ཕ་ཡུལ་དུ་ལོག་པའི་ཟིན་བྲིས།

གནམ་ལ་སྤྲིན་པ་འཁྲིགས་ལེ།།

ཆར་ཆུ་འབབ་པའི་རྟགས་རེད།།

མི་ཡུལ་བསམ་པ་སྡུག་ལེ།།

ཕ་ཡུལ་དྲན་པའི་རྟགས་རེད།།

ཅེས་པའི་དམངས་གླུ་དེས་མདུན་བསུས་ཏེ། ལོ་ལྟར་དུ་དབྱར་ཟླ་བདུན་པའི་པེ་ཅིན་ནི་ཚ་རླབས་གྱི་མེ་འོབས་ལྟ་བུའི་འཇིག་རྟེན་ཞིག་རེད།མཐོ་སྒང་ནས་ཡོང་བའི་བུ་ཕྲུག་ང་ལོ་བཅུ་ཕྲག་རིང་ལ་ས་འདིར་འདུག་ཡོད་ཀྱང་ད་དུང་གོམས་མ་ཐུབ་པས། ནམ་ཡང་ཟླ་བ་འདིའི་ནང་གུང་གསེང་ཞུས་ཏེ་ཕ་ཡུལ་ལ་ལོག་འགྲོ་བཞིན་ཡོད། ད་ཐེངས་ཀྱང་སྔར་བཞིན་ལོ་གཅིག་གི་གུང་སེང་ཞུས་མ་ཐག་ཕ་ཡུལ་ཕྱོགས་སུ་ལོག ང་ནི་ནམ་རྒྱུན་མེ་འཁོར་ནང་སྡོད་རྒྱུར་དགའ་པོ་ཡོད་པས། དེ་རིང་ཡང་ལོ་རེར་མགྱོགས་ཚད་འཕར་བའི་མེ་འཁོར་ལ་བསྡད་དེ་སྒེའུ་ཁུང་གི་ཕྱི་རོལ་གྱི་མཐའ་མེད་པའི་མཛེས་ལྗོངས་ལ་བལྟས་པས་ཚིག་བཅད་ཁ་ཤས་དབང་མེད་དུ་ཤོར།  

