷུང་སོང་། ཨ་དཀོན་མཆོག་གསུམ་མཁྱེན།ང་ཤི་རན་པ་ཡིན་ནམ།ངའི་ལས་འདི་ཅི་འདྲའི་བཙོག་པ་ལ་ཨང་།ང་འདི་ལྟར་ཤི་དགོས་བྱུང་བ་ཡིན་ནམ། བླ་མས་མཁྱེན།བླ་མས་མཁྱེན།
ང་རང་མར་ལ་ལྷུང་བའི་སྐར་ཆ་འགའི་རིང་དུ་འབྲེལ་ཡོད་དང་འབྲེལ་མེད་ཀྱི་དྲན་པ་མང་པོ་ཞིག་ཀླད་པ་ནས་ཐོན།འདི་རྨི་ལམ་ཡིན་ནམ། ངས་ཇི་ལྟར་བྱས་ན་ཤི་མི་སྲིད།རེད། ངས་ཅི་ཞིག་བྱེད་དགོས། དཀོན་མཆོག་མཁྱེན། ང་རང་སྐྱོབ་རོགས།གུ་རུ་རིན་པོ་ཆེས་མཁྱེན།སངས་རྒྱས་མཁྱེན།
ང་ཟམ་ཁ་ནས་ཐད་ཀར་ཆུ་ནང་དུ་སྙོག་སེ་ལྷུང་སོང་། ལུས་པོ་ཡོངས་སྦྲུད་ཤུར་ཤུར་སོང་བ་དང་མཉམ་དུ་དབུགས་འཚང་ཞིང་། རྣ་ལམ་དུ་སྙོག་སྙོག་ཅེས་པའི་སྒྲ་ངན་ཞིག་ཐོན།ངའི་ཡོད་ཚད་འཇིགས་སྐྲག་གིས་གང་།ངས་ཅི་ནུས་ཀྱིས་དབུགས་ཤིག་གཏོང་དགོས་བསམས་ནས་མགོ་བོ་ཆུ་ཁ་རུ་བུད་མ་ཐག་དབུགས་ཉུང་ཙམ་བཏང་ནས་རྔུབ་པར་རྩོམ་དུས།ཆུ་རླབས་ཤིག་གིས་ང་རང་སྐད་ཅིག་ཙམ་ལ་ཆུ་ནང་དུ་དྲངས་སོང་བས།ཁ་སྣ་གཉིས་ཀྱི་ནང་དུ་ཆུ་འཛུལ་ནས་དབུགས་གཏོང་ལེན་ཕར་ཞོག མྱུར་གྱིས་ཤི་འགྲོ་བའི་སྡུག་བསྔལ་དང་ན་ཟུག་ཐོན་ཞིང་ཆུ་ནང་ནས་ལག་པ་གཉིས་གནམ་ལ་བཀྱགས་ཏེ་འབྱར་ས་རེ་ཨེ་རྙེད་བལྟས་ཀྱང་།ང་རང་རིམ་བཞིན་ཚོར་བ་མེད་པའི་མུན་ནག་ཅིག་ཏུ་ལྷུང་ནས་ཡོད་ཚད་འགག
དུས་ཚོད་ག་ཙམ་འདས་སོང་བ་ཤེས་ཐབས་བྲལ།ང་གློ་བུར་དུ་ཟམ་ཁ་ཞིག་ན་རྒྱུ་བཞིན་རྩེ།ཉི་མའི་འོད་ཟེར་ལས་ཚ་གདུག་འཕྲོས་ཤིང་རྒྱུན་དུ་མི་ལུས་གཞོམ་པའི་ཙག་རླུང་དེ་མི་གཟུགས་ཤིག་ཏུ་གྱུར་ནས་རྒྱང་རིང་གི་རི་རྩེ་ཞིག་ཏུ་ཡལ།ང་རྩེ་ཞོར་དགོད་ཞོར་ཟམ་ཁ་ནས་ཕར་ཚུར་བརྒྱུགས།
ང་རང་བག་ལྷོད་ངང་ཟམ་ཁ་ན་སྡོད་དུས།གློ་བུར་དུ་མིག་ནང་ནས་མེ་ལྕེ་མཆེད་ཅིང་མགོ་སྐྲ་འཕྱིང་ལ།ལུས་སྟོབས་རྒྱས་པའི་འདྲེ་རྒོད་པོ་ཞིག་ཟམ་གྱི་ཕར་ཕྱོགས་ནས་མཆོངས་ཐེངས་གཅིག་གིས་ངའི་སར་ཐོན་ཏེ།རིང་ཞིང་ཁྲག་གིས་སྦག་པའི་མཆེ་བ་གཙིག་ཞོར་ལྕགས་དང་འདྲ་བའི་སྡེར་མོ་རྣོན་པོ་དེས་ངའི་ཕྱི་ནང་མེད་པ་བརྟོལ། དེ་ནས་དགོད་ཞོར་དུ་ང་རང་མཐོ་སར་བཀྱགས་ཏེ་ཟམ་ཁ་ནས་མར་ལ་གཡུགས།
ང་སྐྲག་སྟེ་སྐད་ངན་འབྱིན་ཞོར་ཤེད་ཀྱིས་གྱེན་དུ་ལངས་འདོད་ཅིག་སྐྱས་ཏེ་ཧུར་ཐག་བྱེད་དུས། མལ་ཁྲི་ལས་མགོ་བོ་བསྒྲེངས་ཏེ་སྨྲས་སྔགས་འདོན་གྱིན་པ་ཚོར།ངས་བློང་བློང་པོར་གྱུར་བའི་རིག་པ་ལ་དོ་དམ་བྱས་ཏེ་ཡར་མར་ལྟ་དུས།ང་རང་མལ་ཁྲི་ཞིག་ཏུ་ཉལ་འདུག ཉལ་ཁྲིའི་གཡས་འགྲམ་ན་ཨ་མས་ང་བསྐྱོར་ནས་ངུ་བཞིན་ཡོད་ཅིང་གཡོན་ཕྱོགས་ན་ཨ་ཕས་ནུ་མོ་པང་དུ་བཟུང་སྟེ་ཤ་ཚ་བའི་མིག་མདངས་ཤིག་ཐོགས་ཏེ་ང་ལ་ཅེར་འདུག
