སྤྲིན་པ་འདི་སེམས་ཀྱི་སྨན་ཡིན།

སྤྲིན་པ་ཞིག་རྒྱང་རིང་ནས་ག་ལེར་ངའི་ཕྱོགས་སུ་འཐིབས་འོང་སྟེ།

ཉེ་འཁོར་གྱི་རྩི་ཤིང་དག་ལ་བྱུལ་བྱུལ་ཐེངས་འགའ་བྱས་རྗེས།

ཆུ་བོའི་འགོ་ཁུངས་བསྙེགས་ནས་ང་དང་རྒྱང་གྱེས།

ངས་སྤྲིན་པ་འདི་གཏན་དུ་འཚོ་ཚིས་སུ་བཞུགས་ན་བསམས།

ཚ་གདུང་གིས་མནར་དུས། ངས་ལྷག་ཏུ་ཁོ་རང་དྲན།

ནམ་རྒྱུན། ང་དང་རྒྱང་ཐག་ཆེས་ཉེ་བ་དེ།

ཁོ་ཡིན་ན་བསམས་བྱུང་།

མཚམས་མཚམས་སུ། དགུན་དུས་གྲང་ངར་ཆེ་ནའང་།

ངའི་རྨི་ལམ་དུ་ཁོ་རང་འཁྲུངས་པ་ཐེངས་གཅིག་མིན།

ཉི་མ་དང་ཟླ་བ་ཁུར་བའི་སྤྲིན་པ་འདི།

རླུང་བུས་ཡང་ཡང་བསྒུལ་ནའང་།

ཆར་བའི་དངོས་གྲུབ་དུས་ལས་ཡོལ་བ་མེད་པར།

སེམས་པ་གྲངས་མེད་ཅིག་གི་བགོས་སྐལ་དུ་སྨིན་ཡོད།

རི་ཆུ་ཞབས་རྟེན་དུ་བཟོས་པ་ནས།

གང་གི་འབོད་པ་སུ་ཡི་ཡིད་དུ་བསྒྲོན་མྱོང་།

རི་ལུང་ཐང་གསུམ་ཧོབ་ཀྱིས་བརྒལ་བ་དེ།

དམ་པ་གང་ཞིག་གི་བརྩེ་སེམས་མངལ་དུ་སྦྲུམ་པ་ཡིན།

ཡལ་བ་མེད་པའི་ཁ་དོག་དེ། ཁྱེད་ཀྱི་རང་གཤིས་ཡིན།

རང་ཉིད་ཆར་དུ་བརྫིས་ནས།

མི་ཡུལ་ཞིང་འདིར་ཚེ་སྲོག་གི་མཆོད་པ་འབུལ་མཁན་དེ།

ཁྱེད་ཡིན།

མཁའ་དབྱིངས་སུ་རྒྱན་དུ་མཛེས་པའི་སྤྲིན་པ་ཕོན་པོ།

སེམས་ཀྱི་ངལ་བ་གཡུ་འབྲུག་གི་ངར་སྐད་ལ་བརྒྱུས་ནས།

ལྗོངས་འདིའི་ཕྱི་ནང་གསང་གསུམ་ལ་གདམས་པ།

ཆོམ་ཆོམ་དུ་བསྒྲགས་པས།

མཁའ་དབྱིངས་རྒྱ་ཆེ་བ་ད་རེས་ཤེས་ཡོད།

ས་གཞི་ཁོད་སྙོམས་པ་ད་རེས་ཚོར་ཡོད།

རང་ལ་དབང་བའི་གཞིས་ཀ་ཤོར་ཟིན་པའང་།

དེ་རེས་ཡིད་ལ་ཡང་ཡང་དྲན།

སྤྲིན་པ་རྡོག་རྡོག་ཅིག

ངའི་སེམས་ཀྱི་གུར་ཁང་ནས་འཕོས་པ་དང་ལྷན།

འཇིག་རྟེན་འདིའི་ནམ་མཁར་འཁྱིལ་བ་ནི།

གཅིག་བྱས་ན། འཁྲེང་སེམས་ཀྱིས་བསྡམས་དྲགས་ནའང་ཐང་མོད།

དེ་ནི་ཁ་ཕྱོགས་ཤིག་ཀྱང་ཡིན་སྲིད་པས།

འདུན་མ་རྨ་མེད་ཅིག་ཏུ་སེམས་ན་ལོས་ཆོག

སྤྲིན་པ་འདི། རྒྱུ་བ་རླུང་དང་འདྲེས་པས།

སྤྲིན་པ་འདི། སེམས་ཀྱི་སྨན་ཡིན།

ཟས་ཀྱི་མཆོག་ཡིན།