ལྕགས་ལམ་མཐའ་ལ་མི་མངོན་རིང་དུ་བསྲིངས།།

མེ་འཁོར་མདའ་མོ་ཇི་བཞིན་མགྱོགས་སུ་བསྙེགས།།

རང་ལུས་མེ་འཁོར་མལ་ཁྲིར་བསྡད་ན་ཡང་།།

སེམས་པ་སྔར་ནས་ཕ་ཡུལ་ཕྱོགས་སུ་འཕུར།།

སྒེའུ་ཁུང་ཕྱི་ནས་སྐར་མདའ་ཡལ་བ་བཞིན།།

རི་ཆུ་མཛེས་ལྗོངས་ཚང་མ་རྗེས་སུ་བོར།།

བྱང་ལམ་གྲོང་ཁྱེར་དུ་མ་བརྒལ་ན་ཡང་།།

སེམས་པར་ཡུལ་གྱི་རྣམ་པ་ལྷམ་མེར་ཤར།།

 དེ་ལྟར་དཀའ་སྣང་ཅི་ཡང་མེད་པར་ཆུ་ཚོད་བཅོ་ལྔའི་རིང་ལ་ཁྲིན་ཏུའུ་ལ་སླེབས། 

ལོ་བཅུའི་སྔོན། ཁྲིན་ཏུའུ་ནས་དར་མདོའི་བར་ཉི་མ་ཧྲིལ་པོ་གཅིག་གམ་སྐབས་རེར་ཉི་མ་གཉིས་རེ་ལ་སྒ་སྒྲིལ་ལ་བསྡད་ནས་འགྲོ་དགོས། དེང་སང་ནི་གནམ་ལ་གནམ་གྲུའི་འཕུར་ལམ་ཕྱེ། ས་ལ་མགྱོགས་ལམ་བསྐྲུན། རི་ལ་ཕུག་ལམ་བཟོས། ཆུ་ལ་ཟམ་པ་བཙུགས། འཕྲང་ལམ་ཐོག་ཟམ་པ་བརྒྱངས་པས་ ཕ་ཡུལ་དུ་འགྲོ་བ་ཤིན་ཏུ་སྟབས་བདེ། ཁྲིན་ཏུའུ་ནས་དར་མདོའི་བར་གནམ་གྲུར་འདུག་ན་ཆུ་ཚོད་གཅིག་ཙམ། རླངས་འཁོར་ཆུང་རིགས་ལ་བསྡད་ན་ཆུ་ཚོད་བཞི་ཙམ་གྱིས་སླེབས་ཐུབ། ང་རང་ནི་སྤྱི་སྤྱོད་རླངས་འཁོར་ཞིག་གི་ཐོག་བསྡད་ནས་སོང་ཡོད། ཆུ་ཚོད་དྲུག་གི་རིང་ཁོར་ཡུག་མཛེས་ལྗོངས་སྣ་ཚོགས་མིག་ལམ་དུ་རེ་རེ་བཞིན་ཤར་ནས་བདེ་འཇགས་ངང་དར་མདོར་སླེབས།ཁྲིན་ཏུའུ་ནས་དར་མདོའི་བར་མགྱོགས་ལམ་བཟོ་བཞིན་ཡོད་པའི་སྣང་ཚུལ་གང་སར་མཐོང་རྒྱུ་འདུག གོ་ཐོས་ལྟར་ན་ལོ་གཅིག་ཙམ་མི་འགོར་བར་རླངས་འཁོར་ཤར་སྐྱོད་ཐུབ་རྒྱུ་རེད་ཟེར། རྗེས་སུ་ཁྲིན་ཏུའུ་དང་དར་མདོ་བར་ཆུ་ཚོད་གསུམ་ཙམ་མ་གཏོགས་མི་དགོས།   ད་དུང་ཁྲིན་ཏུའུ་ནས་ལྷ་སའི་བར་ལྕགས་ལམ་ཡང་ད་ལྟ་བཟོ་བཞིན་པའི་སྒང་རེད། མ་འོངས་པར་ཤར་གཏོང་ཐུབ་དུས་མེ་འཁོར་ནས་ཕ་ཡུལ་ཕྱོགས་སུ་བསྐྱོད་ཆོག་པ་རེད།  

ལོ་ཉི་ཤུའི་སྔོན་དུ་ང་རང་དར་མདོ་ནས་པེ་ཅིན་ལ་ཐེངས་དང་པོར་ཡོང་དུས། དར་མདོ་ནི་ཤིང་དང་ས་ཕག་ལས་གྲུབ་པའི་སྡོད་ཁང་སྟེང་རྫ་གཡམ་བཀབ་པའི་ཁང་པ་ཤ་སྟག་མ་གཏོགས་དེང་སང་བཞིན་ལྕགས་ཧྲེང་དང་ཨར་འདམ་ལས་བསྐྲུན་པའི་ཐོག་ཁང་གཅིག་ཀྱང་མཐོང་རྒྱུ་མེད། ད་ལྟར་དར་མདོ་གྲོངཁྱེར་འཛུགས་སྐྲུན་གསར་པ་བྱས་ནས་མཐོ་སྒང་དུ་ཆགས་པའི་ཧང་ཀང་གྲོང་ཁྱེར་ལྟ་བུར་འགྱུར་འདུག ངའི་ཤ་ཉེ་ཞིག་གིས་མོ་ཊ་པཱ་ཏའོ་ཞིག་བཏང་ནས་ང་བསུ་སར་སླེབས་བྱུང་། དར་མདོ་དང་ངའི་ཕ་ཡུལ་བར་ཨར་འདམ་ལས་བཟོས་པའི་གཞུང་ལམ་རྒྱ་ཆེ་ལ་འགྲོ་ས་ཤིན་ཏུ་བདེ་བས་ཆུ་ཚོད་གཉིས་ཙམ་ལས་མི་དགོས་པར་རང་ཡུལ་ལ་སླེབས། རང་ཡུལ་ནི་གནམ་སྔོན་པོ། སྤྲིན་དཀར་པོ། གངས་རིའི་འོག་གི་ནགས་ཚལ། རྫ་གསེང་འོག་གི་དྭངས་ཆུ། སྤང་རིའི་འོག་གི་རྩྭ་ཐང་། རྩྭ་ཐང་སྟེང་གི་རྟ་ནོར་ལུག་གསུམ། དེའི་གཤམ་གྱི་གཤོང་སར་གྲོ་ནས་སྲན་གསུམ་སྐྱེ་བཟང་རྒྱས་པའི་ཞིང་ཁ། འབྲས་བུ་ཁུར་དུ་ལྕི་བའི་འོ་སེ་སྡོང་པོ་། ལྷ་ཤིང་ཤུག་པ་དྲི་བཟང་འཐུལ་བ་སོགས་གང་སར་བལྟས་ནའང་ལྷ་ཡུལ་ཞིང་ཁམས་མི་ཡུལ་དུ་འཕོས་པ་དང་འདྲ་བས་དེ་དག་ཐམས་ཅད་ཚིག་བཅད་ལམ་ནས་ཞུས་ན། 