ང་ཤི་མི་འདུག ང་རང་བརྒྱལ་བ་ལས་སད་དུས་ཤི་མི་འདུག་ཅེས་པའི་དོན་དག་འདི་ནི་བྱིས་པ་པྲ་ཆལ་ཞིག་དང་འདྲ་བར་ལུས་པོའི་གནས་སོ་སོར་འཐམས་ནས་དགོད་ཁ་སློང་། ང་རང་གསོན་ཐུབ་བྱུང་བ་ནི་དགའ་འོས་པ་ཞིག་རེད།ཡིན་ནའང་། ངའི་རྣམ་རིག་དལ་བོར་སངས་ཤིང་ཨ་ཕའི་ནག་རོག་གི་གདོང་དེ་མཐོང་འོང་དུས།ང་ཡང་བསྐྱར་སེམས་ཁུར་གྱི་ནང་དུ་ལྷུང་དགོས་བྱུང་།
འོན་ཀྱང་།ད་ཐེངས་ངས་སེམས་ཁུར་བྱས་པ་དེ་དོན་མེད་ཅིག་ཡིན་པ་འདྲ་སྟེ།ཕ་མ་གཉིས་ཀྱིས་ང་རང་སད་མ་ཐག་ནས་སློབ་གྲྭར་འགྲོ་བའི་སྐོར་དང་།ལྭ་བ་གསར་བ་ཉོ་བའི་སྐོར།བུ་རམ་ཞིམ་པོ་ཉོ་བའི་སྐོར་ཏག་ཏག་གླེང་ནས་ང་རང་དགའ་ཅི་ཐུབ་བྱེད།
ཉིན་འདི་ཚོར་ང་རང་སྨན་ཁང་དུ་སྐྱིད་ཆེ་ནས་ད་ལྟ་ཕྱི་རུའང་འབུད་བསམ་གྱིན་མི་འདུག ཟ་ཐེངས་མང་པོར་གྲོང་ནས་ཉོས་པའི་ཤ་ཚོད་བཟས་ཤིང་རྒྱ་ཐུག་འཐུང་། བལ་ལྟར་འཇམ་པའི་མལ་ས་རུ་ཅི་འདོད་འདོད་ཅིག་ཉལ། ཕ་མ་གཉིས་ཀྱི་གདོང་ལའང་བྱམས་བརྩེ་ཡི་འོད་ཟེར་རྒྱས་ཏེ་ང་དང་ནུ་མོ་གཉིས་ལ་ཚིག་རྩུབ་གཅིག་ཀྱང་སྨྲས་མ་བྱུང་།ངས་སྨན་ཁང་གི་སྒོ་ཆེན་ནས་འདི་ལྟར་བསམ་བློ་གཏོང་ཞོར་ཕྱི་རུ་སོང་།
མདུན་དུ་མལ་གོས་ལྟེབ་མ་རྒྱབ་ཏུ་ཁུར་ནས་འགྲོ་བཞིན་པའི་ཨ་ཕ་ལ་བལྟས་ཚེ།ངའི་སེམས་སུ་བརྗོད་མི་ཤེས་པའི་ཚོར་བ་ཞིག་འཕྱུར་ནས་མིག་ཆུ་ཤོར། དོན་ངོ་མར།།བུ་ཕྲུག་ལ་དུང་བ་མེད་མཁན་གྱི་ཕ་མ་ཞིག་གང་དུ་ཡོད།
ང་རང་སྨན་ཁང་ན་ཡོད་དུས།ཐེངས་ཤིག ཨ་ཕ་གྲོང་དུ་ཟ་མ་ཉོ་རུ་སོང་བའི་གོ་སྐབས་དང་བསྟུན་ནས་ཨ་མས་ང་ལ་ཉིན་དེའི་གནས་ཚུལ་གླེང་བྱུང་། ཉིན་དེར་ང་རང་ཆུ་ནང་དུ་ལྷུང་མ་ཁད།ཨ་ཕ་ཡང་ངའི་རྒྱབ་ཏུ་ཆུ་ནང་ལ་མཆོངས་ཏེ་སྨྱོས་པ་ལྟར་ང་ལ་ལག་སྙོབ་བྱས་ཤིང་སྐད་ཅོར་བརྒྱབ།ཆབ་རོམ་གྱིས་གང་བའི་ཆུ་བོས་ང་དང་ཨ་ཕ་གཉིས་མཉམ་དུ་ཁྱེར།ཨ་མས་ནུ་མོ་པང་ནས་ངུ་ངག་རྒྱག་ཞོར་ཆུ་མཐའ་ནས་མར་བརྒྱུགས། ཧ་ལམ་ཟམ་གྱི་འོག་ནས་བུད་དེ་ཅུང་ཙམ་འགོར་དུས་ཨ་ཕས་བེམ་པོ་ལྟ་བུར་གྱུར་ཟིན་པའི་ང་རང་གཞི་ནས་ཟིན། དེ་ལྟར་ཨ་ཕས་ང་རང་བྲང་གཞུང་དུ་བཀྱགས་ཏེ་རིམ་བཞིན་རིམ་བཞིན་ཆུ་མཐའ་ལ་འབུད་ཐུབ་བྱུང་།
ང་རང་སྨན་ཁང་དུ་འཁྱེར་དུས།ཕྱི་ནས་བལྟས་ན་ཤི་ཚར་བ་དང་ཧ་ཅང་འདྲ།མཆུ་འདབས་སྔོན་པོར་གྱུར་ཅིང་དབུགས་ཀྱི་རྒྱུ་བའང་འགག་ཟིན་པས།གཏན་ནས་མིག་ཆུ་འཐོར་མ་མྱོང་བའི་ཨ་ཕ་ངུས་ཤིང་སྨན་ཁང་གི་བར་ཁྱམས་ནས་ཕྱག་འཚལ་བ་དང་གསོལ་འདེབས་བྱེད།
ཨ་མས་དེ་ལྟར་བཤད་དུས།ངས་རང་གི་བྱ་སྤྱོད་ལ་ལྐོག་ནས་ལས་བདའ་བྱས།དྲང་མོར་བཤད་ན།ང་ཆུ་ནང་དུ་མཆོངས་འདོད་གཏན་ནས་མེད།ངས་བསམ་པ་ནི་ཕ་མ་གཉིས་ལ་སྐྲག་བསླངས་ཏེ་ང་རང་སློབ་གྲྭ་རུ་སྐྱེལ་དགོས་པའི་གོ་བརྡ་སྟོན་ཁུལ་ཡིན་མོད།མ་བསམ་ས་ནས་ཆུ་ནང་དུ་ལྷུང་སྟེ་ཕ་མ་གཉིས་ཀྱི་སྙིང་འགད་ལ་ཁད་དང་རང་གི་སྲོག་ཀྱང་ཤོར་ལ་ཁད་ཀྱི་དོན་དེ་བྱུང་བ་རེད།
