ཀ་ཁའི་མཆོད་དབྱངས། ——འབྲོག་པའི་སྣོད་བཅུད་ལ་བྲིས་པའོ།

ཀ༵་དག་དབྱིངས་ཀྱི་འཇའ་གུར་མཛེས་པའི་ལྡིང་ཁང་ན།།

ཀ༵་ལ་པིང་ཀའི་མགྲིན་དབྱངས་སྙན་མོ་ཟིལ་གནོན་པའི།།

ཀ༵་དག་གདངས་སྙན་རྒྱུད་མངས་ཐོགས་པའི་མཚོ་བྱུང་མས།།

ཀ༵་མེད་སེམས་ཀྱི་ཀྱོ་བ་བཀུགས་པས་ཕྱག་འཚལ་ལོ།།

 

ཁ༵་བ་འབྲོག་པའི་འཚོ་བ་སྐྱིད་པོ་བདེ་དགའ་ཅན།།

ཁ༵་རྗེ་དབང་ཐང་ཡར་ངོའི་ཚེས་བཅུའི་དུང་ཟླ་འཕེལ།།

ཁ༵་བའི་ལྗོངས་ཀྱི་སྣོད་བཅུད་མཛེས་པའི་རེ་ཁཱ་དེ།།

ཁ༵་བ་འདྲ་བའི་ཤོག་དཀར་ལེབ་མོའི་རྒྱན་དུ་འགོད།།

 

ག༵་སར་མེད་པའི་གངས་རིས་བསྐོར་བའི་དག་ཞིང་གི།

ག༵་ཐག་བསླད་མེད་སྔོ་བསངས་བུ་མོའི་རང་མདངས་ལ།།

ག༵་ལེར་བསྐྱོམས་པའི་སྤྲིན་པ་དཀར་བོའི་ལྷན་པ་མེད།།

ག༵་དུས་བལྟས་ཀྱང་གཡའ་དག་མངའ་བས་ཀྱེ་མ་ཧོ།།

 

ང༵་རྒྱལ་མགོ་བོ་མཁའ་ལ་ཟུག་ནས་རྟག་བརྟན་འགྱིང་།།

ང༵་ཆེ་ང་བཙན་དོན་ལ་གནས་བའི་དཔའ་ཡོན་ཅན།།

ང༵་ར་བཙན་པོའི་གངས་རི་དཀར་བོའི་སོ་ཕྲེང་དེ།།

ང༵་ཡི་གོ་ལའི་གཙུག་ཏོར་མཛེས་པའི་ཅོན་པན་ཉིད།།

 

ཅ༵་རེ་ཉ་རེས་ལྡིང་ལ་རྩེན་པའི་ཕྱེ་ལེབ་དང་།།

ཅ༵་ཅོ་རང་སྒྲོག་གཡུ་སྦྲང་གཞོན་ནུའི་གར་གྱི་སྟེགས།།

ཅ༵་རེར་མེ་ཏོག་ཕྲ་རྒྱན་བཏབ་པའི་ནེའུ་གསིང་ཁྱོན།།

ཅ༵་གེར་གནས་བའི་འཆི་མེད་ལམ་དང་གཉིས་སུ་མེད།།

 

ཆ༵་ཡོད་གངས་ལས་བརྡོལ་བའི་ཡན་ལག་བརྒྱད་ལྡན་ཆུ།།

ཆ༵་མེད་བཞུད་པའི་གཞན་ཕན་མངའ་བའི་དཀའ་ཐུབ་པ།།

ཆ༵་ཆོར་རྒྱུ་ཡང་སེམས་ཅན་སྐྱེ་དངོས་མ་ལུས་ལ།།

ཆ༵་ཚང་སྐོམ་གྱི་གདུང་བ་འཇོམས་པའི་བདུད་རྩི་མཆོག།

 

ཇ༵་དང་འོ་མ་དབྱར་གྱི་ཆུ་གཏེར་རྒྱས་ལ་འཁྲུལ།།

ཇ༵་ཐུད་མར་གསུམ་རི་བོ་ཞིག་གི་གཏོས་དང་མཉམ།།

ཇ༵་སོགས་ཟས་ཀྱི་འཕེལ་ཁ་སྐྱེན་པའི་རྟེན་འབྲེལ་ལ།།

ཇ༵་ཕུད་མཆོད་ཀྱི་བཀྲ་ཤིས་བརྟན་པའི་སྨོན་ལམ་སྤུར།།

 