གནམ་ནི་དེ་བས་དྭངས་ལ།།

སྤྲིན་ནི་དེ་བས་དཀར་ཞིང་།།

ཕ་ཡུལ་ལྷ་ལྡན་ཡུལ་འདི།།

མཛེས་ཆོས་བརྗོད་ལས་འདས་སོང་།།

བལྟས་ན་ངོམས་རྒྱུ་མི་འདུག །

བཤད་ན་ཚིག་མཐའ་བྲལ་ཞིང་།།

རང་ཡུལ་སུམ་རྩེན་ཕྱོགས་ལ། །

དྲིན་ཅན་ཨ་མས་སྒུག་ཡོད། །

ལ་ཁའི་ལྗོན་ཤིང་སྟུག་ལ། །

ལུང་ཁོག་ཨ་འབྲུ་རྒྱས་པ། །

བར་གྱི་རྒྱུ་འགྲོ་རྒྱུག་ཆུ།

སྐྱེ་འགྲོ་ཀུན་གྱི་བདུད་རྩི།།

མི་ཉག་ཕོ་མོའི་གླུ་དབྱངས། །

འཇོལ་མོ་སྔོན་པོའི་གསུང་སྐད། །

སྟག་ཤར་ལང་ཚོའི་འཚོ་བ།  །

ལྷ་ཡུལ་དག་ཀྱང་སྐྱེངས་སོང་།།

དེ་ལྟར་བསྔགས་བརྗོད་ཚད་མེད་ཞུས་དུས་ཤ་ཉེ་སྤུན་ཡ་ཚོས་ཁོ་ཚོས་ང་ཚོའི་མཛེས་སྡུག་ལྡན་པའི་ཕ་ཡུལ་འདི་དེ་ཙམ་གྱིས་མི་ཚད་པར་ད་དུང་འབངས་མི་སེར་གྱི་འཚོ་བའི་ཆ་རྐྱེན་ཡང་ཕྱོགས་ཡོངས་ནས་གོང་འཕེལ་བྱུང་ཡོད་ཚུལ་གླེང་བྱུང་། དཔེར་ན་ང་ཚོའི་གྲོང་བརྡལ་དུ་དུད་ཚང་སོ་དགུ་ཡོད་པ་ལས་རླངས་འཁོར་མེད་མཁན་ཧ་ལམ་མེད། གོང་ཚད་ཆེ་ཆུང་གི་ཁྱད་པར་མ་གཏོགས་ཁྱིམ་ཚང་རེ་རེར་རླངས་འཁོར་གཏོང་རྒྱུ་རེ་ཡོད། ད་དུང་སྒེར་གྱི་ཁང་གསར་སྐྲུན་པ་ལ་རྫོང་སྲིད་གཞུང་གིས་རོགས་དངུལ་སྤྲོད་པ་དང་སྨན་ཁང་ནང་སྡོད་དགོས་པའི་ནད་ཚབ་ཆེན་ཡིན་ནའང་སྨན་ཡོན་བརྒྱ་ཆ་བདུན་བཅུ་ཙམ་མར་ཆག་གི་ཡོད་པ། རྒྱ་ཆེ་བའི་མི་དམངས་ཀྱི་འཚོ་བ་ནི་ཨ་སྔོན་དགུང་གི་ཉི་མ་ཤར་འདྲ་རེད་ཅེས་བཤད་བྱུང་། སྐད་ཆ་བཤད་ཞོར་ལ་ཁྱིམ་སྒོར་སླེབས། བདག་ནི་བྲེལ་ཚབ་ངང་ལྟག་སྒོ་ནང་འཛུལ་དུས་ཨ་མས་འཁར་བ་ལ་བརྟེན་ནས་རྒྱ་རའི་ཟུར་ནས་ང་སྒུག་འདུག