ཡང་ད་ལྟ་བསམ་བློ་རེ་བཏང་ན།ངས་ཉིན་དེར་བསྒྲུབས་པའི་བྱ་བ་དེ་ངེད་ཚང་ལ་མཚོན་ན་ལོ་རྒྱུས་ཀྱི་དཀྱོག་མཚམས་ཤིག་རེད། གལ་ཏེ་ཉིན་དེར་ངས་བྱ་བ་དེ་བསྒྲུབ་མེད་ན།ཕ་མ་གཉིས་ཀྱིས་སྤྲང་པོའི་ལས་ཀ་དེ་འདོར་མི་སྲིད་ལ་ང་ཡང་སློབ་གྲྭ་རུ་འགྲོ་མི་ཐུབ།དེ་ལས་གལ་ཆེན་ཞིག་ཡོད་པ་ནི།ངའི་སྙིང་ཉེ་བའི་ནུ་མོ་སློབ་གྲྭར་བསྐྱོད་རྗེས།བུད་མེད་ཀྱི་འཕྲོད་བསྟེན་གླེང་བའི་ཚོགས་པ་མང་པོར་ཞུགས་ཏེ་མི་རིགས་ལ་ཞབས་ཞུའི་ཚུལ་དུ་བཙུགས་པའི༼ཨ་མའི་རྒྱུན་ཤེས༽ཞེས་པའི་ཞབས་ཞུ་ལྟེ་གནས་འདི་འདྲ་རྩ་བ་ནས་འབྱུང་མི་སྲིད།
གང་ལྟར།མི་ཞིག་གི་མདུན་ལམ་ནི་བར་ཆད་མང་པོའི་འགག་སྒོ་ནས་རྒྱང་དུ་རྐྱོང་འདུག་པ་དོན་དངོས་རེད།
ང་ཚོ་སྨན་ཁང་ནས་བུད་པའི་ཕྱིར་ཉིན་ཕ་ཡུལ་དུ་སོང་བ་ཡིན།ངས་རླངས་འཁོར་གྱི་སྒེའུ་ཤེལ་མར་བསྣུད་དེ་ཕྱི་རོལ་གྱི་རྒྱབ་ནས་རྒྱབ་ཏུ་བསྐྱུར་བའི་གྲོང་ཁྱེར་འདིའི་ཁང་བརྩེགས་དང་མི་རྣམས་ལ་ལྟ་བཞིན་སེམས་སུ་སྤྲོ་བས་ཁེངས་བྱུང་།ང་རང་གྲོང་ཁྱེར་འདིར་འབྱོར་དོན་ནི་སློང་མོའི་ཆེད་དུ་ཡིན་མོད།དེ་རིང་གྲོང་ཁྱེར་འདི་ནས་ཆས་དོན་ནི་སློབ་སྦྱོང་གི་ཆེད་དུ་ཡིན་ལ།མི་ཚེ་ཡི་དོན་དུ་དེ་བས་ཀྱང་ཡིན།
རྒྱུ་ལ་ཕྲ་མོ་ཞེས་པའི་རི་བོ་དེ་ནི་གླིང་སྒྲུང་ནང་གི་སྤྱི་དཔོན་དང་འདྲ་བར།རི་རྩེ་དང་རི་སྐེད་སྨུག་པས་བཟུང་ཞིང་།རུ་འདབས་ནས་གྱེན་དུ་བལྟས་ན་མགོ་སྐྲ་དཀར་བོ་དང་འདྲ་ལ།རི་རྩེ་ནས་ལ་སྐེད་དུ་བལྟས་ན་ཁ་སྤུ་རིང་པོ་ཞིག་ཐུར་དུ་རྐྱོང་འདུག་པ་དང་ཤིན་ཏུ་འདྲ།ང་ཚོ་རླངས་འཁོར་ལ་བསྡད་དེ་ཨ་མྱེ་སྤྱི་དཔོན་གྱི་ཨོག་ཚོམ་ནས་དལ་བུར་བགྲོད་ཅིང་རིམ་བཞིན་སྐྲ་གསེང་ནས་ཆས་ཏེ་ཕ་ཡུལ་གྱི་རི་ལུང་ཕྱོགས་སུ་བསྐྱོད་པ་ཡིན།
ལོ་རིམ་དྲུག་པའི་སློབ་མ་ཆེ་བོ་འགའ་སློབ་གྲྭའི་སྒོ་རྩར་བསྡད་དེ་བྱིས་པ་ཚོའི་ལག་ནང་ནས་སྲུང་སྐྱོབ་ཀྱི་གླ་ཆ་ཡིན་ཟེར་བའི་སྒོར་མོ་གཅིག་གཉིས་རེ་ལེན་གྱིན་འདུག ང་དང་སློབ་གྲོགས་འགའ་ཕར་འགྲོ་ཞོར་ཁོ་ཚོར་ཕུད་རྒྱག་ཅིག་བྱས་ཏེ་སློབ་གྲྭའི་སྒོ་ནང་དུ་འཛུལ་བ་ན།ཁོ་ཚོའི་ཁྲོད་ཀྱི་ཚོ་སྟུག་ངའི་མདུན་དུ་ཐོན་ནས་ཁུ་ཚུར་ཅིག་ངའི་འགྲམ་རྩར་གཏད་དེ་གཡུགས་སོང་།ངས་དེ་མ་ཁད་ཁོའི་ལག་པ་དམ་པོར་བཟུང་ཞིང་རྐང་པས་གཅིན་གཏོང་སར་ཤེད་ཀྱིས་ཐེངས་གཅིག་བརྒྱབ་པ་ན།ཁོ་ནི་ཕག་ཅིག་དང་འདྲ་བར་སྐད་ངན་ཞིག་ཤོར་ནས་ཐང་དུ་འགྱེལ་སོང་།
ཚོ་སྟུག་ངེད་གཉིས་ནི་སློབ་གྲོགས་ཀྱང་ཡིན་ལ་དགྲ་ཟླ་ཡང་ཡིན།ཁོ་ནི་གཟུགས་ཐུང་ཞིང་ཤ་ཤིན་ཏུ་རྒྱག་པའི་བྱིས་པ་ཞིག་ཡིན་པས།ང་ཚོས་དུས་རྒྱུན་ཁོ་ལ་དྲོའུ་པ་ཅེ་༼猪八戒༽ཞེས་མཚང་མིང་ནས་འབོད། ཁོ་བྱིས་པ་བསམ་ནག་ཅིག་ཡིན་པས་གོ་སྐབས་ཅུང་ཙམ་རྙེད་དུས་ང་དང་འཛིང་རེས་བྱེད་ཅིང་། ཁོ་ལས་ཆུང་བའི་སློབ་མ་དག་ལ་དམན་སྡང་བྱེད།