ཉ༷་རྒྱས་ཟླ་བཞིན་ནོར་འཛིན་གོར་མའི་གདན་ཡངས་ན།།

ཉ༵་ར་མིན་པར་ལག་ཟུང་རྩལ་གྱིས་ལེགས་བཏབ་པའི།།

ཉ༷་ཞའི་མེས་པོས་བསྐྱངས་བའི་སྦྲ་ཁྱིམ་སྨུག་པོ་དེ།།

ཉ༷་ཉུང་བག་ཡངས་ངང་ནས་འགྱིང་བ་ཡི་གར་འོང་།།

 

ཏ༵་ག་རཾ་ཡི་དྲི་བསུང་ཕྱོགས་བཅུར་མཆེད་པ་ཡིས།།

ཏ༵་ཛིན་འགྲོ་བའི་དྲི་འཛིན་མ་ལུས་བཟི་བྱས་པས།།

ཏ༵་ཐཱ་ག་ཏའི་བསྟན་པའི་ཞིང་ཞེས་མིང་མཚུངས་པའི།།

ཏ༵་མ་བཱན་གྱི་གནས་མཆོག་ཨེ་མ་རྨད་དུ་བྱུང་།།

 

ཐ༵་གིར་སྦྲང་ཆར་སིལ་མས་ཁྲུས་བཟང་བགྱིས་པ་ཡི།།

ཐ༵་མདོག་རྡུལ་ཀུན་བྲལ་བའི་རི་ལུང་མཛེས་པོ་ལ།།

ཐ༵་བྲལ་མདངས་ལྡན་དབང་གཞུའི་རི་མོ་རབ་དཔྱངས་པས།།

ཐ༵་མའི་དུས་ཀྱི་མིག་དབང་འཛུམ་པའི་སུམ་རྩེན་གནས།།

 

ད༵་གོང་རང་བྱུང་འབྱུང་བཞིས་ལེགས་པར་བཏབ་པ་ཡི།།

ད༵་བར་ཚང་ཚིང་གཡུ་ལོ་ཐགས་སུ་བཀྲ་བ་འདི།།

ད༵་ལྟའི་རྫས་ཀྱི་ལྗོན་པས་འགྲན་པར་མ་ནུས་པའི།།

ད༵་ཆའི་འཇིག་རྟེན་བརྒྱན་པའི་སྒེག་ཆོས་གཅིག་པུ་ཉིད།།

 

ན༵་ཀྲའི་གྲོང་ཁྱེར་སྔོན་པོའི་མདངས་འཛིན་མཁའ་འོག་གི།

ན༵་བུན་ཀཻ་ལ་ཤ་རྩེར་བག་ཡངས་འཁྱུད་པ་ཡི།།

ན༵་རམ་རྫུབས་པོར་འཁྲུགས་པའི་བསིལ་ལྡན་གོ་ལའི་ཏོག།

ན༵་ཚོད་བགྲང་བྱ་སྟོང་གི་ཞིམ་ཁམས་ཡ་མེད་དོ།།

 

པ༵་སངས་མདངས་ལ་འཁུ་བའི་ལྷག་བསམ་མངའ་བ་དེ།།

པ༵་ཕ་ཨ་མ་བྲག་སྤྲེལ་གཉིས་ཀྱི་རིགས་འཕེལ་བའི།།

པ༵་ཅར་རྣམ་པར་མཛེས་བའི་འབྲོག་པའི་སྐྱེ་བོ་ཚོ།།

པ༵་རི་ཧཱ་སས་འཚོ་བ་རོལ་བ་བླ་ན་འཕགས།།

 

ཕ༵་བཟང་སྟག་ཤར་གཞོན་ནུས་དགའ་འབོད་འཐེན་དང་ལྷན།།

ཕ༵་རྟ་བཟང་བོའི་བང་རྩལ་རླུང་ལ་བསྡེབས་ནས་ནི།།

ཕ༵་ནོར་ཕྱུགས་ཀུན་འཚོ་བའི་ནོར་འཛིན་ཡངས་པོ་རུ།།

ཕ༵་གིའི་མི་ཚོགས་དགྱེས་པ་ཆེན་མོའི་ལྟད་མོར་བསྒྱུར།།

 

བ༵་ཕྱུགས་ནོར་གྱི་མི་ལྟུང་ཕྲེང་བའི་དགའ་ཚལ་དེ།།

བ༵་མཛོ་གཡག་གི་རྩིད་ལས་འཁྲུངས་པབའི་སྦྲ་མཐར་བཀྲམ།།

བ༵་ལས་བྱུང་བའི་འོ་མ་རྒྱ་མཚོ་རབ་བྲུག་པས།།

བ༵་འཇོ་མཁན་གྱི་འཛུམ་མདངས་པདྨའི་འདབ་བརྒྱ་གྲོལ།།

 