ཨ་མ་མཇལ་མ་ཐག་མིག་ཆུ་དབང་མེད་དུ་ཤོར་བ་དང་ཆབས་གཅིག་ཨ་མ་ལགས་ཁྱེད་བདེ་མོ་ཨེ་ཡིན་ཞེས་འཚམས་འདྲི་བྱེད་དུས་ཨ་མས་ཀྱང་འཛུམ་དམུལ་གྱིས་བསུས། ཨ་མའི་སྐུ་གཟུགས་ནི་ཞབས་པུས་མོ་ཅུང་ཙམ་སྨྱུང་བ་མ་གཏོགས་ལུས་ཁམས་ཤིན་ཏུ་དྭངས་ཤིང་ཐུགས་སེམས་ཀྱང་བག་ཡངས་པ་ཞིག་འདུག ད་སྐབས་ནི་རི་ཟས་ཤ་མོ་འཐུ་བའི་དུས་ཡིན་པས་གྲོང་བརྡལ་འདིའི་ནང་ལོ་ཆུང་ཧ་ལམ་མཐོང་རྒྱུ་མི་འདུག རྒན་རྒོན་ཚོས་ཆུ་ཁའི་དུང་འཁོར་དང་མ་ཎི་རྡོ་འབུམ་གཉིས་ལ་སྐོར་ར་རྒྱག་བཞིན་འདུག  ངའི་ཨ་མ་ཁྱིམ་ནང་གཅིག་པུར་ལུས་པས་འཚོ་བ་སོགས་གང་ཐད་ནས་དཀའ་ངལ་འཕྲད་རྒྱུའི་དོགས་པ་ཆེན་པོ་བྱུང་ཡང་། ཨ་མས་ཞལ་ནས་གསུང་རྒྱུ་དང་མིག་མཐོང་ལག་ཟིན་གྱི་རྣམ་པ་ཐོག་ནས་ཁོང་ལ་སྐུ་ངལ་གང་ཡང་མེད་པ་ཤེས། དཔེར་ན་སྔོན་མ་འཐུང་ཆུ་ཡང་ལེ་དབར་གཅིག་ཙམ་ནས་ཁུར་ཡོང་དགོས་པ་དང་། བུད་ཤིང་ནི་ཁང་འོག་ནས་ཁང་སྟེང་ཁྱེར་ཡོང་དགོས་པས་ཞབས་ཕྱི་ཞིག་རྒྱུག་མཁན་མེད་ན་ཁྱིམ་པའི་རྒན་རྒོན་རྣམས་ཧ་ཅང་དཀའ་ཡང་། ཨ་མའི་ཞལ་ནས། དེང་སང་འཚོ་བ་ཧ་ཅང་སྟབས་བདེ་པོ་རེད་ཡོད། མེ་ནི་གློག་ལ་བརྟེན། ཆུ་ནི་རང་འབབ་ལས་ཐོག་ཁང་ལ་འཐེན་པས་ཟ་མ་བཟོ་པ་ལ་དཀའ་ལས་ཆེན་པོ་ཡོད་མ་རེད་གསུངས། ཨ་མས་དེང་སང་ཕ་ཡུལ་ལ་འགྱུར་ལྡོག་ཆེན་པོ་བྱུང་ཡོད་པ་རེད།ནགས་ཚལ་སྲུང་ན་གླ་རིན་ཡོད།ས་ཞིང་རྨོ་ནའང་གླ་རིན་ཡོད། རང་གི་སྡོད་ཁང་བརྒྱག་ན་རོགས་དངུལ་གནང་། ནད་པས་སྨན་བསྟེན་དགོས་ན་སྨན་རིན་ཆུང་། ཞིང་རྨོས་དཔྱ་ཁྲལ་སྔོན་ནས་མེད་པར་བཏང་། རྩྭ་དང་ཤིང་སྡོང་བཙུགས་ན་རིན་པ་སྤྲད། ལོ་རྒན་དྲུག་ཅུ་བརྒལ་བར་རོགས་དངུལ་གནང། རྒྱལ་ཁབ་ཨ་མ་བཞིན་དུ་དྲིན་ཆེའོ་ཞེས་གསུངས།