དེ་རིང་སློབ་གྲྭ་ཚོགས་མགོ་བརྩམས་སོང་།ང་ཚོ་འཛིན་གྲྭའི་སློབ་མ་མང་པོ་ཞིག་སློང་དུ་སོང་ནས་ཕྱིར་ཐོན་མི་འདུག དོན་དག་དེ་ནི་རྒྱུན་ལྡན་ཞིག་ཡིན། ང་ཚོ་ལོ་རིམ་དང་པོ་ཡིན་དུས་སློབ་མ་ཉི་ཤུ་ལྷག་ཡོད་མོད། སློབ་སྐབས་རེ་ཕྱིན་དུས་གཅིག་གཉིས་རེ་ཉུང་དུ་འགྲོ་བས་ད་ལྟ་མཐར་ཕྱིན་ལ་ཉེ་དུས་འཛིན་གྲྭའི་ནང་དུ་སློབ་མ་ལྔ་ལས་ལྷག་མེད། ང་ཚོ་སློབ་མ་ལྔ་བོའི་གྲས་ནས་ཀྱང་སློབ་མཐར་ཕྱིན་རྗེས་ག་ཚོད་ཅིག་སློབ་གྲྭར་བསྐྱོད་སྲིད་པ་ནི་གབ་ཚིག་ཅིག་རེད།
ཚོགས་དྲིལ་གྲག་སོང་། ང་ཚོ་རང་གི་འདུག་སྟེགས་སུ་བསྡད་དེ་བོད་ཡིག་དགེ་རྒན་ཡོང་བར་བསྒུགས། གཅིག་བྱས་ན་རང་སྐད་ཡིན་པས་ཡིན་སྲིད་ལ།ཡང་གཅིག་བྱས་ན།ང་ཚོ་ལ་རླབས་ཆེན་གྱི་བོད་ཡིག་དགེ་རྒན་ཞིག་ཡོད་པས་ཡིན་སྲིད་དེ།ང་ཚོའི་ཕ་ཡུལ་གྱི་སློབ་མ་རྣམས་རྒྱ་ཡིག་དང་རྩིས་རིག་ལ་ཞན་ཡང་། བོད་ཡིག་གི་རྨང་གཞི་ཤིན་ཏུ་བཟང་། ཁོང་ནི་རྒྱ་གར་གྱི་༼གོ་ལའི་སྟེང་གི་སྐར་མ་༽ཞེས་པའི་གློག་བརྙན་ནང་གི་དགེ་རྒན་ནིས་ཁི་དང་ཤིན་ཏུ་མཚུངས་ཏེ།ངས་ཁོང་གིས་སློབ་མ་གཅིག་ཀྱང་རྒྱབ་ཏུ་དོར་བ་མཐོང་མ་མྱོང་།
ང་ཚོའི་བོད་ཡིག་དགེ་རྒན་གྱི་གཟུགས་རིང་ཞིང་ཤ་སྐམ་པོ་ཡོད། ཡིན་ནའང་།དེ་རིང་དགེ་རྒན་གཞན་ཞིག་ཐོན་ནས་ང་ཚོར་བོད་ཡིག་ཁྲིད་འགོ་བརྩམས།ང་ཚོ་མགོ་ཐོམ་དུ་བཅུག་སོང་། ངས་ལག་པ་བཀྱགས་ནས་ང་ཚོའི་དགེ་རྒན་གང་དུ་སོང་བ་རེད་དྲིས་མོད།དགེ་རྒན་གསར་བ་དེས་ཅིའང་མ་ཐོས་ཁུལ་གྱིས་མུ་མཐུད་དུ་སློབ་ཁྲིད་བྱས།
སློབ་གྲྭ་ནས་བོད་ཡིག་དགེ་རྒན་མཐོང་མི་ཐུབ་པ་ནི་ང་ལ་མཚོན་ན་སྡུག་བསྔལ་ཞིག་རེད། ཁོས་ལོ་རིམ་དང་པོ་ནས་ང་ལ་བོད་ཡིག་བསླབས་ཤིང་ལམ་སྟོན་མཛད།ང་རང་ཁྲིད་དེབ་ལས་གཞན་གླིང་སྒྲུང་དང་བྱིས་སྒྲུང་།འདྲེ་སྒྲུང་སོགས་ལ་དགའ་དོན་ཡང་དགེ་རྒན་ཁོང་གིས་ལམ་སྟོན་བྱས་པས་ཡིན།ཁོང་གིས་བཤད་རྒྱུར།ཁང་པ་གཅིག་གི་ནང་དུ་ཡོད་པའི་ཅ་ལག་ལ་ཚད་ཡོད་ཅིང་། དེ་ཕོ་བྲང་ཞིག་གི་ནང་དུ་ཡོད་པའི་ཅ་ལག་དང་བསྡུར་ན་གཏན་ནས་མི་འདྲ།ཁྱོད་ཚོ་ངེས་པར་དུ་ཁང་པ་ལས་ཕོ་བྲང་དུ་བསྐྱོད་ཤེས་དགོས་ཤིང་ཕོ་བྲང་ལས་ཕྱི་རོལ་དུ་བསྐྱོད་ཐུབ་དགོས་ཞེས་སློབ་སྟོན་གནང་། དེ་རིང་ངས་དངོས་གནས་ཁོ་རང་དྲན་གྱིན་འདུག
ང་རང་དྲིལ་བརྡ་དང་མཉམ་པོར་སློབ་ཁང་དུ་འཛུལ་གྱིན་ཡོད་དུས།ཚོ་སྟུག་བརྒྱུགས་ཡོང་ནས་ཨ་རོགས། ཁྱོད་ཀྱིས་ཨེ་གོ། སློབ་གཙོས་མགོ་ཁྲིད་ཚོ་ལ་བསམ་འཆར་བརྒྱབ་སྟེ་བོད་ཡིག་དགེ་རྒན་ཕུད་པ་རེད་ཟེར་གྱིན་འདུག་ཅེས་ལབ་བྱུང་།ང་ཧ་ལས་ཏེ་ཅིའི་ཕྱིར་རེད་ཅེས་དྲིས་པ་ཡིན།ཁོས་བཤད་པ་བདེན་ན།བོད་ཡིག་དགེ་རྒན་གྱིས་སློབ་གཙོ་ལ་གཅར་རྡུང་བྱས་པས་རེད་ཟེར་ཞེས་ལབ་བྱུང་།ངས་ཡང་བསྐྱར་བོད་ཡིག་དགེ་རྒན་གྱིས་ཅིའི་ཕྱིར་སློབ་གཙོ་གཅར་དགོས་པ་རེད་དྲིས་པས།ཁོས་དེ་ངས་ག་ལ་ཤེས་ཞེས་བཤད་དེ་སློབ་ཁང་དུ་འཛུལ་སོང་།
