ལི་ཐང་ནས་ཚངས་དབྱངས་རྒྱ་མཚོ་དྲན་པ།

ཁྱུང་ཆེན་ལ་སྒུག་པའི་ལོ་ཟླ་དེ་དགུན་དུས་ཤིག་ཡིན།

གྲང་ཤུར་ཤུར་གྱི་དགུན་དུས་ཤིག་ཡིན།

དགུན་དུས་དེར་ཁྱོད་ཀྱིས་ཡང་ཡང་ལི་ཐང་དྲན་མྱོང་སྐད།

ཁྱོད་ཀྱིས་གློ་བུར་གློ་བུར་དུ་ལི་ཐང་དྲན་པ་བཞིན།

དེ་རིང་ངས་ཀྱང་གློ་བུར་གློ་བུར་དུ་ལི་ཐང་ནས་ཁྱོད་རང་དྲན་ཡོང་།

ཚངས་དབྱངས་རྒྱ་མཚོ།

ཁྲུང་ཁྲུང་དྲུག་གི་གཤོག་སྟེང་ན་འཚེར་བའི་གངས་ཀྱི་ན་རོ།

ལི་ཐང་ནས་ཁྱོད་རང་དྲན་པ་ནི།

ནང་སེམས་ཀྱི་མེ་ལོང་སྟོང་ཚུལ་གཞན་ཞིག་རེད།

མ་རེད།   ཁྱོད་རང་གཞན་ཏུ་ཕེབས་མི་འདུག

ད་དུང་ལི་ཐང་ན་བཞུགས་འདུག

དུས་ཀྱི་གཙང་བོ་རྒྱང་དུ་བྱེར་ནའང་།

ཁྱོད་རང་དངོས་གནས་ད་དུང་ལི་ཐང་ན་བཞུགས་འདུག

དོ་ནུབ་ཁྱོད་རང་སྐར་ཚོགས་བཞིན།

ཟླ་བ་བཞིན།     མེ་ལྕེ་བཞིན།

ངའི་སྙན་ངག་གི་འཇིག་རྟེན་ཏུ་ཕེབས་བྱུང་།

གཞས་གཏོང་བཞིན་ཕེབས་བྱུང་།

ཁྱོད་ཀྱི་ཕེབས་པ་ཡི་གར་འོང་བ་ལ།

ངས་སྨུག་སྤྲིན་གྱི་གསེང་དུ་ཁྲུང་ཁྲུང་ཞིག་མཐོང་བྱུང་།

ཁྲུང་ཁྲུང་དེ་ཁྱོད་རང་ཡིན་པར་རྟོག་བཟོ་ཡང་ཡང་བྱས།

སྐབས་ལན་རེར་ཁྲུང་ཁྲུང་དེས་ང་ལ་ལི་ཐང་གི་ངོ་མཚར་གཏམ་རྒྱུད་བཤད་ཡོང་།