མདང་ནུབ་ཁ་བ་འབབ་པའི་སྒེའུ་ཁུང་ལས།།
དགའ་སྡུག་གཉིས་དང་མཐུན་པའི་གླུ་ཞིག་བླངས།།
རྒྱང་རིང་རི་ཚོགས་བཏུམས་པའི་རླུང་བུ་ཡིས།།
མཇུག་མཐའི་འགྱུར་ཁུག་ཆུ་བོའི་གཞུང་ནས་འཐེན།།
ཞེ་ལ་མེ་ཏོག་བཏབ་པའི་དཔྱིད་ཀ་དེར།།
སྣང་བའི་དྲིལ་ཆུང་དཀྲོལ་བའི་འཇིག་རྟེན་དགོད།།
གསེར་གྱི་ཕུང་པོའི་རི་ལ་བྱ་ཚོགས་འཕུར།།
སྤྲིན་པ་ཐར་ཐོར་ཞིག་གི་འཚུབ་ཁ་རྒོད།།
ཡིག་འབྲུའི་མཚོ་མོ་འཁྱིལ་བའི་ཕ་མཐའ་ན།།
ཞེ་འདྲེས་ཚིག་གི་རྦ་རླབས་བྲང་ལ་རྡེབ།།
ལོ་ཟླའི་རླུང་གིས་བསྐྱོད་པའི་ཀོ་གྲུ་ལ།།
ཆུ་ཡི་རི་མོའི་མཐའ་ན་རྒས་གཟུགས་དོད།།
ལས་ཀྱིས་དུས་ཆད་བྱས་པའི་ཚེ་རབས་འདིར།།
ལང་ཚོའི་ཐོད་དུ་བབས་པའི་ཁ་ཡིག་ལ།།
མིག་ཆུའི་སྒྲོམ་དུ་ཚུད་པའི་ཐ་སྙད་འགའ།།
ཤ་དང་པགས་པའི་གསེབ་ན་འཕག་འཚག་བྱེད།།
མ་དག་སྡིག་སྒྲིབ་འཁོར་བའི་རྣམ་ཤེས་ལ།།
ཕྱི་ནང་ལོ་བརྒྱར་འཁྱམས་པའི་བཀའ་ཆད་དེ།།
བདེན་ནམ་མི་བདེན་ལྷ་དང་དྲང་སྲོང་ཀྱེ།།
ལས་ཀྱི་བསྐོས་ཐང་མཐོང་ངམ་ལྷ་ཡི་ལྷ།།