སློབ་གྲྭ་གྲོལ་སོང་།ངས་དཔེ་ཁུག་ཁུར་ནས་རྐྱང་བོར་ཁྱིམ་དུ་འགྲོ་དུས།ལམ་འགྲམ་དུ་ཉི་མར་ལྡེ་བའི་རྒན་པོ་ཞིག་གིས་དགོད་ཞོར་དུ། ཁོ་རེ། ཁྱོད་ཚོའི་དགེ་རྒན་ངན་པ་དེ་བརྗེས་སོང་ཟིག་ཟེར་གྱིན་འདུག་པས་བདེན་པ་ཨེ་རེད་ཅེས་དྲིས་བྱུང་།ངས་ཁོང་གིས་བཤད་པའི་དགེ་རྒན་ངན་པ་དེ་སུ་ལ་ཟེར་བ་གོ་བས་སེམས་སུ་ཙག་ཤད་ཅིག་བརྒྱུགས་བྱུང་།ང་ཁོང་ཁྲོ་ལངས་ནས་རྒན་པོ་དེར་ལྟ་ཞོར། བརྗེས་སོང་ན་ཅི་རེད།མ་བརྗེས་ནའང་ཅི་རེད།ཁྱོད་ལ་འབྲེལ་བ་ཡོད་དམ།རྒན་པོ་ཁ་མ་མང་ཨྰ་ཞེས་བཤད་ནས་གནས་དེ་དང་བྲལ་བ་ཡིན།ང་སོང་ཤུལ་ན་རྒན་པོ་དེས་སྤྲང་ཕྲུག་ཅིག་ཅིག་ཅེས་ལབ་ཀྱིན་འདུག་མོད་ངས་མཉམ་མ་བཞག་སྟེ་སོང་།
མདུན་དུ་འགྲོ་ཞོར་ངས་བོད་ཡིག་དགེ་རྒན་བརྗེ་དགོས་པའི་རྒྱུ་མཚན་ལ་བསམ་བློ་བཏང་བ་ཡིན།དོན་ངོ་མས་བཤད་ན།ངས་སྐད་ཆ་དེ་གོ་བ་ནས་རྒྱུ་མཚན་ཅི་ཡིན་གསལ་བོར་རྟོགས་མོད།རེ་ཞིག་ལ་ཁས་ལེན་བྱེད་མི་འདོད་པ་ཙམ་རེད།ངའི་རེ་བ་ནི་བོད་ཡིག་དགེ་རྒན་འགྲོ་མི་དགོས་པ་དེ་ཡིན་མོད།ངའི་སྙིང་དང་འདྲ་བའི་བོད་ཡིག་དགེ་རྒན་ཁོང་ལ་གྱེས་ཕྱག་ཀྱང་འབུལ་བའི་གོ་སྐབས་མ་བྱུང་བར་བྲལ་དགོས་ཐུག
འོན་ཀྱང་།ལས་དབང་ཟེར་བ་དེ་བཟི་རྐྱལ་ཞིག་དང་འདྲ་སྟེ།བཟི་སོང་དུས་ཉག་ཉོག་མི་འགྲིག་པ་བརྒྱ་བསྒྲུབས་ལ།བཟི་ལས་དྭངས་དུས་དོན་བཟང་བཟང་ཐམས་ཅད་མཉམ་དུ་སྒྲིག་འཇོག རྗེས་ནས་ང་རང་སྲོང་བཙན་བོད་ཡིག་སློབ་གྲྭ་རུ་བསྐྱོད་དུས་ངའི་སྙིང་ཉེ་བའི་བོད་ཡིག་དགེ་རྒན་དེ་རུ་བཞུགས།ཁོ་རང་སློབ་གྲྭ་དེར་དགེ་སློབ་ཀུན་གྱིས་བརྩི་བའི་བཤེས་གཉེན་ཆེན་པོ་ཞིག་ཏུ་གྱུར་འདུག་ཅིང་།སྔོན་ཆད་དང་བསྡུར་ན་ཤ་ཡང་རྒྱགས་པ་ཆགས་འདུག
སྡེ་བ་འདིས་དགེ་རྒན་བཟང་བོ་དག་ནམ་ཡང་འདི་ལྟར་ཕུད་ཀྱིན་ཡོད།ཁོ་ཚོས་སློབ་མའི་མི་ཚེ་ལ་བློ་དཀར་བའི་དགེ་རྒན་རྣམ་པར་ཁ་མང་དང་དད་ལོག་པའི་མིང་ངན་བཏགས་ཏེ་ཟུར་དུ་ཕུད་ཀྱིན་ཡོད།ཁོ་ཚོར་མཚོན་ན།སློང་དུ་འགྲོ་བ་ནི་སྲོལ་རྒྱུན་ཡིན་ལ།སྲོལ་རྒྱུན་ནི་ཆོས་ལུགས་ཡིན་པས་དེ་ལ་མི་འགྲིག་པར་བཤད་ནི་ཆོས་ལུགས་ལ་དད་པ་མེད་པའི་རྟགས་སུ་བརྩི།
ཡུལ་ལུང་འདིའི་མི་རྣམས་ལ་ཅི་ཞིག་བྱུང་ཟིན་པ་སུ་ཡིས་ཤེས།ཚང་མའི་དམིགས་ཡུལ་ནི་སྒེར་གྱི་དམིགས་ཡུལ་ཡིན་དགོས་ལ།སྒེར་གྱི་དམིགས་ཡུལ་ནི་མགོ་གཡོག་མགོ་སྐོར་འོག་ནས་བསྒྲུབ་ན་ད་གཟོད་དཔའ་བོར་བརྩི།
ང་རང་ཁྱིམ་དུ་ཐོན་མ་ཁད་ངུས་པ་ཡིན།ཕ་མ་གཉིས་ཀྱིས་ང་གློ་བུར་དུ་ངུས་པའི་རྒྱུ་མཚན་མ་ཤེས་ཤིང་མྱུར་གྱིས་ཚུར་བརྒྱུགས་ནས་ཅི་ཞིག་བྱུང་བ་རེད་ཅེས་དྲིས་བྱུང་།ངས་འགྲམ་པ་ནས་ཐུར་དུ་ཆུ་རྡོག་བཞིན་འགྲིལ་གྱིན་པའི་མིག་ཆུ་དག་ཕྱི་ཞོར།ང་ཚོའི་བོད་ཡིག་དགེ་རྒན་ས་གནས་གཞན་པར་བརྗེས་སོང་ཟིག་ཅེས་བཤད་པ་ཡིན། ཁོང་གཉིས་ཀྱིས་དོན་དེ་སྔུན་ནས་ཤེས་ཟིན་པ་དང་འདྲ་བར།ངའི་སྐད་ཆ་དེ་གོ་མ་ཐག་རྒྱུན་ལྡན་གྱི་རྣམ་འགྱུར་ཞིག་ལས་ཅིའང་མངོན་མ་སོང་།
