གངས་ལྗོངས་ཀྱི་ཨ་མ་རྣམས་ལ་བསྔགས་པ།འཛམ་གླིང་བུད་མེད་དུས་ཆེན་ཉིན་གངས་ལྗོངས་ཨ་མ་རྣམས་ལ་ཕུལ་བ།

རྒྱལ་ཡུམ་སྒྲོལ་མ་དབྱངས་ཅན།།

འབྲོ་བཟའ་དབུས་བཟའ་མ་ཅིག།

དྲིན་ཆེན་ཨ་མ་སོགས་ལ།།

གུས་པའི་འདུད་པ་དང་བཅས།།

གནའ་རབས་ལོ་རྒྱུས་མི་བཤད།།

དེང་རབས་ངོ་མཚར་མི་འབྲི།།

མཁས་དང་མཛངས་མིན་མི་བལྟ།།

ད་ལྟ་དྲན་ཚོད་སྨྲ་འོ།།

སྤྱི་ལ་འཆར་བའི་སྤྱི་ལོ།།

གསུམ་པའི་ཚེས་པ་བརྒྱད་ཉིན།།

གནམ་འོག་སྐྱེད་མ་ཀུན་ལ།།

རྟེན་འབྲེལ་མེ་ཏོག་འབུལ་ལོ།།

དུས་གསུམ་རྒྱལ་བའི་ཡུམ་ཆེན།།

ས་སྟེང་འགྲོ་བའི་མར་གྱུར།།

ཁྱིམ་འཛིན་སྟོང་གི་བདག་མོ།།

བྱམས་དང་བརྩེ་བའི་མ་མ།།

བཅུ་དྲུག་ལང་ཚོའི་མེ་ཏོག།

སྙིང་གི་མཛའ་བོར་ཕུལ་ཡོད།།

མི་ཚེ་གཅིག་གི་སྐྱིད་སྡུག།

གཏན་གྱི་ཁྱོ་བོར་བཅོལ་ཡོད།།

སྒེག་འཛུམ་བཞིན་རས་དྭངས་མོ།།

ཁྱིམ་གྱི་ཕུགས་ན་རྒས་ཡོད།།

ཡིད་འོང་གཟུགས་ཀྱི་འཁྲི་ཤིང་།།

བཙག་དང་བསེར་བས་བཅོམས་སོང་།།

ཞིམ་མངར་ཇ་ཡི་ལོ་མ།།

བྱམས་ལྡན་མ་ཁྱོས་བསྐོལ་ཡོད།།

དྲོད་འཇམ་ཁྱིམ་གྱི་ཁང་བ།།

བརྩོན་ལྡན་མ་ཁྱོས་ཕྱགས་ཡོད།།

འཁོར་བའི་འདམ་གྱི་དབུས་ན།།

ཡིད་འོང་བྱུ་རུའི་མེ་ཏོག།

མ་བཅོས་མཛེས་སྡུག་ལྷུན་རྫོགས།།

འཁོར་བའི་བདག་མོ་ཁྱེད་ཡིན།།

གནམ་ཕྱེད་བུད་མེད་ཡིན་ཞེས།།

སྔ་རབས་གཏམ་ལ་གྲགས་ཀྱང་།།

ས་ཕྱེད་བུད་མེད་ཡིན་ཞེས།།

སྨྲས་ཀྱང་ཚད་ལས་བརྒལ་མེད།།

དུས་ཆེན་དུས་ཀྱིས་གཏུགས་ཀྱང་།།

དོན་གྱིས་བུད་མེད་ཀུན་ལ།།

ཁ་མིན་སེམས་ཀྱིས་བརྩི་འཇོག།

དུས་རྒྱུན་ཡིད་ལ་འཇགས་དགོས།།

འཁོར་བར་ཞེན་ལོག་སྐྱེས་ཀྱང་།།

བུད་མེད་ཐན་དུ་མ་ལྟ།།

ནང་གི་དེ་ཉིད་ཁེགས་ན།།

འཁོར་རྩ་དེ་ཡིས་གཅོད་ངེས།།

རིགས་ཀྱི་མཐོ་དམན་མ་རྩོད།།

ཐམས་ཅད་མི་ཡི་ལུས་རྟེན།།

བཟང་ངན་གཙང་བཙོག་མ་བྱེད།།

བསམ་སྤྱོད་བཟང་ལ་ལྟོས་ཤིག།

འདོད་པའི་བདེ་བ་ཀུན་ལ།།

ཕོ་མོ་གཉིས་ཀ་གཤིས་མཚུངས།།

དོན་མེད་སྡུག་བསྔལ་ལས་ཀ།

བུད་མེད་ཁྲལ་དུ་མ་འགལ།།

མང་དུ་བཤད་དགོས་ཅི་ཡོད།།

མ་ཡི་དྲིན་ལན་སྒོམས་ཤིག།

མ་ཡི་གདོང་ལ་ལྟོས་ཤིག།

མ་ཡི་སྐྱིད་སྡུག་སོམས་ཤིག།

གཞན་དག་བུད་མེད་ཀུན་ལ།།

རང་དབང་འདྲ་མཉམ་ཐོབ་ཐང་།།

ཚངས་པའི་དབྱངས་སྙན་ངག་གིས།།

སྙན་དབང་འགུག་པ་ལེགས་མོད།།

མཐོ་སྒང་བུད་མེད་རྣ་བར།།

སྐྱེས་པའི་ཕྱག་ངར་བཙན་པས།།

ཕོ་བཟང་རུས་པ་ཅན་རྣམས།།

བུད་མེད་བརྩི་འཇོག་མ་ལྷོད།།

ཕོ་སྐྱེས་རབ་ཀྱི་ལས་ལ།།

ཚེ་གཅིག་ཨ་མར་བཀུར་དགོས།།

ལས་གཅིག་བཟའ་ཟླར་བྱམས་དགོས།།

ཁྱིམ་གཅིག་གཉེན་ལ་དུངས་དགོས།།

བུད་མེད་ཤེས་རབ་ཅན་མ།།

རིག་པའི་གནས་ལ་བརྩོན་རོགས།།

བུད་མེད་བྱམས་པའི་བདག་མོ།།

འཁོར་བའི་གཞི་འཛིན་ཟུངས་ཤིག།

མོ་སྐྱེས་རབ་ཀྱི་ལས་ལ།།

ཁྲེལ་གཞུང་བག་ཡོད་ལྡན་ཞིང་།།

ཁ་འཇམ་ཁོག་དྲང་འཛུམ་ཅན།།

ཁྱིམ་ཁ་སྟོང་གི་གཡང་བདག།

མ་རྣམས་འགྲོ་བའི་ཞིང་ས།།

མ་རྣམས་ཤེས་རབ་བདག་མོ།།

མ་རྣམས་བརྩེ་བའི་གཞིས་ཁྱིམ།།

མ་རྣམས་འཁོར་བའི་བདེ་སྐྱིད།།

རྟེན་འབྲེལ་ཙམ་གྱི་དོད་དང་།།

དོན་གྱིས་བསམ་པའི་ཚུལ་རྣམས།།

གོ་སླའི་ངག་གི་ཚོམ་བུ།།

ཨ་མའི་དྲུང་དུ་འབུལ་ལོ།།