ད་ལྟའི་ཀྲུང་དབྱང་གི་ཞིང་འབྲོག་སྲིད་ཇུས་ཧ་ཅང་ཡག་པོ་འདུག་པས་ཕྱོགས་གང་ཐད་ཀྱི་འཕེལ་རྒྱས་ཀྱི་རྣམ་པ་ནི་སྔར་ན་མེད་པའི་རྫོགས་ལྡན་ཞིག་ཏུ་བརྩི་ཆོག རང་ཡུལ་ནི་ཞིང་ལས་གཙོ་བོ་ཡིན་ཏེ་འཚོ་བ་ནི་ཉིན་རེ་བཞིན་དབྱར་ཆུ་རྒྱས་པ་ལྟར་ཕུན་སུམ་ཚོགས་པའི་ཕྱོགས་སུ་འཕེལ་རྒྱས་འགྲོ་བཞིན་འདུགའཆར་གཞིའི་ནང་ཁྲིན་ཏུའུ་ནས་དར་མདོ་བར་མགྱོགས་ལམ་བསྐྲུན་ཏེ་སང་ལོའི་ལོ་འགོར་ཤར་གཏོང་ཐུབ་པ་དང་། ཁྲིན་ཏུའུ་ནས་ལྷ་སའི་བར་གྱི་ལྕགས་ལམ་ཡང་ཕྱོགས་སྣེ་གཉིས་ནས་འགོ་བརྩམས་ཤིང་ཡུན་རིང་མི་འགོར་བར་མེ་འཁོར་ནང་བསྡད་ནས་ལྷ་སར་ཕྱིན་པའི་རྨི་ལམ་ཡང་མངོན་སུམ་དུ་འགྱུར་ཐུབ་རྒྱུ་རེད།དར་མདོ་གྲོང་ཁྱེར་དང་ར་རྔ་ཁ་གྲོང་བརྡལ་སོགས་ལ་མགྲོན་ཁང་དང་ཡུལ་སྐོར་བ་སྣེ་ལེན་བྱེད་པའི་བྲེལ་འཚུབ་ཀྱི་རྣམ་པ་ནི་མིག་མཐོང་ལག་ཟིན་རེད།  

སླར་སྨྲས་པ།

མ་ཕྱིན་མེད་པར་རི་ཆུ་འཕྲང་ལམ་བརྒལ།།

མ་བལྟས་མེད་པར་གནམ་ས་བར་གསུམ་མཐོང་།།

མ་དང་མཉམ་དུ་འདས་མ་ད་གསུམ་གླེང་།།

མ་ཡི་ཞལ་ནས་ལུས་བདེ་སེམས་སྐྱིད་རྟོགས།།

བགྲང་བྱ་སུམ་ཅུ་སྔོན་དང་ད་ལྟའི་བར།།

འཕོ་འགྱུར་གནམ་ས་བསྒྱུར་བ་ཧར་གཏམ་མིན།།

རང་ཡུལ་ལྷ་ཡུལ་ལྟ་བུར་གྱུར་པ་ཡང་།།

རང་ཉིད་མིག་གིས་མཐོང་ལས་སྒྲོ་འདོགས་མིན།།

གོང་གི་སྲིད་ཇུས་ཉི་འོད་བཞིན་དུ་འཆར།།

མུན་པའི་ཡུལ་ན་རྟ་བདུན་དབང་པོ་གསལ།།

མཐའ་འཁོབ་ཡུལ་དེའི་རྣམ་པ་ཧ་ཅང་མཛེས།།

དབུས་མཐའ་མེད་པར་བདེ་སྐྱིད་འཚོ་བར་རོལ།།

(ལྷུག་རྩོམ་བསྐུར་སའི་ཡིག་སྒྲོམ། 2408416708@qq.com)