ཨ་ཕས་ང་པང་དུ་བླངས་ནས་འོ་ཞིག་བྱས་རྗེས། ཕ་ལོ།དགེ་རྒན་བརྗེས་ཚར་ཡང་ཁྱོད་ཀྱིས་མུ་མཐུད་དུ་ཡི་གེ་སློབ་དགོས། ད་ངས་ཀྱང་ཐག་བཅད་ཟིན།ང་རང་སང་ཉིན་ནས་ཞོར་ལས་ལ་འགྲོ་རྒྱུ་ཡིན།ཨ་མས་ཀྱང་ནུ་མོ་དང་ཁྱོད་གཉིས་ལ་བདག་སྐྱོང་བྱེད་ཞོར་ཞིང་རྨོ་དགོས་པ་རེད་ཅེས་བཤད་བྱུང་བས།ང་རང་ཡིད་ཆེས་མི་ཆེས་ཀྱིས་ངོ་མ་ཨེ་ཡིན།སྒོར་མོ་སློང་དུ་མི་འགྲོའམ་ཞེས་དྲིས་པ་ཡིན།ཨ་ཕས་ཨ་མའི་གདོང་ལ་བལྟས་ཏེ་དགོད་ཙམ་བྱས་ཏེ་ང་རང་ལག་པས་ཡར་བཀྱགས་ཏེ་པང་དུ་འཛིན་ཞོར།ངོ་མ་ཡིན།ད་ནས་བཟུང་སྒོར་མོ་སློང་དུ་མི་འགྲོ། ཁྱོད་ཀྱིས་ཡི་གེ་ལ་འབད་བརྩོན་བྱེད་དགོས།སང་ལོ་ནུ་མོའང་སློབ་སྔོན་ཁང་དུ་བཞག་སྟེ་ཡི་གེ་སློབ་དགོས་པ་རེད་ཅེས་ལབ་ཞོར་ང་ལ་ཡང་བསྐྱར་འོ་ཞིག་བྱས་བྱུང་།
མི་ཁ་ནི་ཙག་རླུང་བཞིན་གྱང་གིས་ཀྱང་འགོག་མི་ཐུབ་ན།ང་ཚོས་ཇི་ལྟར་བྱས་ཏེ་འགོག་དགོས་ཨང་།ཅུང་མ་འགོར་བར་ཨ་ཕའི་ཐག་བཅད་དེ་སྡེ་བའི་རྒན་གཞོན་ཚང་མས་ཤེས་སོང་། དུས་རྒྱུན་གན་ཚང་གི་མནའ་མ་ཅིག་ཅིག་དང་དེ་ཚང་གི་མག་པ་ཉིག་ཉིག་ཅེས་གླེང་ནས་ནམ་ཟླ་འཁྱོལ་གྱིན་པའི་ལོ་ལོན་ཚོར།ད་ལྟ་དཔྱིད་ཟླ་རིང་བོ་གཅིག་ལའང་བཤད་ན་འཛད་པ་མེད་པའི་གླེང་གཞི་ཞིག་ཐོན་སོང་བས།སྐོར་ལམ་དང་གྲོང་བར།ཇ་བར་དང་འགྲོ་བར་སོགས་གང་དུ་ཡང་བཤད་དེ་སྡེ་བ་འདི་ཚ་ཚ་འུར་འུར་ཞིག་ཏུ་བསྒྱུར་གྱིན་འདུག
ང་རང་སློབ་གྲྭ་ནས་ཁྱིམ་དུ་འབྱོར་དུས།དུས་རྒྱུན་ཉེ་རིང་མང་པོ་སླེབས་ཏེ་ཨ་ཕར་སློབ་གསོ་གཏོང་གིན་པ་མཐོང་ཐུབ། ང་ཉེ་མི་དེ་ཚོར་ཁོང་ཁྲོ་ལངས་བ་ཞིག་རེད། ང་ཨ་ཕས་ཉེ་མི་ཚོས་བཤད་པར་འཐད་པ་བྱུང་ནས་ངེད་ཚང་ཡང་བསྐྱར་སློང་མོའི་ལས་ཀར་ཞུགས་འགྲོ་བར་ཧ་ཅང་སྐྲག སྐབས་སྐབས་སུ་ངེད་ཚང་སློང་མོའི་ལམ་དུ་ཞུགས་ཟིན་པ་རྨིས་ཏེ་ང་རང་གཉིད་ལས་འཇིགས་སྐྲག་གིས་སད་དུ་བཅུག་པ་ཐེངས་མང་ཡིན།
སློབ་གྲྭ་ནས་སློབ་གྲོགས་ཚོས་ང་ལ་འཕྱ་སྨོད་བྱེད།ཐ་ན་དགེ་རྒན་ཚོའི་མིག་ནང་ནས་ཀྱང་ངས་བྱ་ངན་ཞིག་བསྒྲུབ་བཞག་པ་ལྟ་བུའི་དབྱེ་བསལ་དང་མཐོང་ཆུང་ཞིག་རིག་ཐུབ་པས། སེམས་སུ་གཟུགས་མེད་ཀྱི་ཁུར་བོ་ཞིག་ངའི་ཕྲག་པ་རུ་ལྷུང་འདུག་ཅིང་ཁུར་བོ་དེས་ང་རང་ཚད་བཙུགས་ཏེ་གསོད་རྩིས་བྱེད་ཀྱིན་པ་དང་འདྲ་བར་ཕྲག་པ་ནས་ཐུར་དུ་གནོན།
མི་ཚང་མས་ཁྱོད་རང་ཐན་ཞིག་ཏུ་བརྩིས་ཏེ་ཟུར་དུ་དགར་ན།ཁྱེད་ནི་ལྷ་ཞིག་ཡིན་ཡང་བྱེད་ཐབས་བྲལ།