མ༵་ཀུ་ར་འདྲའི་ལྷ་ལམ་ཡངས་པོའི་ཕང་བ་རུ།།

མ༵་བྲེལ་བག་ཡངས་རྩེན་པའི་སྤྲིན་གྱི་ཚོམ་བུ་བཞིན།།

མ༵་མིག་སྤང་ལྗོངས་སྔོན་མོའི་གདན་ཡངས་བཀྲ་བ་རུ།།

མ༵་མོ་གཡང་དཀར་ལུག་གི་ཁྱུ་ཚོགས་བག་ཡངས་འཁྱིལ།།

 

ཙ༵་རི་གནས་མཆོག་འདྲ་བའི་རྫ་སྟོད་གོང་མ་ནས།།

ཙ༵་གོ་ར་ཡི་མགྲིན་དབྱངས་སྙན་མོ་རབ་འཐོར་བས།།

ཙ༵་ཏ་ཀ་སོགས་འདབ་ཆགས་ཚོགས་ཀྱིས་རྩེད་འཇོའི་ངང་།།

ཙ༵་གེ་ཙིག་གེའི་ལྗོན་ཤིང་སྤོ་ན་སྤྲོ་བས་བཟི།།

 

ཚ༵་གྲང་སྙོམས་ལ་དུས་བཞིའི་རེས་མོས་མངོན་པར་གསལ།།

ཚ༵་ཟེར་ཅན་གྱི་གཟི་འོད་ངར་མོ་མཆེད་ཀྱང་རུང་།།

ཚ༵་ཟེར་འཇོམས་ཀྱི་ཡོལ་བ་སྲབ་མོས་ལྷོད་བཏེགས་དུས།།

ཚ༵་ཁུལ་ཕེབས་པའི་ཁྲུང་ཁྲུང་ཁྱུ་ཡི་ལྡིང་སྐོར་མཛེས།།

 

ཛ༵་ཡའི་བསྟན་པ་ལེགས་པར་སྐྱོང་མཁས་བསྟན་འཛིན་ཀུན།།

ཛ༵་དྲག་མ་གོས་ཕར་ཕྱིན་དྲུག་གིས་ཞི་བར་བཏུལ།།

ཛ༵་ཡའི་གསུང་རབ་བརྩེགས་པའི་གསེར་གྱི་འདུ་ཁང་དེ།།

ཛ༵་རེ་མེད་པའི་དབེན་རིའི་རྐེད་ན་གསལ་ལེམ་བཀྲ།

 

ཝ༵་ཞྭ་གྱོན་པའི་ལོ་རྒྱུས་བྱུང་གནས་བྱང་རྒྱུད་དེར།།

ཝ༵་ལུང་ཡུལ་འདྲའི་རྫ་རི་ཆེན་པོའི་རྩེ་མོ་རུ།།

ཝ༵་ལྟར་འཁྱུག་པའི་འདབ་ཆགས་ཚོཊ་ཀྱི་རྩེད་འཇོ་མཛེས།།

ཝ༵་ལེར་སྣང་བའི་མཛེས་པ་སྟོང་གི་འདབ་ཆགས་གླིང་།།

 

ཞྭ༵་མོ་རྩེ་རྣོ་ཕྱིང་ཞྭ་གྱོན་པའི་ཆར་བཞའ་དང་།།

ཞྭ༵་མོ་ཚེ་རིང་རྒྱན་ལ་སྤྲས་བའི་སྤྲོ་སྣང་སོགས།།

ཞྭ༵་མོ་མི་གཅིག་དུས་བཞི་འབྱེད་པའི་འབྲོག་པའི་ཐང་།།

ཞ༵་ཞི་མང་པོ་རྩེད་ལ་གཡེང་བའི་རྩེ་ར་གླིང་།།

 

ཟ༵་མ་དཀར་གསུམ་བཅུད་ཀྱིས་ལུས་ཟུངས་བསྐྱེད་པ་ལས།།

ཟ༵་བས་མངར་གསུམ་བྲོ་བ་ལྷན་སྐྱེས་མངའ་བ་ཡི།།

ཟ༵་མ་མཆོག་གྱུར་འབྲོག་པའི་ཕ་སའི་སེམས་ཅན་ཀུན།།

ཟ༵་མའི་དྲི་བསུང་ཕྱོགས་བཅུར་འཕྲོས་པས་ལྟོ་བ་འགྲངས།།

 

