འཇོན་ཐང་ཅན་ལ་མགོ་གནོན་མ་བྱེད།

བུ་སྲོག་གི་རི་མོ་ཅན་ཞིག་སྐྱེས་པ་བཟང་།།

མགོན་ཕ་ལོའི་སྙིང་གི་བསམ་དོན་འགྲུབ་ནས་བྱུང་།།

དྲིན་མ་ལོའི་རེ་བའི་འོ་ཆང་འཁོལ་ནས་བྱུང་།།

མི་ཁོ་རང་འཚར་བའི་འཚར་གོ་ཆོད་ནས་བྱུང་།།

 

དོན་སྙིང་པོ་ཅན་གྱི་ལོ་རྒྱུས་བལྟས་ནས་བྱུང་།།

གཏམ་སྐད་ཆའི་གཟི་བྱིན་ཡག་པོ་བཀྲ་ནས་བྱུང་།།

ཡིན་ངེས་པའི་གནད་ལུགས་སྙིང་ལ་བཅངས་ནས་བྱུང་།།

བུ་འཁྲུངས་པའི་དཀའ་ངལ་མྱོང་ཡང་ཆོག་ས་གདའ།།

 

ཡིད་དད་པའི་མེ་ལོང་དཀར་གཙང་དྲི་མེད་ངོས།།

ལས་བཟང་པོའི་བག་ཆགས་སད་པའི་སྨོན་ལམ་གྱིས།།

དོན་དགེ་བའི་ལོ་ཏོག་གྲ་ཁ་ཡག་པོ་སྐྱེས།།

བཀྲ་ཤིས་པའི་དགེ་མཚན་དཔལ་དུ་འབར་འདི་རྨད།།

 

བུ་འཇོན་ཐང་ཅན་གྱི་མགོ་བོ་གནམ་ལ་བཏེགས།།

ལས་དགེ་བའི་འཛུམ་དཀར་རིང་དུ་རྩེན་གྱུར་ཚེ།།

ཡིད་མ་རངས་བློ་ལ་མུན་པའི་གདོན་ཆར་འབེབས།།

མིག་རབ་རིབ་ཅན་ལ་འོ་ཕོར་གད་སྙིགས་ཁེངས།།

 

མགོ་མཐོན་པོར་དམོད་ཚིག་དུག་གི་མདའ་མོ་འཕེན།།

མིག་མ་བདེ་ལོག་པའི་སྟངས་ཀྱི་འགྱུ་བག་རྒོད།།

དོན་ཡང་དག་ཡོད་པ་འགལ་བའི་བུ་མོས་འཛིན།།

ལུགས་ཚུལ་མཐུན་བྱུང་བ་སྒྲོག་བྱང་ངན་པས་བསླད།།

 

མི་འཕར་བྱུང་བསམས་ནས་མགོ་བོར་ཐལ་ལྕག་བཞུར།།

ལས་བསྒྲུབས་བྱུང་དྲན་ནས་གནད་ལུགས་རྡོག་རོལ་གཏོང་།།

ཁ་འགུལ་བྱུང་ཟེར་ནས་ངག་ཚིག་རྐེད་གཅོད་བྱེད།།

ད་གཉའ་གནོན་མ་བྱེད་རང་རིགས་ཕན་སེམས་ཆོངས།།

 

ལས་བཟང་པོ་སྒྲུབ་མཁན་གཉའ་ནས་མནན་གྱུར་ན།།

རྗེས་ཕྱིས་འབྱུང་ལྷག་བསམ་ཅན་གྱི་མི་རིགས་དཀོན།།

དེར་བསམས་ནས་གཉའ་གནོན་མ་བྱེད་རེ་འབོད་ཡིན།།

ཡང་བསམས་ནས་རྒྱབ་སྐྱོར་བཙན་པོའི་རི་མོ་བྲིས།།

 

ལས་དེ་ལྟར་བསྒྲུབས་ན་བོད་ཀྱི་འཕེལ་ཁ་ཡོད།།

དོན་བཟང་པོའི་ཉིང་ཞུན་འབྱུང་བའི་རྒྱུ་རྐྱེན་ཚོགས།།

ཤེས་ཡོན་ཏན་གངས་ཆུ་རྡོལ་བའི་ཉེར་བསྡོགས་ཚང་།།

ཁྱོད་འུ་ཅག་དགའ་བས་མཉམ་དུ་ལས་དོན་བསྒྲུབ།།