སློབ་སྐབས་གཅིག་འདི་ལྟར་གདུག་རྩུབ་ཀྱི་མི་ཁའི་བར་ནས་རིམ་བཞིན་རྫོགས་དུས།སྐྱ་མོག་གེའི་རི་ལུང་ཐམས་ཅད་ལ་གསོན་ཤུགས་རྒྱས་ཏེ་སྔོ་ལྗང་གིས་ཐང་དང་རི་བོ་ཡོངས་སུ་བརྒྱན།གང་སར་རྒྱུ་བའི་བསིལ་རླུང་གིས་དྲི་ཞིམ་ལྡན་པའི་མེ་ཏོག་གི་དྲི་བསུང་འཁྱེར་ནས་རང་བྱུང་ཁམས་ལ་ཁམས་འདྲི་ཞུ།རྫ་མགོ་ནས་བཞུར་བའི་ཆུ་ཕྲན་ལ་ལང་ཚོའི་སྟོབས་ཤུགས་རྒྱས་ཤིང་འབྲོག་པའི་རྫི་གླུ་དང་འདྲེས་ཏེ་ཞིང་བར་ནས་མདུན་དུ་རྒྱུག ལྷོ་ཕྱོགས་ནས་ཐོན་པའི་དུས་ཀྱི་མགྲོན་པོ་ཁུ་བྱུག་གིས་ཤིང་སྡོང་གང་རུང་གི་ཡལ་གར་བཞུགས་ཏེ་གླུ་དབྱངས་སྙན་མོ་ཡང་ཡང་ལེན། ཁོར་ཡུག་གི་འགྱུར་ལྡོག་འདི་དག་མཐོང་འོང་དུས་སེམས་སུ་དགའ་སྤྲོ་སྐྱེ་པ་ཞིག་རེད།
ཡིན་ནའང་།ངེད་ཚང་ནི་དབྱར་གྱི་མཛེས་ལྗོངས་འདི་དང་འབྲེལ་བ་མེད་ཅིང་སྡེ་བ་འདི་ནས་ཀྱང་སྡོད་ཐབས་མེད་པ་འདྲ་སྟེ།ཉིན་ཞིག་སྡེ་དཔོན་ཐོན་ནས་ངེད་ཚང་སྡེ་བ་འདི་དང་ཁ་བྲལ་དགོས་པའི་གཏམ་ངན་ཞིག་བཤད་བྱུང་།ཨ་ཕ་ཁྲོས་ཏེ་སྡེ་དཔོན་ལ་རྡོ་ལོག་ཅིག་བླང་ནས་འཕངས་མོད།བསམ་པའི་འདོད་ཐོག་ཏུ་མ་སོང་བར་ཨ་མྱེ་རྒན་པོ་ཞིག་འགྲོ་བཞིན་པའི་སྒྱིད་པར་ཕོག་པས།གློ་བུར་དུ་གྱོད་ངན་མང་པོ་བྱུང་ཞིང་མཐར་ཁང་ཁྱིམ་དང་ཞིང་ས་བཙོང་སྟེ་རྫོང་གི་ཉེ་རིང་ཞིག་ཡོད་སར་ཕྱིན་ནས་སྐྱབས་མི་ཞུ་ཀ་མེད་བྱུང་།
ང་ཚོས་ཤུལ་ཏུ་ལྷག་པའི་ཅ་ལག་དག་འདྲུད་འཐེན་ཞིག་ཏུ་བརྫངས་ཏེ་ཞོགས་པ་ཞིག་ལ་རྫོང་དུ་ཆས།ཉིན་དེར་ཆར་བ་ཟིམ་ཟིམ་ཞིག་ཉི་འོད་ཕྲ་མོ་དང་བསྡོངས་ཏེ་འབབ་ཀྱིན་འདུག ཨ་མ་སྐད་ཆུང་ངུས་ངུ་བཞིན་ཁང་པ་ལ་ལྟ་ཙམ་ལྟ་ཙམ་བྱས་ཏེ་མིག་ཆུ་གཏོང་།ཨ་ཕས་ཆུ་ཤོག་རིང་བོ་ཞིག་ཉོས་ཏེ་ང་ཚོའི་སྟེང་དུ་བཀབ་ཅིང་ཉེ་འཁོར་ལ་ལྟ་བའི་མིག་ཟུང་དུ་ཞེ་སྡང་ཞིག་ལང་ནས་མིག་རྩ་ཡང་དམར་བོར་གྱུར་འདུག ནུ་མོས་སྐབས་སྐབས་སུ་ང་ཚོ་གང་དུ་འགྲོ་དགོས་པ་རེད་དང་ང་ཚོ་སྒོར་མོ་སློང་དུ་འགྲོ་དགོས་པ་ཨེ་རེད་དྲིས་ཏེ་ཕ་མ་གཉིས་ཀྱི་སེམས་ཁམས་ལ་ན་ཟུག་བར་མེད་དུ་བསླངས།
འདི་ཡོད་ཚད་ངས་ལན་པ་རེད།གལ་ཏེ་ངས་ཕ་མ་གཉིས་ཀྱི་གསུང་ལྟར་བསྒྲུབ་ན།ང་ཚོ་སྡེ་བ་ནས་ནམ་ཡང་ཕུད་མི་སྲིད།
ང་ཚོ་འདྲུད་འཐེན་གྱི་ཐོག་ནས་སྒོང་སྒོང་བྱས་ཏེ་ཆུ་ཤོག་འོག་ཏུ་བསྡད།ཚང་མར་སྨྲ་བ་མེད་ཅིང་རང་རང་ས་རུ་བསམ་བློ་སྣ་ཚོགས་བཏང་ནས་བསྡད།ངའི་སེམས་ནི་རྙོག་འཛིང་གི་དོན་དག་མང་པོས་བཟུང་ཞིང་སྡེ་བ་འདིས་ངེད་ཁྱིམ་ཚང་ལ་བྱས་པའི་སྤྱོད་ངན་འདི་ལ་ནམ་ཞིག་ཅིས་ཀྱང་ལན་པ་སློག་དགོས་པའི་མནའ་བསྒགས་པ་ཡིན།
ང་ཚོ་ས་སྲོད་ཅིག་ལ་གཞི་ནས་རྫོང་དུ་ཐོན།ཉེ་མི་ཚོས་ང་ཚོ་ཁོ་ཚང་གི་ར་སྐོར་དུ་ཅ་ལག་བཅུག་སའི་མཛོད་ཁང་ཆུང་ཆུང་ཞིག་ཡོད་པར་འདུག་ཏུ་བཅུག ཁང་པ་འདི་ཆུང་ཆུང་ཡིན་མོད། ནང་དུ་ལྕགས་ཐབས་དང་སྣོད་ཆས་ཀྱི་རིགས་ཆ་ཚང་ལྡན་པས།ད་ལྟ་འདི་ལྟ་བུའི་མལ་གནས་ཤིག་ཡོད་པའང་ལས་བཟང་རེད།
འོན་ཀྱང་།ཁང་ཆུང་འདི་དྲག་ཆར་ལ་འཕྲད་དུས་གཉོམ་ཆུང་ཞིག་ཏུ་གྱུར་འགྲོ དྲག་ཆར་འབབ་ཐེངས་རེ་ཡིས་ཁང་པ་དེའི་ནང་ཡོད་ཚད་སྣོད་ཆས་ཐང་དུ་བཞག་པ་ཡིས་འགྲོ་ལམ་འགོག