འ༵་ལེ་འོལ་ལེའི་སེམས་ཀྱི་སྤྲོ་བསང་བྱེད་སའི་མཆོག།

འ༵་འུར་སྟོངས་ལ་བག་ཡངས་རྣམ་པར་འཕེལ་བ་ཡི།།

འ༵་ཚེ་འལ་ལ་དུས་བཞི་བརྗེས་པའི་ཁྱད་མཚར་སའི།།

འ༵་འུར་ཞི་ལ་ཞི་བའི་བཀྲ་ཤིས་སྨོན་ལམ་བརྟན།།

 

ཡ༵་ཐོག་མེས་པོ་གོང་མའི་སེམས་ཀྱིས་ཉར་བ་ཡི།།

ཡ༵་གི་འབྲོག་པའི་སྣོད་ཀྱི་བཀོད་པ་རྣམ་པར་མཛེས།།

ཡ༵་རབས་དེང་གི་རྒྱུད་འཛིན་དམ་པས་ལེགས་པར་གཅེས།།

ཡ༵་མེད་སྤོབས་པས་ལྷོད་ཡངས་མ་བྱེད་སྐྱོངས་བར་གྱིས།།

 

ར༵་བ་གངས་རིའི་མུ་ཁྱུད་མཛེས་པའི་བསིལ་ལྗོངས་ཀྱི།།

ར༵་བ་གངས་རིའི་དབུ་འཕང་སྔོན་པོའི་མཁའ་ལ་འཕེལ།།

ར༵་བ་གངས་རིའི་གཟི་འོད་དཀར་བོ་ཕྱོགས་བཅུར་ཁྱབ།།

ར༵་བ་གངས་རིའི་སྣོད་བཅུད་རྒྱས་པའི་སྨོན་ལམ་སྤུར།།

ལ༵་ཐུར་ནགས་ལ་འདབ་ཆགས་འཁོར་བས་སྙན་པ་སྒྲོག།

ལ༵་ལུང་འདི་ཡི་ནང་བཅུད་སེམས་ཅན་སྤྲོ་གྱུར་ཅིག།

ལ༵་ལུང་འདི་ཡི་ཕྱི་སྣོད་འཇིག་རྟེན་མཛེས་གྱུར་ཅིག།།

ལ༵་ལུང་འབྲོག་ཐང་ཕྱུགས་ཀྱིས་ཕྱུར་བུར་གཏམས་པར་སྨོན།།

 

 

ཤ༵་ཁྲག་གདོས་བཅས་ལུས་ཀྱི་ལྟེ་ཁྲག་གཅིག་མཚུངས་པའི།།

ཤ༵་རུས་གདོང་རྒྱུད་གཅིག་ལས་མཆེད་པའི་ལས་མཐུན་ཅན།།

ཤ༵་གཟན་སྨུག་པོ་རང་ཡུལ་ལས་ལ་འབད་པ་ཅན།། 

ཤ༵་རུས་གཅིག་པུ་འཚོ་སའི་ཕ་ས་འཕེལ་གྱུར་ཅིག།

 

ས༵་བཟང་གོ་ལའི་གཙུག་ཏོར་གངས་རིའི་མུ་ཁྱུད་ཅན།།

ས༵་ཆེན་སྐྱེ་དགུ་ཀུན་གྱིས་ཡིད་དབང་འཛིན་པ་ཡི།།

ས༵་ཡི་གོ་ལ་རབ་ཏུ་འཕགས་པའི་བོད་ཡུལ་འདིའི།།

ས༵་བཟང་དགེ་བཅུའི་མཚན་མ་རྟག་ཏུ་འབར་གྱུར་ཅིག།

ཧ༵་ཅང་སྤྲོ་སྣང་སྦྱིན་པའི་འབྲོག་པའི་ཐང་ཆེན་ནས།།

ཧ༵་ལམ་མིག་གིས་ཟིན་པའི་མཛེས་པ་མ་ལུས་པ།།

ཧ༵་ཧ་ཧོ་ཧོའི་འདུ་འཛི་རྒོད་པའི་བར་གླགས་ནས།།

ཧ༵་རེ་ཧུ་རེས་ཀ་ཁ་ཕྲེང་བའི་བསྟར་ལ་བརྒྱུས།།

 

ཨ༵་སོགས་སུམ་ཅུ་ཐམ་པའི་བསྟོད་པའི་སྒྲ་དབྱངས་ལ།།

ཨ༵་ལ་ལ་མོ་གཉིས་མེད་གདངས་ཉམས་མེད་མོད་ཀྱང་།།

ཨ༵་ཧ་ཉ་ཉོག་འཛེར་སྒྲའི་དྲི་མས་བསླད་འདྲེས་ན།།

ཨ༵་རོགས་ཀློག་པོའི་རྣམ་དཔྱོད་ཆར་གྱིས་བྱབས་ཁྲུས་མཛོད།།