རྫོང་དུ་ཐོན་རྗེས།ཨ་ཕ་དང་ཨ་མ་ཞོར་ལས་སུ་སོང་ཞིང་ང་དང་ནུ་མོ་གཉིས་སློབ་གྲྭར་བསྐྱོད།ཁོ་གཉིས་དུས་རྒྱུན་ནངས་སྔ་ཕྱི་ཉལ་བྱེད་དགོས་པས་ངས་ནུ་མོར་བདག་སྐྱོང་དང་ཁྱིམ་ལས་ཙག་ཙིག་བསྒྲུབ་ཐུབ་དགོས། ཞོགས་པར་ངས་ནུ་མོ་སློབ་སྔོན་ཁང་དུ་བསྐྱལ་རྗེས་ང་རང་སློབ་འབྲིང་དུ་འགྲོ་དགོས་ལ།ཕྱི་དྲོ་ང་གྲོལ་མ་ཐག་ནུ་མོ་བསུ་རུ་སོང་ནས་མཚན་ཚོགས་སུ་ནུ་མོ་པང་ཐོག་ཏུ་འཛིན་ཞོར་སློབ་ཁྲིད་ལ་ཉན་དགོས། ངའི་སློབ་གྲོགས་ཚོས་གནས་ཚུལ་དེ་མཐོང་རྗེས།ཀུ་རེས་ཀྱིས་ང་ལ་ཕ་རྒན་ཆུང་ཆུང་ཞེས་རྩེད་མོ་བརྩེས།
ང་དང་ནུ་མོ་གཉིས་ཀྱི་སྦྱངས་འབྲས་ཤིན་ཏུ་བཟང་བས།དུས་རྒྱུན་གཟེངས་རྟགས་མང་པོ་ལོན་གྱིན་ཡོད།ཨ་ཕ་དང་ཨ་མ་གཉིས་ཀྱིས་སློབ་གྲྭ་ནས་གནང་བའི་ངེད་གཉིས་ཀྱི་གཟེངས་རྟགས་དག་ཆུ་ཤོག་གིས་དཀྲིས་ཏེ་གྱང་ངོར་སྦྱར། ཐེངས་རེར་ཕ་རྒན་གྱིས་གཟེངས་རྟགས་སྦྱར་བའི་གྱང་ལ་ལྟ་ཞོར་དེའི་སྔུན་ནས་ཕར་ཚུར་འགྲོ།ཁོས་ཡིད་ཚིམ་པ་ཞིག་བལྟས་རྗེས་ང་དང་ནུ་མོ་གཉིས་ལ།ངའི་བུ་དང་བུ་མོ་གཉིས་མ་འོངས་པར་མཁས་པ་ཆགས་རྒྱུ་རེད།ཧ་་ཧ་་ཞེས་ངེད་གཉིས་པང་དུ་ལེན།
ངེད་ཚང་གི་འཚོ་བ་རིམ་བཞིན་ཇེ་དགར་སོང་།ཨ་ཕས་གྲོང་མཐའ་ནས་ས་ཞིག་ཉོས་ཤིང་གནས་དེ་ནས་ཁང་པ་བརྩེགས་གཉིས་ཅན་ཞིག་ཕུབ། ཁང་པའི་མཐའ་རུ་གྱང་གིས་བཟོས་པའི་ར་བ་ཆུང་ཆུང་ཞིག་ཀྱང་བསྐོར་བས།སྔོན་གྱི་ཁང་པ་ལས་ཀྱང་སྐྱིད་པོར་གྲུབ།
ཕ་མ་གཉིས་ཀྱི་མགོ་ནས་སྐྲ་དཀར་བོ་ཇེ་མང་ནས་ཇེ་མང་དུ་སོང་ཞིང་གདོང་གི་གཉེར་མ་ཇེ་སྟུག་ནས་ཇེ་སྟུག་ཏུ་འགྱུར་དུས།ག་ལེར་ནུ་མོ་ནར་སོན་ཏེ་སློབ་ཆུང་ནས་མཐར་ཕྱིན་ལ་ཉེ་ཞིང་།ང་ཡང་དར་རྩེ་མདོའི་སྲོང་བཙན་སློབ་གྲྭ་ནས་ཕྱིར་ཐོན་ཏེ་ཕ་ཡུལ་དུ་དགེ་རྒན་གྱི་བྱ་བར་ཞུགས།
ལོ་མང་པོ་ཞིག་འགོར་རྗེས།ང་རང་ཡང་བསྐྱར་ཕ་ཡུལ་ལ་འགྲོ་འདོད་སྐྱེས་བྱུང་།
ང་རང་སློབ་གྲྭ་ནས་འགྲོ་ཁར་ངའི་སློབ་ཆུང་གི་བོད་ཡིག་དགེ་རྒན་སྐྱེལ་དུ་ཐོན།ཁོས་ངའི་མ་འོངས་པའི་དམིགས་འབེན་ལ་རྒྱབ་སྐྱོར་བྱས་ཤིང་ཡིད་ཕམ་མི་རུང་བའི་སློབ་སྟོན་མང་ཙམ་བྱས་རྗེས་ཕྱིར་ལོག་སོང་།ངས་ཁོ་རང་སློབ་གྲྭའི་སྒོ་ཆེན་ནས་སློབ་ཁང་ཕྱོགས་སུ་བསྐྱོད་པའི་རྒྱབ་གཟུགས་ལ་ཕྱག་གསུམ་བཙལ་ཏེ་བཀའ་དྲིན་མཚོན་ཐུབ་པར་བྱས་ནས་འབྲལ་རྩིས་བྱེད་དུས།གཞི་ནས་ཁོ་རང་གི་རྒྱབ་གཟུགས་དེ་ནི་ངའི་དྲན་པའི་གཏིང་ས་ཞིག་ཏུ་ཟུག་འདུག་པ་ཚོར།
བུད་མེད་ཅིག་གི་འགྲོ་སྟངས་དང་མཚུངས་པའི་གོམ་སྟབས་དེ་ནི།ངས་དྲན་སོང་།དེ་ནི་སྔོན་མ་སྔོན་མ་ཞིག་རེད།སྐབས་དེར།ཁོ་རང་ང་ལ་ཡི་ཆད་བྱུང་ཡོད་དམ།ངས་དེ་ལྟར་དྲན་ཞོར་ཕ་ཡུལ་གྱི་རླངས་འཁོར་ཞིག་ཏུ་བསྡད་དེ་དྲིན་ཆེན་ཕ་མའི་ཕྱོགས་སུ་ཆས་སོ།། །།